CRESTOR - კრესტორი 20მგ 28 ტაბლეტი

კრესტორი, 20 მგ, აპკიანი გარსით დაფარული ტაბლეტები

მოქმედი ნივთიერება: როზუვასტატინი

 ამ პრეპარატის მიღებამდე სრულად წაიკითხეთ ინსტრუქცია, ვინაიდან ის შეიცავს თქვენთვის მნიშვნელოვან ინფორმაციას.

·        შეინახეთ ეს ინსტრუქცია. შეიძლება დაგჭირდეთ მისი ხელახლა წაკითხვა.

·        დამატებითი შეკითხვის შემთხვევაში, გთხოვთ, დაუკავშირდეთ თქვენს მკურნალ ექიმს.

·        პრეპარატი მხოლოდ თქვენ დაგინიშნეს. ნუ გადასცემთ მას სხვა პირებს. ამან შეიძლება ზიანი მიაყენოს მათ მაშინაც კი, თუ  ამ პირების სიმპტომები თქვენსას ემთხვევა. 

·        ნებისმიერი გვერდითი რეაქციის განვითარების შემთხვევაში, მიმართეთ მკურნალ ექიმს. ეს რეკომენდაცია ვრცელდება ყველა შესაძლო გვერდით რეაქციაზე, იმ გვერდით მოვლენებზეც რომელიც არ არის შეტანილი ამ გამოყენების ინსტრუქციაში.

ინსტრუქციის შინაარსი

1. რა არის პრეპარატი კრესტორი და რისთვის გამოიყენება ის.

2. რა უნდა იცოდეთ კრესტორის მიღებამდე.

3. პრეპარატ კრესტორის მიღება.

4. შესაძლო გვერდითი რეაქციები.

5. პრეპარატ კრესტორის შენახვა.

6. შეფუთვის შემცველობა და სხვა ინფორმაცია.

1. რა რის პრეპარატი კრესტორი და რისთვის გამოიყენება ის.

პრეპარატი კრესტორი შეიცავს მოქმედ ნივთიერებას როზუვასტატინს და წარმოადგენს ჰიპოლიპიდემიურ საშუალებას - HMG-CoA რედუქტაზას ინჰიბიტორს (მიეკუთვნება პრეპარატების ჯგუფს, რომელსაც ეწოდება სტატინები).

კრესტორი გამოიყენება სისხლში ცხიმების (ლიპიდების) მაღალი კონცენტრაციის შესამცირებლად, ისეთ შემთხვევებში,  როდესაც დიეტითა და ფიზიკური ვარჯიშით ეს ვერ ხერხდება. თუ ლიპიდების გაზრდილი კონცენტრაცია არ შემცირდება, ისინი შეიძლება დაგროვდეს სისხლძარღვების კედლებში (არტერიები) სხეულის სხვადასხვა ნაწილში (ათეროსკლეროზული ფოლაქები), რამაც შეიძლება გამოიწვიოს ამ სისხლძარღვების შევიწროება. ეს პროცესი (ათეროსკლეროზი) გულის დაავადების ერთ-ერთი ყველაზე გავრცელებული მიზეზია. სისხლში ლიპიდების კონცენტრაციის შემცირებით კრესტორს შეუძლია შეანელოს ლიპიდების დეპონირება არტერიების კედლებში. ეს ხელს უწყობს გულის შეტევის, ინსულტის და სიკვდილის რისკის შემცირებას.

პრეპარატის გამოყენების ჩვენებები

პრეპარატ კრესტორის გამოყენება ნაჩვენებია 18 წელზე უფროსი ასაკის მოზრდილებში:  

·        პირველადი ჰიპერქოლესტერინემიისას  ფრედრიქსონის მიხედვით (ტიპი IIa, ოჯახური ჰეტეროზიგოტური ჰიპერქოლესტერინემიის ჩათვლით) ან შერეული ჰიპერქოლესტერინემისას (ტიპი IIb), როგორც დიეტის დანამატი, როდესაც დიეტა და სხვა არამედიკამენტოზური მკურნალობა (მაგალითად, ვარჯიში, წონის დაკლება) არასაკმარისია;

