Levoximed - ლევოქსიმედი თვალის და ყურის წვეთები 0.5% 5მლ

ლევოქსიმედი

სავაჭრო დასახელება

ლევოქსიმედი, Levoximed

საერთაშორისო არაპატენტირებული დასახელება

ლევოფლოქსაცინი, Levofloxacin

სამკურნალო ფორმა

თვალის წვეთები 0,5%.

აღწერილობა:  გამჭვირვალე, ღია-ყვითელი ან მომწვანო-მოყვითალო ფერის ხსნარი.

შემადგენლობა

პრეპარატის 1 მლ შეიცავს 

აქტიური ნივთიერება: ლევოფლოქსაცინი (ლევოფლოქსაცინის ჰემიჰიდრატის ფორმით) 5 მგ.

დამხმარე ნივთიერებები:  ნატრიუმის ქლორიდი, ბენზალკონიუმის ქლორიდი, ნატრიუმის ჰიდროქსიდი ან ქლორწყალბადმჟავა, საინექციო ხსნარი. 

ფარმაკოთერაპიული ჯგუფი

ოფთალმოლოგიაში გამოსაყენებელი საშუალებები. ანტიმიკრობული საშუალებები. 

ფარმაკოლოგიური თვისებები

ფარმაკოდინამიკა

ლევოქსიმედი – ანტიმიკრობული პრეპარატი ფტორქინოლონების ჯგუფიდან.  

ლევოფლოქსაცინი არის ოფლოქსაცინის რაცემული სამკურნალო სუბსტანციის L-იზომერი.

ოფლოქსაცინის ანტიბაქტერიული აქტივობა მიეკუთვნება ძირითადად  L – იზომერს. 

მოქმედების მექანიზმი

ლევოფლოქსაცინი აინჰიბირებს ბაქტერიულ ტოპოიზომერაზა II-ს (დნმ-ჰირაზას) და ტოპოიზომერაზა IV-ს.

ლევოფლოქსაცინის სამიზნეებია, უპირველეს ყოვლისა, დნმ-ჰირაზა  გრამუარყოფით ბაქტერიებში და ტოპოიზომერაზა IV გრამდადებით ბაქტერიებში.

რეზისტენტობის მექანიზმი

ლევოფლოქსაცინის მიმართ ბაქტერიული რეზისტენტობა შეიძლება განვითარდეს უმთავრესად ორი ძირითადი მექანიზმით: პრეპარატის ინტრაბაქტერიული კონცენტრაციის დაქვეითება ან სამიზნე ფერმენტებში ცვლილება. სამიზნე უბნის ცვლილებები განპირობებულია მუტაციებით ქრომოსომულ გენებში, რომლებიც ახდენენ დნმ-ჰირაზას  (gyrA და  gyrB) და ტოპოიზომერაზას IV (parC და parE, grlA და grlB Staphylococcus aureus-ში) კოდირებას. სამკურნალო ნივთირების დაბალი ინტრაბაქტერიული კონცენტრაციით განპირობებული რეზისტენტობა შეიძლება დაკავშირებული იყოს გარეთა მემბრანის ფორების ცვლილებასთან (OmpF) ფტორქინოლონების გრამუარყოფით ბაქტერიებში შეღწევის შემდგომი დაქვეითებით ან ეფლუქსური ტუმბოების დახმარებით. 

ეფლუქსური ტუმბოებით გამოწვეული რეზისტენტობა აღწერილი იყო პნევმოკოკებში (PmrA),  სტაფილოკოკებში  (NorA), ანაერობებსა და გრამუარყოფითი ბაქტერიებში. ქინოლონებისადმი  პლაზმიდებით განპირობებული რეზისტენტობა (რომელიც განისაზღვრება qnr-გენით) აღწერილი იყო  Klebsiella pneumoniae და E. coli. 

ჯვარედინი რეზისტენტობა

ფტორქინოლონებს შორის შეიძლება გამოვლინდეს ჯვარედინი რეზისტენტობა.

