Simbicort - სიმბიკორტი 320/9მკგ 60დოზა

სიმბიკორტი ტურბუჰალერი

სამკურნალო პრეპარატის დასახელება

სავაჭრო დასახელება: სიმბიკორტი ტურბუჰალერი

საერთაშორისო არაპატენტური ან ჯგუფური დასახელება:

ბუდესონიდი+ფორმოტეროლი

სამკურნალწამლო ფორმა: საინჰალაციო ფხვნილი, დოზირებული

შემადგენლობა

ყოველი მოწოდებული დოზა შეიცავს:

აქტიური ნივთიერებები: ბუდესონიდი მიკრონიზებული 320მკგ და ფორმოტეროლის ფუმარატის დიჰიდრატი 9 მკგ.

დამხმარე ნივთიერებები: ლაქტოზის მონოჰიდრატი 491 მკგ.

აღწერა

ინჰალატორი: წითელი, მბრუნავი დოზატორი, რომელზეც ამოტვიფრულია ბრაილის კოდი.

თეთრი თავსახური. თავსახურის შიდა მხარეს განლაგებულია 5 ნეკნისებრი შემსხვილება წაგრძელებული ზოლების სახით. დოზირების ინდიკატორის ფანჯარაში ჩანს რიცხვი “60”. მუნდშტუკს გააჩნია ოთხი გრძელი ზოლი და შეიძლება ტრიალებდეს.

შემცველობა: თეთრი ან თითქმის თეთრი, უპირატესად მრგვალი ფორმის გრანულები.

ფარმაკოთერაპიული ჯგუფი:

კომბინირებული ბრონქოდილატაციური საშუალება (სელექტიური ბეტა- 2 ადრენომიმეტიკი +ადგილობრივი მოქმედების გლუკოკორტიკოსტეროიდი).

ATC Code:R03AK07

იხილეთ ბლოგი: სიმბიკორტი — მედიკამენტი ასთმისა და ფილტვის ქრონიკული ობსტრუქციული დაავადების სამართავად

ფარმაკოლოგიური თვისებები

ფარმაკოდინამიკა

სიმბიკორტი ტურბუჰალერი შეიცავს ფორმოტეროლს და ბუდესონიდს, რომლებსაც გააჩნიათ მოქმედების განსხვავებული მექანიზმები და ავლენს ადიტიურ ეფექტს ბრონქული ასთმის და ფქოდ-ს გამწვავების სიხშირის შემცირებაზე.

ბუდესონიდი. ბუდესონიდი - გლუკოკორტიკოსტეროიდი, რომელიც ინჰალაციის შემდეგ სასუნთქ გზებზე ახდენს სწრაფ (რამდენიმე საათის განმავლობაში) და დოზადამოკიდებულ ანთების საწინააღმდეგო მოქმედებას, აქვეითებს ბრონქული ასთმის სიმპტომების გამოხატულებას და გამწვავების სიხშირეს. საინჰალაციო ბუდესონიდის დანიშვნისას აღინიშნება ნაკლები სერიოზული არასასურველი ეფექტი, ვიდრე სისტემური გლუკოკორტიკოსტეროიდების გამოყენებისას: ამცირებს ბრონქების ლორწოვანის შეშუპებას, ლორწოს პროდუქციას, ნახველის წარმოქმნას და სასუნთქი გზების ჰიპერრეაქტიულობას. გლუკოკორტიკოსტეროიდების ანთების საწინააღმდეგო მოქმედების ზუსტი მექანიზმი უცნობია.

ფორმოტეროლი. ფორმოტეროლი - β₂-ადრენერგული რეცეპტორების სელექტიური აგონისტი, რომელიც ინჰალაციის შემდეგ იწვევს ბრონქების გლუვი მუსკულატურის სწრაფ და ხანგრძლივ მოდუნებას პაციენტებში სასუნთქი გზების შექცევადი ობსტრუქციით. ბრონქოლიზური ეფექტი დოზადამოკიდებულია, დგება სწრაფად - ინჰალაციიდან 1-3 წუთის განმავლობაში და ერთჯერადი დოზის მიღების შემდეგ მინიმუმ 12 საათი ნარჩუნდება.

სიმბიკორტი ტურბუჰალერი: ბუდესონიდი+ფორმოტეროლი

ბრონქული ასთმა

ფორმოტეროლის ბუდესონიდზე დამატება ამცირებს ბრონქული ასთმის სიმპტომების გამოხატულებას, აუმჯობესებს ფილტვების ფუნქციას და ამცირებს დაავადების გამწვავების სიხშირეს.

ფილტვების ფუნქციაზე სიმბიკორტი ტურბუჰალერის მოქმედება შეესაბამება მონოპრეპარატების - ბუდესონიდის და ფორმოტეროლის კომბინაციას და აჭარბებს მხოლოდ ბუდესონიდის მოქმედებას. ყველა შემთხვევაში შეტევების კუპირებისთვის გამოიყენება ხანმოკლე მოქმედების ბეტა-2 ადრენომიმეტიკი. დროთა განმავლობაში არ აღინიშნა ასთმის საწინააღმდეგო ეფექტის შემცირება. პრეპარატი კარგად გადაიტანება.

ფილტვის ქრონიკული ობსტრუქციული დაავადება (ფქოდ)

საშუალო სიმძიმის ფქოდ-ის მქონე (საწყისი: პრებრონქოდილატაციური ფორსირებული ამოსუნთქვის მოცულობა პირველ წამში <50% ნორმასთან შედარებით; პირველ წამში ფორსირებული ამოსუნთქვის მოცულობის პოსტ-ბრონქოდილატაციური მედიანა=42% ნორმასთან შედარებით)პაციენტებში 12 თვის განმავლობაში სიმბიკორტი ტურბუჰალერის მიღების ფონზე აღინიშნა დაავადების გამწვავების სიხშირის შემცირება იმ პაციენტებთან შედარებით, რომლებიც მკურნალობის სახით იღებდნენ მხოლოდ ფორმოტეროლს ან პლაცებოს (გამწვავებების საშუალო სიხშირე 1,4 პლაცებო/ფორმოტეროლის ჯგუფის 1,8-1,9 მაჩვენებელთან შედარებით). სიმბიკორტსა და ფორმოტეროლს შორის არ აღინიშნება პირველ წამში ფორსირებული ამოსუნთქვის მოცულობის (FEV₁) მაჩვენებლის განსხვავება.

ფარმაკოკინეტიკა

შეწოვა.

