კოსოფტი - Cosopt თვალის წვეთები 20/5მგ 10მლ

კოსოფტი® კონსერვანტების გარეშე, 20 მგ/მლ + 5 მგ/მლ, თვალის წვეთები, ხსნარი

დორზოლამიდი /თიმოლოლი

პრეპარატის გამოყენებამდე მთლიანად წაიკითხეთ ფურცელი-ჩანართი, რადგან იგი შეიცავს თქვენთვის მნიშვნელოვან ინფორმაციას.

• შეინახეთ ფურცელი-ჩანართი. შესაძლოა, დაგჭირდეთ მისი ხელმეორედ წაკითხვა.
• დამატებითი შეკითხვების არსებობის შემთხვევაში მიმართეთ მკურნალ ექიმს ან ფარმაცევტს.
• პრეპარატი დანიშნულია მხოლოდ თქვენთვის, არ გადასცეთ იგი სხვა ადამიანებს. მან შეიძლება ავნოს მათ, იმ შემთხვევაშიც კი, თუ მათი დაავადების სიმპტომები ემთხვევა თქვენსას.
•რაიმე სახის არასასურველი რეაქციის წარმოშობის შემთხვევაში მიმართეთ მკურნალ ექიმს ან ფარმაცევტს. მოცემული რეკომენდაცია ვრცელდება ნებისმიერ შესაძლებელ არასასურველ რეაქციაზე, მათ შორის ისეთებზეც, რომლებიც არ არის მოცემული ფურცელი-ჩანართის მე-4 ქვეთავის ჩამონათვალში.
 

ფურცელი-ჩანართის შინაარსი:

1. რას წარმოადგენს კოსოფტი კონსერვანტების გარეშე და რისთვის გამოიყენება იგი?
2. რას უნდა მივაქციოთ ყურადღება პრეპარატის კოსოფტი კონსერვანტების გარეშე გამოყენებამდე?
3. როგორ გამოიყენება პრეპარატი კოსოფტი კონსერვანტების გარეშე?
4. რომელი გვერდითი მოვლენები შეიძლება გამოიწვიოს პრეპარატის მიღებამ?
5. როგორ შევინახოთ პრეპარატი კოსოფტი კონსერვანტების გარეშე?
6. შეფუთვის შემადგენლობა და სხვა ინფორმაცია.

1.რას წარმოადგენს კოსოფტი კონსერვანტების გარეშე, და რისთვის გამოიყენება იგი ?

პრეპარატი კოსოფტი კონსერვანტების გარეშე, შეიცავს ორ აქტიურ ნივთიერებას: დორზოლამიდს და თიმოლოლს.

• დორზოლამიდი განეკუთვნება პრეპარატების ჯგუფს, რომელსაც უწოდებენ „კარბოანჰიდრაზის ინჰიბიტორებს“.
• თიმოლოლი გენეკუთვნება პრეპარატების ჯგუფს, რომელსაც უწოდებენ „ბეტა-ბლოკატორებს“.
ორივე აქტიური ნივთიერება სხვადასხვა გზით ამცირებს თვალშიდა წნევას.

პრეპარატი კოსოფტი  კონსერვანტების გარეშე,  გამოიყენება მომატებული თვალშიდა წნევის დასაქვეითებლად გლაუკომის მკურნალობისას, როდესაც ბეტა-ბლოკატორების  მონოთერაპია საკმარისი  არ არის.

პრეპარატი კოსოფტი  კონსერვანტების გარეშე,  არის თვალის წვეთების სტერილური ხსნარი, რომელიც არ შეიცავს კონსერვანტებს.

ასევე, იხილეთ : გლავოპტი ფორტე თვ.წვ.5მლ

2. რას უნდა მივაქციოთ ყურადღება პრეპარატის კოსოფტი კონსერვანტების გარეშე გამოყენებამდე?

არ გამოიყენოთ პრეპარატი კოსოფტი კონსერვანტების გარეშე:

• თუ ალერგიული ხართ დორზოლამიდის, თიმოლოლის ან პრეპარატის ნებისმიერი სხვა კომპონენტის მიმართ (რომლებიც ჩამოთვლილია ფურცელ-ჩანართის მე-6 ქვეთავში).
• ამჟამად ან წარსულში თუ გქონდათ სასუნთქი გზების დაავადებები, ისეთი როგორიცაა ასთმა ან ფილტვების მძიმე დაავადებები სასუნთქი გზების პათოლოგიური შევიწროვებით (მწვავე ქრონიკული ობსტრუქციული ბრონქიტი), რომელმაც შესაძლოა გამოიწვიოს მსტვინავი სუნთქვა, სუნთქვის უკმარისობა და/ან ხანგრძლივი ხველა).
• თუ გაქვთ შენელებული გულისცემა, გულის უკმარისობა ან გულის რიტმის დარღვევა (არარეგულარული გულისცემა).
• თუ გაქვთ თირკმლების მძიმე დაავადებები ან პრობლემები, აგრეთვე ანამნეზში თუ გქონდათ კენჭები თირკმლებში.
• თუ გაქვთ  სისხლის მოჭარბებული მჟავიანობა, რაც გამოწვეულია სისხლში ქლორიდების მომატებით (ჰიპერქლორემიული აციდოზი).
აღნიშნული სამკურნალო პრეპარატის თქვენთვის მიღების მიზანშეწონილობის შესახებ ეჭვის გაჩენის შემთხვევაში მიმართეთ მკურნალ ექიმს ან ფარმაცევტს.

განსაკუთრებული მითითებები და უსაფრთხოების ზომები

პრეპარატის კოსოფტი კონსერვანტების გარეშე გამოყენებამდე კონსულტაციისთვის მიმართეთ მკურნალ ექიმს, თუ ანამნეზში გქონდათ ან გაქვთ შემდეგი დაავადებები:

• გულის იშემიური დაავადება (სიმპტომები შეიძლება მოიცავდეს ტკივილს ან კუმშვით შეგრძნებებს გულმკერდის არეში, ქოშინს ან ხუთვის შეგრძნებას), გულის უკმარისობას, დაბალ არტერიულ წნევას.
• გულისცემის რიტმის დარღვევები, ისეთი როგორიცაა გულისცემის რიტმის შენელება.
• სუნთქვითი პრობლემები, ასთმა ან ფილტვების ქრონიკული ობსტრუქციული დაავადება.
• სისხლის მიმოქცევის დარღვევასთან დაკავშირებული დაავადება (მაგალითად, რეინოს დაავადება ან რეინოს სინდრომი).
• დიაბეტი, ვინაიდან თიმოლოლს შეუძლია შენიღბოს სისხლში შაქრის დაბალი შემცველობის ნიშნები და სიმპტომები.
• ფარისებრი ჯირკვლის მომატებული ჰიპერაქტიურობა, ვინაიდან თიმოლოლს შეუძლია შენიღბოს ფარისებრი ჯირკვლის ჰიპერფუნქციის ნიშნები და სიმპტომები.
• ნებისმიერი სახის ალერგია ან ანაფილაქსიური რეაქცია.
• კუნთების სისუსტე, ან თუ დასმულია მძიმე მიასთენიის დიაგნოზი.
თუ თქვენ ატარებთ რბილ კონტაქტურ ლინზებს, რადგანაც პრეპარატის კოსოფტი კონსერვანტების გარეშე გამოყენება იმ პაციენტებში, რომლებიც ატარებენ კონტაქტურ ლინზებს, არ არის შესწავლილი.
 პაციენტებმა, რომლებსაც ვერცხლთან კონტაქტისას აღენიშნებათ  ჰიპერმგრძნობიარობა არ უნდა გამოიყენონ ეს სამკურნალო პრეპარატი, ვინაიდან წვეთები შესაძლოა შეიცავდეს ვერცხლის კვალს ფლაკონის საცობიდან.

ქირურგიული ოპერაციის წინ აცნობეთ მკურნალ ექიმს, რომ მოიხმართ პრეპარატს კოსოფტი კონსერვანტების გარეშე, ვინაიდან თიმოლოლმა შეიძლება ზეგავლენა მოახდინოს ანესთეზიის მოქმედებაზე.

პრეპარატის კოსოფტი კონსერვანტების გარეშე თვალში ჩაწვეთებამ შეიძლება  ზემოქმედება მოახდინოს მთელს ორგანიზმზე.  

აცნობეთ მკურნალ ექიმს, თუ პრეპარატის კოსოფტი კონსერვანტების გარეშე გამოყენებისას:

შეამჩნევთ თვალის გაღიზიანებას ან ნებისმიერ ახალ პრობლემას, ისეთებს, როგორიცაა თვალის სიწითლე ან ქუთუთოების შეშუპება.
ეჭვობთ, რომ პრეპარატი კოსოფტი კონსერვანტების გარეშე იწვევს ალერგიულ რეაქციას ან მომატებულ მგრძნობელობას (მაგალითად, კანის გამონაყარს, კანის მძიმე რეაქციას ან თვალების სიწითლეს და ქავილს). ასეთ შემთხვევაში შეწყვიტეთ სამკურნალო პრეპარატის მიღება და დაუყოვნებლივ მიმართეთ ექიმს.
გაგივითარდათ თვალის ინფექცია, მიიღეთ თვალის დაზიანება, დაგჭირდათ ოპერაცია თვალებზე, ან თავი იჩინა ახალმა სიმპტომებმა ან გაგიუარესდათ არსებული სიმპტომები.
 ბავშვები

ჩვილებსა და ბავშვებში პრეპარატის კოსოფტი  (კონსერვანტებთან ერთად) გამოყენების შესახებ კვლევის მონაცემები შეზღუდულია.