ინდივიდუალურმა მუტაციებმა შეიძლება სულაც არ გამოიწვიონ კლინიკური რეზისტენტობა, მაგრამ მრავლობითი მუტაციები, როგორც წესი, იწვევენ  კლინიკურ რეზისტენტობას ფტორქინოლონების კლასის ყველა პრეპარატის მიმართ.  მემბრანის გარეთა ზედაპირზე არსებული პორინების და ეფლუქსის სისტემის ცვლილებას შეიძლება გააჩნდეს ფართო სპეციფიკურობა ფერმენტების მიმართ,  ანტიბაქტერიული ნივთიერებების რამდენიმე კლასზე გავლენის მოხდენით და მულტირეზისტენტობის გამოწვევით.          

ზღვრული მნიშვნელობები

ქვემოთ მოცემულია მინიმალური მაინჰიბირებელი კონცენტრაციის (მმკ) ზღვრული მნიშვნელობების მონაცემები, რომლებიც გამოყოფენ მგრძნობიარე მიკროორგანიზმებს საშუალო მგრძნობელობის მქონე მიკროორგანიზმებისგან, ასევე მგრძნობიარე მიკროორგანიზმებს რეზისტენტული მიკროორგანიზმებისგან, ანტიმიკრობული პრეპარატებისადმი მგრძნობელობის ტესტირების ევროპული კომიტეტის (EUCAST) ზღვრული  მნიშვნელობების შესაბამისად: 

-        Pseudomonas spp., Staphylococcus spp., Streptococcus A, B, C, G: მგრძნობიარე ≤ 1 მგ/ლ, რეზისტენტული > 2 მგ/ლ;

-        Streptococcus pneumoniae: მგრძნობიარე ≤ 2 მგ/ლ, რეზისტენტული > 2 მგ/ლ;

-        Haemophilus influenzae, Moraxella catarrhalis: მგრძნობიარე ≤ 1 მგ/ლ, რეზისტენტული > 1 მგ/ლ;

-        ყველა დანარჩენი მიკროორგანიზმი: მგრძნობიარე ≤ 1 მგ/ლ, რეზისტენტული > 2 მგ/ლ.

ანტიბაქტერიული სპექტრი

შეძენილი რეზისტენტობის გავრცელება ბაქტერიების გარკვეულ  სახეობებში შეიძლება ვარირებდეს დროისა და გეოგრაფიული მდებარეობის მიხედვით; ამიტომ, სასურველია გქონდეთ ლოკალური ცნობები რეზისტენტობის შესახებ, განსაკუთრებით სერიოზული ინფექციების მკურნალობისას. მოწოდებული ინფორმაცია უნდა განიხილებოდეს მხოლოდ, როგორც სახელმძღვანელო, რომელიც იძლევა ლევოფლოქსაცინის მიმართ მიკროორგანიზმების მგრძნობელობის განსაზღვრის საშუალებას. აუცილებლობის შემთხვევაში, როდესაც ხელმისაწვდომია ადგილობრივი ინფორმაცია რეზისტენტული შტამების გავრცელების შესახებ  და სამკურნალო საშუალების  გამოყენების სარგებელი ეჭვს ბადებს, ყოველ შემთხვევაში, ზოგიერთი ინფექციის მიმართ აუცილებელია რჩევისთვის ექსპერტთან ვიზიტი. 

ქვემოთ მოცემულია მხოლოდ მიკროორგანიზმების ის სახეობები, რომლებიც, როგორც წესი, იწვევენ თვალის ზედაპირული სტრუქტურების დაავადებებს, როგორიცაა კონიუნქტივიტი.

ანტიბაქტერიული სპექტრი - მგრძნობელობისა და რეზისტენტობის მახასიათებლების კატეგორია EUCAST-ის მიხედვით:

I კატეგორია: ჩვეულებრივ მგრძნობიარე სახეობები

გრამდადებითი აერობული მიკროორგანიზმები: Staphylococcus aureus (MSSA)*, Streptococcus pneumoniae, Streptococcus pyogenes, Viridans ჯგუფის სტრეპტოკოკები.

გრამუარყოფითი აერობული მიკროორგანიზმები: Escherichia coli, Haemophilus influenza, Moraxella catarrhalis, Pseudomonas aeruginosa (არაჰოსპიტალური იზოლატები).