სიმბიკორტი ტურბუჰალერი ბუდესონიდის და ფორმოტეროლის სისტემური მოქმედების მხრივ შესაბამისი მონოპრეპარატების ბიოექვივალენტურია. ამის მიუხედავად სიმბიკორტი ტურბუჰალერის მიღების შემდეგ აღინიშნა კორტიზოლის სუპრესიის მცირე გაძლიერება მონოპრეპარატებთან შედარებით. ეს განსხვავება გავლენას არ ახდენს კლინიკურ უსაფრთხოებაზე. არ არსებობს ბუდესონიდის და ფორმოტეროლის ფარმაკოკინეტიკური ურთიერთქმედების მტკიცებულებები.

შესაბამისი ნივთიერებების ფარმაკოკინეტიკური მაჩვენებლები შედარებადია ბუდესონიდის და ფორმოტეროლის მონოპრეპარატების სახით და სიმბიკორტი ტურბუჰალერის შემადგენლობაში დანიშვნის შემდეგ. ბუდესონიდისთვის კომბინირებული პრეპარატის შემადგენლობაში შეყვანისას “კონცენტრაცია-დროის” მრუდი (AUC) რამდენადმე მაღალია, პრეპარატის შეწოვა უფრო სწრაფად ხდება და მეტია პლაზმაში მაქსიმალური კონცენტრაცია.

ფორმოტეროლისთვის კომბინირებული პრეპარატის შემადგენლობაში შეყვანისას პლაზმაში მაქსიმალური კონცენტრაცია მონოპრეპარატისას ემთხვევა.

ინჰალირებული ბუდესონიდი სწრაფად შეიწოვება და პლაზმაში მაქსიმალურ კონცენტრაციას აღწევს ინჰალაციის ჩატარებიდან 30 წუთის შემდეგ. ტურბუჰალერით ინჰალაციის ჩატარების შემდეგ ფილტვებში მოხვედრილი ბუდესონიდის საშუალო დოზა შეადგენს 32-44%-ს. სისტემური ბიოშეღწევადობა შეადგენს შეყვანილი დოზის დაახლოებით 49%-ს. 6-16 წლის ასაკის ბავშვებში ტურბუჰალერით ინჰალაციის შემდეგ ბუდესონიდის ფილტვებში მოხვედრილი საშუალო დოზა არ განსხვავდება მოზრდილი პაციენტების მაჩვენებლისგან (პლაზმაში პრეპარატის საბოლოო კონცენტრაცია განსაზღვრული არ არის).

ინჰალირებული ფორმოტეროლი სწრაფად შეიწოვება და პლაზმაში მაქსიმალურ კონცენტრაციას აღწევს ინჰალაციის ჩატარებიდან 10 წუთის შემდეგ. ტურბუჰალერით ინჰალაციის შემდეგ ფილტვებში მოხვედრილი ფორმოტეროლის საშუალო დოზა შეადგენს 28-49%-ს. სისტემური ბიოშეღწევადობა შეადგენს დაახლოებით 61%-ს.

განაწილება და მეტაბოლიზმი

პლაზმის ცილებს უკავშირდება დაახლოებით ფორმოტეროლის 50% და ბუდესონიდის 90%. განაწილების მოცულობა ფორმოტეროლისთვის შეადგენს დაახლოებით 4ლ/კგ-ს, ბუდესონიდისთვის - 3ლ/კგ-ს. ფორმოტეროლი ინაქტივირდება კონიუგაციის გზით (წარმოიქმნება აქტიური O-დემეთილირებული მეტაბოლიტები ძირითადად ინაქტივირებული კონიუგატების სახით). ბუდესონიდი ღვიძლში პირველადი გავლისას ექვემდებარება ინტენსიურ ბიოტრანსფორმაციას (დაახლოებით 90%) მეტაბოლიტების წარმოქმნით, რომლებსაც ახასიათებს დაბალი გლუკოკორტიკოსტეროიდული აქტივობა. ძირითადი მეტაბოლიტების - 6-β-ჰიდროქსიბუდესონიდის და 16-α-ჰიდროქსიპრედნიზოლონის გლუკოკორტიკოსტეროიდული აქტივობა არ აჭარბებს ბუდესონიდის ანალოგიური აქტივობის 1%-ს. არ არსებობს მეტაბოლიტების ურთიერთქმედების ან ბუდესონიდს და ფორმოტეროლს შორის ჩანაცვლების რეაქციის მტკიცებულებები. ფორმოტეროლის დოზის ძირითადი ნაწილი ექვემდებარება ღვიძლში მეტაბოლიზმს და შემდეგ თირკმელებით გამოიყოფა: ინჰალაციის შემდეგ ფორმოტეროლის შეყვანილი დოზის 8-13% უცვლელი სახით გამოიყოფა. ფორმოტეროლს გააჩნია მაღალი სისტემური კლირენსი (დაახლოებით 1,4ლ/წთ); პრეპარატის ნახევარგამოყოფის პერიოდი შეადგენს საშუალოდ 17 საათს.

ბუდესონიდი მეტაბოლიზდება უპირატესად ფერმენტ CYP3A4 მონაწილეობით. ბუდესონიდის მეტაბოლიტები უცვლელად ან კონიუგატების ფორმით თირკმელებით გამოიყოფა. შარდში ისაზღვრება უცვლელი ბუდესონიდის მხოლოდ უმნიშვნელო რაოდენობა. ბუდესონიდს გააჩნია მაღალი სისტემური კლირენსი (დაახლოებით 1,2ლ/წთ).

თირკმლის უკმარისობით დაავადებულ პაციენტებში ფორმოტეროლის და ბუდესონიდის ფარმაკოკინეტიკა შესწავლილი არ არის. ღვიძლის დაავადების მქონე პაციენტებში შეიძლება გაიზარდოს პლაზმაში ბუდესონიდის და ფორმოტეროლის კონცენტრაცია.

მიღების ჩვენებები

· ბრონქული ასთმა (არასაკმარისად გაკონტროლებული საინჰალაციო გკს-ს და ხანმოკლე მოქმედების ბეტა-2 აგონისტების მიღებით, ან ადექვატურად კონტროლირებული საინჰალაციო გკს-ით და ხანგრძლივი მოქმედების ბეტა-2 ადრენომიმეტიკებით).

· ფილტვის ქრონიკული ობსტრუქციული დაავადება (ფქოდ) – (სიმპტომური თერაპიის სახით ფქოდ-ის მქონე პაციენტებში პოსტბრონქოდილატაციური ფორსირებული ამოსუნთქვის მოცულობით პირველ წამში <70% ნორმასთან შედარებით და გამწვავებებით ანამნეზში, ბრონქოდილატატორებით რეგულარული თერაპიის მიუხედავად).