ხანდაზმული პაციენტები

პრეპარატი კოსოფტი  (კონსერვანტებთან ერთად) კვლევის მონაცემების მიხედვით ხანდაზმულ და ახალგაზრდა პაციენტებში პრეპარატის კოსოფტი  (კონსერვანტებთან ერთად) მოქმედება მსგავსი იყო.

პრეპარატის გამოყენება ღვიძლის ფუნქციის დარღვევის მქონე პაციენტებში

შეატყობინეთ მკურნალ ექიმს ამჟამად არსებული ღვიძლთან დაკავშირებული ნებისმიერი პრობლემის ან ანამნეზში ღვიძლის დაავადებების არსებობის შემთხვევაში.

პრეპარატის კოსოფტი კონსერვანტების გარეშე გამოყენება სხვა მედიკამენტებთან ერთად

პრეპარატმა კოსოფტი კონსერვანტების გარეშე შეიძლება მოახდინოს გავლენა სხვა სამკურნალო პრეპარატებზე, რომელთაც თქვენ იყენებთ,  ან თვითონ დაექვემდებაროს გავლენას იმ სამკურნალო პრეპარატების მხრიდან, რომელთაც თქვენ იღებთ, გლაუკომის სამკურნალო სხვა თვალის წვეთების ჩათვლით.

აცნობეთ მკურნალ ექიმს, თუ მოიხმართ ან გადაწყვეტილი გაქვთ მიიღოთ სისხლის  წნევის დამაქვეითებელი, გულის მუშაობის გასაუმჯობესებელი ან მაკორექტირებელი, ან დიაბეტის სამკურნალო პრეპარატები.

აცნობეთ მკურნალ ექიმს ან ფარმაცევტს, თუ იღებთ, უახლოეს წარსულში მოიხმარეთ ან შესაძლოა დაიწყოთ ნებისმიერი სხვა პრეპარატის მიღება.

ეს განსაკუთრებულად მნიშვნელოვანია, თუ თქვენ:

იღებთ სამკურნალო პრეპარატებს არტერიული წნევის შესამცირებლად ან გულ-სისხლძარღვთა დაავადებების სამკურნალოდ (როგორებიცაა კალციუმის არხის ბლოკატორები, ბეტა-ბლოკატორები ან დიგოქსინი).
იღებთ სამკურნალო პრეპარატებს დარღვეული ან არარეგულარული გულისცემის სამკურნალოდ (როგორებიცაა კალციუმის არხის ბლოკატორები, ბეტა-ბლოკატორები ან დიგოქსინი).
იღებთ ბეტა-ბლოკატორების შემცველ სხვა თვალის წვეთებს.
იღებთ კარბოანჰიდრაზის სხვა ინჰიბიტორს, როგორიცაა აცეტაზოლამიდი.
იღებთ მონოამინოქსიდაზის ინჰიბიტორებს (MAOI).
იღებთ პარასიმპატომიმეტურ მედიკამენტებს, რომლებიც ინიშნება შარდვის გასაუმჯობესებლად.
პარასიმპატომიმეტური მედიკამენტები ასევე წარმოადგენს სამკურნალო პრეპარატების განსაკუთრებულ ტიპს, რომლებიც ზოგჯერ გამოიყენება კუჭ-ნაწლავის მოქმედების ნორმალიზებისთვის.

იღებთ ნარკოტიკულ საშუალებებს, როგორიცაა მორფინი, რომლებიც გამოიყენება საშუალო და ძლიერი ტკივილის გასაყუჩებლად.
იღებთ სამკურნალო პრეპარატებს დიაბეტის სამკურნალოდ.
იღებთ ანტიდეპრესანტებს, როგორებიცაა ფლუოქსეტინი და პაროქსეტინი.
იღებთ სულფანილამიდურ პრეპარატებს (ანტიბიოტიკებს).
იღებთ ქინიდინს, გულის დაავადებებისა და მალარიის ზოგიერთი სახეობის სამკურნალოდ.
 ორსულობა და ძუძუთი კვება

თუ ხართ ფეხმძიმედ ან ძუძუთი კვებავთ, თუ ფიქრობთ, რომ ხართ ფეხმძიმედ, ან გეგმავთ დაფეხმძიმებას, პრეპარატის გამოყენების დაწყებამდე კონსულტაციისთვის მიმართეთ მკურნალ ექიმს.