სხვა მიკროორგანიზმები: Chlamydia trachomatis (ქლამიდიური კონიუნქტივიტის მქონე პაციენტების მკურნალობა უნდა მოიცავდეს ერთდროულ სისტემურ ანტიმიკრობულ მკურნალობას).

II კატეგორია: სახეობები, რომლებსაც შეუძლიათ მდგრადობის შეძენა

გრამდადებითი აერობული მიკროორგანიზმები:  Staphylococcus aureus (MRSA) **, Staphylococcus epidermidis.

გრამუარყოფითი აერობული ორგანიზმები: Pseudomonas aeruginosa (არაჰოსპიტალური იზოლატები). 

* MSSA = მეთიცილინისადმი მგრძნობიარე Staphylococcus aureus

** MRSA = მეთიცილინ-რეზისტენტული Staphylococcus aureus

ზემოაღნიშნული მიკროორგანიზმები კლასიფიცირებული იყო, როგორც მგრძნობიარე ლევოფლოქსაცინის მიმართ in vitro მგრძნობელობის განსაზღვრის და სისტემური თერაპიის შემდეგ მიღწეული სისხლის პლაზმაში კონცენტრაციების შედეგების მიხევით. ადგილობრივი თერაპია უზრუნველყოფს მაქსიმალურ მნიშვნელობებს, რომლებიც აღემატება სისხლში განსაზღვრულ კონცენტრაციებს.  თუმცა, უცნობია, შეუძლია თუ არა პრეპარატის კინეტიკას ადგილობრივი ოფთალმოლოგიური გამოყენების შემდეგ შეცვალოს ლევოფლოქსაცინის ანტიბაქტერიული აქტივობა და როგორი სახით. 

ბავშვები

ფარმაკოდინამიკური თვისებები ერთნაირია მოზრდილებში და 1 წელზე უფროსი ასაკის ბავშვებში.

ფარმაკოკინეტიკა 

თვალებში ინსტილაციის შემდეგ ლევოფლოქსაცინი კარგად ნარჩუნდება საცრემლე აპკში.

კვლევებში ჯანმრთელი მოხალისეების მონაწილეობით ნაჩვენებია, რომ ლევოფლოქსაცინის საშუალო კონცენტრაციები საცრემლე აპკში, გაზომილი ადგილობრივი გამოყენებიდან 4 და 6 საათის შემდეგ, შეადგენდა 17,0 მკგ/მლ-ს და 6,6 მკგ/მლ-ს, შესაბამისად. 6-დან 5 სუბიექტში ლევოფლოქსაცინის კონცენტაცია შეადგენდა 2 მკგ/მლ-ს და მეტს დოზის ინსტილაციიდან 4 საათის შემდეგ. 6-იდან 4 სუბიექტში ეს კონცენტრაცია შენარჩუნებული იყო ინსტილაციიდან 6 საათის შემდეგ.

ლევოფლოქსაცინის  საშუალო კონცენტრაცია სისხლის პლაზმაში გაიზომა 15 ჯანმრთელ მოზრდილ მოხალისეში ლევოფლოქსაცინის თვალის წვეთების გამოყენებისას 15 დღის განმავლობაში. პლაზმაში ლევოფლოქსაცინის საშუალო კონცენტრაცია გამოყენებიდან ერთი საათის შემდეგ ვარირებდა 0,86 ნგ/მლ-დან პირველ დღეს 2,05 ნგ/მლ-მდე მეთხუთმეტე დღეს. ლევოფლოქსაცინის მაქსიმალური კონცენტრაცია,  2,25 ნგ/მლ-ის ტოლი, გამოვლენილია მეოთხე დღეს, პრეპარატის გამოყენების ორი დღის შემდეგ ყოველ 2 საათში 8 ჯერამდე დღეში. ლევოფლოქსაცინის მაქსიმალური კონცენტრაცია, რომელიც იზრდებოდა 0,94 ნგ/მლ-დან პირველ დღეს 2,15 ნგ/მლ-მდე მეთხუთმეტე დღეს, იყო 1000 ჯერზე უფრო დაბალი კონცენტრაციაზე, რომელიც აღინიშნება ლევოფლოქსაცინის სტანდარტული დოზების პერორალური  მიღების შემდეგ.  