უკუჩვენება

· მომატებული მგრძნობელობა ბუდესონიდის, ფორმოტეროლის ან საინჰალაციო ლაქტოზის მიმართ.

• ბავშვთა ასაკი 12 წლამდე.

· ლაქტოზის აუტანლობა, ლაქტაზას დეფიციტი ან გლუკოზა-გალაქტაზის მალაბსორბცია.

სიფრთხილით: ფილტვების ტუბერკულოზი (აქტიური ან არააქტიური ფორმა), სუნთქვის ორგანოების სოკოვანი, ვირუსული ან ბაქტერიული ინფექციები, თირეოტოქსიკოზი, ფეოქრომოციტომა, შაქრიანი დიაბეტი, თირკმელზედა ჯირკვლის ქერქის ფუნქციის დაქვეითება, არაკონტროლირებადი ჰიპოკალიემია, ჰიპერტროფიული ობსტრუქციული კარდიომიოპათია, იდიოპათიური ჰიპერტროფიული სუბაორტული სტენოზი, მძიმე არტერიული ჰიპერტენზია, ნებისმიერი ლოკალიზაციის ანევრიზმა ან გულ-სისხლძარღვთა სხვა მძიმე დაავადებები (გულის იშემიური დაავადება, ტაქიარითმია ან მძიმე ხარისხის გულის უკმარისობა), QT ინტერვალის გახანგრძლივება (ფორმოტეროლის მიღებამ შეიძლება გამოიწვიოს QTс- ინტერვალის გახანგრძლივება).

გამოყენება ორსულობის და ძუძუთი კვების პერიოდში

არ არსებობს კლინიკური მონაცემები ორსულობის დროს სიმბიკორტი ტურბუჰალერის ან ფორმოტეროლის და ბუდესონიდის ერთდროული გამოყენების შესახებ.

ორსულობის დროს სიმბიკორტი ტურბუჰალერი უნდა გამოიყენონ მხოლოდ მაშინ, როდესაც პრეპარატის გამოყენების სარგებელი აჭარბებს ნაყოფის პოტენციურ რისკს. უნდა გამოიყენონ ბუდესონიდის უმცირესი ეფექტური დოზა, რომელიც აუცილებელია ბრონქული ასთმის სიმპტომების ადექვატური კონტროლისთვის.

ინჰალირებული ბუდესონიდი გამოიყოფა რძეში, თუმცა თერაპიულ დოზებში გამოყენებისას ბავშვზე ზემოქმედება აღნიშნული არ იყო. უცნობია, გამოიყოფა თუ არა ფორმოტეროლი რძეში. სიმბიკორტი ტურბუჰალერი მეძუძურ დედებს შეიძლება დაენიშნოს მხოლოდ მაშინ, თუ დედისთვის მოსალოდნელი სარგებელი მეტია, ვიდრე ბავშვისთვის მოსალოდნელი რისკი.

გამოყენების მეთოდი და დოზირება

ბრონქული ასთმა

სიმბიკორტი ტურბუჰალერი განკუთვნილი არ არის ბრონქული ასთმის პირველადი მკურნალობისთვის, რომელიც წყვეტილი და მსუბუქი პერსისტული მიმდინარეობისაა. სიმბიკორტი ტურბუჰალერის შემადგენლობაში შემავალი პრეპარატების დოზის შერჩევა ხდება ინდივიდუალურად და დაავადების სიმძიმის მიხედვით. ეს აუცილებლად უნდა გაითვალისწინონ არა მხოლოდ კომბინირებული პრეპარატებით მკურნალობისას, არამედ პრეპარატის დოზის ცვლილებისას.

იმ შემთხვევაში, თუ ცალკეულ პაციენტებს ესაჭიროებათ აქტიური ნივთიერებების იმისგან განსხვავებული დოზა, რაც მოცემულია სიმბიკორტ ტურბუჰალერში, ცალკე ინჰალაციების სახით უნდა დაინიშნოს β2-ადრენომიმეტიკები და/ან გლუკოკორტიკოსტეროიდები. სიმბიკორტ ტურბუჰალერის ოპტიმალური დოზის კონტროლისთვის პაციენტები რეგულარულად უნდა მიდიოდნენ ექიმთან. დოზა უნდა დაქვეითდეს იმ უმცირეს მაჩვენებლამდე, რომლის ფონზეც ხორციელდება ბრონქული ასთმის სიმპტომების ოპტიმალური კონტროლი. პრეპარატის დღეში ორჯერ მიღებისას ბრონქული ასთმის სიმპტომების სრული კონტროლის მიღწევის შემდეგ რეკომენდებულია დოზის ტიტრაცია მინიმალურ ეფექტურ მაჩვენებლამდე, შესაძლებელია პრეპარატის მიღება დღეში ერთხელ იმ შემთხვევებში, როდესაც ექიმის აზრით, საჭიროა შემანარჩუნებელი თერაპია ხანგრძლივი მოქმედების ბრონქოდილატატორებით საინჰალაციო გლუკოკორტიკოსტეროიდებთან კომბინაციაში.

გადაუდებელი შემთხვევებისთვის ბრონქოდილატატორების გამოყენების სიხშირის ზრდა მიუთითებს ძირითადი დაავადების მიმდინარეობის გაუარესებაზე და წარმოადგენს ბრონქული ასთმის მკურნალობის გადახედვის საფუძველს.

მოზრდილები (18 წლის და უფროსი): სიმბიკორტი ტურბუჰალერი 320/9მკგ/დოზა: 1 ინჰალაცია დღეში ორჯერ. აუცილებლობისას შესაძლებელია დოზის გაზრდა: 2 ინჰალაცია დღეში 2-ჯერ. პრეპარატის დღეში ორჯერ მიღების ფონზე ბრონქული ასთმის სიმპტომების ოპტიმალური კონტროლის მიღწევის შემდეგ შესაძლებელია დოზის შემცირება მინიმალურ ეფექტურ დოზამდე, დღეში ერთხელ მიღებამდე.

მოზარდები (12-17წელი) სიმბიკორტი ტურბუჰალერი 320/9მკგ/დოზა: 1 ინჰალაცია დღეში ორჯერ.

12 წლამდე ასაკის ბავშვები: კლინიკური მონაცემების არარსებობის გამო 12 წლამდე ასაკის ბავშვებში სიმბიკორტი ტურბუჰალერი 320/9მკგ/დოზა რეკომენდებული არ არის. სიმბიკორტი ტურბუჰალერი 320/9მკგ/დოზა განკუთვნილია მხოლოდ შემანარჩუნებელი თერაპიისთვის.