ორსულობა

ორსულობის დროს არ გამოიყენოთ პრეპარატი კოსოფტი კონსერვანტების გარეშე,  თუ თქვენი ექიმი არ ჩათვლის მკურნალობას საჭიროდ.

ძუძუთი კვება

პრეპარატის კოსოფტი კონსერვანტების გარეშე გამოყენება არ შეიძლება ორსულობისა და ძუძუთი კვების პერიოდში, რადგან  თიმოლოლი შესაძლოა გადავიდეს დედის რძეში.

სატრანსპორტო საშუალებების მართვა და მექანიზმებთან მუშაობა

სატრანსპორტო საშუალებების მართვისა და მექანიზმებთან მუშაობის უნარზე პრეპარატის ზეგავლენასთან დაკავშირებით კვლევები არ ჩატარებულა. თვალის წვეთების კოსოფტი კონსერვანტების გარეშე გამოყენებისთანავე შეიძლება მოხდეს თქვენი მხედველობის დაბინდვა. არ მართოთ სატრანსპორტო საშუალებები და არ იმუშაოთ მექანიზმებთან, სანამ არ აღდგება თქვენი მხედველობის სიმახვილე.

3. როგორ გამოიყენება პრეპარატი კოსოფტი კონსერვანტების გარეშე?

ყოველთვის გამოიყენეთ აღნიშნული პრეპარატი მკურნალი ექიმის რეკომენდაციების სრული დაცვით. ნებისმიერი ეჭვის გაჩენის შემთხვევაში მიმართეთ რჩევისთვის მკურნალ ექიმს. იგი ზუსტად შეგირჩევთ  დოზას და მკურნალობის ხანგრძლივობას.

რეკომენდებული  დოზა - პრეპარატის კოსოფტი კონსერვანტების გარეშე 1 წვეთი დილით და საღამოს, ყოველი დაავადებული თვალის კონიუნქტივალურ პარკში.

თუკი პრეპარატთან კოსოფტი კონსერვანტების გარეშე ერთად სხვა თვალის წვეთებითაც მკურნალობთ, ინტერვალი ამ წვეთებს შორის უნდა იყოს მინიმუმ 10 წუთი.

არ შეცვალოთ სამკურნალო პრეპარატის დოზა ექიმთან კონსულტაციის გარეშე.

თუ გიჭირთ თვალის წვეთების დამოუკიდებლად ჩაწვეთება, სთხოვეთ დახმარება ოჯახის წევრს ან სამედიცინო დამხმარე პერსონალს.

დაუშვებელია კონტეინერის/ფლაკონის კონტაქტი თვალთან ან თვალის მიმდებარე  ქსოვილებთან, ვინაიდან ეს გამოიწვევს თვალის ტრავმას. ოფთალმოლოგიური ხსნარები არასწორი გამოყენებისას შეიძლება დაინფიცირდეს გავრცელებული ბაქტერიებით, რომლებმაც შეიძლება გამოიწვიოს თვალის ინფექციური დაავადებები. დაინფიცირებული ხსნარების გამოყენებას შეუძლია გამოიწვიოს თვალის სერიოზული დაზიანება და შემდგომი მხედველობის დაკარგვა. შესაძლო დაბინძურების თავიდან ასაცილებლად აუცილებელია ხელების დაბანა პრეპარატის გამოყენების წინ და დაუშვებელია კონტეინერის წვერთან შეხება.

სამკურნალო პრეპარატის სამედიცინო გამოყენების ინსტრუქცია

თვალის წვეთების ჩაწვეთების წინ:

ფლაკონის გახსნამდე უნდა დაიბანოთ ხელები;
არ გამოიყენოთ სამკურნალო პრეპარატი, თუ პირველად გამოყენების წინ თქვენ შეამჩნიეთ, რომ ფლაკონის თავსახური პირველი გახსნის კონტროლით დაზიანებულია;
ფლაკონის პირველად გამოყენებისას, პრეპარატის თვალში ჩაწვეთებამდე, ფლაკონზე ხელის ნელი მოჭერით სცადეთ პირველი წვეთის გვერდით გადაწვეთება;
როდესაც იქნებით დარწმუნებული იმაში, რომ შეძლებთ თითო წვეთის ერთ ჯერზე ჩაწვეთებას, საჭიროა შეარჩიოთ ჩაწვეთებისათვის მოსახერხებელი პოზიცია (შეიძლება ჯდომა, დაწოლა ზურგზე ან სარკის წინ დგომა);
ყოველ ჯერზე, ახალი ფლაკონის გახსნისას, ფლაკონის გასააქტიურებლად, მოახდინეთ პირველი წვეთის საცდელი გადაწვეთება.
როგორ ჩავიწვეთოთ პრეპარატი:

1.დაიჭირეთ ფლაკონი ვერტიკალურად და მოაბრუნეთ თავსახური, რათა გახსნათ ფლაკონი. არ შეეხოთ ფლაკონის წვერს ხსნარის დაბინძურების თავიდან აცილების მიზნით.
2. გადაწიეთ თავი უკან და დაიჭირეთ ფლაკონი თვალს ზემოთ.
3. ჩამოქაჩეთ ქვედა ქუთუთო ძირს და აიხედეთ ზემოთ. მოუჭირეთ ხელი ფლაკონს შუაში ფრთხილად და ჩაიწვეთეთ წვეთი თვალში. გთხოვთ გაითვალისწინოთ, რომ ფლაკონზე ხელის მოჭერასა და წვეთის ჩამოვარდნამდე შეფერხება შეიძლება იყოს რამდენიმე წამი. ფლაკონს ხელი ძლიერად არ მოუჭიროთ.
4.დახუჭეთ თვალი და მიიჭირეთ თითი თვალშიდა კუთხეზე 2 წუთის განმავლობაში. ეს საშუალებას მოგცემთ თავიდან აიცილოთ სამკურნალო პრეპარატის გადინება ცრემლსადენიდან.
5.გაიმეორეთ 2-4 პუნქტები მეორე თვალში ჩასაწვეთებლად, თუ დაგინიშნათ ექიმმა. ხანდახან საჭიროა მხოლოდ ერთი თვალის მკურნალობა და ექიმმა უნდა გითხრათ, თქვენ საჭიროებთ თუ არა ამას და რომელი თვალი საჭიროებს მკურნალობას.
6.ყოველი გამოყენების შემდეგ და თავსახურის დახურვამდე საჭიროა ფლაკონი გადმოვაბრუნოთ ქვევით და დავიქნიოთ ერთხელ, ისე რომ საწვეთურის წვერს არ შევეხოთ, რათა ხსნარის ნარჩენი მოვაცილოთ  საწვეთურის წვერს. ეს აუცილებელია მომდევნო წვეთების მიწოდების უზრუნველსაყოფად.
7.მოიშორეთ წამლის ნარჩენები თვალის გარშემო კანის ზედაპირიდან.
8.სამკურნალო საშუალების შენახვის 2-თვიანი ვადის გასვლის შემდეგ ფლაკონში რჩება ცოტაოდენი კოსოფტი კონსერვანტების გარეშე თვალის წვეთები. არ უნდა ეცადოთ ფლაკონში დარჩენილი სამკურნალო პრეპარატის გამოყენებას მას შემდეგ, რაც დაასრულებთ მკურნალობის კურსს. არ გამოიყენოთ თვალის წვეთები ფლაკონის პირველი გახსნიდან ორი თვის გასვლის შემდეგ.
 თუ არ ხართ დარწმუნებული, როგორ უნდა მოიხმაროთ სწორად ეს სამკურნალო პრეპარატი, კონსულტაციისთვის მიმართეთ ექიმს ან ექთანს.

თუ თქვენ მიიღეთ საჭიროზე მეტი პრეპარატი კოსოფტი კონსერვანტების გარეშე

თუ თქვენ მოიხმარეთ პრეპარატის კოსოფტი კონსერვანტების გარეშე დიდი რაოდენობა, დაუყოვნებლივ მიმართეთ ექიმს, ფარმაცევტს ან შხამების კონტროლის ცენტრს (070/245.245).

თუ თქვენ ჩაიწვეთეთ საჭიროზე მეტი პრეპარატი, ან, გარდა ამისა, ჩაგეყლაპათ იგი, შეიძლება იგრძნოთ თავბრუსხვევა, სუნთქვის გაძნელება ან გულის რიტმის შენელების შეგრძნება. სასწრაფოდ მიმართეთ ექიმს სამედიცინო დახმარებისთვის.

თუ თქვენ დაგავიწყდათ პრეპარატის კოსოფტი კონსერვანტების გარეშე მიღება

პრეპარატის კოსოფტი კონსერვანტების გარეშე გამოყენებისას ძალიან მნიშვნელოვანია ექიმის დანიშნულების დაცვა.