უცნობია ლევოფლოქსაცინის კონცენტრაცია პლაზმაში მისი გამოყენების შემდეგ თვალების ინფექციების დროს.  

გამოყენების ჩვენებები

ლევოქსიმედი განკუთვნილია ლევოფლოქსაცინისადმი მგრძნობიარე მიკროორგანიზმებით გამოწვეული  თვალის ზედაპირული ბაქტერიული ინფექციების  მკურნალობისთვის, 1 წლიდან და უფროსი ასაკის პაციენტებში:

პრეპარატი გამოიყენება მოზრდილებში, 1-დან 12 წლამდე ასაკის ბავშვებში და 12-დან 18 წლამდე მოზარდებში.

პრეპარატის გამოყენებისას უნდა გავითვალისწინოთ ოფიციალური რეკომენდაციები ანტიბაქტერიული პრეპარატების სათანადო გამოყენების შესახებ.

გამოყენების წესი და დოზირება

დოზირება

მოზრდილები და 1 წელზე უფროსი ასაკის ბავშვები: პირველი 2 დღის განმავლობაში ხდება ხსნარის 1-2 წვეთის ჩაწვეთება  დაზიანებულ თვალში (თვალებში) ყოველ 2 საათში სიფხიზლის დროს, 8-ჯერამდე დღეში, შემდეგ 4-ჯერ დღეში მომდევნო 3-5 დღის განმავლობაში.

ადგილობრივად რამდენიმე ოფთალმოლოგიური პრეპარატის ერთდროული გამოყენებისას აუცილებელია ინსტილაციებს შორის 15 წუთიანი ინტერვალის დაცვა.

საწვეთურის და ხსნარის მიკრობული დაბინძურების თავიდან ასაცილებლად, მოერიდეთ საწვეთურის წვერის კონტაქტს ქუთუთოებთან და თვალის ირგვლივ ქსოვილებთან. 

მკურნალობის ხანგრძლივობა დამოკიდებულია დაავადების სიმძიმეზე, დაავადების კლინიკურ და ბაქტერიოლოგიურ მიმდინარეობაზე და ჩვეულებრივ შეადგენს 5 დღეს.

პრეპარატის უსაფრთხოება და ეფექტურობა ახალშობილებში რქოვანას წყლულების და  ბლენორეის მკურნალობის დროს დადგენილი არ არის.

პაციენტთა განსაკუთრებული ჯგუფები

ხანდაზმული პაციენტები

დოზის კორექცია საჭირო არ არის.

ბავშვები

ლევოქსიმედის გამოყენება არ არის რეკომენდებული 1 წლამდე ასაკის ბავშვებში, უსაფრთხოებისა და ეფექტურობის შესახებ ინფორმაციის არარსებობის გამო.

გამოყენების წესი

მხოლოდ ადგილობრივი გამოყენებისთვის ოფთალმოლოგიაში.

უკუჩვენებები

ჰიპერმგრძნობელობა ლევოფლოქსაცინის, სხვა ქინოლონების ან პრეპარატის ნებისმიერი დამხმარე ნივთიერების მიმართ.

არასასურველი რეაქციები

ლევოქსიმედი შეიცავს ბენზალკონიუმის ქლორიდს, როგორც კონსერვანტს, რომელმაც აქტიური ნივთიერების მსგავსად, შეუძლია გამოიწვიოს კონტაქტური დერმატიტი და/ან თვალის გაღიზიანება.

ქვემოთ ჩამოთვლილი არასასურველი რეაქციები დაფიქსირდა ლევოფლოქსაცინის შემცველი თვალის წვეთების კლინიკური კვლევების დროს და მარკეტინგული პერიოდის განმავლობაში.

არასასურველი რეაქციები შეიძლება აღინიშნოს პაციენტების დაახლოებით 10%-ში.

არასასურველი რეაქციები, როგორც წესი, ვლინდება მსუბუქიდან ზომიერ ფორმით, არის დროებითი და ჩვეულებრივ შემოიფარგლება თვალის სიმპტომებით.