ფქოდ

მოზრდილები: სიმბიკორტი ტურბუჰალერის 320/9მკგ/დოზის 1 ინჰალაცია დღეში ორჯერ.

პაციენტთა განსაკუთრებული ჯგუფები: ხანდაზმული პაციენტებისთვის არ არსებობს პრეპარატის დოზის სპეციალური შერჩევის აუცილებლობა. არ არსებობს მონაცემები თირკმლის ან ღვიძლის უკმარისობით დაავადებულ პაციენტებში სიმბიკორტი ტურბუჰალერის გამოყენების შესახებ. რადგან ბუდესონიდი და ფორმოტეროლი ძირითადად ღვიძლის მეტაბოლიზმის გზით გამოიყოფა, ღვიძლის მძიმე ციროზით დაავადებულ პაციენტებში შეიძლება მოსალოდნელი იყოს პრეპარატის გამოყოფის სისწრაფის შენელება.

ინსტრუქციები ტურბუჰალერის სწორად გამოყენებისთვის

ტურბუჰალერის მოქმედების მექანიზმი: პაციენტის მიერ ჩასუნთქვისას მუნდშტუკიდან პრეპარატი ხვდება სასუნთქ გზებში.

აუცილებელია პაციენტის ინსტრუქტაჟი:

· მან ყურადღებით უნდა შეისწავლოს ტურბუჰალერის გამოყენების ინსტრუქცია;

· მუნდშტუკიდან ძლიერად და ღრმად უნდა ჩაისუნთქოს, რათა გარანტირებული იყოს ფილტვებში ოპტიმალური დოზის მოხვედრა;

• არასდროს არ უნდა ამოისუნთქოს მუნდშტუკში;

· ინჰალაციის შემდეგ პირის ღრუს და ყელის ლორწოვანი გარსის კანდიდოზის განვითარების რისკის შემცირებისთვის პირი წყლით უნდა გამოირეცხოს.

ტურბუჰალერის გამოყენების შემდეგ პაციენტმა შეიძლება არ იგრძნოს გემო ან ვერ აღიქვას პრეპარატი, რაც განპირობებულია შეყვანილი ნივთიერების მცირე რაოდენობით.

ტურბუჰალერის გამოყენება

ტურბუჰალერი - მრავალდოზიანი ინჰალატორი, რომელიც იძლევა პრეპარატის ძალიან მცირე დოზირების და შესუნთქვის საშუალებას (სურ 1).

მუნდშტუკი თავსახური

მადოზირებელი საშუალება

დოზის ინდიკატორის ფანჯარა

 სურ 1.

როდესაც აკეთებთ ჩასუნთქვას, ფხვნილი ტურბუჰალერიდან მიეწოდება ფილტვებს. ამიტომ მნიშვნელოვანია, რომ მუნდშტუკიდან ძლიერად და ღრმად ჩაისუნთქოთ.

ტურბუჰალერის მომზადება პირველი გამოყენებისთვის:

ტურბუჰალერის პირველ გამოყენებამდე აუცილებელია მუშაობისთვის მისი მომზადება.

1. შეატრიალეთ და მოხსენით სახურავი.

2. ინჰალატორი გეჭიროთ ვერტიკალურად წითელი დოზატორით ქვემოთ (სურ. 2). არ დაიჭიროთ ინჰალატორი მუნდშტუკით, როდესაც აბრუნებთ დოზატორს. დოზატორი მიაბრუნეთ ერთი მიმართულებით, შემდეგ ბოლომდე მეორე მიმართულებით. ამ პროცედურის შესრულებისას ტკაცუნს გაიგონებთ. აღწერილი პროცედურა შეასრულეთ ორჯერ.

სურ. 2

„ტკაცუნი“

ახლა ინჰალატორი მზად არის გამოყენებისთვის და ტურბუჰალერის სამუშაოდ მომზადების მოცემული პროცედურა ყოველ ჯერზე არ უნდა გაიმეოროთ. პრეპარატის მიღებისთვის მიყევით ქვემოთ მოცემულ ინსტრუქციას.

როგორ გამოიყენება სიმბიკორტი ტურბუჰალერი

ერთი დოზის მიღებისთვის მიყევით ქვემოთ აღწერილ პროცედურას.

1. შეატრიალეთ და მოხსენით სახურავი.

2. ინჰალატორი გეჭიროთ ვერტიკალურად წითელი დოზატორით ქვემოთ (სურ. 2). არ დაიჭიროთ ინჰალატორი მუნდშტუკით, როდესაც აბრუნებთ დოზატორს. დოზის სწორად მოზომვისათვის, დოზატორი მიაბრუნეთ ერთი მიმართულებით ბოლომდე (მნიშვნელობა არა აქვს საათის ისრის მიმართულებით თუ საწინააღმდეგოდ), შემდეგ ასევე ბოლომდე მეორე მიმართულებით. მობრუნების დროს გაიგონებთ ტკაცუნს.

3. ამოისუნთქეთ. არ ამოისუნთქოთ მუნდშტუკში.

4. ფრთხილად მოათავსეთ მუნდშტუკი კბილებს შორის, მოკუმეთ ტუჩები და პირით ჩაისუნთქეთ ძლიერად და ღრმად (სურ. 3). მუნდშტუკი არ დაღეჭოთ და არ მოუჭიროთ კბილები.

სურ. 3

5. ამოსუნთქვამდე ინჰალატორი პირიდან გამოიღეთ.

6. თუ საჭიროა ერთზე მეტი დოზის ინჰალაცია, გაიმეორეთ 2-5 ნაბიჯი.

7. დახურეთ ინჰალატორი თავსახურით. შეამოწმეთ, რომ ინჰალატორის თავსახური ძლიერად ჩახრახნილი იყოს.

8. პირი წყლით გამოირეცხეთ, არ გადაყლაპოთ.

მნიშვნელოვანია!

არ ეცადოთ მუნდშტუკის მოხსნას, რადგან ის მიმაგრებულია ინჰალატორზე და არ იხსნება. ტურბუჰალერის მუნდშტუკი ტრიალებს, მაგრამ არ დაატრიალოთ აუცილებლობის გარეშე. რადგან შესუნთქული ფხვნილის რაოდენობა ძალიან მცირეა, ინჰალაციის შემდეგ მისი გემო შეიძლება არ იგრძნოთ.