თუ თქვენ დაგავიწყდათ პრეპარატის მიღება, რაც შეიძლება მალე მიიღეთ გამოტოვებული დოზა. თუმცა, თუ მალევე გიწევთ შემდეგი დოზის მიღება, არ მიიღოთ გამოტოვებული დოზა და დაუბრუნდით გამოყენების ჩვეულ გრაფიკს.

არ მიიღოთ ორმაგი დოზა გამოტოვებული დოზის კომპენსირებისთვის.

თუ თქვენ შეწყვიტეთ პრეპარატის კოსოფტი კონსერვანტების გარეშე მიღება

თუ თქვენ აპირებთ შეწყვიტოთ სამკურნალო პრეპარატის მიღება, გაიარეთ კონსულტაცია მკურნალ ექიმთან.

პრეპარატის მიღების შესახებ კითხვების არსებობის შემთხვევაში  მიმართეთ მკურნალ ექიმს ან ფარმაცევტს.

4.შესაძლო გვერდითი მოვლენები

როგორც ყველა სამკურნალო პრეპარატს, მოცემულ პრეპარატსაც შეუძლია გამოიწვიოს გვერდითი მოვლენები, თუმცა ის ყველას არ გამოუვლინდება.

სერიოზული გვერდითი მოვლენები:

თუ გამოგივლინდათ შემდეგი გვერდითი მოვლენებიდან რომელიმე, შეწყვიტეთ მოცემული სამკურნალო პრეპარატის მიღება და დაუყოვნებლივ მიმართეთ ექიმს სამედიცინო დახმარებისთვის.

იშვიათად (შესაძლოა გამოუვლინდეს არაუმეტეს 1 ადამიანისა 1.000-დან):

ტკივილი გულმკერდის არეში, შეშუპება (სითხის დაგროვება), გულისცემის რიტმის ან სიჩქარის დარღვევა, გულის შეგუბებითი უკმარისობა (გულის დაავადება ქოშინით და სითხის დაგროვებით გამოწვეული ტერფებისა და ფეხების შეშუპებით), გულის გაჩერება, გულის ბლოკადა, დაბალი არტერიული წნევა, ცერებრული იშემია (თავის ტვინისთვის სისხლის მიწოდების შემცირება), ინსულტი.
ქოშინი, სუნთქვის უკმარისობა, სასუნთქი გზების შევიწროება ფილტვებში.
სისტემური ალერგიული რეაქციების ნიშნები და სიმპტომები, ანგიონევროზული შეშუპების, ჭინჭრის ციების, ქავილის, გამონაყარის, ანაფილაქსიის ჩათვლით.
კანის მწვავე რეაქციები, კანქვეშ შეშუპების ჩათვლით.
სხვა შესაძლო  გვერდითი მოვლენები,

თქვენ შეგიძლიათ ჩვეულებრივ  განაგრძოთ წვეთების მოხმარება, თუ გვერდითი მოვლენები  არ არის სერიოზული სახის. თუ თქვენ გაღელვებთ თქვენი მდგომარეობით, კონსულტაციისთვის მიმართეთ მკურნალ ექიმს ან ფარმაცევტს. არ შეწყვიტოთ პრეპარატის კოსოფტი კონსერვანტების გარეშე მიღება ექიმთან კონსულტაციის გარეშე.

პრეპარატის კოსოფტი კონსერვანტების გარეშე ან მისი რომელიმე კომპონენტის მიღებისას კლინიკური კვლევების დროს ან სამომხმარებლო ბაზარზე გამოშვების შემდეგ ადგილი ჰქონდა შეტყობინებებს შემდეგი გვერდითი მოვლენები  შესახებ:

ძალიან ხშირად (შესაძლოა გამოუვლინდეს 1 ადამიანზე მეტს 10-დან):

წვა და ჩხვლეტის შეგრძნება თვალებში, გემოვნებითი შეგრძნებების დარღვევა.
ხშირად (შესაძლოა გამოუვლინდეს არაუმეტეს 1 ადამიანისა 10-დან):

გამოვლინება მხედველობის ორგანოს მხრივ: თვალებისა და მისი მიდამოების სიწითლე, ცრემლდენა ან თვალების ქავილი, რქოვანას ეროზია (თვალის კაკლის წინა გარსის დაზიანება), თვალებისა და მისი მიდამოების შეშუპება და/ან გაღიზიანება, თვალში უცხო სხეულის შეგრძნება და ტკივილი, რქოვანას მგრძნობელობის დაქვეითება (მგრძნობელობის არქონა თვალში მექანიკური ნაწილაკების მოხვედრისას), თვალების ტკივილი, თვალის სიმშრალე, დაბინდული მხედველობა.
ზოგადი გვერდითი მოვლენები: თავის ტკივილი, სინუსიტი (დაჭიმულობის ან ცხვირის გაჭედვის შეგრძნება), გულისრევა, სისუსტე/დაღლილობა, მოთენთილობა.
არახშირად (შესაძლოა გამოუვლინდეს არაუმეტეს 1 ადამიანისა 100-დან):

