ანასპანი - სპაზმის საწინააღმდეგო ეფექტიანი საშუალება

ანასპანი სპაზმოლიტიკური მოქმედების მქონე პრეპარატია, რომელიც საჭმლის მომნელებელი სისტემისა და ნაღვლის სადინარების სპაზმური მდგომარეობებისთვისაა განკუთვნილი, ასევე შარდ-სასქესო გზების დაავადებათა სამკურნალოდ. იგი ხელს უწყობს კუნთოვანი სპაზმების მოხსნას და ტკივილის შემსუბუქებას, რაც განსაკუთრებით ეფექტიანია თირკმლისა და ნაღვლის კოლიკის, ნაწლავის სპაზმების, ქოლეცისტიტის, პილოროსპაზმისა და სანაღვლე გზების სპაზმური დისკინეზიის დროს.

პრეპარატის მიღება შეიძლება რეკომენდებული იყოს იმ შემთხვევაშიც, როდესაც კუჭისა და თორმეტგოჯა ნაწლავის მუშაობაში შეინიშნება სპაზმური დარღვევები. ანასპანის აქტიური ნივთიერებები კუნთოვანი ქსოვილების მოდუნებას უზრუნველყოფს, რაც სისხლის მიმოქცევას აუმჯობესებს და დაზიანებული სისტემების ფუნქციას აღადგენს.

პრეპარატი ანასპანი 10 მგ. ტაბლეტების სახითაა წარმოდგენილი და ექიმის დანიშნულებით გაიცემა. მისი ვარგისიანობის ვადა 3 წელს შეადგენს. ამასთან, აუცილებელია ის 10-25°C ტემპერატურაზე, მშრალ და სინათლისგან დაცულ ადგილზე შეინახოთ. უსაფრთხოების მიზნით, ის ბავშვებისთვის მიუწვდომელ ადგილას უნდა იყოს მოთავსებული.

როგორია ანასპანის მიღების წესი და მოქმედება

ანასპანის ტაბლეტი აქტიურ კომპონენტ ჰიოსცინის N-ბუთილბრომიდს შეიცავს, რომლის რაოდენობაც 10 მგ-ს შეადგენს. ეს ნივთიერება პრეპარატის მთავარ სპაზმოლიზურ მოქმედებას განაპირობებს.  

ჰიოსცინის ბუთილბრომიდი მ-ქოლინორეცეპტორების ბლოკატორების ჯგუფს მიეკუთვნება. მისი მთავარი ფუნქციაა შინაგანი ორგანოების, კერძოდ, კუჭ-ნაწლავის ტრაქტის, ნაღვლის სადინარებისა და შარდ-სასქესო გზების გლუვ კუნთებზე სპაზმების მოხსნა. გარდა ამისა, პრეპარატი საჭმლის მომნელებელი სისტემის ჯირკვლების სეკრეციას ამცირებს, რაც მას სპაზმური დარღვევების სამკურნალოდ ეფექტიანს ხდის.  

ჰიოსცინის ბუთილბრომიდი ჰემატოენცეფალურ ბარიერს არ გადის, რაც იმას ნიშნავს, რომ მას ცენტრალურ ნერვულ სისტემაზე ზემოქმედება არ აქვს და ანტიქოლინერგული გვერდითი მოვლენები ამ მხრივ არ აღინიშნება.  

წამალი ანასპანი ინიშნება როგორც მოზრდილებში, ისე ბავშვებში და მისი მიღების სქემა ექიმის რეკომენდაციით განისაზღვრება:  

• მოზრდილებში: 1-2 ტაბლეტი დღეში 4-ჯერ.  
• ბავშვებში (6 წლის ასაკის ზემოთ): 1 ტაბლეტი დღეში 3-ჯერ.  

მკურნალობის ხანგრძლივობა პაციენტის მდგომარეობისა და ექიმის გადაწყვეტილების მიხედვით ინდივიდუალურად განისაზღვრება. 

