კანქვეშა სისხლჩაქცევები

სარჩევი:

რა არის კანქვეშა სისხლჩაქცევები? 

კანქვეშა სისხლჩაქცევის ტიპები 

ვის შეიძლება განუვითარდეს კანქვეშა სისხლჩაქცევა? 

რა იწვევს კანქვეშა სისხლჩაქცევას? 

კანქვეშა სისხლჩაქცევების სიმპტომები

როგორ ხდება კანქვეშა სისხლჩაქცევის დიაგნოსტიკა? 

კანქვეშა სისხლჩაქცევების მკურნალობა

კანქვეშა სისხლჩაქცევები ვითარდება მაშინ, როდესაც წვრილი სისხლძარღვები სკდება კანის ზედაპირის ქვეშ. გასკდომის შემდგომ სისხლძარღვები გამოიყურება, როგორც პატარა წითელი წერტილები. ან შეიძლება უფრო დიდი მეწამული, ლურჯი ან შავი ლაქების ფორმა მიიღონ. ჩვეულებრივ, კანქვეშა სისხლჩაქცევა უმნიშვნელოა და დაახლოებით ორ კვირაში გადის.

რა არის კანქვეშა სისხლჩაქცევები? 

როგორც აღვნიშნეთ, კანქვეშა სისხლჩაქცევა ხდება მაშინ, როდესაც ერთ-ერთი სისხლძარღვი სკდება და ჟონავს მიმდებარე ქსოვილში. ადამიანის სისხლძარღვი არის მილი, რომელიც გადააადგილებს სისხლს მთელ სხეულში. მიუხედავად იმისა, რომ კანქვეშა სისხლჩაქცევა შეიძლება სერიოზულად ჟღერდეს, ჩვეულებრივ ის არ იწვევს მძიმე სიმპტომებს. ის ხშირად იწვევს სისხლნაჟღენთს, რომელიც რამდენიმე დღეში ან კვირაში განიკურნება.

კანქვეშა სისხლჩაქცევის ტიპები 

სისხლნაჟღენთი კანქვეშა სისხლჩაქცევის ყველაზე გავრცელებული ტიპია. ისინი ჩვეულებრივ წითელი, ლურჯი, შავი ან მეწამული ლაქების სახით ჩნდება რაიმე ტრავმის შემდეგ. სისხლნაჟღენთი შეიძლება გამოვლინდეს რამდენიმე განსხვავებული გზით:

1. პეტექია. პეტექიები ვითარდება მაშინ, როდესაც მხოლოდ რამდენიმე პატარა სისხლძარღვი სკდება. ისინი გამოიყურება როგორც პატარა წითელი წერტილები და 2 მილიმეტრზე ნაკლები ზომისაა.
2. პურპურა. პურპურა შედარებით ბევრი პატარა სისხლძარღვის ერთდროულად გასკდომის შემდეგ ჩნდება. გამოიყურება როგორც მოწითალო-მეწამული ლაქა. პურპურას ლაქები დაახლოებით 4 მმ-დან 2.54 სანტიმეტრამდეა. 
3. ეკქიმოზი ხდება მაშინ, როდესაც მრავალი ახლო განლაგებული სისხლძარღვი ერთდროულად სკდება, რაც იწვევს სისხლის დაგროვებას კანის ზედაპირის ქვეშ. ეკქიმოზი გამოიყურება როგორც სისხლნაჟღენთი, მაგრამ ის ყოველთვის არ არის დაკავშირებული ტრავმასთან.
4. ჰემატომები ხდება მაშინ, როდესაც უფრო დიდი სისხლძარღვები სკდება და იწვევს სისხლის დაგროვებას. ჰემატომების უმეტესობა უმნიშვნელოა. მაგრამ თუ ისინი ვითარდება დიდ ორგანოებში ან სხეულის ღრუებში, შეიძლება იყოს მძიმე და სიცოცხლისთვის საშიში.

ვის შეიძლება განუვითარდეს კანქვეშა სისხლჩაქცევა? 

ნებისმიერ ადამიანს შეიძლება ჰქონდეს სისხლნაჟღენთი ან უმნიშვნელო კანქვეშა სისხლჩაქცევა. ზოგიერთ ადამიანს უფრო მეტად აქვს მიდრეკილება სისხლნაჟღენთის წარმოქმნისკენ, მათ შორის ადამიანებს, რომლებიც:

• არიან 65 წელზე უფროსი ასაკის. 
• იღებენ სისხლის გამათხელებელ მედიკამენტებს (ანტიკოაგულანტები). 
• იღებენ დანამატებს, რომლებიც ზრდის სისხლდენის რისკს, როგორიცაა ვიტამინი E. 
• აქვთ უფრო ღია კანის ტონი. 
• თამაშობენ საკონტაქტო სპორტს. 