გამოვლინება მხედველობის ორგანოზე: ფერადი გარსის ანთება, მხედველობის დარღვევა, მათ შორის რეფრაქციის ცვლილებები (ზოგიერთ შემთხვევაში გამოწვეული მიოტიკებით თერაპიის შეწყვეტით).
ზოგადი არასასურველი ეფექტები: თავბრუსხვევა, დეპრესია, გულისცემის შენელება, გულის წასვლა, ქოშინი, დიარეა, ქვები თირკმლებში.
იშვიათად (შესაძლოა გამოუვლინდეს არაუმეტეს 1 ადამიანისა 1000-დან):

გამოვლინება მხედველობის ორგანოზე: დროებითი ახლომხედველობა, რომელიც შეიძლება გასწორდეს მკურნალობის შეწყვეტის შემდგომ, სისხლძარღვოვანი გარსის აშრევება ფილტრაციული ოპერაციის შემდეგ, რამაც შესაძლოა გამოიწვიოს მხედველობის დარღვევა, ქუთუთოების დაწევა (თვალი რჩება ნახევრად დახუჭულ მდგომარეობაში), დიპლოპია, ქუთუთოებზე ქერქის წარმოქმნა, რქოვანას შეშუპება (მხედველობის დარღვევით), თვალშიდა წნევის დაქვეითება.
ზოგადი არასასურველი ეფექტები: ძლიერი გულისცემა, რომელიც შეიძლება იყოს სწრაფი ან არარეგულარული (გულისცემის შეგრძნება), რეინოს ფენომენი, ხელებისა და ფეხების შეშუპება ან გაცივება და სისხლის მიმოქცევის შემცირება ხელებსა და ფეხებში, სპაზმები ფეხებში და/ან ფეხების ტკივილი სიარულის დროს (წყვეტილი სიკოჭლე), ხველება, ყელში ღიტინის შეგრძნება, პირის სიმშრალე, უძილობა, კოშმარული სიზმრები, მეხსიერების დაკარგვა, ფეხებსა ან ხელებში ჩხვლეტის შეგრძნება ან დაბუჟება, მიასთენიის ნიშნებისა და სიმპტომების გაძლიერება (კუნთების სისუსტე), სექსუალური მოთხოვნილების შემცირება, სისტემური  წითელი მგლურა (იმუნური დაავადება, რომელმაც შეიძლება გამოიწვიოს შინაგანი ორგანოების ანთება), შუილი ყურებში, რინიტი, სისხლდენა ცხვირიდან, დიარეა, კონტაქტური დერმატიტი, თმის ცვენა,  მოვერცხლისფრო-თეთრი ფერის გამონაყარი კანზე (ფსორიაზის მსგავსი გამონაყარი), პეირონის დაავადება, რომელმაც შესაძლოა გამოიწვიოს სასქესო ორგანოს გამრუდება, ალერგიული ტიპის რეაქციები, როგორებიცაა კანის გამონაყარი, ჭინჭრის ციება, ქავილი, იშვიათ შემთხვევებში შესაძლოა ტუჩების, თვალების და პირის შეშუპება,  მსტვენავი სუნთქვა.    
როგორც თვალში ჩასაწვეთებელი სხვა პრეპარატები, თიმოლოლიც შეიწოვება სისხლში. ამან შესაძლოა გამოიწვიოს ისეთივე გვერდით მოვლენები, როგორსაც იწვევს ბეტა-ბლოკატორები პერორალური მიღებისას. მიუხედავად ამისა, ოფთალმოლოგიური პრეპარატის ადგილობრივი მოხმარებისას გვერდითი მოვლენების განვითარების სიხშირე უფრო დაბალია, ვიდრე მედიკამენტის პერორალურად მიღებისას ან ინექციით შეყვანისას.  ჩამოთვლილი დამატებითი არასასურველი რეაქციები მოიცავს რეაქციებს, რომლებიც შეინიშნება ბეტა-ბლოკატორების კლასში მხედველობის ორგანოს სამკურნალოდ მათი გამოყენების დროს.

