Lasolvan - ლაზოლვანი მარწყვის სიროფი 15მგ/5მლ

  ლაზოლვანი®  

სავაჭრო დასახელება: ლაზოლვანი სიროფი 15 მგ/5 მლ   

საერთაშორისო არაპატენტირებული დასახელება: ამბროქსოლი

სამკურნალწამლო ფორმა: სიროფი 

შემადგენლობა

სიროფი 15 მგ/5 მლ: 5 მლ სიროფი შეიცავს აქტიურ ნივთიერებას _ 15 მგ ამბროქსოლის ჰიდროქლორიდს; დამხმარე ნივთიერებები _ ბენზოის მჟავა, ჰიდროქსიეთილცელულოზა, სუკრალოზა, არომატიზატორი ~ტყის კენკრა~ PHL-1321195, არომატიზატორი ~ვანილი~ PHL-114481, გასუფთავებული წყალი.

აღწერილობა

გამჭვირვალე ან თითქმის გამჭვირვალე, უფერო ან თითქმის უფერო, ოდნავ ბლანტი სიროფი.

ფარმაკოთერაპიული ჯგუფი

ხველისა და გაციების სამკურნალო საშუალებები. ამოსახველებელი საშუალებები, ხველის საწინააღმდეგო საშუალებებთან კომბინაციების გარდა. მუკოლიზური საშუალებები. 

ფარმაკოლოგიური თვისებები

ფარმაკოდინამიკა

წინაკლინიკურ კვლევებში ნაჩვენებია, რომ ლაზოლვანის აქტიური ნივთიერება, ამბროქსოლის ჰიდროქლორიდი, ზრდის სეკრეციას სასუნთქ გზებში, აძლიერებს ფილტვის სურფაქტანტის სინთეზს და ასტიმულირებს ცილიარულ აქტივობას.  ალვეოლებსა და ბრონქიოლების კლარის უჯრედებში განლაგებულ II ტიპის პნევმოციტებზე პირდაპირი ზემოქმედების გზით იგი ასევე ზრდის ზედაპირულად აქტიური ნივთიერებების სეკრეციას, ასევე ასტიმულირებს მოციმციმე ეპითელიუმის აქტივობას. ეს ეფექტები იწვევს ნახველის გათხელებას და ნახველის ტრანსპორტის (მუკოცილიარული კლირენსის) გაუმჯობესებას. მუკოცილიარული კლირენსის გაუმჯობესება ნაჩვენებია კლინიკურ ფარმაკოლოგიურ კვლევებში. ნახველის სეროზული კომპონენტის სეკრეციის გაზრდა და მუკოცილიარული კლირენსის გაძლიერება ხელს უწყობს ნახველის ევაკუაციას და ამსუბუქებს ხველას. გარდა ამისა, ქრონიკული ბრონქიტის ან/და ფილტვის ქრონიკული ობსტრუქციული დაავადების (ფქოდ) მქონე პაციენტებში მცირდება დაავადების გამწვავებების სიხშირე. 

ფილტვის ქრონიკული ობსტრუქციული დაავადების მქონე პაციენტებში, რომლებიც 6 თვის განმავლობაში იღებდნენ ლაზოლვანს, 75 მგ პროლონგირებული მოქმედების კაფსულების სახით, მკურნალობის მე-2 თვის ბოლოს აღინიშნებოდა გამწვავებების სარწმუნო შემცირება პლაცებოსთან შედარებით. ლაზოლვანის ჯგუფის პაციენტებში აღინიშნებოდა დაავადების დღეების სარწმუნო შემცირება და ანტიბაქტერიული საშუალებების მიღების დღეების რაოდენობის შემცირება. ლაზოლვანის ჯგუფში, პლაცებოსთან შედარებით, ასევე აღინიშნებოდა ისეთი შესაფასებელი სიმტომების სტატისტიკურად მნიშვნელოვანი გაუმჯობესება, როგორიცაა ნახველის ევაკუაციის გაძნელება, ხველა, ქოშინი და აუსკულტაციური სიმპტომები.

ამბროქსოლის ჰიდროქლორიდის ადგილობრივი ტკივილგამაყუჩებელი მოქმედება აღინიშნებოდა ბოცვერის თვალის მოდელზე ჩატარებულ კვლევებში, რაც, სავარაუდოდ,  დაკავშირებულია პრეპარატის მიერ ნატრიუმის არხების ბლოკირების უნართან. ინ ვიტრო ტესტებმა აჩვენა, რომ პრეპარატი შექცევადად და დოზადამოკიდებულად ბლოკავს ნეირონულ ნატრიუმის არხებს.

