კორდარონი - Cordarone 200მგ 30 ტაბლეტი

კორდარონი®, 200 მგ, ტაბლეტები  
მოქმედი ნივთიერება: ამიოდარონის ჰიდროქლორიდი

პრეპარატის გამოყენებამდე სრულად წაიკითხეთ ჩანართი, რადგან ის შეიცავს თქვენთვის მნიშვნელოვან ინფორმაციას
•    შეინახეთ ჩანართი. შეიძლება, კვლავ დაგჭირდეთ მისი გადაკითხვა. 
•    თუ დამატებითი კითხვები გაგიჩნდათ, მიმართეთ მკურნალ ექიმს ან მედდას.
•    პრეპარატი დაგენიშნათ პირადად თქვენ. არ გადასცეთ ის სხვა პირებს. მან შეიძლება ზიანი მიაყენოს მათ იმ შემთხვევაშიც კი, თუ მათი დაავადების სიმპტომები თქვენსას ემთხვევა.   
•    თუ გამოგივლინდათ რომელიმე არასასურველი რეაქცია, მიმართეთ მკურნალ ექიმს, ფარმაცევტს ან მედდას. ეს რეკომენდაცია ეხება ნებისმიერ შესაძლო არასასურველ რეაქციას, მათ შორის ისეთებს, რომლებიც არ არის მითითებული ჩანართის მე-4 პარაგრაფში.  

ჩანართის შინაარსი:

1.    რას წარმოადგენს პრეპარატი კორდარონი® და რისთვის გამოიყენება  
2.    რა უნდა იცოდეთ პრეპარატ კორდარონის® გამოყენებამდე 
3.    პრეპარატ კორდარონის® გამოყენება 
4.    შესაძლო არასასურველი რეაქციები 
5.    პრეპარატ კორდარონის® შენახვა    
6.    შეფუთვის შიგთავსი და დამატებითი ინფორმაცია 

1. რას წარმოადგენს პრეპარატი კორდარონი® და რისთვის გამოიყენება  

კორდარონის® 200 მგ ტაბლეტები შეიცავს მოქმედ ნივთიერებას ამიოდარონის ჰიდროქლორიდს და მიეკუთვნება ანტიარითმული სამკურნალო საშუალებების ჯგუფს. პრეპარატი არეგულირებს გულის მოქმედებას, ის გამოიყენება გულის რიტმის დარღვევების სამკურნალოდ. 
პრეპარატი გამოიყენება შემდეგი დაავადებების პროფილაქტიკისთვის: 
•    რიტმის საშიში პარკუჭოვანი დარღვევების (მაგალითად, პარკუჭოვანი ტაქიკარდია, პარკუჭების ფიბრილაცია) პროფილაქტიკა; 
•    ვოლფ-პარკინსონ-უაიტის სინდრომით გამოწვეული რიტმის დარღვევების (ტაქიარითმიის) პროფილაქტიკა; 
•    რიტმის სხვა დარღვევების (მაგალითად, წინაგულების ფიბრილაცია, სუპრავენტრიკულური ტაქიკარდია) პროფილაქტიკა, თუ სხვა პრეპარატებს არ აქვს სათანადო მოქმედება ან მათი გამოყენება უკუნაჩვენებია. 
კორდარონი® შესაფერისია მაღალი ხარისხის რისკის (გულის სიმპტომური უკმარისობა, პარკუჭების ფუნქციების დაქვეითება მიოკარდიუმის ინფარქტის შემდეგ) მქონე პაციენტებში რიტმის დარღვევების შედეგად სიკვდილის თავიდან ასაცილებლად. 
გამოიყენება შემდეგი დაავადებების სამკურნალოდ: 
•    რიტმის დარღვევების (წინაგულების ფიბრილაცია და ფრიალი) შემთხვევაში გამოყენება შეიძლება გულის შეკუმშვათა სიხშირის შენელებისთვის ან სინუსური რიტმის აღდგენისთვის.  

