რა არის კოპლავიქსი და როდის გამოიყენება მედიკამენტი?

როგორც კოპლავიქსის ანოტაცია გვეუბნება, ეს პრეპარატი ათეროთრომბოზული დაავადებების პროფილაქტიკისათვის გამოიყენება. თუმცა, რას ნიშნავს თავად ათეროთრომბოზული დაავადებები?

რა საფრთხეს გვიქმნის ათეროთრომბოზული დაავადებები? 

ეს არის მდგომარეობა, რომელიც გამოწვეულია ათეროსკლეროზის (ცხიმოვანი დეპოზიტების, ან ე.წ. დაფების დაგროვება არტერიებში) და თრომბოზის (სისხლის კოლტების წარმოქმნა) კომბინაციით. როდესაც ათეროსკლეროზი ავიწროებს არტერიებს, ის ზღუდავს სისხლის მიმოქცევას და თუ „დაფა“ გასკდება, შეიძლება გამოიწვიოს თრომბის წარმოქმნა. 

ამ შედედებას შეუძლია მთლიანად დაბლოკოს სისხლის მიმოქცევა, რაც იწვევს მძიმე გართულებებს. საერთო ათეროთრომბოზულ დაავადებებს მიეკუთვნება გულის შეტევა (მიოკარდიუმის ინფარქტი), ინსულტი და პერიფერიული არტერიების დაავადება (PAD). ეს სამედიცინო ჩვენებები იწვევს მრავალი სახის უნარის შეზღუდვასა და სიკვდილსაც კი, მთელ მსოფლიოში.

ათეროსკლეროზი დროთა განმავლობაში ვითარდება ისეთი ფაქტორების გამო, როგორიცაა ქოლესტერინის მაღალი დონე, მაღალი წნევა, მოწევა, დიაბეტი და ცხოვრების უმოძრაო წესი. როდესაც არტერიები იკეტება ცხიმოვანი დეპოზიტებით, იზრდება „დაფის ​“გახეთქვის რისკიც, რამაც შეიძლება გამოიწვიოს უეცარი და სისხლის საშიში ​შედედება. როდესაც ეს თრომბები ბლოკავს სისხლის ნაკადს სასიცოცხლო ორგანოებში, ამან შეიძლება გამოიწვიოს საშიში მოვლენები, როგორიცაა გულის შეტევა ან ინსულტი.

ათეროთრომბოზული დაავადებების პროფილაქტიკა და მართვა

ათეროთრომბოზული დაავადებების პროფილაქტიკა და მართვა მოიცავს ძირითადი რისკ-ფაქტორების გათვალისწინებასა და მათ მაქსიმალურ განეიტრალებას. ცხოვრების წესის ცვლილებები, როგორიცაა ჯანსაღი დიეტისა თუ რეგულარული ვარჯიშის დაწყება, მოწევისთვის თავის დანებება და ისეთი პირობების მართვა, როგორიცაა ჰიპერტენზია და დიაბეტი, გადამწყვეტია რისკის შესამცირებლად. 

მედიკამენტები, როგორიცაა სისხლის გამათხელებლები, ქოლესტერინის შემამცირებელი საშუალებები და ანტიჰიპერტენზიული საშუალებები, ასევე შეიძლება დაინიშნოს თრომბის წარმოქმნის შანსების შესამცირებლად და არტერიებში ნადების დაგროვების თავიდან ასაცილებლად. როგორც უკვე ვახსენეთ, ამ დაავადებების პროფილაქტიკისთვის ერთ-ერთი მედიკამენტია კოპლავიქსიც.

როგორია კოპლავიქსის დოზირება? 

კოპლავიქსი პსპ-ს სააფთიაქო ქსელში შეგიძლიათ შეიძინოთ. ეს პრეპარატი, როგორც წესი, ორდოზიანი დასახელებით გვხვდება — მაგალითად კოპლავიქსი 75/100 მგ. ასეთი წესით დაწერილი დოზირება ნიშნავს, რომ მედიკამენტი ორ აქტიურ ნივთიერებას შეიცავს და 75 და 100, ამ შემთხვევაში, ნივთიერებების დოზაა თითოეულ ტაბლეტში. თუმცა, ხშირად მას „კოპლავიქსი 75-ის” სახელწოდებით შეხვდებით.