ინ ვიტრო დადგენილია, რომ ამბროქსოლის ჰიდროქლორიდს აქვს ანთების საწინააღმდეგო მოქმედება. ინ ვიტრო ტესტებში იგი მნიშვნელოვნად ამცირებდა ციტოკინების გამოთავისუფლებას მოცირკულირე და ქსოვილური მონონუკლეური და პოლიმორფობირთვული უჯრედებიდან.

ყელის ტკივილის მქონე პაციენტებში ჩატარებულ კლინიკურ კვლევებში ნაჩვენებია, რომ 20 მგ საწუწნი ტაბლეტების სახით ამბროქსოლის ჰირდოქლორიდი მნიშვნელოვნად ამცირებს ყელის ტკივილს და შეწითლებას. 

ამ ფარმაკოლოგიურ თვისებებს ამტკიცებს ეფექტიანობის კლინიკური კვლევების დროს მიღებული დამატებითი დაკვირვება, რომ ამბროქსოლის ინჰალაცია უზრუნველყოფს ტკივილის სწრაფ შემსუბუქებას ზედა სასუნთქი გზების დარღვევების მკურნალობისას.  

ამბროქსოლის ჰიდროქლორიდის ანტიბიოტიკებთან (ამოქსიცილინი, ცეფუროქსიმი, ერითრომიცინი და დოქსიციკლინი) ერთად გამოყენება ზრდის ფილტვის ქსოვილში ანტიბიოტიკების კონცენტრაციას. ამ ეფექტის კლინიკური მნიშვნელობის შესახებ მონაცემები არ არსებობს. 

ფარმაკოკინეტიკა

შეწოვა

დაუყოვნებელი გამოთავისუფლების პერორალური ფორმების  აბსორბცია სწრაფი და სრულია, სისხლის პლაზმაში მაქსიმალური კონცენტრაციის მიღწევის დრო შეადგენს 1-2,5 საათს პერორალურად მიღებისას და 6,5 საათს – ხანგრძლივი გამოთავისუფლების ფორმებისთვის. 

30 მგ ტაბლეტების მაქსიმალური ბიოშეღწევადობა უტოლდება 79%-ს.

განაწილება

ამბროქსოლის ჰიდროქლორიდი სწრაფად და მნიშვნელოვნად გადადის  სისხლიდან ქსოვილებში, ამავე დროს აქტიური ნივთიერების ყველაზე მაღალი კონცენტრაცია აღინიშნება ფილტვებში. პერორალური მიღების შემდეგ განაწილების მოცულობა შეადგენს 552 ლ-ს. კავშირი სისხლის პლაზმის ცილებთან შეადგენს 90%-ს, იგი გადის ჰემატოენცეფალურ და პლაცენტურ ბარიერს, გადადის დედის რძეში.

მეტაბოლიზმი და გამოყოფა 

პერორალური დოზის დაახლოებით 30% გამოიყოფა პრესისტემური მეტაბოლიზმის შედეგად. ამბროქსოლის საწყისი მეტაბოლიზმი ღვიძლში მიმდინარეობს კონიუგაციის გზით და ქმნის დიბრომანტრანილის მჟავას (დოზის დაახლოებით 10%), გლუკურონის კონიუგატებს და რამდენიმე მეორეხარისხოვან მეტაბოლიტს. ადამიანის ღვიძლის მიკროსომების კვლევამ აჩვენა, რომ ჩYP3A4 წარმოადგენს პრედომინანტურ იზოფორმას, რომელიც პასუხისმგებელია ამბროქსოლის მეტაბოლიზმზე. 

3 დღის განმავლობაში ამბროქსოლის პერორალური მიღებისას დოზის დაახლოებით 6% არის თავისუფალი სახით, ხოლო დოზის 26% გადადის კონიუგირებულ ფორმაში და გამოიყოფა შარდში.

ნახევარგამოყოფის პერიოდი შეადგენს 10 სთ-ს. საერთო კლირენსი არის 660 მლ/წთ-ის დიაპაზონში, თირკმლის კლირენსი უზრუნველყოფს საერთო კლირენსის დაახლოებით 8%-ს. ნაჩვენებია, რომ 5 დღის შემდეგ შარდში გამოიყოფა ამბროქსოლის ჰიდროქლორიდის საერთო მიღებული დოზის (რადიოაქტიურად მონიშნული) დაახლოებით 83%-ს. 