თუმცა თუ დაიცავთ ინსტრუქციას, შეიძლება დარწმუნებული იყოთ, რომ შეისუნთქეთ (მოახდინეთ ინჰალაცია) პრეპარატის აუცილებელი დოზა. თუ პრეპარატის მიღებამდე შეცდომით ერთ ჯერზე მეტად გაიმეორეთ ინჰალატორის ჩატვირთვის პროცედურა, ინჰალაციისას მაინც ერთ დოზას მიიღებთ. ამ დროს დოზის ინდიკატორი დოზების საერთო რაოდენობას აჩვენებს. ხმა, რომელიც გესმით ინჰალატორის შენჯღრევისას, წარმოიქმნება გამშრობი აგენტით და არა წამლით.

როგორ უნდა გავიგოთ, როდის არის საჭირო ინჰალატორის გამოცვლა?

დოზის ინდიკატორი (სურ. 4) აჩვენებს ინჰალატორში დარჩენილი დოზების დაახლოებით რაოდენობას. ავსებული ტურბუჰალერის დოზების ათვლა იწყება მე-60 დოზიდან. ინდიკატორი აჩვენებს 10 დოზიან ინტერვალს, ამიტომ არ მიუთითებს ყველა მიღებულ (ჩატვირთულ) დოზაზე.

სურ.4

შეიძლება დარწმუნებული იყოთ, რომ ტურბუჰალერი გაწვდით პრეპარატის აუცილებელ დოზას მაშინაც კი, თუ ვერ ამჩნევთ ცვლილებებს დოზის ინდიკატორის ფანჯარაში. დოზის ინდიკატორის ფანჯარაში წითელი ფონის გამოჩენა ნიშნავს, რომ ტურბუჰალერში დარჩა პრეპარატის 10 დოზა. დოზის ინდიკატორის ფანჯრის შუაში წითელ ფონზე ციფრი 0-ის გამოჩენისას (სურ. 5) ინჰალატორი ახლით უნდა შეიცვალოს.

სურ. 5

ყურადღება მიაქციეთ, რომ მაშინაც კი, როდესაც დოზის ინდიკატორის ფანჯარა აჩვენებს ციფრ 0-ს, დოზატორი ბრუნვას აგრძელებს. თუმცა დოზის ინდიკატორი წყვეტს დოზის რაოდენობის დაფიქსირებას (წყვეტს მოძრაობას) და ინჰალატორის დოზის ფანჯარაში რჩება ციფრი 0.

გაწმენდა

მუნდშტუკი რეგულარულად (კვირაში ერთხელ) გაწმინდეთ გარედან მშრალი ქსოვილით. მუნდშტუკის გასაწმენდად არ გამოიყენოთ წყალი ან სხვა სითხეები.

უტილიზაცია

ფრთხილად იყავით გამოყენებულ ინჰალატორთან, გახსოვდეთ, რომ მის შიგნით შეიძლება დარჩეს პრეპარატის გარკვეული რაოდენობა.

გვერდითი მოქმედება

ბუდესონიდის და ფორმოტეროლის ერთდროულად მიღებისას არ აღინიშნა გვერდითი რეაქციების სიხშირის ზრდა. პრეპარატის მიღებასთან დაკავშირებული ყველაზე ხშირი გვერდითი რეაქციებია β₂-ადრენომიმეტიკებთან დაკავშირებული ისეთი ფარმაკოლოგიურად მოსალოდნელი მოვლენები, როგორიცაა ტრემორი და გულისცემის გახშირება; სიმპტომები ჩვეულებრივ ზომიერი ხასიათისაა და ქრება მკურნალობის დაწყებიდან რამდენიმე დღის შემდეგ.

არასასურველი რეაქციები, რომლებიც დაკავშირებულია ბუდესონიდის ან ფორმოტეროლის მიღებასთან, ქვემოთ არის ჩამოთვლილი ორგანოთა სისტემების კლასის და განვითარების სიხშირის მიხედვით. რეაქციების განვითარების სიხშირე წარმოდგენილია შემდეგი გრადაციით: ძალიან ხშირი (>1/ 10), ხშირი ( > 1/ 100, <1/10), ნაკლებად ხშირი (>1/1000, <1/100), იშვიათი (>1/10000, <1/1000), ძალიან იშვიათი (<1/10000).

ინფექციები და ინვაზიები: ხშირი -პირის ღრუს და ხახის ლორწოვანი გარსის კანდიდოზი, პნევმონია (ფქოდით დაავადებულ პაციენტებში).

დარღვევები იმუნური სისტემის მხრივ:იშვიათი - დაუყოვნებელი და დაყოვნებული ტიპის ჰიპერმგრძნობელობის რეაქციები (მაგალითად, დერმატიტი, ეგზანთემა, ჭინჭრის ციება, ქავილი, ანგიოედემა, ანაფილაქსიური რეაქცია).

დარღვევები მეტაბოლიზმის და კვების მხრივ:იშვიათი - ჰიპოკალიემია; ძალიან იშვიათი - ჰიპერგლიკემია, გლუკოკორტიკოსტეროიდების სისტემური ეფექტების ნიშნები ან სიმპტომები (თირკმელზედა ჯირკვლების ჰიპოფუნქციის ჩათვლით).

დარღვევები ფსიქიკის მხრივ: ნაკლებად ხშირი -ფსიქომოტორული აგზნება, შფოთვა, ძილის დარღვევა; ძალიან იშვიათი - დეპრესია, ქცევის მოშლა (ძირითადად ბავშვებში).

დარღვევები ნერვული სისტემის მხრივ: ხშირი - თავის ტკივილი, ტრემორი; ნაკლებად ხშირი - თავბრუსხვევა; ძალიან იშვიათი - გემოს შეგრძნების დარღვევა.

დარღვევები გულ-სისხლძარღვთა სისტემის მხრივ:ხშირი - გულისცემის შეგრძნება; ნაკლებად ხშირი - ტაქიკარდია; იშვიათი - არითმია (მაგ.: წინაგულების ფიბრილაცია, სუპრავენტრიკულური ტაქიკარდია, ექსტრასისტოლია); ძალიან იშვიათად - სტენოკარდია, არტერიული წნევის მერყეობა.

დარღვევები სასუნთქი სისტემის, გულმკერდის კედლის და შუასაყრის მხრივ: ხშირი - ხველა, ხმის ჩახლეჩა, ხახის ლორწოვანი გარსის მსუბუქი გაღიზიანება; იშვიათი - ბრონქოსპაზმი.