ასევე, იხილეთ: Amiokordin - ამიოკორდინი 200 მგ. 60 ტაბლეტი

2. რა უნდა იცოდეთ პრეპარატ კორდარონის® გამოყენებამდე

არ მიიღოთ კორდარონის® ტაბლეტები:
•    თუ გაქვთ ალერგია იოდის, ამიოდარონის ჰიდროქლორიდის ან პრეპარატის ნებისმიერი დამხმარე ნივთიერების მიმართ (ჩამოთვლილია პუნქტში 6); 
•    თუ ცნობილია, რომ გაქვთ გულის გარკვეული დაავადებები (გულის პათოლოგიურად ნელი ფუნქციონირება, გულის გამტარობის ზოგიერთი დარღვევა) და არ გაქვთ ჩადგმული მუდმივი კარდიოსტიმულატორი (რიტმის მარეგულირებელი მოწყობილობა); 
•    თუ გაქვთ ფარისებრი ჯირკვლის ფუნქციის დარღვევა;
•    თუ იღებთ სხვა პრეპარატებს, რომლებსაც ასევე შეუძლია გავლენა იქონიოს გულის მოქმედებაზე (იხ. პარაგრაფი “სხვა სამკურნალო საშუალებები და პრეპარატი კორდარონი®”); 
•    თუ ხართ ორსულად (გამონაკლისი შემთხვევების გარდა) ან ბავშვს ძუძუთი კვებავთ (იხ. პარაგრაფი “ორსულობა და ძუძუთი კვება”).

განსაკუთრებული მითითება და უსაფრთხოების ზომები 
პრეპარატ კორდარონის® გამოყენებამდე კონსულტაციისთვის მიმართეთ მკურნალ ექიმს, თუ გაქვთ ან წარსულში გქონდათ ნებისმიერი შემდეგი მდგომარეობა ან დაავადება:  
•    ფილტვების ნებისმიერი დაავადება ან ასთმა (ხველის, ქოშინის შემთხვევები შეიძლება მიუთითებდეს ფილტვების დაზიანებაზე); 
•    გულის დაავადება; 
•    ღვიძლის დაავადებები; 
•    ადრე ნამკურნალები ფარისებრი ჯირკვლის დაავადება; 
•    თუ დაგეგმილი გაქვთ ქირურგიული ჩარევა, უნდა აცნობოთ ექიმ-ანესთეზიოლოგს, რომ იღებთ კორდარონს®;
•    თუ გაქვთ მხედველობასთან დაკავშირებული რაიმე პრომლება (კერძოდ, მხედველობის ნერვის ნევრიტი). მკურნალობის პერიოდში და მკურნალობიდან რამდენიმე თვის განმავლობაში თავი უნდა დაიცვათ მზის სხივებისგან და უი-გამოსხივებისგან, ან/და დაიცვათ კანი მზისგან, რადგან პრეპარატს შეიძლება ჰქონდეს ფოტოსენსიბილიზაციის მოქმედება;
•    თუ ხართ გულის გადანერგვის მოლოდინში, მკურნალ ექიმს შეუძლია შეცვალოს მკურნალობა. ეს განპირობებულია იმით, რომ გულის გადანერგვამდე ამიოდარონის გამოყენებას თან ახლავს სიცოცხლისთვის საშიში გართულების განვითარების მომატებული რისკი (ტრანსპლანტატის პირველადი დისფუნქცია): გადანერგილი გული სათანადოდ არ ფუნქციონირებს ოპერაციიდან პირველი 24 საათის განმავლობაში. 
•    ბავშვთა ასაკი: ბავშვებში გამოყენება რეკომენდებული არ არის. 

პრეპარატის გამოყენების დროს პერიოდულად უნდა გაიაროთ ექიმის მიერ დანიშნული ზოგიერთი საკონტროლო კვლევა: კარდიოლოგიური შემოწმება, ეკგ, გულ-მკერდის ორგანოების რენტგენოლოგიური კვლევა, ლაბორატორიული კვლევები (ფარისებრი ჯირკვლის ფუნქცია, ღვიძლის ფერმენტები, სისხლში კალიუმის დონე), ასევე ოფთალმოლოგიური გამოკვლევა. 