ფარმაკოკინეტიკა პაციენტების განსაკუთრებულ ჯგუფებში

სამკურნალო საშუალება მეტაბოლიზდება ღვიძლში და გამოიყოფა თირკმელებით, ამიტომ თირკმელების ფუნქციის მძიმე დარღვევის შემთხვევაში შესაძლებელია ღვიძლში წარმოქმნილი ამბროქსოლის მეტაბოლიტების დაგროვება. ღვიძლის ფუნქციის დარღვევების მქონე პაციენტებში ამბროქსოლის ჰიდროქლორიდის გამოყოფა მცირდება, რაც იწვევს სისხლის პლაზმაში მისი დონის 1.3-2-ჯერ გაზრდას. ამბროქსოლის ფართო თერაპიული მოქმედების გამო დოზის კორექცია საჭირო არ არის.

კვლევებმა აჩვენა, რომ ამბროქსოლის ფარმაკოკინეტიკა არ არის დამოკიდებული ასაკსა და სქესზე და, შესაბამისად, დოზირების შეცვლა საჭირო არ არის.

საკვების მიღება არ მოქმედებს ამბროქსოლის ჰიდროქლორიდის ბიოშეღწევადობაზე.

წინაკლინიკური მონაცემები უსაფრთხოების შესახებ

ამბროქსოლის ჰიდროქლორიდს აქვს მწვავე ტოქსიურობის ძალიან დაბალი მაჩვენებელი. 

პრეპარატის შიგნით შეყვანის კვლევებში 150 მგ/კგ/დღეში (თაგვები – 4 კვირა), 50 მგ/კგ/დღეში (ვირთაგვები – 52 და 72 კვირა), 40 მგ/კგ/დღეში (ბოცვრები – 26 კვირა) და 10 მგ/კგ/დღეში (ძაღლები – 52 კვირა) მრავალჯერადი დოზები შეესაბამებოდა მაქსიმალურ დოზებს, რომლებიც არ იწვევდა აღნიშნული არასასურველი რეაქციების განვითარებას (NOAELს). ტოქსიკოლოგიური კვლევებით არ არის გამოვლენილი სამიზნე ორგანოების დაზიანებები. 

4 კვირის განმავლობაში ჩატარებული ტოქსიურობის კვლევებში, როდესაც ამბროქსოლის ჰიდროქლორიდი ინტრავენურად შეიყვანებოდა ვირთაგვებში დოზით 4, 16 და 64 მგ/კგ/დღეში და ძაღლებში 45, 90 და 120 მგ/კგ/დღეში (ინფუზია 3 საათი/დღეში), არ არის ნაჩვენები მძიმე ადგილობრივი და სისტემური ტოქსიურობა, მათ შორის ჰისტოპათოლოგია.  ყველა არასასურველი რეაქცია იყო შექცევადი. 

3000 მგ-მდე/კგ/დღეში ვირთაგვებზე და 200 მგ-მდე/კგ/დღეში ბოცვრებზე ამბროქსოლის ჰიდროქლორიდის პერორალური დოზების ტესტირებისას არ არის გამოვლენილი ემბრიოტოქსიური ან ტერატოგენული თვისებები. ძუ და ხვად ვირთაგვებში ფერტილობა არ იცვლებოდა პრეპარატის შეყვანისას დოზით 1500 მგ-მდე/კგ/დღეში. პერინატალური და პოსტნატალური განვითარების პერიოდში NOAEL-ის მაჩვენებელი შეადგენდა 50 მგ/კგ/დღეში. 500 მგ/კგ/დღეში დოზით ამბროქსოლის ჰიდროქლორიდი ავლენდა მცირე ტოქსიურობას ძუ ჯიშებში და ახალშობილ შვილებში, რაც გამოვლინდა სხეულის მასის განვითარების შენელებით და შთამომავლობის შემცირებით. 

ინ ვიტრო (ეიმსის ტესტი და ქრომოსომული აბერაციების ანალიზი) და ინ ვივო (მიკრონუკლეარული ტესტი თაგვებზე) ჩატარებულ ცდებში გენოტოქსიურობის კვლევებმა არ აჩვენა ამბროქსოლის ჰიდროქლორიდის მუტაგენური პოტენციალი.

ამბროქსოლის ჰიდროქლორიდმა არ აჩვენა ონკოგენური პოტენციალი თაგვებში (50, 200 და 800 მგ/კგ/დღეში) და ვირთაგვებში (65, 250 და 1000 მგ/კგ/დღეში) კანცეროგენულობის კვლევებში, პრეპარატის საკვებთან ერთად შეყვანისას შესაბამისად 105 და 116 კვირის განმავლობაში.  