დარღვევები კუჭ-ნაწლავის ტრაქტის მხრივ:ნაკლებად ხშირი - გულისრევა

დარღვევები კანისა და კანქვეშა ქსოვილების მხრივ:ნაკლებად ხშირი - სისხლჩაქცევები

დარღვევები ძვალ-კუნთოვანი სისტემის მხრივ:ნაკლებად ხშირი - კუნთების კრუნჩხვები.

ხანგრძლივი დროის განმავლობაში მაღალი დოზების გამოყენებისას შეიძლება აღინიშნოს საინჰალაციო გლუკოკორტიკოსტეროიდების სისტემური მოქმედება.

β2-ადრენომიმეტიკების გამოყენებამ შეიძლება გამოიწვიოს სისხლში ინსულინის, თავისუფალი ცხიმოვანი მჟავების, გლიცეროლის და კეტონური სხეულების მომატება.

დოზის გადაჭარბება

ფორმოტეროლის დოზის გადაჭარბების სიმპტომები: ტრემორი, თავის ტკივილი, გულისცემის გახშირება. ცალკეულ შემთხვევებში აღინიშნა ტაქიკარდია, ჰიპერგლიკემია, ჰიპოკალიემია, QТс-ინტერვალის გახანგრძლივება, არითმია, გულისრევა და ღებინება. კომბინირებული პრეპარატის შემადგენლობაში შემავალი ფორმოტეროლის დოზის გადაჭარბების გამო სიმბიკორტ ტურბუჰალერის მოხსნის აუცილებლობისას უნდა განიხილონ შესაბამისი გლუკოკორტიკოსტეროიდის დანიშვნის საკითხი.

მკურნალობა: შემანარჩუნებელი და სიმპტომური. მწვავე ბრონქული ობსტრუქციის მქონე პაციენტების მიერ ფორმოტეროლის 90 მკგ დოზის გამოყენება სამი საათის განმავლობაში უსაფრთხოა.

ბუდესონიდის დოზის მწვავე მნიშვნელოვანი გადაჭარბების დროსაც კი მოსალოდნელი არ არის კლინიკურად მნიშვნელოვანი ეფექტები. გადაჭარბებული დოზების ქრონიკული მიღებისას შეიძლება გამოვლინდეს გლუკოკორტიკოსტეროიდების სისტემური მოქმედება, როგორიცაა ჰიპერკორტიციზმი და თირკმელზედა ჯირკვლის ფუნქციის დათრგუნვა.

ურთიერთქმედება სხვა სამკურნალო საშუალებებთან

ერთად დანიშვნისას დღეში ერთხელ 200მგ კეტოკონაზოლის მიღება საშუალოდ 6-ჯერ ზრდის პლაზმაში პერორალური ბუდესონიდის (ერთჯერადი დოზა 3მგ) კონცენტრაციას. კეტოკონაზოლის დანიშვნისას ბუდესონიდის მიღებიდან 12 საათის შემდეგ პლაზმაში ამ უკანასკნელის კონცენტრაცია საშუალოდ სამჯერ იზრდებოდა. არ არსებობს ინფორმაცია საინჰალაციო ბუდესონიდთან მსგავსი ურთიერთქმედების შესახებ, თუმცა მოსალოდნელია პლაზმაში პრეპარატის კონცენტრაციის მომატება. რადგან არ არსებობს დოზის შერჩევის რეკომენდაციების მონაცემები, უნდა მოერიდონ ზემოთაღნიშნული პრეპარატების კომბინაციის გამოყენებას. თუ ეს შეუძლებელია, მაქსიმალურად უნდა გაიზარდოს კეტოკონაზოლის და ბუდესონიდის დანიშვნას შორის დროის ინტერვალი. აგრეთვე უნდა განიხილონ ბუდესონიდის დოზის დაქვეითების შესაძლებლობა. სავარაუდოდ CYP3A4-ის სხვა ძლიერ ინჰიბიტორებს აგრეთვე შეუძლიათ პლაზმაში ბუდესონიდის კონცენტრაციის მნიშვნელოვნად მომატება.

β-ადრენერგული რეცეპტორების ბლოკერებს შეუძლიათ ფორმოტეროლის მოქმედების დასუსტება. აუცილებელი შემთხვევების გარდა სიმბიკორტ ტურბუჰალერი არ უნდა დაინიშნოს ადრენობლოკერებთან ერთად (თვალის წვეთების ჩათვლით).

სიმბიკორტ ტურბუჰალერის და ქინიდინის, დიზოპირამიდის, პროკაინამიდის, ფენოთიაზინების, ანტიჰისტამინური პრეპარატების (ტერფენადინი) მონოამინოოქსიდაზას (მაო) ინჰიბიტორების და ტრიციკლური ანტიდეპრესანტების ერთდროულმა დანიშვნამ შეიძლება გამოიწვიოს QT ინტერვალის გახანგრძლივება და გაზარდოს პარკუჭოვანი არითმიების განვითარების რისკი.

ამას გარდა, ლევოდოფა, ლევოთიროქსინი, ოქსიტოცინი და ალკოჰოლი შეიძლება აქვეითებდეს გულის კუნთის ტოლერანტობას β2-ადრენომიმეტიკების მიმართ.

მაო-ის ინჰიბიტორების, აგრეთვე მსგავსი მოქმედების პრეპარატების ერთდროული დანიშვნა, როგორიცაა ფურაზოლიდონი და პროკარბაზინი, შეიძლება იწვევდეს არტერიული წნევის მომატებას. ზოგადი ანესთეზიის ჰალოგენიზებული ნახშირწყალბადების შემცველი პრეპარატებით ჩატარებისას პაციენტებში არსებობს არითმიის განვითარების მომატებული რისკი. სიმბიკორტ ტურბუჰალერის და სხვა β-ადრენერგული სამკურნალო პრეპარატების ერთად გამოყენებისას შესაძლებელია ფორმოტეროლის გვერდითი მოქმედების გაძლიერება. β2-ადრენომიმეტიკების გამოყენების შედეგად შეიძლება განვითარდეს ჰიპოკალიემია, რომელიც შეიძლება გაძლიერდეს ქსანტინის წარმოებულებით, მინერალური წარმოების გლუკოკორტიკოსტეროიდებით და დიურეტიკებით მკურნალობისას. პაციენტებში, რომლებიც საგულე გლიკოზიდებს იღებენ, ჰიპოკალიემიამ შეიძლება გააძლიეროს არითმიისადმი წინასწარგანწყობა.

არ აღინიშნა ბუდესონიდის და ფორმოტეროლის ურთიერთქმედება ბრონქული ასთმის სამკურნალოდ გამოყენებულ სხვა სამკურნალო პრეპარატებთან.