·        ოჯახური ჰომოზიგოტური ჰიპერქოლესტერინემიისას, როგორც დიეტის და სხვა ჰიპოლიპიდემიური თერაპიის (მაგალითად, დაბალი სიმკვრივის ლიპოპროტეინების (LDL) აფერეზი) დანამატი, ან იმ შემთხვევებში, როდესაც მსგავსი  თერაპია საკმარისად ეფექტური არ არის;

·        ჰიპერტრიგლიცერიდემიისას (ფრედრიქსონის ტიპი IV) დიეტის დანამატის სახით;

·        ათეროსკლეროზის პროგრესირების შესანელებლად, როგორც დიეტის დანამატი პაციენტებში, რომლებშიც ნაჩვენებია მკურნალობა საერთო  ქოლესტერინის (TC) და დაბალი სიმკვრივის ლიპოპროტეინების ქოლესტერინის (LDL-C) კონცენტრაციის შესამცირებლად;

·        გულ-სისხლძარღვთა სისტემის ძირითადი გართულებების (ინსულტი, ინფარქტი, არტერიული რევასკულარიზაცია) პირველადი პროფილაქტიკისთვის მოზრდილ პაციენტებში გულის იშემიური დაავადების (CHD) კლინიკური ნიშნების გარეშე, მაგრამ მისი განვითარების მომატებული რისკით (50 წელზე უფროსი ასაკის მამაკაცებისთვის და 60 წელზე უფროსი ასაკის ქალებში, C-რეაქტიული ცილის კონცენტრაციის მატებისას (≥ 2 მგ/ლ-ზე) მინიმუმ ერთი დამატებითი რისკ-ფაქტორის არსებობისას, როგორიცაა არტერიული ჰიპერტენზია, მაღალი სიმკვრივის ლიპოპროტეინის ქოლესტერინის დაბალი კონცენტრაცია (HDL-C), თამბაქოს მოხმარება, CAD-ის  ადრეულ ეტაპზე დაწყების ოჯახური ანამნეზი).

თუ პრეპარატის გამოყენებისას გაუმჯობესება არ შეინიშნება, ან თავს უარესად გრძნობთ, საჭიროა მიმართოთ ექიმს.

2. რა უნდა იცოდეთ კრესტორის მიღებამდე

უკუჩვენებები

ნუ მიიღებთ პრეპარატ კრესტორს, თუ:   

·      ხართ ალერგიული როზუვასტატინის ან პრეპარატის სხვა კომპონენტების მიმართ, რომლებიც ჩამოთვლილია ინსტრუქციის მე-6 თავში;

·      გაქვთ ღვიძლის დაავადება აქტიურ ფაზაში, მათ შორის შრატის ტრანსამინაზების აქტივობის მუდმივი მატება და შრატის ტრანსამინაზების აქტივობის ნებისმიერი მატება (ნორმის ზედა ზღვარზე 3-ჯერ მეტი);

·      გაქვთ თირკმლის ფუნქციის მძიმე დარღვევა (კრეატინინის კლირენსი 30 მლ/წთ-ზე ნაკლები);

·      გაქვთ კუნთების სპეციფიკური პრობლემა (მიოპათია);

·      გაქვთ მიდრეკილება კუნთების გარკვეული გართულებების განვითარებისკენ (მიოტოქსიური გართულებები);

·      იღებთ ციკლოსპორინს (იმუნოსუპრესანტი; გამოიყენება ორგანოთა გადანერგვისა და რიგი დაავადებების დროს);

·      ქალებისთვის - თუ ხართ ორსულად, ძუძუთი კვებაზე ან არ იყენებთ კონტრაცეფციის საიმედო მეთოდებს.