გამოყენების ჩვენება:

მუკოლიზური თერაპია ძნელად ამოსახველებელი ბლანტი ნახველის წარმოქმნით მიმდინარე  სასუნთქი გზების მწვავე და ქრონიკული დაავადებების მკურნალობისას.

გამოყენების წესი და დოზები:

მოზრდილები და 12 წელზე უფროსი ასაკის ბავშვები: ჩვეულებრივი დოზა შეადგენს 10 მლ სიროფს სამჯერ დღეში (რაც შეესაბამება 90 მგ ამბროქსოლის ჰიდროქლორიდს დღეში) პირველი ორი-სამი დღის განმავლობაში, შემდეგ 10 მლ სიროფი ორჯერ დღეში (რაც შეესაბამება 60 მგ ამბროქსოლის ჰიდროქლორიდს დღეში). 

მოზრდილებისთვის და 12 წელზე უფროსი ასაკის ბავშვებისთვის თერაპიული ეფექტის გაძლიერება შეიძლება სიროფის დოზის გაზრდით 20 მლ-მდე ორჯერ დღეში (რაც შეესაბამება 120 მგ ამბროქსოლის ჰიდროქლორიდს დღეში). 

 

6-12 წლის ასაკის ბავშვები: 5 მლ სიროფი ორი-სამჯერ დღეში (რაც შეესაბამება 30-45 მგ ამბროქსოლის ჰიდროქლორიდს დღეში). 

2-5 წლის ასაკის ბავშვები: 2.5 მლ სიროფი სამჯერ დღეში (რაც შეესაბამება 22.5 მგ ამბროქსოლის ჰიდროქლორიდს დღეში).

2 წლამდე ასაკის ბავშვები: მოცემული სამკურნალო საშუალების გამოყენება უკუნაჩვენებია 2 წლამდე ასაკის ბავშვებში.

ექიმის მეთვალყურეობით ლაზოლვანის გამოყენების ხანგრძლივობა შეზღუდული არ არის. ექიმის კონსულტაციის გარეშე 4-5 დღეზე მეტი დროის განმავლობაში რეკომენდებული არ არის. 

ლაზოლვანი სიროფი გამოიყენება საკვების მიღების მიუხედავად და მისი დოზირება ხდება შეფუთვაში არსებული საზომი ჭიქის გამოყენებით. 

ლაზოლვანი სიროფის გამოყენება შეიძლება შაქრიანი დიაბეტის მქონე პაციენტებში, 5 მლ სიროფი შეესაბამება 0 პე.

ლაზოლვანი სიროფი არ შეიცავს სპირტს. 

გვერდითი მოქმედება:

სამკურნალო საშუალების არასასურველი რეაქციების განვითარების სიხშირის შეფასების კრიტერიუმები კლასიფიცირებულია არასასურველი რეაქციების საერთაშორისო ლექსიკონის თანახმად ორგანოთა სისტემების მიხედვით (MედDღA სყსტემ): ძალიან ხშირად (³1/10); ხშირად (³1/100, <1/10); არც ისე ხშირად (³1/1000, <1/100); იშვიათად (³1/10000, <1/1000); ძალიან იშვიათად (<1/10000); სიხშირე უცნობია (არსებული მონაცემების საფუძველზე შეუძლებელია განსაზღვრა).

დარღვევები იმუნური სისტემის მხრივ

იშვიათად: ჰიპერმგრძნობელობის რეაქციები

სიხშირე უცნობია: ანაფილაქსიური რეაქციები, მათ შორის ანაფილაქსიური შოკი, ანგიონევროზული შეშუპება, ქავილი.

დარღვევები ნერვული სისტემის მხრივ

ხშირად: დისგევზია (გემოს შეგრძნებების შეცვლა). 

დარღვევები სასუნთქი სისტემის, გულ-მკერდის ორგანოებისა და შუასაყარის მხრივ

ხშირად: ყელის ჰიპესტეზია

სიხშირე უცნობია: ქოშინი (ალერგიული რეაქციის სიმპტომის სახით).

დარღვევები კუჭ-ნაწლავის ტრაქტის მხრივ

ხშირად: გულისრევა, პირის ღრუს ლორწოვანის მგრძნობელობის დაქვეითება

არც ისე ხშირად: ღებინება, დიარეა, დისპეფსია, ტკივილი მუცლის არეში, პირის ღრუს სიმშრალე

იშვიათად: ყელის სიმშრალე

ძალიან იშვიათად: ჰიპერსალივაცია. 