დამატებითი მონაცემები
•    პრეპარატის გამოყენებისას ცნობილია კანის მძიმე რეაქციების გამოვლენის შესახებ, კერძოდ, კანზე სიცოცხლისთვის პოტენციურად საშიში გამონაყარის შესახებ, როგორიცაა პირის ღრუს, თვალების და საშოს ლორწოვან გარსზე გამონაყარით მიმდინარე დაზიანებები, კანზე ლაქოვანი უბნების წარმოქმნა, რომელიც დაფარულია გამონაყარით (სტივენს-ჯონსონის სინდრომი), და ბუშტუკების წარმოქმნის შესახებ, კანის ზედა საფარის აშრევებით (ტოქსიკური ეპიდერმული ნეკროლიზი), ზოგ შემთხვევაში ლეტალური შედეგით. კანის რეაქციების არსებობისას პრეპარატით მკურნალობა დაუყოვნებლივ უნდა შეწყდეს და საჭიროა ექიმთან მიმართვა.
•    მძიმე, სიცოცხლისთვის პოტენციურად საშიში მდგომარეობები - შენელებული გულისცემა (ბრადიკარდია), გულის გაჩერება (გულის გამტარობის დარღვევები) შეიძლება გამოვლინდეს ცალკეული ანტივირუსული პრეპარატების (ჩ ჰეპატიტის სამკურნალოდ) და კორდარონის® ტაბლეტების ერთდროულად გამოყენებისას. თუ ასეთი მკურნალობა აუცილებელია და მკურნალობის დროს ძალიან მცირდება გულის შეკუმშვათა სიხშირე, არ ისინჯება ან ცუდად ისინჯება პულსი, აღინიშნება ქოშინი, გაბრუება, გულისცემის შეგრძნება, გონების დაკარგვა, დაუყოვნებლივ უნდა მიმართოთ ექიმს. რიტმის ასეთი დარღვევების დადასტურებული მაღალი რისკის მქონე პაციენტებში სოფოსბუვირით კომბინირებული მკურნალობის დაწყებიდან 48 საათის განმავლობაში, საჭიროა დაკვირვება სპეციალიზირებულ სამედიცინო დაწესებულებაში (იხ, პარაგრაფი “სხვა სამკურნალო საშუალებები და პრეპარატი კორდარონი®”).

სხვა სამკურნალო საშუალებები და პრეპარატი კორდარონი®
აცნობეთ მკურნალ ექიმს, რომ იღებთ, ახლო წარსულში იღებდით ან გეგმავთ რომელიმე სხვა პრეპარატის მიღების დაწყებას. 

სხვა სამკურნალო საშუალებასთან ერთად პრეპარატის მიღება შეიძლება მხოლოდ ექიმის დანიშნულებით, რადგან ერთდროულად გამოყენებისას სამკურნალო საშუალებების მოქმედება შეიძლება შეიცვალოს, ასევე შეიძლება გამოვლინდეს არასასურველი რეაქციები. 

დაუშვებელია პრეპარატ კორდარონის® გამოყენება ქვემოთ ჩამოთვლილ სამკურნალო საშუალებებთან ერთად, აცნობეთ ექიმს, თუ იღებთ ქვემოთ მითითებულ რომელიმე პრეპარატს:  
•    გულის რიტმის დარღვევების სამკურნალო ცალკეული სამკურნალო საშუალებები, მაგალითად, ქინიდინის რიგის პრეპარატები, სოტალოლი, ბეპრიდილი; 
•    ზოგიერთი სამკურნალო საშუალება, რომელიც გამოიყენება ფსიქოზების (შიზოფრენიის) სამკურნალოდ (ნეიროლეფსიურები); 
•    სხვა სამკურნალო საშუალებები, როგორიცაა ვინკამინი, ციზაპრიდი, ინტრევანური ერითრომიცინი, საინექციო პენტამიდინი, რადგან ერთდროულად გამოყენებისას შეიძლება განვითარდეს რიტმის პოტენციურად ლეტალური დარღვევები. 

რეკომენდებული არ არის ერთდროულად გამოყენება: 
•    ნაწლავის პერისტალტიკის მასტიმულირებელი საფაღარათო საშუალებები: კალიუმის დაკარგვის გამო იზრდება რიტმის ზოგიერთი დარღვევის განვითარების რისკი. ამიოდარონთან კომბინირებისას საჭიროა სხვა ჯგუფის საფაღარათო საშუალებების გამოყენება. 
•    დილთიაზემი, ვერაპამილი: იზრდება გულისცემის შენელებისა და გულის გამტარობის დარღვევების რისკი, ამიტომ მათი ერთდროულად გამოყენება რეკომენდებული არ არის. 
•    ბეტა-ბლოკერები: შეიძლება განვითარდეს გულის ფუნქციონირებისა და გულის გამტარობის დარღვევა. 
•    საჭიროა ფტორქინოლონური ანტიბიოტიკების გამოყენებისგან თავის შეკავება. 
•    ამიოდარონით მკურნალობის პერიოდში რეკომენდებულია ჩYP3A4-ის ფერმენტის ინჰიბიტორების (მაგალითად, კლარითრომიცინი, გრეიპფრუტის წვენი) გამოყენებისგან თავის შეკავება. 
•    რეკომენდებული არ არის ჩ ჰეპატიტის ვირუსის საწინააღმდეგო პრეპარატებთან (სოფოსბუვირი ჩ ჰეპატიტის ვირუსის საწინააღმდეგო სხვა პრეპარატებთან, მაგალითად დაკლატასვირი, სიმეპრევირი, ლედიპასვირი, კომბინაციაში) ერთდროულად გამოყენება, რადგან ამ შემთხვევაში იზრდება გულისცემის შენელებისა და გულის გაჩერების რისკი (იხ. პარაგრაფი 2). 