 არ მიიღოთ კრესტორი დღიური დოზით 40 მგ, თუ:

·      გაქვთ კუნთების გარკვეული პრობლემების განვითარების რისკ-ფაქტორები (მიოპათია/რაბდომიოლიზი), კერძოდ:

-        გაქვთ თირკმლის  საშუალო ხარისხის დისფუნქცია (კრეატინინის კლირენსი 60 მლ/წთ-ზე ნაკლები);

-        გაქვთ ფარისებრი ჯირკვლის ფუნქციის დაქვეითება (ჰიპოთირეოზი);

-        თქვენ ან თქვენს ახლობლებს წარსულში გქონდათ კუნთებთან დაკავშირებული პრობლემები;

-        წარსულში გქონდათ კუნთების პრობლემები HMG-CoA რედუქტაზას სხვა ინჰიბიტორების ან ფიბრატების (გამოიყენება სისხლში ლიპიდების კონცენტრაციის შესამცირებლად) მიღებისას;

-        მოიხმართ ჭარბ ალკოჰოლს;

-        გაქვთ მდგომარეობა, რომელმაც შეიძლება გამოიწვიოს სისხლის პლაზმაში როზუვასტატინის კონცენტრაციის მატება;

-        ერთდროულად იღებთ ფიბრატებს;

-         ხართ მონღოლოიდური რასის წარმომადგენელი.

თუ ფიქრობთ, რომ რომელიმე ზემოთ ჩამოთვლილი გეხებათ, აცნობეთ მკურნალ ექიმს.

განსაკუთრებული მითითებები და სიფრთხილის ზომები

კრესტორის მიღებამდე გაიარეთ კონსულტაცია მკურნალ ექიმთან.

თუ ქვემოთ ჩამოთვლილთაგან რომელიმე გეხებათ, აცნობეთ  თქვენს მკურნალ ექიმს კრესტორის მიღებამდე ან მისი მიღებისას:

·      გაქვთ ან ადრე გქონდათ თირკმლის პრობლემები;

·      გაქვთ ან ადრე გქონდათ ღვიძლის პრობლემები;

·      გაქვთ ფარისებრი ჯირკვლის ფუნქციის დაქვეითება (ჰიპოთირეოზი);

·      რეგულარულად იღებთ დიდი რაოდენობით ალკოჰოლს;

·      ხართ 65 წელზე მეტი ასაკის;

·      შეიძლება გქონდეთ მდგომარეობა, როდესაც აღინიშნება როზუვასტატინის პლაზმური კონცენტრაციის მატება;

·      გაქვთ მძიმე ინფექციური დაავადება (სეფსისი);

·      გაქვთ დაბალი წნევა (ჰიპოტენზია);

·      იტარებთ ან ადრე ჩაგიტარდათ ფართო ქირურგიული ჩარევა ან მიიღეთ რაიმე დაზიანება;

·      გაქვთ ან ადრე გქონდათ მძიმე მეტაბოლური, ენდოკრინული ან ელექტროლიტური დარღვევები ან არაკონტროლირებადი კრუნჩხვითი შეტევები;

·       თქვენ ან თქვენს ახლობლებს წარსულში ქონდათ კუნთებთან დაკავშირებული  პრობლემები;

·      წარსულში გქონდათ კუნთების პრობლემები HMG CoA რედუქტაზას სხვა ინჰიბიტორების ან ფიბრატების მიღებისას;

·      გაქვთ კუნთების ტკივილი, კუნთების სისუსტე ან სპაზმი, განსაკუთრებით სისუსტესა და ცხელებასთან ერთად;

·      გაქვთ სისხლში ფერმენტის კრეატინ ფოსფოკინაზას (CPK) აქტივობის მატება;

·      ხართ მონღოლური რასის წარმომადგენელი;

·      იღებთ მედიკამენტებს, რომლებიც გამოიყენება აივ ინფექციის სამკურნალოდ

 (იხილეთ ინსტრუქციის მე-2 თავში „სხვა პრეპარატები და პრეპარატი კრესტორი“);

·      გაქვთ აუტანლობა ზოგიერთი შაქრის მიმართ;

·      გაქვთ ქოშინი, არაპროდუქტიული ხველა ან საერთოდ თავს ცუდად გრძნობთ (ფილტვის დაავადება, რომელსაც ფილტვის ინტერსტიციული დაავადება ეწოდება);

·      გაქვთ შაქრიანი დიაბეტი ან სისხლში გლუკოზის მაღალი დონე;

·      გაქვთ ან წარსულში  გქონდათ კუნთების გავრცელებული სისუსტე, მათ შორის თვალის კუნთების ან,ზოგიერთ შემთხვევაში, სუნთქვაში მონაწილე კუნთების (მიასთენია გრავისი), რადგან სტატინებმა შეიძლება გააუარესოს ეს მდგომარეობა. ზოგიერთ შემთხვევაში სტატინებს ასევე შეუძლიათ გამოიწვიონ მიასთენია გრავისი.