ზოგიერთ ადამიანს აქვს მდგომარეობები, რაც იწვევს უფრო მარტივ სისხლნაჟღენთებს ან სისხლდენას, როგორიცაა:

• ჰემოფილია. 
• ლეიკემია. 
• ღვიძლის დაავადება.
• ლუპუსი. 
• მარფანის სინდრომი. 
• მენინგიტი. 
• თრობოციტების დარღვევები, მათ შორის თრომბოციტოპენია. 
• ვიტამინ K-ს დეფიციტი. 

რა განსხვავებაა კანქვეშა სისხლჩაქცევასა და კანის სიწითლეს შორის? 

კანქვეშა სისხლჩაქცევა შეიძლება გამოიყურებოდეს როგორც კანის მოწითალო ლაქა. თუ თქვენ გაქვთ კანქვეშა სისხლჩაქცევა, ეს ადგილი არ გახდება ღია ფერის როდესაც მას დააწვებით. საპირისპიროდ, ერითემა, კანის გამონაყარის ერთ-ერთი ტიპი, რომელიც იწვევს სიწითლეს, ფერმკრთალდება როდესაც დააწვებით დაზიანებულ ადგილს.

რა იწვევს კანქვეშა სისხლჩაქცევას? 

ტრავმა კანქვეშა სისხლჩაქცევების ყველაზე გავრცელებული მიზეზია. შეიძლება შეეჯახოთ საგანს, დავარდეთ ან დაგარტყათ სპორტის დროს.

კანქვეშა სისხლჩაქცევის სხვა მიზეზებია:

1. კანის დაძაბვა ტირილის, ხველის ან ღებინების დროს. 
2. ყავარჯნების გამოყენება
3. ცუდად მორგებული ფეხსაცმლის, ტანსაცმლის ან სათვალის ტარება. 

კანქვეშა სისხლჩაქცევების სიმპტომები

ზოგჯერ კანქვეშა სისხლჩაქცევის ერთადერთი სიმპტომია კანის ფერის ცვლილება. თქვენ შეიძლება გქონდეთ ლაქა, რომელიც ა წითელი, შავი, ლურჯი ან მეწამული ფერისაა.

სისხლნაჟღენთები შეიძლება ასევე იყოს:

• მტკივნეული. 
• შეშუპებული.
• მგრძნობიარე შეხებისას.

როგორ ხდება კანქვეშა სისხლჩაქცევის დიაგნოსტიკა? 

ექიმი დიაგნოზს დაზიანებული ადგილის ფიზიკური შემოწმებით ადგენს. მან შეიძლება გკითხოთ:

• როდის შეამჩნიეთ პირველად სიმპტომები. 
• გაქვთ თუ არა სხვა რაიმე სიმპტომები. 
• რა მედიკამენტებს იღებთ. 
• შეგიძლიათ თუ არა მიუთითოთ ან აღწეროთ ტრავმა, რომელმაც გამოიწვია სისხლნაჟღენთი. 
• გაქვთ თუ არა ოჯახური ისტორია მძიმე სისხლნაჟღენთების ან მდგომარეობების, რომლებიც იწვევენ სისხლნაჟღენთებს. 

თუ თქვენს ჯანდაცვის პროვაიდერს მიაჩნია, რომ შეიძლება გქონდეთ საფუძვლად არსებული მდგომარეობა, რომელიც იწვევს სისხლჩაქცევებს, მან შეიძლება დაგინიშნოთ ტესტები, როგორიცაა:

• სისხლის ანალიზი. 
• ძვლის ტვინის ბიოფსია. 
• შარდის ანალიზი. 
• ულტრაბგერითი, კომპიუტერული ტომოგრაფია (CT სკანი) ან მაგნიტურ-რეზონანსული ტომოგრაფია (MRI) (გამოსახულებითი კვლევის სახეები).

კანქვეშა სისხლჩაქცევების მკურნალობა

კანქვეშა სისხლჩაქცევების მკურნალობა, უმეტეს შემთხვევაში, სახლის პირობებშია შესაძლებელი. მცირე სისხლნაჟღენთებისთვის, თქვენ შეგიძლიათ:

1. დაადოთ ყინულის პაკეტი დაზიანებულ ადგილს 10-15 წუთის განმავლობაში. 
2. მოერიდოთ პირდაპირ სითბოს დაზიანებულ ადგილზე დაახლოებით 48 საათის განმავლობაში. 
3. დაასვენეთ დაზიანებული ადგილი და მოერიდეთ დატვირთვას. 
4. მიიღოთ იბუპროფენი (ედვილი®) ან აცეტამინოფენი (ტილენოლი®) ტკივილის შესამცირებლად. 

თუ კანქვეშა სისხლჩაქცევა არ გადის, თქვენმა ჯანდაცვის პროვაიდერმა შეიძლება სხვა მკურნალობის მეთოდები სცადოს. მათ შეიძლება დაგინიშნოთ მედიკამენტები ან გირჩიონ შეწყვიტოთ გარკვეული მედიკამენტების მიღება. შესაძლოა, ასევე დაგჭირდეთ მკურნალობა იმ მდგომარეობის სამართავად, რომელიც იწვევს კანქვეშა სისხლჩაქცევას.