ამ პრეპარატებთან ერთდროულად გამოყენება საჭიროებს ექიმის შეფასებას: 
•    სისხლში კალიუმის დონის დამაქვეითებელი სამკურნალო საშუალებები (იზრდება რიტმის ცალკეული დარღვევების რისკი): ზოგიერთი (ერთკომპონენტიანი ან კომბინირებული) დიურეზული, გლუკო-, მინერალოკორტიკოიდები, ტეტრაკოზაქტიდი, ამფოტერიცინი B. მნიშვნელოვანია ჰიპოკალიემიის განვითარების თავიდან აცილება და მისი კორეგირება, განვითარების შემთხვევაში. 
•    ანტიკოაგულანტური ტაბლეტები (ვარფარინი, დაბიგატრანი); შეიძლება საჭირო იყოს დოზირების შეცვლა. 
•    ფუტკარას პრეპარატები: შეიძლება განვითარდეს გამტარობის დარღვევები, რიტმის დარღვევები.
•    ფენიტოინი: სისხლის პლაზმაში ფენიტოინის კონცენტრაციის მომატებას თან ახლავს დოზის გადაჭარბების ნიშნები, პირველ რიგში, სიმპტომებით ნერვული სისტემის მხრივ. 
•    ციკლოსპორინი: იზრდება თირკმელების დაზიანების რისკი. 
•    ფლეკაინიდი: შეიძლება გაიზარდოს პლაზმაში ფლეკაინიდის დონე, საჭიროა ფლეკაინიდის დოზირების შეცვლა. 
•    ჩYP3A4-ის ფერმენტის მეტაბოლიზატორ სხვა პრეპარატებთან ერთდროულად გამოყენებისას მათი ტოქსიკურობა შეიძლება გაიზარდოს: მაგალითად, ფენტანილი, ლიდოკაინი, სილდენაფილი, მიდაზოლამი, ტრიაზოლამი, დიჰიდროერგოტამინი, ერგოტამინი, კოლხიცინი. 
•    სისხლში ლიპიდების (ცხიმების) დონის დამაქვეითებელი გარკვეული სტატინები, მაგალითად სიმვასტატინი, ლოვასტატინი, ატორვასტატინი. 
•    ზოგადი საანესთეზიო საშუალებების ერთდროულად გამოყენებისას ცნობილია მძიმე გართულებების შესახებ. ერთეულ შემთხვევებში, უშუალოდ ქირურგიული ჩარევის შემდეგ აღინიშნა მძიმე რესპირატორული დარღვევები. არსებობს მოსაზრება ჟანგბადის ტოქსიკური მოქმედების შესაძლო გაძლიერების შესახებ. 
•    გულისცემის ან/და გულის გამტარობის შენელების გამომწვევ პრეპარატებთან ერთად: საჭიროა კლინიკური დაკვირვება და ეკგ კონტროლი. 
•    სხვადასხვა ჯგუფის პრეპარატებთან, რომლებიც გამოიყენება რიტმის დარღვევების სამკურნალოდ: შესაძლებელია სასიკეთო მოქმედება, მაგრამ საჭიროა მკაცრი დაკვირვება და ეკგ მონიტორინგი.
შეიძლება საჭირო იყოს ზემოაღნიშნული პრეპარატების დოზის კორექტირება პრეპარატ კორდარონი® 200 მგ-თან ერთდროულად გამოყენების შემთხვევაში. ამასთან დაკავშირებით, კორდარონთან მკურნალობის დაწყებამდე აცნობეთ მკურნალ ექიმს, რომ იღებთ, ახლო წარსულში იღებდით ან გეგმავთ რომელიმე სხვა პრეპარატის მიღების დაწყებას. 