მონიტორინგი პრეპარატ კრესტორით მკურნალობის დროს 

მნიშვნელოვანია პერიოდულად ეწვიოთ ექიმს ლიპიდების კონცენტრაციის რეგულარული შემოწმებისთვის, რათა უზრუნველყოთ საჭირო კონცენტრაციის მიღწევა და შენარჩუნება. მკურნალმა ექიმმა შეიძლება გირჩიოთ დამატებიტი ტესტების განსაზღვრა, მათ შორის ღვიძლის ფუნქციის შეფასება პრეპარატის მიღებამდე და შემდგომში  მისით მკურნალობის დროს.

ბავშვები და მოზარდები

პრეპარატ კრესტორის უსაფრთხოება და ეფექტურობა 0-დან 18 წლამდე ასაკის ბავშვებში ამ დროისათვის არ არის დაზსუტებული. გამოყენების მონაცემები შეზღუდულია. 

სხვა პრეპარატები და კრესტორი

აცნობეთ მკურნალ ექიმს, თუ იღებთ, ცოტა ხნის წინ მიიღეთ ან შეიძლება დაიწყოთ სხვა მედიკამენტების მიღება.

განსაკუთრებით მნიშვნელოვანია აცნობოთ ექიმს, თუ იღებთ შემდეგ მედიკამენტებს:

·      ციკლოსპორინი;

·      ვარფარინი ან კლოპიდოგრელი (ან ნებისმიერი სხვა სისხლის გამათხელებელი საშუალება);

·      ფიბრატები (როგორიცაა გემფიბროზილი, ფენოფიბრატი);

·      ეზეტიმიბი (პრეპარატი, რომელიც მიიღება სისხლში ლიპიდების დონის შესამცირებლად);

·      ნიკოტინის მჟავა (ვიტამინი PP);

·      ანტაციდები (გამოიყენება კუჭის მჟავიანობის გასანეიტრალებლად);

·      ერითრომიცინი, ფუზიდის მჟავა (ანტიბიოტიკები);

·      პერორალური კონტრაცეპტივები (ჩასახვის საწინააღმდეგო აბები), ჰორმონების შემცვლელი მკურნალობა;

·      რეგორაფენიბი, დაროლუტამიდი, კაპმატინიბი (პრეპარატები, რომლებიც გამოიყენება გარკვეული ტიპის კიბოს სამკურნალოდ);

·      ფოსტამატინიბი (გამოიყენება სისხლის დაავადების სამკურნალოდ, რომელსაც ეწოდება იმუნური თრომბოციტოპენია);

·      ფებუქსოსტატი (გამოიყენება იმ მდგომარეობის სამკურნალოდ, რომელიც დაკავშირებულია სისხლში შარდმჟავას მაღალ დონესთან, რომელსაც ეწოდება პოდაგრა);

·      ელტრომბოპაგი (გამოიყენება სისხლის დაავადებების სამკურნალოდ, რომელსაც ეწოდება იმუნური თრომბოციტოპენია, აპლაზიური ანემია);

·      ტერიფლუნომიდი (გაფანტული სკლეროზის სამკურნალო პრეპარატი);

·      დრონედარონი (გამოიყენება გულის რითმის დარღვევის სამკურნალოდ);

·      იტრაკონაზოლი (გამოიყენება სოკოვანი ინფექციების სამკურნალოდ);

·      ბაიკალინი (მცენარეული პრეპარატი);

·      რომელიმე შემდეგი პრეპარატი, რომელიც გამოიყენება ვირუსული ინფექციების სამკურნალოდ, მათ შორის აივ ინფექციის ან C ჰეპატიტის, მონოთერაპიის სახით  ან კომბინაციაში სხვა პრეპარატებთან: რიტონავირი, ლოპინავირი, ატაზანავირი, სოფოსბუვირი, ვოქსილაპრევირი, ომბიტასვირი, პარიტაპრევირი, დასაბუვირი, ველპატასვირი, გრაზოპრევირი, ელბასვირი, გლეკაპრევირი, პიბრენტასი დარუნავირი, ტიპრანავირი;