სიხშირე უცნობია (არსებული მონაცემების საფუძველზე სიხშირის განსაზღვრა შეუძლებელია):

გლუკოზის დაბალი დონე სისხლში, მუცლის ტკივილი, ღებინება, კუნთების ტკივილი, რომელიც არ არის დაკავშირებული ფიზიკურ დატვირთვასთან, სექსუალური დისფუნქცია, ჰალუცინაციები და  თვალში უცხო სხეულის შეგრძნება, გახშირებული გულისცემა და მომატებული  წნევა.

შეტყობინება გვერდითი მოვლენების შესახებ

თუ თავს იჩენს რაიმე სახის გვერდითი მოვლენა, კონსულტაციისთვის მიმართეთ თქვენს ექიმს ან ფარმაცევტს. მოცემული რეკომენდაცია ვრცელდება ნებისმიერ შესაძლო გვერდითი მოვლენაზე, მათ შორის ისეთებზეც, რომლებიც არ არის ჩამოთვლილი ფურცელ-ჩანართში.

გვერდითი მოვლენების შესახებ შეტყობინებით თქვენ გვეხმარებით მივიღოთ მეტი ინფორმაცია პრეპარატის უსაფრთხოების შესახებ.

5. როგორ შევინახოთ პრეპარატი კოსოფტი კონსერვანტების გარეშე?

პრეპარატი შეინახეთ ბავშვებისაგან მიუწვდომელ ადგილას.

არ გამოიყენოთ  პრეპარატი ვარგისიანობის ვადის გასვლის შემდეგ, რომელიც მითითებულია ფლაკონის ეტიკეტსა და მუყაოს შეფუთვაზე  მოცემული წარწერის შემდეგ „ვარგისიანობის ვადა“ (EXP). ვარგისიანობის ვადის გასვლის თარიღად ითვლება იმ თვის ბოლო დღე, რომელიც მითითებულია შეფუთვაზე.

ინახება არაუმეტეს 25°C ტემპერატურაზე.

ფლაკონის გამოყენება შეიძლება პირველი გახსნიდან 2 თვის განმავლობაში. ფლაკონი უნდა შეინახოთ მჭიდროდ დახურულ მდგომარეობაში.  

არ გამოიყენოთ სამკურნალო პრეპარატი, თუ პირველად გამოყენების წინ შეამჩნევთ, რომ ფლაკონის  საცობი პირველი გახსნის კონტროლით დაზიანებულია.

არ გადააგდოთ სამკურნალო პრეპარატი კანალიზაციაში. დააზუსტეთ ფარმაცევტთან ან ნარჩენების მართვის ადგილობრივ კომპანიასთან, თუ როგორ უნდა მოხდეს იმ სამკურნალო პრეპარატის უტილიზაცია, რომელსაც თქვენ აღარ იყენებთ. ეს ღონისძიებები ხელს შეუწყობს გარემოს დაცვას.

6.შეფუთვის შემადგენლობა და სხვა ინფორმაცია

პრეპარატი კოსოფტი კონსერვანტების გარეშე შეიცავს:

აქტიურ ნივთიერებებს: დორზოლამიდს და თიმოლოლს.
1 მლ შეიცავს 20 მგ დორზოლამიდს (22,26 მგ დორზოლამიდის ჰიდროქლორიდის  სახით) და 5 მგ თიმოლოლს (6,83 მგ თიმოლოლის მალეატის სახით).

დამხმარე ნივთიერებებს: ჰიდროქსიეთილცელულოზას, მანიტოლს (Ph. Eur.), ნატრიუმის ციტრატს 2 H2O,  ნატრიუმის ჰიდროქსიდს (pH კორექტირებისათვის) და საინექციო წყალს.

პრეპარატის კოსოფტი კონსერვანტების გარეშე გარეგნული იერსახე და შეფუთვის შემადგენლობა

პრეპარატი კოსოფტი კონსერვანტების გარეშე არის გამჭირვალე, უფერო ან თითქმის უფერო, ოდნავ ბლანტი სითხე. მოთავსებულია დაბალი სიმკვრივის პოლიეთილენისგან დამზადებულ თეთრ ფლაკონში მაღალი სიმკვრივის პოლიეთილენისგან დამზადებული თეთრი Novelia (ნოველია) საწვეთურით,  მაღალი სიმკვრივის პოლიეთილენისგან დამზადებული თეთრი ხრახნიანი თავსახურით პირველი გახსნის კონტროლით.

შეფუთვის ზომა: 1, 2 ან 3 ფლაკონი ერთ მუყაოს კოლოფში.

შესაძლოა ყველა ზომის ფლაკონი ერთდროულად არ იყოს გაყიდვაში.

გაცემა

გაიცემა რეცეპტით.