პრეპარატ კორდარონის® მიღება საკვებთან და სასმელებთან ერთად
პრეპარატ კორდარონის® მიღების დროს რეკომენდებული არ არის გრეიპფრუტის წვენის მიღება, რადგან მას შეუძლია გაზარდოს სისხლში ამიოდარონის კონცენტრაცია. 

ორსულობა და ძუძუთი კვება
თუ ხართ ორსულად ან ბავშვს ძუძუთი კვებავთ, ფიქრობთ, რომ ხართ ორსულად ან გეგმავთ ორსულობას, პრეპარატის მიღების დაწყებამდე კონსულტაციისთვის მიმართეთ მკურნალ ექიმს. 
ორსულობა:
კორდარონი® გავლენას ახდენს ნაყოფის ფარისებრი ჯირკვლის ფუნქციონირებაზე. ამიტომ, მკურნალობის დროს ამიოდარონით მკურნალობა უკუნაჩვენებია, განსაკუთრებული შემთხვევების გარდა. 
ძუძუთი კვება: 
იმის გათვალისწინებით, რომ ამიოდარონი გადადის დედის რძეში, ლაქტაციის პერიოდში მისი გამოყენება უკუნაჩვენებია. 

სატრანსპორტო საშუალებების მართვა და მექანიზმებთან მუშაობა
ამიოდარონის მიღების შედეგად მხედველობის დარღვევების განვითარების შემთხვევაში შეიძლება გაუარესდეს სატრანსპორტო საშუალებების მართვის ან სხვა მექანიზმებთან მუშაობის უნარი. 

პრეპარატი კორდარონი® შეიცავს ლაქტოზის მონოჰიდრატს
პრეპარატ კორდარონში® რძის შაქრის (ლაქტოზის მონოჰიდრატის) შემცველობა შეადგენს 71.0 მგ-ს ერთ ტაბლეტში. თუ მკურნალი ექიმისგან თქვენთვის ცნობილია, რომ გაქვთ მგრძნობელობა შაქრის ზოგიერთი სახეობის მიმართ, ამ პრეპარატის მიღების დაწყებამდე მიმართეთ ექიმს. 

3. პრეპარატ კორდარონის® მიღება

პრეპარატი უნდა მიიღოთ მკურნალი ექიმის მიერ დანიშნული დოზირების და მიღების დროის მკაცრად დაცვით. დოზირებასთან დაკავშირებით ეჭვის არსებობის შემთხვევაში მიმართეთ მკურნალ ექიმს ან ფარმაცევტს. 

თუ სხვა დანიშნულება არ არის მოცემული მკურნალი ექიმის მიერ, რეკომენდებული დოზაა: 
დამტვირთავი დოზა ჩვეულებრივ შეადგენს ერთ ტაბლეტს სამჯერ დღეში 8-10 დღის განმავლობაში, შემდეგ მკურნალი ექიმი ნიშნავს შემანარჩუნებელ დოზას ნახევარი ტაბლეტიდან ორ ტაბლეტამდე დღეში. 
თუ ექიმი ნიშნავს ½ ტაბლეტს, მისი გაყოფა მარტივად შეიძლება ორ ნაწილად. 

გამოყენება ბავშვებსა და მოზარდებში
ბავშვებში ეფექტიანობისა და უსაფრთხოების შესახებ მონაცემები შეზღუდულია. თქვენი ბავშვისთვის შესაბამის დოზას განსაზღვრავს ექიმი. 

თუ მიიღეთ პრეპარატ კორდარონის® საჭიროზე მეტი დოზა
აცნობეთ თქვენს ექიმს ან მიმართეთ უახლოესი საავადმყოფოს გადაუდებელი დახმარების განყოფილებას, რადგან შეიძლება დაგჭირდეთ სამედიცინო დახმარება. 
სიმპტომები: შენელებული გულისცემა, სისხლის მიმოქცევის უკმარისობა, რიტმის დარღვევები, ღვიძლის დაზიანებები. 