·      როქსადუსტატი (პრეპარატი, რომელიც გამოიყენება თირკმლის ქრონიკული დაავადების დროს სისხლის წითელი უჯრედების რაოდენობისა და ჰემოგლობინის კონცენტრაციის მოსამატებლად);

·      ენასიდენიბი (პრეპარატი, რომელიც გამოიყენება სისხლის დაავადების სამკურნალოდ, რომელსაც მწვავე მიელოიდური ლეიკემია ეწოდება);

·      ტაფამიდისი (პრეპარატი, რომელიც გამოიყენება დაავადების სამკურნალოდ, რომელიც დაკავშირებულია სხვადასხვა ორგანოებში გარკვეული ცილის დეპონირებასთან, რომელსაც ეწოდება ტრანსთირეტინის ამილოიდოზი).

ორსულობა, ძუძუთი კვება და ფერტილობა

თუ ხართ ორსულად ან ძუძუთი კვებაზე, ფიქრობთ, რომ ორსულად ხართ, ან გეგმავთ ორსულობას, ამ პრეპარატის გამოყენებამდე მიმართეთ მკურნალ ექიმს.

ორსულობა 

ნუ მიიღებთ კრესტორს, თუ ორსულად ხართ.

თუ კრესტორის მიღებისას დაორსულდებით, დაუყოვნებლივ შეწყვიტეთ პრეპარატის მიღება და მიმართეთ ექიმს.

ვინაიდან ქოლესტერინი და ნივთიერებები, რომლებიც წარმოიქმნება ქოლესტერინის სინთეზის დროს, აუცილებელია არდაბადებული ბავშვის (ნაყოფის) განვითარებისთვის, ორსულობის დროს სტატინებით მკურნალობის შესაძლო რისკები აღემატება შესაძლო სარგებელს. ლაბორატორიულ ცხოველებზე ჩატარებულ კვლევებში აღინიშნა როზუვასტატინის უნარი გამოიწვიოს ნაყოფის განვითარების დეფექტები (ტერატოგენული ეფექტი).

ძუძუთი კვება

არ მიიღოთ კრესტორი ძუძუთი კვების დროს. ვირთხებში როზუვასტატინი გამოიყოფა რძეში. უცნობია გამოიყოფა თუ არა როზუვასტატინი ადამიანის დედის რძეში.

ფერტილობა (ჩასახვის  უნარი)

რეპროდუქციული პოტენციალის მქონე ქალებს ურჩევენ გამოიყენონ კონტრაცეფციის საიმედო მეთოდები კრესტორით მკურნალობის დროს.

ავტომობილის მართვა და მექანიზმებთან მუშაობა

არ ჩატარებულა კვლევები კრესტორის ზემოქმედების  შესასწავლად სატრანსპორტო საშუალების მართვისა და მექანიზმებთან მუშაობის უნარზე. ფრთხილად იყავით სატრანსპორტო საშუალების მართვისას ან სამუშაოს შესრულებისას, რომელიც მოითხოვს კონცენტრაციის გაზრდას და ფსიქომოტორული რეაქციების სიჩქარეს (მკურნალობის დროს შესაძლოა თავბრუსხვევის განვითარება).

პრეპარატი კრესტორი შეიცავს ლაქტოზას

თუ გაქვთ აუტანლობა ლაქტოზის მიმართ, გაესაუბრეთ ექიმს ამ პრეპარატის მიღებამდე.

3. პრეპარატ კრესტორის მიღება

ყოველთვის მიიღეთ კრესტორი თქვენი მკურნალი ექიმის მითითების შესაბამისად. ეჭვის შემთხვევაში, მიმართეთ ექიმს.

რეკომენდებული დოზა

საწყისი დოზაა 5 მგ ან 10 მგ 1-ჯერ დღეში.

საწყისი დოზის არჩევა დამოკიდებული იქნება შემდეგზე:

·      ქოლესტერინის კონცენტრაციაზე;

·      გულ-სისხლძარღვთა  სისტემის გართულებების შესაძლო რისკზე;

·      გაქვთ თუ არა ფაქტორები, რომლებიც შეიძლება მიუთითებდეს გვერდითი რეაქციების გაზრდილ რისკზე.