დარღვევები კანისა და კანქვეშა ქსოვილების მხრივ

იშვიათად: გამონაყარი, ჭინჭრის ციება;

სიხშირე უცნობია: კანის მძიმე რეაქციები (მულტიფორმული ერითემის, სტივენს-ჯონსონის სინდრომის, ტოქსიური ეპიდერმული ნეკროლიზის, მწვავე გენერალიზებული ეგზანთემატოზური პუსტულოზის ჩათვლით).

ზოგადი დარღვევები და რეაქციები შეყვანის ადგილას

არც ისე ხშირად: ცხელება, რეაქციები ლორწოვანი გარსის მხრივ.

შეტყობინება არასასურველი რეაქციების შესახებ

მნიშვნელოვანია პრეპარატის რეგისტრაციის შემდეგ მოსალოდნელი არასასურველი რეაქციების შესახებ შეტყობინების გაგზავნა პრეპარატის ~სარგებელი-რისკის~ თანაფარდობის უწყვეტი მონიტორინგის უზრუნველყოფის მიზნით. რეკომენდებულია, რომ სამედიცინო მუშაკმა განაცხადოს ნებისმიერი მოსალოდნელი არასასურველი რეაქციის შესახებ სამკურნალო საშუალებების არასასურველი რეაქციებისა და არაეფექტიანობის შეტყობინებათა ეროვნული სისტემების საშუალებით. რომელიმე არასასურველი რეაქციის გამოვლენის შემთხვევაში რეკომენდებულია, რომ პაციენტმა კონსულტაცია გაიაროს ექიმთან. მოცემული რეკომენდაცია ეხება ნებისმიერ შესაძლო არასასურველ რეაქციას, მათ შორის ისეთებს, რომლებიც არ არის აღნიშნული პრეპარატის გამოყენების ინსტრუქციაში. ასევე, შეგიძლიათ გააგზავნოთ შეტყობინება არასასურველი რეაქციების შესახებ, მათ შორის შეტყობინება სამკურნალო საშუალების არაეფექტიანობის შესახებ, სამკურნალო საშუალებების არასასურველი რეაქციების (მოქმედებების) მონაცემთა საინფორმაციო ბაზაში. არასასურველი რეაქციების შესახებ შეტყობინების გაგზავნით გვეხმარებით პრეპარატის უსაფრთხოების შესახებ მეტი ინფორმაციის მიღებაში.  

უკუჩვენება

მომატებული მგრძნობელობა ამბროქსოლის ან პრეპარატის სხვა კომპონენტების მიმართ (იხ. პარაგრაფი ~შემადგენლობა~).

არ გამოიყენოთ 2 წლამდე ასაკის ბავშვებში.  

ჭარბი დოზირება

ადამიანებში ჭარბი დოზირების სიმპტომები აღწერილი არ არის. შემთხვევით ჭარბი დოზით მიღებისას ან/და ექიმის მიერ შეცდომით ჭარბი დოზებით დანიშვნისას ცნობილია, რომ აღნიშნული სიმპტომები ლაზოლვანის რეკომენდებული დოზების მიღების შემთხვევაში მოსალოდნელი არასასურველი რეაქციების მსგავსია, და მათი კუპირებისთვის შეიძლება საჭირო იყოს სიმპტომური მკურნალობა. 

სიფრთხილის ზომები

პაციენტებში, რომლებიც იღებენ ამბროქსოლს, აღწერილია კანის მხრივ ისეთი მძიმე  რეაქციების განვითარების შემთხვევები, როგორიცაა მულტიფორმული ერითემა, სტივენს-ჯონსონის სინდრომი, ტოქსიური ეპიდერმული ნეკროლიზი, მწვავე გენერალიზებული ეგზანთემატოზური პუსტულოზი.

კანზე პროგრესირებადი რეაქციის სიმპტომების გამოვლენის შემთხვევაში (რაც ზოგჯერ დაკავშირებულია ბუშტუკების წარმოქმნასთან და პირის ღრუს, ყელის, ცხვირის, თვალების, გენიტალიების ლორწოვანი გარსების დაზიანებასთან) საჭიროა დაუყოვნებლივ შეწყვიტოთ პრეპარატით მკურნალობა და მიმართოთ ექიმს.  