თუ დაგავიწყდათ პრეპარატ კორდარონის® მიღება 
თუ გამოტოვეთ პრეპარატის ერთი დოზა, მიიღეთ ის როგორც კი გაგახსენდებათ, მაგრამ თუ უკვე მომდევნო დოზის მიღების დრო მოახლოვდა, გამოტოვეთ დავიწყებული დოზა. არ მიიღოთ ორმაგი დოზა გამოტოვებულის ასანაზღაურებლად, რადგან ამ შემთხვევაში ადგილი ექნება დოზის გადაჭარბების რისკს. 

4. შესაძლო არასასურველი რეაქციები

როგორც ყველა სამკურნალო საშუალებას, მოცემულ პრეპარატსაც შეუძლია გამოიწვიოს არასასურველი რეაქციები, თუმცა ის არ ვლინდება ყველა პაციენტში.   

ძალიან ხშირად (შეიძლება განვითარდეს 10-დან 1-ზე მეტ ადამიანში):
•    მხედველობის დარღვევებისას (არამკვეთრი მხედველობა, მხედველობის სიმკვეთრის დაქვეითება, ფერადი რგოლების დანახვა მზის სინათლის გარშემო) საჭიროა სრული ოფთალმოლოგიური გამოკვლევა (მხედველობის მძიმე დაზიანებების განვითარების თავიდან ასაცილებლად). მკურნალობის დასრულების შემდეგ ეს მოვლენები ალაგდება. 
•    დარღვევები კუჭ-ნაწლავის ტრაქტის მხრივ (ღებინება, გულისრევა, გემოს შეგრძნებების დარღვევები). ჩვეულებრივ დოზის შემცირებასთან ერთად აღინიშნება მათი ალაგება. 
•    მკურნალობის დასაწყისში ღვიძლის ფერმენტების მნიშვნელობების ზომიერი მომატება;
•    ფოტოსენსიბილიზაცია. 

ხშირად (შეიძლება განვითარდეს 10-დან არაუმეტეს 1 ადამიანში): 
•    გულისცემის შენელება (ბრადიკარდია);
•    ფარისებრი ჯირკვლის ფუნქციების დარღვევები (ფუნქციის დაქვეითება ან გაზრდა, რაც ზოგ შემთხვევაში შეიძლება იწვევდეს ლეტალურ შედეგს). საყურადღებოა შემდეგი სიმპტომების გამოვლენა: წონის მატება, აპათია, ძილიანობა, მნიშვნელოვნად შენელებული პულსი, ასევე წონის დაუდგენელი მიზეზით შემცირება, გულის პრობლემების განვითარება, ფსიქიატრიული სიმპტომები. 
•    ღვიძლის დაავადებების განვითარება (ზოგჯერ ლეტალური შედეგით), რაც  ხასიათდება ლაბორატორიული კვლევების შედეგების გადაცდომებით, ზოგჯერ სიყვითლით; 
•    ტრემორი, კოშმარები, ძილის დარღვევები; 
•    შეკრულობა; 
•    კანზე გამონაყარი ქავილით (ეგზემა); 
•    სუნთქვის დარღვევები, ხველა, ქოშინი - შეიძლება იყოს ფილტვების ანთებითი დაავადებების სიმპტომები (მაგალითად, შემაერთებელი ქსოვილების ანთება, ფიბროზი, პლევრიტი, სპეციფიკური პნევმონია), და პოტენციურად შეიძლება იწვევდეს ლეტალურ შედეგს; 
•    კანის მონაცრისფრო ან მოცისფერო პიგმენტაცია მაღალი დღიური დოზებით ხანგრძლივი მკურნალობისას; მკურნალობის შეწყვეტის შემდეგ ეს ლაქები კანზე თანდათანობით ქრება. 

არც ისე ხშირად (შეიძლება განვითარდეს 100-დან არაუმეტეს 1 ადამიანში):   
•    გულის რიტმის, გულის გამტარობის დარღვევები. აღწერილია გულის გაჩერების შემთხვევები არითმიის განვითარების ან მისი გაუარესების შემდეგ. აქტუალური მონაცემების საფუძველზე შეუძლებელია იმის დადგენა, იყო თუ არა ეს შემთხვევები გამოწვეული პრეპარატების მიღებით, გულის მდგომარეობით თუ არაეფექტიანი მკურნალობით. ამიოდარონის არითმოგენური ეფექტი უფრო იშვიათად აღინიშნა, ვიდრე სხვა ანტიარითმული საშუალებების გამოყენებისას, და ჩვეულებრივ ვლინდება გარკვეულ სამკურნალო საშუალებებთან კომბინაციაში ან ელექტროლიტური ბალანსის დარღვევებისას. 
•    ნევრალგია ან მიალგია; 
•    სიმშრალე პირის ღრუში. 