დოზის გაზრდა. მკურნალმა ექიმმა შეიძლება გადაწყვიტოს დოზის გაზრდა. თუ დაიწყეთ მკურნალობა 5 მგ დოზით, ექიმმა შეიძლება გადაწყვიტოს მისი გაზრდა 10 მგ-მდე, 20 მგ-მდე და 40 მგ-მდე, საჭიროების შემთხვევაში.

         მაქსიმალური სადღეღამისო დოზაა 40 მგ. იგი განკუთვნილია მხოლოდ ქოლესტერინის მაღალი კონცენტრაციის და გულ-სისხლძარღვთა სისტემის გართულებების მაღალი რისკის მქონე პირებისთვის, რომელთა ქოლესტერინის კონცენტრაცია საკმარისად არ მცირდება 20 მგ დოზის მიღებისას.

პრეპარატის მიღების გზა და მეთოდი

პერორალურად მიღებისთვის.

ტაბლეტები უნდა გადაიყლაპოს მთლიანად წყალთან ერთად. ტაბლეტები არ უნდა დაღეჭონ ან დააქუცმაცონ. პრეპარატის მიღება შესაძლებელია დღის ნებისმიერ დროს, საკვების მიღების მიუხედავად.

კრესტორით მკურნალობის დაწყებამდე თქვენი ექიმი გირჩევთ დაიწყოთ დიეტის დაცვა სისხლში ქოლესტერინის კონცენტრაციის შესამცირებლად და გააგრძელოთ მისი დაცვა მკურნალობის დროს.

მკურნალობის ხანგრძლივობა

გააგრძელეთ კრესტორის მიღება იმდენ ხანს, რა პერიოდითაც დაგინიშნავთ ექიმი.

თუ მიიღებთ იმაზე მეტ კრესტორს, ვიდრე საჭიროა

თუ საჭიროზე მეტ ტაბლეტს მიიღებთ, სასწრაფოდ მიმართეთ სამედიცინო დახმარებას.

თუ გაქვთ შეკითხვები პრეპარატის გამოყენებასთან დაკავშირებით, მიმართეთ  მკურნალ ექიმს.

4. შესაძლო გვერდითი რეაქციები

ყველა სამკურნალო პრეპარატის მსგავსად, კრესტორმაც შეიძლება გამოიწვიოს გვერდითი მოვლენები, თუმცა ისინი ყველას არ უვითარდება.

შეწყვიტეთ კრესტორის მიღება და დაუყოვნებლივ მიმართეთ სამედიცინო დახმარებას, თუ გამოვლინდება რომელიმე შემდეგი რეაქცია:

·        სახის, ტუჩების, ენის და/ან ყელის შეშუპება, რამაც შეიძლება გამოიწვიოს ყლაპვის გაძნელება (ჰიპერმგრძნობელობითი რეაქციები, მათ შორის ანგიონევროზული შეშუპება, იშვიათია და შეიძლება განვითარდეს 1000-დან 1 პირში);

·        პანკრეასის პრობლემა (პანკრეატიტი, იშვიათი - შეიძლება აღმოაჩნდეს არაუმეტეს 1 პირს 1000-დან);

·        ღვიძლის პრობლემა (ჰეპატიტი, ძალიან იშვიათი - შესაძლოა აღინიშნოს 10000-დან არაუმეტეს 1 პირში);

·        ფართოდ გავრცელებული გამონაყარი, სხეულის მაღალი ტემპერატურა და გადიდებული ლიმფური კვანძები (წამლისმიერი რეაქცია ეოზინოფილიით და სისტემური სიმპტომებით (DRESS სინდრომი), სიხშირე უცნობია - არსებული მონაცემების საფუძველზე მისი განვითარების სიხშირის დადგენა შეუძლებელია);

·        გარკვეული გამონაყარი და წყლულები კანსა და ლორწოვან გარსებზე (სტივენს-ჯონსონის სინდრომი, სიხშირე უცნობია - არსებული მონაცემების საფუძველზე, სიხშირის დადგენა შეუძლებელია);