რაც შეეხება შედგენილობას, კოპლავიქსში 75 მგ კლოპიდოგრელი და 100 მგ აცეტილსალიცილის მჟავა შედის. 

მედიკამენტის ღირებულება კი, შეიძლება, ცვალებადი იყოს. კოპლავიქსი 75მგ-ის ფასზე გავლენას ახდენს მრავალი ფაქტორი — რომელ ქვეყანაშია ის წარმოებული, როგორია ჩვენს ქვეყანაში არსებული ფინანსური და ეკონომიკური მდგომარეობა, ლარის სიმყარე, ექსპორტისა თუ იმპორტის გადასახადების ცვლილება და ა.შ. ასევე, კოპლავიქსის ფასი, შეიძლება, შეიცვალოს სააფთიაქო ქსელში ფასდაკლებების დროსაც.

ერთ-ერთი გავრცელებული მითია, რომ რომელიმე კონკრეტულ ქვეყანაში დამზადებული მედიკამენტი უკეთესია ხოლმე. მაგალითად, მოისმენთ ისეთ ინფორმაციასაც, თითქოს კოპლავიქსი თურქული წარმოებისაა საუკეთესო. ეს კი არასწორია. მაგალითად, პსპ-ს სააფთიაქო ქსელში რეალიზებული ყველა პროდუქტი საერთაშორისო სტანდარტების დაცვით იწარმოება უცხოეთში და ამ სტანდარტების დაცვით ხდება მათი იმპორტი ჩვენს ქვეყანაში. 

კოპლავიქსის შედგენილობა და სიფრთხილის ზომები

როგორც ერთხელ უკვე ვახსენეთ, კოპლავიქსის შედგენილობაში ორი აქტიური ნივთიერება გვხვდება — 75 მგ კლოპიდოგრელი და 100 მგ აცეტილსალიცილის მჟავა. 

გარდა ამისა, შემოგარსული თითოეული ტაბლეტი შეიძლება შეიცავდეს ჰიდროგენიზებულ აბუსალათინის ზეთს, დაბალშენაცვლებად ჰიდროქსიპროპილცელულოზას, მანიტოლი E421-ს, მიკროკრისტალურ ცელულოზას, პოლიეთილენგლიკოლ 6000-ს, სტეარინის მჟავას, კოლოიდურ უწყლო სილიციუმს. 

ხოლო ტაბლეტის გარსის შემცველობაში შედის: რკინის ოქსიდი E172, ჰიპრომელოზა, ლაქტოზა, ტიტანის დიოქსიდი და ტრიაცეტინი. ყველა ტაბლეტი დაფარულია კარნაუბის ცვილით.

მიუხედავად იმისა, რომ შემცველობა ხშირად ქიმიური ტერმინების რახარუხადაც შეიძლება მოგვეჩვენოს, მისი ცოდნა გამოყენებამდე აუცილებელია — პრეპარატები შეიძლება შეიცავდეს ისეთ ნივთიერებებს, რაზეც ალერგიული რეაქცია გვაქვს. ამის შესახებ კი ექიმი გაფრთხილებული უნდა იყოს, სანამ წამალს დაგვინიშნავს. 

მაგალითად, კოპლავიქსი არ გამოიყენება პაციენტებში, ვისაც აქვთ გალაქტოზის აუტანლობის საკმაოდ იშვიათი პრობლემები, ლაპის ლაქტაზის დეფიციტი ან გლუკოზა-გალაქტოზის მალაბსორბცია.  

ასევე, უნდა ვიცოდეთ, რომ პრეპარატი შეიცავს ჰიდროგენიზირებულ აბუსალათინის ზეთს – ეს კი ნიშნავს, რომ მან, შესაძლოა, კუჭის მოქმედების ცვლილება და დიარეა გამოიწვიოს.