განსაკუთრებული მითითებები

მითითებები დოზების შესახებ

პაციენტებს რეკომენდაცია ეძლევათ, რომ მუდმივად იქონიონ გადაუდებელი დახმარების პრეპარატები (ხანმოკლე მოქმედების β2-ადრენომიმეტიკები).

პაციენტის ყურადღება უნდა გაამახვილონ იმაზე, რომ რომ რეგულარულად მიიღონ სიმბიკორტი ტურბუჰალერი შერჩეული დოზით, იმ დროსაც კი, როდესაც დაავადების სიმპტომები არ აქვთ.

რეკომენდებულია პაციენტის გაფრთხილება პირის ღრუს გამორეცხვის აუცილებლობის შესახებ შემანარჩუნებელი დოზის ინჰალაციის შემდეგ პირისა და ხახის ლორწოვანის კანდიდოზის განვითარების თავიდან აცილების მიზნით.

მკურნალობის შეწყვეტამდე უნდა მოხდეს შემანარჩუნებელი დოზის თანდათან შემცირება, სწრაფი მოხსნა რეკომენდებული არ არის.

საინჰალაციო გლუკოკორტიკოსტეროიდების სრული მოხსნა საჭირო არ არის, გარდა იმ შემთხვევებისა, როცა აუცილებელია ბრონქული ასთმის დიაგნოზის დადასტურება.

სიმბიკორტი ტურბუჰალერი განკუთვნილი არ არის ბრონქული ასთმის საწყისი თერაპიის შერჩევისათვის მკურნალობის პირველ ეტაპებზე.

დაავადების სიმპტომთა გაძლიერება

თერაპიის არასაკმარისი ეფექტურობისას ან სიმბიკორტი ტურბუჰალერის მაქსიმალური რეკომენდებული დოზების გადაჭარბებისას აუცილებელია მკურნალობის ტაქტიკის გადახედვა. ბრონქული ასთმის ან ფქოდ სიმპტომების კონტროლის მოულოდნელი და პროგრესირებადი გაუარესება წარმოადგენს სიცოცხლისთვის პოტენციურად საშიშ მდგომარეობას და მოითხოვს სასწრაფო სამედიცინო ჩარევას. აღნიშნულ სიტუაციაში უნდა განიხილონ გლუკოკორტიკოსტეროიდების დოზის მომატების შესაძლებლობა, მაგალითად, პერორალური გლუკოკორტიკოიდების კურსის ან ანტიბიოტიკებით მკურნალობის დანიშვნა ინფექციის თანდართვის შემთხვევაში. მძიმე შეტევისას ინჰალაციური გლუკოკორტიკოსტეროიდისა და ხანგრძლივი მოქმედების ბეტა2- ადრენომიმეტიკის მოქმედება საკმარისი არ არის.

პერორალური თერაპიიდან გადასვლა

თუ არსებობს საფუძველი, რომ გლუკოკორტიკოსტეროიდებით წინამორბედი სისტემური თერაპიისას დაირღვა თირკმელზედა ჯირკვლის ფუნქცია, სიმბიკორტ ტურბუჰალერზე გადაყვანისას საჭიროა უსაფრთხოების ზომების მიღება.

ბუდესონიდის ინჰალაციური თერაპიის უპირატესობებს, როგორც წესი, მინიმუმამდე დაჰყავთ პერორალური გლუკოკორტიკოსტეროიდების გამოყენება, თუმცა, პერორალური გლუკოკორტიკოიდების შეწყვეტის შემთხვევაში ხანგრძლივი დროის განმავლობაში შეიძლება აღინიშნოს თირკმელზედა ჯირკვლის ფუნქციის უკმარისობა. რისკის იგივე ჯგუფში შეიძლება აღმოჩნდნენ პაციენტები, რომლებიც საჭიროებდნენ გლუკოკორტიკოსტეროიდების მაღალი დოზის გადაუდებელ მიღებებს ან მკურნალობდნენ საინჰალაციო გლუკოკორტიკოსტეროიდების მაღალი დოზით. აუცილებელია გლუკოკორტიკოსტეროიდების დამატებით დანიშვნის გათვალისწინება სტრესის ან ქირურგიული ჩარევის შემთხვევაში.

დამხმარე ნივთიერებები:

სიმბიკორტი ტურბუჰალერი შეიცავს ლაქტოზას (< 1 მგ/ინჰალაცია). ჩვეულებრივ, ასეთი დოზა არ ქმნის პრობლემებს ლაქტოზის აუტანლობის მქონე პაციენტებში.

სიფრთხილის ზომები ზოგიერთი დაავადებებისას:

QTc - ინტერვალის გახანგრძლივების მქონე პაციენტებში საჭიროა სიფრთხილის ზომების დაცვა. ფორმოტეროლის მიღებამ შეიძლება გამოიწვიოს QTc - ინტერვალის გახანგრძლივება.

პრეპარატის გამოყენების აუცილებლობა და საინჰალაციო გლუკოკორტიკოსტეროიდის დოზა უნდა გადაიხედოს პაციენტებში, რომლებსაც აღენიშნებათ ფილტვის ტუბერკულოზის აქტიური ან არააქტიური ფორმა, სუნთქვის ორგანოების სოკოვანი, ვირუსული ან ბაქტერიული ინფექციები.

β2-ადრენომიმეტიკების დანიშვნისას იმ პრეპარატებთან ერთად, რომლებმაც შეიძლება გამოიწვიონ ან გააძლიერონ ჰიპოკალიემური ეფექტი, როგორიცაა მაგ. ქსანტინის წარმოებულები, სტეროიდები ან დიურეტიკები, შესაძლებელია β2-ადრენომიმეტიკების ჰიპოკალიემიური ეფექტის გაძლიერება. განსაკუთრებული სიფრთხილის ზომები უნდა დაიცვან პაციენტებში, რომლებსაც აღენიშნებათ არასტაბილური ბრონქული ასთმა და მძიმე ბრონქული ასთმის გამწვავებისას შეტევების მოხსნისთვის იღებენ ხანმოკლე მოქმედების ბრონქოდილატატორებს, რამდენადაც ჰიპოკალიემიის განვითარების რისკი იზრდება ჰიპოქსიის და სხვა მდგომარეობების ფონზე - როცა მეტია ჰიპოკალიემიური ეფექტის განვითარების ალბათობა. ამგვარ შემთხვევებში რეკომენდებულია შრატში კალიუმის დონის კონტროლი.