·        ჩონჩხის კუნთების სპეციფიკური პრობლემა (რაბდომიოლიზი, იშვიათი - შეიძლება განვითარდეს 1000-დან 1 პირში; იმუნური პასუხით გამოწვეული ნეკროზული მიოპათია, სიხშირე უცნობია - სიხშირე არ შეიძლება განისაზღვროს არსებული მონაცემების საფუძველზე);

·        ფართოდ გავრცელებული კუნთების სისუსტე, ზოგიერთ შემთხვევაში სუნთქვაში მონაწილე კუნთების ჩათვლით (მიასთენია გრავისი, სიხშირე უცნობია - სიხშირე არ შეიძლება განისაზღვროს არსებული მონაცემების საფუძველზე);

·        თვალის კუნთების სისუსტე (თვალის მიასთენია, სიხშირე უცნობია - არსებული მონაცემების საფუძველზე,  სიხშირის დადგენა შეუძლებელია).

სხვა გვერდითი რეაქციები

ხშირი (შეიძლება დაემართოს 10-დან 1 პირს):

·      შაქრიანი დიაბეტი;

·      თავის ტკივილი;

·      თავბრუსხვევა;

·      ყაბზობა;

·      გულისრევა;

·      მუცლის არეში ტკივილი;

·      კუნთების ტკივილი (მიალგია);

·      მომატებული დაღლილობა (ასთენია).

ნაკლებად ხშირი (შეიძლება განვითარდეს 100-დან 1-მდე პირში):

·      კანის ქავილი;

·      კანის გამონაყარი;

·      ჭინჭრის ციება.

 იშვიათი (შეიძლება დაემართოს 1000-დან 1 პირს):

·      სისხლში თრომბოციტების რაოდენობის შემცირება (თრომბოციტოპენია);

·      ღვიძლის ფერმენტების აქტივობის მატება, როგორიცაა ალანინამინოტრანსფერაზა (ALT) და ასპარტატამინოტრანსფერაზა (AST);

·      კუნთების პრობლემები (მიოპათია, მიოზიტის ჩათვლით);

·      მგლურას მსგავსი სინდრომი (პრეპარატებით გამოწვეული მგლურა);

·      კუნთების გაგლეჯვა.

ძალიან იშვიათი (შეიძლება განვითარდეს 10000-დან 1-მდე პირში):

·      პერიფერიული ნერვების პრობლემა (პოლინეიროპათია);

·      მეხსიერების დაკარგვა;

·      სიყვითლე;

·      სახსრების ტკივილი (ართრალგია);

·      სისხლი შარდში (ჰემატურია);

·      სარძევე ჯირკვლების გადიდება მამაკაცებში (გინეკომასტია).

უცნობი (სიხშირის დადგენა შეუძლებელია არსებული მონაცემების საფუძველზე):

·      ფსიქიკური დარღვევები (დეპრესია);

·      პერიფერიული ნერვების პრობლემა (პერიფერიული ნეიროპათია);

·      ძილის დარღვევა, მათ შორის უძილობა და კოშმარები;

·       ხველა;

·      ქოშინი;

·      დიარეა;

·      მყესების პრობლემები (ტენდინოპათია), რომელიც ზოგჯერ შეიძლება გართულდეს მყესის გაგლეჯვით;

·      შეშუპება;

·      კანზე გარკვეული გამონაყარი ან პირის ღრუს წყლულები (ლიქენოიდული წამლისმიერი გამონაყარი).

შეტყობინება გვერდითი რეაქციების შესახებ

თუ გაგივითარდათ რაიმე გვერდითი რეაქცია, მიმართეთ ექიმს. ეს რეკომენდაცია ვრცელდება ნებისმიერ შესაძლო გვერდით რეაქციაზე, მათ შორის მათზე, რომლებიც არ არის ჩამოთვლილი ინსტრუქციაში. თქვენ ასევე შეგიძლიათ პირდაპირ შეატყობინოთ არასასურველი რეაქციების შესახებ. გვერდითი რეაქციების შეტყობინებით დაეხმარებით პრეპარატის უსაფრთხოების შესახებ მეტი ინფორმაციის მოწოდებას.

5. პრეპარატ კრესტორის შენახვა

შეინახეთ პრეპარატი ბავშვებისთვის მიუწვდომელ ადგილას, რომ ბავშვმა ვერ დაინახოს იგი.