არასასურველი რეაქციების სიხშირის პარამეტრები განისაზღვრება შემდეგნაირად: ძალიან ხშირად (≥ 1/10); ხშირად (≥ 1/100, მაგრამ <1/10); არახშირად (≥ 1/1000, მაგრამ <1/100); იშვიათად (≥ 1/10000, მაგრამ <1/1000); ძალიან იშვიათად (<1/10000); სიხშირე უცნობია (შეუძლებელია შეფასდეს არსებული მონაცემებით).

იმუნური სისტემის მხრივ: იშვიათად - ექსტრა-ოკულური ალერგიული რეაქციები, მათ შორის კანის გამონაყარი; ძალიან იშვიათად - ანაფილაქსია.

ნერვული სისტემის მხრივ: იშვიათად - თავის ტკივილი.

მხედველობის ორგანოს მხრივ: ხშირად - წვა თვალებში, მხედველობის სიმახვილის დაქვეითება, ლორწოს გამოჩენა ძაფების სახით; არახშირად - ბლეფარიტი, ქემოზი, კონიუნქტივის პაპილარული რეაქცია, ქუთუთოების შეშუპება, დისკომფორტი, ქავილი, თვალის ტკივილი, კონიუნქტივის ჰიპერემია, კონიუნქტივის ფოლიკულოზი, თვალების სიმშრალე, ქუთუთოების ერითემა, ფოტოფობია.

კლინიკურ კვლევებში არ დაფიქსირებულა რქოვანაზე პრეციპიტატების შემთხვევები.

სასუნთქი სისტემის, გულმკერდის და შუასაყარის ორგანოების მხრივ: არახშირად - რინიტი; ძალიან იშვიათად - ხორხის შეშუპება.

იყო შეტყობინებები მხრის, მტევნების ძვლების მოტეხილობების, აქილევსის და სხვა მყესების რღვევის შემთხვევების შესახებ, რაც საჭიროებდა ქირურგიულ აღდგენას ან იწვევდა ხანგრძლივ ინვალიდობას პაციენტებში, რომლებიც იღებდნენ სისტემურ ფტორქინოლონებს. სისტემური ქინოლონების კვლევები და პოსტმარკეტინგული გამოცდილება მიუთითებს, რომ ასეთი დაზიანების რისკი შეიძლება გაიზარდოს პაციენტებში, რომლებიც იღებენ კორტიკოსტეროიდებს, განსაკუთრებით ხანდაზმულ პაციენტებში, ასევე  მყესებისთვის, რომლებიც განიცდიან მაღალ დატვირთვას, აქილევსის მყესის ჩათვლით. 

ბავშვები

მოსალოდნელია, რომ ბავშვებში არასასურველი რეაქციების სიხშირე, ტიპი და სიმძიმე იქნება იგივე, რაც მოზრდილებში.

შეტყობინებები საეჭვო არასასურველი რეაქციების შესახებ 

შეტყობინებები საეჭვო არასასურველი რეაქციების შესახებ სამკურნალო საშუალების რეგისტრაციის შემდეგ მნიშვნელოვანია. თუ პაციენტს გამოუვლინდა სერიოზული არასასურველი რეაქცია სამკურნალო საშუალებაზე ან ახალი არასასურველი რეაქციის აღნიშვნის შემთხვევაში, რომელიც არ არის აღწერილი ამ ნაწილში, გთხოვთ, მოახდინოთ ინფორმირება ფარმაკოზედამხედველობის ეროვნული სისტემის შესაბამისად.

განსაკუთრებული მითითებები

ლევოქსიმედი არ უნდა იქნას შეყვანილი სუბკონიუნქტივალურად და უშუალოდ თვალის წინა საკანში.

როგორც სხვა ანტიმიკრობული პრეპარატების შემთხვევაში, ლევოფლოქსაცინის ხანგრძლივმა გამოყენებამ თვალის წვეთების სახით შეიძლება გამოიწვიოს რეზისტენტული მიკროორგანიზმების, ასევე სოკოების ზრდა.  თუ კლინიკური სურათი გაუარესდება ან არ გაუმჯობესდება გონივრულ ვადაში, სამკურნალო პრეპარატი უნდა მოიხსნას და დაიწყოს ალტერნატიული თერაპია. კლინიკური აუცილებლობის შემთხვევაში, პაციენტი უნდა შემოწმდეს ისეთი მეთოდის გამოყენებით, რომელიც იძლევა გადიდების საშუალებას, მაგალითად ჭრილი ნათურით ბიომიკროსკოპია, ან, საჭიროების შემთხვევაში, გამოყენებული იქნას ფლუორესცეინით შეფერადების მეთოდი.