შაქრიანი დიაბეტის მქონე პაციენტებში მკურნალობისას აუცილებელია გლუკოზის დონის კონტროლი სისხლში.

სისტემური მოქმედება

სისტემური მოქმედება შეიძლება გამოვლინდეს ნებისმიერი საინჰალაციო გლუკოკორტიკოსტეროიდის მიღებისას, განსაკუთრებით ხანგრძლივი პერიოდის განმავლობაში პრეპარატის მაღალი დოზების გამოყენებისას. სისტემური მოქმედების გამოვლინება ნაკლებად სავარაუდოა საინჰალაციო თერაპიის ჩატარებისას, ვიდრე პერორალური გლუკოკორტიკოსტეროიდების გამოყენებისას. შესაძლო სისტემურ ეფექტებს მიეკუთვნება თირკმელზედა ჯირკვლების ფუნქციის დათრგუნვა, ბავშვებსა და მოზარდებში ზრდის შეფერხება, ძვლის ქსოვილის მინერალური სიმკვრივის დაქვეითება, კატარაქტა და გლაუკომა.

ძვლის ქსოვილის მინერალურ სიმკვრივეზე საინჰალაციო გლუკოკორტიკოსტეროიდების შესაძლო მოქმედების გამო განსაკუთრებული ყურადღება უნდა დაეთმოს პაციენტებს, რომლებიც ხანგრძლივი პერიოდის განმავლობაში იღებენ პრეპარატის მაღალ დოზებს და აღენიშნებათ ოსტეოპოროზის განვითარების რისკ-ფაქტორები. ბავშვებში საინჰალაციო ბუდესონიდის ხანგრძლივი გამოყენების კვლევამ საშუალო დღიური დოზით 400მკგ (გაზომილი დოზა) და მოზრდილებში 800მკგ დოზით (გაზომილი დოზა) არ აჩვენა ძვლოვანი ქსოვილის მინერალურ სიმკვრივეზე მნიშვნელოვანი მოქმედება. არ არსებობს მონაცემები ძვლის ქსოვილის მინერალურ სიმკვრივეზე სიმბიკორტ ტურბუჰალერის მაღალი დოზების მოქმედების შესახებ.

პარადოქსული ბრონქოსპაზმი:

როგორც ნებისმიერი სხვა ინჰალაციური თერაპიისას, შესაძლებელია პარადოქსული ბრონქოსპაზმის განვითარება პრეპარატის მიღების შემდეგ ხიხინის მყისიერი გაძლიერებით. ამ დროს უნდა შეწყდეს სიმბიკორტით თერაპია, უნდა გადაიხედოს მკურნალობის ტაქტიკა და აუცილებლობისას დაინიშნოს ალტერნატიული თერაპია.

ბავშვთა ასაკის პაციენტები

რეკომენდებულია იმ ბავშვების ზრდის რეგულარული მონიტორინგი, რომლებიც ხანგრძლივად იღებენ გლუკოკორტიკოსტეროიდულ თერაპიას საინჰალაციო ფორმით. ზრდის შეფერხების დადგენის შემთხვევაში თერაპია უნდა გადაიხედოს, შემცირდეს საინჰალაციო გლუკოკორტიკოსტეროიდის დოზა. აუცილებელია გლუკოკორტიკოსტეროიდული თერაპიის უპირატესობის შედარება ზრდის შეფერხების შესაძლო რისკთან. თერაპიის არჩევისას რეკომენდებულია ბავშვთა პულმონოლოგის კონსულტაცია.

გლუკოკორტიკოსტეროიდების ხანგრძლივი გამოყენების კვლევების შეზღუდულ მონაცემებზე დაყრდნობით შეიძლება ვივარაუდოთ, რომ ბავშვების უმრავლესობა, რომლებიც ხანგრძლივად იღებენ საინჰალაციო ბუდესონიდით თერაპიას, საბოლოო ჯამში მიაღწევს მოზრდილებისთვის ნორმალურ სიმაღლეს. ამასთან ერთად აღინიშნა ზრდის ხანმოკლე უმნიშვნელო შეფერხება (დაახლოებით 1 სმ) ძირითადად მკურნალობის პირველ წელს.

ფქოდ-ის მქონე პაციენტები

სიმბიკორტი ტურბუჰალერის კლინიკური კვლევის მონაცემები ფქოდ-ის მქონე პაციენტებში პრებრონქოდილატაციური FEV₁>50% საჭიროდან და პოსტბრონქოდილატაციური FEV₁< 70% საჭიროდან, არ არსებობს (იხ. „ფარმაკოდინამიკა“).

კლინიკურმა კვლევებმა და მეტაანალიზმა აჩვენა, რომ ინჰალაციური გლუკოკორტიკოსტეროიდების გამოყენებამ ფქოდ-ის შემანარჩუნებელი თერაპიის დროს შესაძლოა გამოიწვიოს პნევმონიების განვითარების რისკის მატება. ექიმებს უნდა ახსოვდეთ ფქოდის მქონე პაციენტებში პნევმონიის განვითარების შესაძლებლობის შესახებ, რადგან პნევმონიის და დაავადების გამწვავების კლინიკური ნიშნები ხშირად ერთმანეთს ემთხვევა.

გავლენა ავტომობილის და სხვა მექანიზმების მართვის უნარზე

სიმბიკორტი ტურბუჰალერი გავლენას არ ახდენს ავტომობილის და მექანიზმების მართვის უნარზე. უმნიშვნელო გავლენა შეიძლება მოახდინოს გვერდითი მოქმედების განვითარებისას.

გამოშვების ფორმა

საინჰალაციო ფხვნილი დოზირებული 320+9 მიკროგრამი/დოზა.

პლასტმასის ინჰალატორი რომელიც შეიცავს პრეპარატის 60 დოზას შედგება მადოზირებელი მოწყობილობისგან, ფხვნილის შესანახი რეზერვუარისგან, დესიკანტის რეზერვუარისგან, მუნდშტუკისგან და ჩასახრახნი თავსახურისგან. ყოველი ინჰალატორი თავსდება მუყაოს კოლოფში გამოყენების ინსტრუქციასთან ერთად.

შენახვის პირობები

ინახება არა უმეტეს 30°С ტემპერატურაზე, ბავშვებისთვის მიუწვდომელ ადგილას.

ვარგისობის ვადა

2 წელი. გამოყენება არ შეიძლება ვარგისობის ვადის გასვლის შემდეგ.

აფთიაქიდან გაცემის პირობები

ფარმაცევტული პროდუქტის ჯგუფი II, გაიცემა ფორმა N3 რეცეპტით.