ძალიან იშვიათად (შეიძლება განვითარდეს 10000-დან არაუმეტეს 1 ადამიანში):   
•    ცვლილებები სისხლის ანალიზში (სხვადასხა ტიპის ანემია, თრომბოციტების რიცხვის შემცირება), დაღლილობა;
•    მნიშვნელოვნად შენელებული გულისცემა, განსაკუთრებით ხანდაზმულებში (ზოგერ შეიძლება განვითარდეს გულის გაჩერება), რაც იწვევს მიღების შეწყვეტის აუცილებლობას; 
•    მხედველობის ნერვის დაზიანება ან ანთება, რის შედეგადაც შეიძლება განვითარდეს სიბრმავე; 
•    ღვიძლის ქრონიკული დაავადებები (ჰეპატიტი, ციროზი), ზოგჯერ ლეტალური შედეგით; 
•    სისხლში კრეატინინის დონის მომატება; 
•    თავის ტკივილი, კეთილთვისებიანი ქალაშიდა ჰიპერტენზია, არამკვეთრი სიარული (მოძრაობის დარღვევა); 
•    იმპოტენცია, სათესლე ჯირკვლის დანამატების ანთება; 
•    მსტვინავი სუნთქვა ბრონქების შევიწროების გამო პაციენტებში, რომლებსაც აქვთ სუნთქვის მძიმე უკმარისობა და ასთმა; 
•    ქოშინი, შეიძლება იყოს სასუნთქი სისტემის დაავადებების - სუნთქვის უკმარისობის სიმპტომები (ეგრედ წოდებული მწვავე რესპირატორული დისტრეს-სინდრომი მოზრდილებში (AღDშ)), ზოგჯერ ლეტალური შედეგით. ჩვეულებრივ შეიძლება განვითარდეს უშუალოდ ქირურგიული ჩარევის შემდეგ. 
•    ვასკულიტი;
•    კანზე გამონაყარი, თმის ცვენა, ექსფოლიაციური დერმატიტი;
•    ცუდი გუნება-განწყობა, ცნობიერების არევა ან სისუსტის შეგრძნება, გულისრევა, უმადობა, გაღიზიანებადობა. ეს შეიძლება მიუთითებდეს ანტიდიურეზული ჰორმონის  არაადეკვატური სეკრეციის სინდრომზე. 