არ გამოიყენოთ პრეპარატი მუყაოს კოლოფზე ან ბლისტერზე მითითებული ვარგისიანობის ვადის გასვლის შემდეგ, რაც მითითებული სიტყვების შემდეგ „პრეპარატი ვარგისია “.

ვარგისიანობის ვადა არის მოცემული თვის ბოლო დღე.

   პრეპარატი ინახება არაუმეტეს 30ºС ტემპერატურაზე.

არ გადააგდოთ პრეპარატი კანალიზაციაში. ჰკითხეთ თქვენს ფარმაცევტს, როგორ გაანადგუროთ (უტულიზაცია) პრეპარატოი, რომელიც აღარ არის საჭირო. ეს ზომები ხელს შეუწყობს გარემოს დაცვას.

6. შეფუთვის შემცველობა და სხვა ინფორმაცია

პრეპარატი კრესტორი შეიცავს

მოქმედი ნივთიერებაა როზუვასტატინი.

კრესტორი, 10 მგ, აპკიანი გარსით დაფარული ტაბლეტები

აპკიანი გარსით დაფარული თითოეული ტაბლეტი შეიცავს როზუვასტატინის კალციუმს 10,40 მგ (10,00 მგ როზუვასტატინი).

კრესტორი, 20 მგ, აპკიანი გარსით დაფარული ტაბლეტები

აპკიანი გარსით დაფარული თითოეული ტაბლეტი შეიცავს როზუვასტატინის კალციუმს 20,80 მგ (20,00 მგ როზუვასტატინი).

სხვა ინგრედიენტები (დამხმარე ნივთიერებები) არის: ლაქტოზას მონოჰიდრატი, მიკროკრისტალური ცელულოზა, კალციუმის ფოსფატი, კროსპოვიდონი, მაგნიუმის სტეარატი, ჰიპრომელოზა (E464), ტრიაცეტინი (გლიცეროლის ტრიაცეტატი), ტიტანის დიოქსიდი (E172), რკინის ოქსიდის წითელი საღებავი (E172).

კრესტორი შეიცავს ლაქტოზას (იხილეთ ინსტრუციის მე-2  თავის შესაბამისი ნაწილი).

კრესტორის გარეგნული სახე  და შეფუთვის შიგთავსი

აპკიანი გარსით დაფარული ტაბლეტები.

პრეპარატი არის მრგვალი, ორმხრივ ამოზნექილი, ვარდისფერი, გარსით დაფარული ერთ მხარეს ამოტვიფრული „ZD4522 10“-ით.

14 ტაბლეტი მოთავსებულია  ბლისტერში დამზადებული ალუმინის ლამინატის/ალუმინის ფოლგისგან, რომელიც შედგება პოლიამიდის/ ალუმინის რბილი ფოლგის/არაპლასტიკური პოლივინილქლორიდის (PVC) ფირისგან, დალუქული გამაგრებული ალუმინის ფოლგით,  დაფარული თერმოლაქით; 2 ბლისტერი პრეპარატის გამოყენების ინსტრუქციასთან ერთად თავსდება მუყაოს კოლოფში პირველი გახსნის კონტროლით.

კრესტორი, 20 მგ, აპკიანი გარსით დაფარული ტაბლეტები

პრეპარატი არის მრგვალი, ორმხრივ ამოზნექილი, ვარდისფერი, გარსით დაფარული ერთ მხარეს ამოტვიფრული „ZD4522 20“-ით.

14 ტაბლეტი მოთავსებულია  ბლისტერში დამზადებული ალუმინის ლამინატის/ალუმინის ფოლგისგან, რომელიც შედგება პოლიამიდის/ ალუმინის რბილი ფოლგის/არაპლასტიკური პოლივინილქლორიდის (PVC) ფირისგან, დალუქული გამაგრებული ალუმინის ფოლგით,  დაფარული თერმოლაქით; 2 ბლისტერი პრეპარატის გამოყენების ინსტრუქციასთან ერთად თავსდება მუყაოს კოლოფში პირველი გახსნის კონტროლით.

გაცემის პირობები:

ფარმაცევტული პროდუქტის ჯგუფი -  II, გაიცემა ფორმა N3  რეცეპტით