ფტორქინოლონებმა სისტემური გამოყენებისთვის  შეიძლება გამოიწვიონ ჰიპერმგრძნობელობის რეაქციები ერთჯერადი გამოყენების შემდეგაც კი. ლევოფლოქსაცინზე ალერგიული რეაქციების აღნიშვნისას უნდა შეწყვდეს თვალის წვეთების გამოყენება.

ფტორქინოლონების, მათ შორის ლევოფლოქსაცინის, სისტემური გამოყენებისას შეიძლება აღინიშნოს მყესის ანთება და გაწყვეტა, განსაკუთრებით ხანდაზმულ პაციენტებში და იმ პაციენტებში, ვინც ერთდროულად მკურნალობს კორტიკოსტეროიდებით. ამასთან დაკავშირებით სიფრთხილე უნდა იქნას დაცული და ლევოფლოქსაცინის შემცველი პრეპარატებით მკურნალობა უნდა შეწყდეს მყესის ანთების პირველივე ნიშნების დროს.

ლევოქსიმედი შეიცავს კონსერვანტს ბენზალკონიუმის ქლორიდს. პრეპარატის გამოყენებამდე უნდა მოიხსნათ კონტაქტური ლინზები და გაიკეთოთ ჩაწვეთებიდან არა უადრეს 15 წუთის შემდეგ. ბენზალკონიუმის ქლორიდი ცვლის რბილი კონტაქტური ლინზების ფერს. 

თვალის ზედაპირული ბაქტერიული ინფექციის სიმპტომების დროს პაციენტებმა თავი უნდა შეიკავონ ნებისმიერი ტიპის კონტაქტური ლინზების ტარებისაგან.

იყო შეტყობინებები, რომ ბენზალკონიუმის ქლორიდი იწვევს თვალის გაღიზიანებას, თვალის სიმშრალეს და შეიძლება უარყოფითად იმოქმედოს საცრემლე აპკსა და რქოვანას ზედაპირზე.

პრეპარატი სიფრთხილით უნდა იქნას გამოყენებული მშრალი თვალის სინდრომის მქონე პაციენტებში და პაციენტებში, რომლებსაც შეიძლება დაზიანებული ჰქონდეთ რქოვანა. პრეპარატის ხანგრძლივი გამოყენებისას საჭიროა პაციენტების მონიტორინგი.

ბავშვები 

გამოყენებასთან დაკავშირებული გაფრთხილებები და სიფრთხილის ზომები იგივეა მოზრდილებში და 1 წელზე უფროსი ასაკის ბავშვებში.

შეუთავსებლობა

თავსებადობის კვლევების არ არსებობის გამო, ეს პრეპარატი არ უნდა იყოს შერეული სხვა პრეპარატებთან.

ზეგავლენა ავტოტრანსპორტის ტარების და მექანიზმების მართვის უნარზე

ოფთალმოლოგიური გამოყენებისას პრეპარატი უმნიშვნელოდ მოქმედებს ავტომობილის ტარების  და მექანიზმების მართვის უნარზე, რომლებიც საჭიროებენ ფსიქომოტორული რეაქციების მომატებულ სიჩქარეს. მხედველობის შესაძლო დარღვევის გამო, რომელიც აღინიშნება პრეპარატის ჩაწვეთებისთანავე, მხედველობის ნორმალიზებამდე უარი უნდა ითქვას მანქანის  და პოტენციურად სახიფათო მექანიზმების მართვაზე. 

ფერტილობა, გამოყენება ორსულობისა და ლაქტაციის დროს

ორსულობა

არ არსებობს მონაცემები ორსულ ქალებში ლევოფლოქსაცინის გამოყენების შესახებ.