სიხშირე უცნობია (არსებული მონაცემების საფუძველზე განვითარების სიხშირის დადგენა შეუძლებელია): 
•    სხეულის მომატებული ტემპერატურა, ყელის ტკივილი, წყლულები პირის ღრუს ლორწოვან გარსებზე (ნეიტროპენია);
•    გარკვეული ტიპის ლეიკოციტების ძალიან დაბალი რიცხვი (აგრანულოციტოზი); 
•    მძიმე ალერგიული რეაქცია (ანაფილაქსიური რეაქცია, ანაფილაქსიური შოკი), რომლის ნიშნები, სხვებთან ერთად, არის ჭინჭრის ციება მთლიან სხეულზე, არტერიული წნევის მოულოდნელად დაცემა (რომელიც შეიძლება იწვევდეს გონების დაკარგვასაც კი), ქოშინი ან შეშუპების განვითარება კისრისა და ყელის არეში; 
•    ანგიონევროზული შეშუპება, კვინკეს შეშუპება (კანისა და სახის ლორწოვანი გარსების, ქუთუთოებისა და ხახის შეშუპება);
•    მადის დაქვეითება; 
•    კუნთების არაკონტროლირებული მოძრაობები, სახსრების გაჭედვა, ტრემორი (პარკინსონიზმი) და აგზნებული მდგომარეობა;   
•    ყნოსვის დარღვევა (პაროსმია); 
•    ცნობიერების დარღვევა (დელირიუმი), გონების დაკარგვა, ჰალუცინაცია; 
•    აჩქარებული გულისცემა, რომელიც შეიძლება იყოს გულის რიტმის დარღვევის სიმპტომი, სახელწოდებით ტორსადეს დე პოინტეს (~პირუეტის~ ტიპის ტაქიკარდია); 
•    შეიძლება გაიზარდოს ფილტვისმიერი სისხლდენის რისკი; 
•    კუჭქვეშა ჯირკვლის მოულოდნელი ანთება (მწვავე პანკრეატიტი); 
•    ჭინჭრის ციება; 
•    სიცოცხლისთვის საშიში რეაქციები კანის მხრივ, რომლებიც ხასიათდება გამონაყარით, ბუშტუკების განვითარებით, კანის ზედაპირის აშრევებით და ტკივილით (ტოქსიკური ეპიდერმული ნეკროლიზი (ტენ), სტივენს-ჯონსონის სინდრომი (სჯს), კანის ბუშტუკოვანი ანთება (ბულოზური დერმატიტი) და სამკურნალწამლო რეაქცია პრეპარატზე ეოზინოფილიით (ერთი ტიპის ლეიკოციტების პროლიფერაცია) და (სისტემური) გამოვლინებებით მთლიან სხეულზე (ეგრედ წოდებული DღEშშ-სინდრომი); 
•    მგლურას მსგავსი სინდრომი (სისტემური წითელი მგლურა - ლუპუს ერყტჰემატოსუს /შLE/ - აუტოიმუნური დაავადება, როდესაც იმუნური სისტემა აზიანებს ადამიანის რამდენიმე ორგანოს; რის შედეგადაც ვითარდება სახსრების ტკივილი, უმოძრაობა და შესიება, ასევე შეიძლება განვითარდეს კანის პეპლისებური სიწითლე ლოყებზე); 
•    უჯრედული ქსოვილის სწრაფი გამრავლება (გრანულომა), მათ შორის ძვლის ტვინის გრანულომა; 
•    ლიბიდოს დაქვეითება;
•    სიცოცხლისთვის საშიში გართულება, რომელიც ვითარდება გულის გადანერგვის შემდეგ (ტრანსპლანტატის პირველადი დისფუნქცია), როდესაც გადანერგილი გული არ ფუნქციონირებს სათანადოდ (იხ. პარაგრაფი 2: “განსაკუთრებული მითითება და სიფრთხილის ზომები”). 

შეტყობინება არასასურველი რეაქციების შესახებ 

რომელიმე არასასურველი რეაქციის განვითარების შემთხვევაში კონსულტაციისთვის მიმართეთ ექიმს ან ფარმაცევტს. ეს რეკომენდაცია ეხება ნებისმიერ შესაძლო არასასურველ რეაქციას, მათ შორის ისეთებს, რომლებიც არ არის აღწერილი მოცემულ ჩანართში. არასასურველი რეაქციების შესახებ შეტყობინებით ეხმარებით პრეპარატის უსაფრთხოების შესახებ მეტი ინფორმაციის მიღებაში. 

5. პრეპარატ კორდარონის® შენახვა    

შეინახეთ +30˚C-ზე დაბალ ტემპერატურაზე. შეინახეთ ბავშვებისათვის მიუწვდომელ ადგილზე.

6. შეფუთვის შიგთავსი და დამატებითი ინფორმაცია

პრეპარატი კორდარონი® შეიცავს
მოქმედ ნივთიერებას: ამიოდარონის ჰიდროქლორიდი 200 მგ ერთ ტაბლეტში. 
სხვა ინგრედიენტები (დამხმარე ნივთიერებები): ლაქტოზის მონოჰიდრატი (71.0 მგ), სიმინდის სახამებელი, პოლივიდონი K90F (E1201), სილიციუმის დიოქსიდი უწყლო კოლოიდური (E551), მაგნიუმის სტეარატი (E470). 

პრეპარატ კორდარონის® აღწერა და შეფუთვის შიგთავსი:
თეთრიდან მოყვითალო-თეთრი ფერის მრგვალი ტაბლეტები გამყოფი ხაზით და გრავირებით: გულის ფორმის სიმბოლო და “200” ერთ მხარეს.
15 ტაბლეტი პვქ/ალუმინის ბლისტერში. 2 ბლისტერი მუყაოს კოლოფში შეფუთვის ჩანართთან ერთად.

გაცემის წესი:
ფარმაცევტული პროდუქტის ჯგუფი - II ჯგუფი, გაიცემა ფორმა №3 რეცეპტით (გადაუდებელი დახმარებისას გაიცემა ურეცეპტოდ)