მოსალოდნელი სიმპტომები დოზის გადაჭარბებისას 

ანასპანის ჭარბი დოზირების შემთხვევები არ არის აღწერილი, ამიტომ სიმპტომები და შესაბამისი რეკომენდაციები, ძირითადად, თეორიული ხასიათისაა. პრეპარატის გადაჭარბებულ დოზაზე შეიძლება გამოვლინდეს რამდენიმე ნიშანი, მათ შორის შარდის შეკავება, პირის სიმშრალე, ჰიპერემია (სისხლის ნაკადის მომატება), ტაქიკარდია, კუჭ-ნაწლავის ტრაქტის მოტორიკის დარღვევა და მხედველობის დროებითი დარღვევები. 

ასეთ შემთხვევებში მკურნალობა იწყება კუჭის ამორეცხვით, რაც, ჩვეულებრივ, აქტივირებული ნახშირისა და 15%-იანი მაგნიუმის სულფატით კეთდება. ამას ქოლინომიმეტური საშუალებების გამოყენების ეტაპი მოჰყვება. თუ გლაუკომა ვლინდება, ადგილობრივად გამოსაყენებლად პილოკარპინი ინიშნება. შემთხვევების მიხედვით, კუნთში ან ვენაში საინიექციოდ  0.5-2.5 მგ. ნეოსტიგმინი ინიშნება. გარდა ამისა, სიმპტომური თერაპია შეიძლება მოიცავდეს შარდის ბუშტის კათეტერიზაციას, რათა შარდის შეკავება განიმუხტოს.  

ანასპანი ტრიციკლური ანტიდეპრესანტების, ანტიჰისტამინური პრეპარატების, ქინიდინის, ამანტადინისა და დიზოპირამიდის ანტიქოლინერგულ მოქმედებას აძლიერებს. დოფამინის ანტაგონისტები, რომლებიც ანასპანთანაა კომბინირებული, კუჭ-ნაწლავის ტრაქტზე ამ ორივე პრეპარატის მოქმედების ეფექტიანობას უშლის ხელს. ასევე, შეიძლება გაძლიერდეს ტაქიკარდია, რომელიც ბეტა-ადრენერგული საშუალებებითაა გამოწვეული.

როგორი უკუჩვენებები და გვერდითი მოვლენები ახასიათებს ანასპანს

პრეპარატის გამოყენებისას შესაძლოა, გვერდითი მოვლენები განვითარდეს. ყველაზე გავრცელებულია პირის და/ან კანის სიმშრალე, ტაქიკარდია, ძილიანობა და აკომოდაციის დარღვევა. ასევე შეიძლება გამოიხატოს შარდის შეკავება, ძალიან იშვიათად კი — კანზე გამონაყარი ან სუნთქვის გაძნელება. 

პრეპარატის გამოყენება უკუნაჩვენებია, თუ არსებობს ჰიოსცინის ბუთილბრომიდის ან მედიკამენტის სხვა კომპონენტების მიმართ მომატებული მგრძნობელობა. სხვა უკუჩვენებებს შორისაა დახურულკუთხოვანი გლაუკომა, წინამდებარე ჯირკვლის ადენომა, პილორუსის სტენოზი, ტაქიარითმია, მეგაკოლონი, ნაწლავების მექანიკური გაუვალობა, ფილტვების მწვავე უკმარისობა და თავის ტვინის სისხლძარღვების გამოხატული ათეროსკლეროზი.

პრეპარატი განსაკუთრებული სიფრთხილით უნდა გამოიყენოთ ნაწლავთა გაუვალობის, საშარდე გზების ობსტრუქციის (შედარებით წინამდებარე ჯირკვლის კეთილთვისებიანი ჰიპერპლაზიის შემთხვევაში), ასევე ტაქიარითმიის (მათ შორის მოციმციმე არითმია) არსებობისას. ორსულობის პერიოდში პრეპარატის უარყოფითი მოქმედების შესახებ კონკრეტული ინფორმაცია არ არსებობს, თუმცა პირველ ტრიმესტრში მისი გამოყენებისას სიფრთხილეა საჭირო. ლაქტაციისას ანასპანის უსაფრთხოების შესახებ მონაცემები არ მოგვეპოვება და ახალშობილებში არასასურველი ეფექტების შემთხვევებიც არაა აღწერილი.