ცხოველებზე ჩატარებულმა კვლევებმა არ მიუთითა პირდაპირ ან არაპირდაპირ მავნე ზემოქმედებაზე  რეპროდუქციულ ტოქსიკურობასთან მიმართებაში. პოტენციური რისკი ადამიანებისთვის უცნობია. 

ლევოქსიმედი ორსულობის დროს უნდა იქნას გამოყენებული მხოლოდ იმ შემთხვევაში, თუ დედისთვის პოტენციური სარგებელი აღემატება ნაყოფისთვის პოტენციურ რისკს.

ლაქტაცია

ლევოფლოქსაცინი გამოიყოფა დედის რძეში. თუმცა, თერაპიულ დოზებში გამოყენებისას, არ არის მოსალოდნელი არასასურველი ეფექტების განვითარება მეძუძურ ბავშვებში. 

ლევოქსიმედი უნდა იქნას გამოყენებული ლაქტაციის პერიოდში მხოლოდ იმ შემთხვევაში, თუ დედისთვის პოტენციური სარგებელი აღემატება ჩვილისთვის პოტენციურ რისკს.

ფერტილობა

ლევოფლოქსაცინი არ იწვევდა ფერტილობის რაიმე დარღვევას ვირთაგვებში ზემოქმედების დროს, რომელიც მნიშვნელოვნად აღემატებოდა ადამიანზე მაქსიმალურ ზემოქმედებას ოფთალმოლოგიური გამოყენების შემდეგ. 

ურთიერთქმედება სხვა სამკურნალო საშუალებებთან

ადგილობრივი გამოყენებისთვის ლევოფლოქსაცინის სხვა სამკურნალო საშუალებებთან ურთიერთქმედების  სპეციალური კვლევები არ ჩატარებულა. 

ლევოფლოქსაცინის მაქსიმალური კონცენტრაცია პლაზმაში ადგილობრივი გამოყენების შემდეგ მინიმუმ 1000-ჯერ ნაკლებია, ვიდრე სტანდარტული დოზების პერორალური მიღებისას. 

ნაკლებად სავარაუდოა, რომ ურთიერთქმედება სხვა სამკურნალო საშუალებებთან, დამახასიათებელი სისტემური გამოყენებისთვის, კლინიკურად მნიშვნელოვანი იყოს.

ბავშვები

ურთიერთქმედების კვლევები არ ჩატარებულა.

ჭარბი დოზირება

ფლაკონში არსებული ლევოფლოქსაცინის საერთო რაოდენობა არასაკმარისია იმისათვის, რომ გამოიწვიოს ტოქსიკური რეაქციები შიგნით შემთხვევით მიღების შემდეგ. აუცილებლობის შემთხვევაში უნდა დაინიშნოს სიმპტომური მკურნალობა და პაციენტის დაკვირვება. ლევოქსიმედის თვალის წვეთების გადაჭარბებული დოზის ადგილობრივი გამოყენების შემდეგ, თვალები უნდა ჩამოიბანოთ ოთახის ტემპერატურის სუფთა (ონკანის) წყლით.  

ბავშვები

დოზის გადაჭარბების შემთხვევაში, აუცილებლად მისაღები ზომები ერთნაირია მოზრდილებში და 1 წელზე უფროსი ასაკის ბავშვებში.

გამოშვების ფორმა

5 მლ თვალის წვეთები თეთრ პოლიეთილენის ფლაკონ-საწვეთურით, თეთრი ხრახნიანი დამცავი თავსახურით, აღჭურვილი დამცავი რგოლით.

1 ფლაკონი სამედიცინო გამოყენების ინსტრუქციასთან ერთად მუყაოს კოლოფში.

შენახვის პირობები

ინახება არა უმეტეს 25°C ტემპერატურაზე.

ინახება ბავშვებისთვის მიუწვდომელ ადგილას!

ფლაკონის გახსნის შემდეგ პრეპარატი გამოყენებული უნდა იქნას 28 დღის განმავლობაში.

ვარგისობის ვადა

3 წელი წარმოების თარიღიდან. 

არ გამოიყენოთ ვარგისობის ვადის გასვლის შემდეგ.

აფთიაქებიდან გაცემის პირობები                                  

ფარმაცევტული პროდუქტის ჯგუფი III, გაიცემა რეცეპტის გარეშე.