თირკმელების ფუნქციის დარღვევების ან ღვიძლის ფუნქციის მძიმე დარღვევების შემთხვევაში ლაზოლვანი უნდა გამოიყენოთ მხოლოდ ექიმთან კონსულტაციის შემდეგ. სამკურნალო საშუალება მეტაბოლიზდება ღვიძლში და გამოიყოფა თირკმელებით, ამიტომ თირკმელების ფუნქციის მძიმე დარღვევის შემთხვევაში შესაძლებელია ღვიძლში წარმოქმნილი ამბროქსოლის მეტაბოლიტების დაგროვება.

ბრონქების მოტორიკის დარღვევის და უხვი ბრონქული სეკრეტის მქონე პაციენტებში (მაგალითად, პირველადი ცილიარული დისკინეზიის იშვიათი სინდრომის დროს) ლაზოლვანი გამოიყენება სიფრთხილით, რადგან არსებობს ნახველის დაგროვების რისკი.

ორსულობა, ძუძუთი კვების პერიოდი და ფერტილობა

ორსულობა 

ამბროქსოლის ჰიდროქლორიდი გადის პლაცენტურ ბარიერს. ცხოველებზე ჩატარებულმა კვლევებმა არ გამოავლინა პირდაპირი ან არაპირდაპირი ნეგატიური გავლენა ორსულობის მიმდინარეობაზე, ემბრიონულ/ფეტალურ განვითარებაზე, მშობიარობასა თუ პოსტნატალურ განვითარებაზე.

28 კვირაზე მეტი ვადის ორსულებში პრეპარატის გამოყენების ფართო კლინიკურმა გამოცდილებამ არ გამოავლინა ნაყოფზე ნეგატიური მოქმედების მტკიცებულებები. მიუხედავად ამისა, ორსულობის პერიოდში ნებისმიერი სამკურნალო საშუალების დანიშვნისას საჭიროა სიფრთხილის საერთო წესების დაცვა. ლაზოლვანის გამოყენება არ არის რეკომენდებული, განსაკუთრებით ორსულობის პირველ ტრიმესტრში. 

ძუძუთი კვების პერიოდი

ცხოველებზე ჩატარებულმა კვლევებმა აჩვენა, რომ ამბროქსოლი გამოიყოფა ორგანიზმიდან დედის რძესთან ერთად. ძუძუთი კვების პერიოდში პრეპარატის გამოყენება რეკომენდებული არ არის.

ფერტილობა

ცხოველებზე ჩატარებულმა კვლევებმა არ გამოავლინა პირდაპირი თუ არაპირდაპირი ნეგატიური გავლენა ფერტილობაზე.

სამკურნალო საშუალების ზემოქმედება სატრანსპორტო საშუალებების მართვისა და მექანიზმებთან მუშაობის უნარზე

სატრანსპორტო საშუალებების მართვისა და მექანიზმებთან მუშაობის უნარზე პრეპარატის ზემოქმედების შესახებ ცნობილი არ არის. შესაბამისი კვლევები არ ჩატარებულა. 

ურთიერთქმედება სხვა სამკურნალო საშუალებებთან

ხველის საწინააღმდეგო პრეპარატებთან ერთდროულად გამოყენება ხველის შემცირების ფონზე შეიძლება იწვევდეს ნახველის გამოყოფის შეფერხებას, ამიტომ შეიძლება დაინიშნოს მხოლოდ სარგებელი/რისკის თანაფარდობის გულდასმით შეფასების შემდეგ. 

შეფუთვა

15 მგ/5 მლ სიროფი 100 მლ მუქი ფერის მინის ფლაკონში, რომელიც შიგნიდან დახურულია პოლიეთილენის ფირით და პირველადი გახსნის კონტროლის მქონე პლასტმასის თავსახურით; ფლაკონი საზომ ჭიქასთან და გამოყენების ინსტრუქციასთან ერთად მოთავსებულია მუყაოს კოლოფში.

შენახვის პირობები

შეინახეთ არაუმეტეს 30°c ტემპერატურაზე, არ გაყინოთ.

შეინახეთ ბავშვებისათვის მიუწვდომელ ადგილას. 

ვარგისობის ვადა 

3 წელი.

პრეპარატი არ გამოიყენება შეფუთვაზე მითითებული ვარგისობის ვადის გასვლის შემდეგ.

აფთიაქიდან გაცემის წესი:  ფარმაცევტული პროდუქტის ჯგუფი III, გაიცემა რეცეპტის გარეშე.