Azithromycin - აზითრომიცინი ნორმონი 500მგ 3 ტაბლეტი

აზითრომიცინი ნორმონი 500 მგ აპკიანი გარსით დაფარული ტაბლეტები

მედიკამენტის მიღებამდე საჭიროა გამოყენების ინსტრუქციის ყურადღებით წაკითხვა, რადგან შეიცავს პაციენტისათვის მნიშვნელოვან ინფორმაციას.

-    საჭიროა ინსტრუქციის შენახვა. შესაძლოა, წარმოიშვას მისი ხელახალი გაცნობის აუცილებლობა.

-    დამატებითი კითხვების არსებობისას საჭიროა მკურნალ ექიმთან ან ფარმაცევტთან მიმართვა.

-    მედიკამენტი განკუთვნილია მხოლოდ პაციენტისთვის. არ შეიძლება მისი სხვა პირებისათვის მიცემა. დაავადების სიმტომების მსგავსების მიუხედავად, ის საზიანო შეიძლება აღმოჩნდეს მათთვის. 

-    ნებისმიერი გვერდითი მოვლენის განვითარებისას პაციენტმა უნდა მიმართოს მკურნალ ექიმს ან ფარმაცევტს. ეს მოიცავს ისეთ შესაძლო გვერდით მოვლენებს, რომლებიც არ არის ჩამოთვლილი ინსტრუქციაში, იხ. პარაგრაფი 4.

ინსტრუქციაში მოცემულია:

1.   რას წარმოადგენს აზითრომიცინი ნორმონი და მისი გამოყენება;

2.   რა უნდა იცოდეს პაციენტმა აზითრომიცინი ნორმონის მიღებამდე;

3.   აზითრომიცინი ნორმონის მიღების წესი;

4.   შესაძლო გვერდითი მოვლენები;

5.   აზითრომიცინი ნორმონის შენახვის წესი;

6.   შეფუთვის შემცველობა და სხვა ინფორმაცია.

 

1.   რას წარმოადგენს აზითრომიცინი ნორმონი და მისი გამოყენება 

აზითრომიცინი მიეკუთვნება ანტიბიოტიკების მაკროლიდების ჯგუფს. ის ანადგურებს ინფექციის გამომწვევ ბაქტერიებს.

ანტიბიოტიკები გამოიყენება ბაქტერიული ინფექციების სამკურნალოდ და არ გამოიყენება ისეთი ვირუსული ინფექციების, როგორიცაა გრიპი და კატარი, სამკურნალოდ.

მნიშვნელოვანია, რომ მოხდეს მკურნალი ექიმის მიერ მოცემული ინსტრუქციების დაცვა მედიკამენტის დოზებთან, დოზებს შორის ინტერვალთან და მკურნალობის ხანგრძლივობასთან დაკავშირებით.

დაუშვებელია მედიკამენტის შენახვა ან ხელახალი გამოყენება. მკურნალობის დასრულების შემდეგ დარჩენილი ანტიბიოტიკები უნდა დაბრუნდეს აფთიაქში მათი სათანადო უტილიზაციისათვის. დაუშვებელია მედიკამენტის გადაგდება საკანალიზაციო წყალში ან საყოფაცხოვრებო ნაგავში.
 მედიკამენტი ნაჩვენებია ორგანიზმის სხვადასხვა ნაწილების ბაქტერიებით გამოწვეული ინფექციების სამკურნალოდ 45 კგ-ზე მეტი სხეულის წონის მქონე ბავშვებსა და მოზრდილებში.

პრეპარატი გამოიყენება შემდეგი ინფექციების სამკურნალოდ:

·       ხახის, ტონზილების, ყურის ან სინუსური წიაღების ინფექციები;

·       ბრონქიტი და პნევმონია (სუსტი ან საშუალო სიმძიმის);

·       კანისა და რბილი ქსოვილების ინფექციები (სუსტი ან საშუალო სიმძიმის);

·       ურეთრის ინფექცია (ურეთრიტი) ან საშვილოსნოს ყელის ინფექცია (ცერვიციტი), იხ. პარაგრაფი 3;

·       სქესობრივად გადამდები  ინფექციები (რბილი შანკრი), იხ. პარაგრაფი 3.

2.   რა უნდა იცოდეს პაციენტმა აზითრომიცინი ნორმონის მიღებამდე

დაუშვებელია აზითრომიცინი ნორმონის მიღება:

·       თუ პაციენტი ალერგიულია აზითრომიცინის, ერითრომიცინის, მაკროლიდების ან კეტოლიდების ჯგუფის სხვა ანტიბიოტიკების ან მედიკამენტის სხვა რომელიმე ინგრედიენტის მიმართ (ჩამონათვალი იხ. მე-6 პარაგრაფში).

გაფრთხილებები და სიფრთხილის ზომები

აზითრომიცინი ნორმონის მიღებამდე საჭიროა ექიმთან ან ფარმაცევტთან კონსულტაცია:

·       თუ პაციენტს აღენიშნება ალერგიული ტიპის რეაქციები (ქავილი, სიწითლე, კანზე გამონაყარი, შეშუპება ან სუნთქვის გაძნელება ან მედიკამენტის მიმართ ალერგიული რეაქცია, რომელიც ხასიათდება ლეიკოციტების რაოდენობის მომატებითა და გენერალიზებული სიმპტომებით), რომლებიც შეიძლება მძიმე იყოს და განვითარდეს აზითრომიცინი ნორმონით მკურნალობის დროს. საჭიროა ექიმთან მიმართვა, რომელმაც შეიძლება შეწყვიტოს მკურნალობა და დანიშნოს სათანადო თერაპია;

·       თუ პაციენტს აღენიშნება ღვიძლის პრობლემები ან კანის და/ან თვალის სკლერების გაყვითლება მკურნალობის დროს, საჭიროა ექიმთან კონსულტაცია, რომელიც გადაწყვეტს მკურნალობის შეწყვეტას ან ღვიძლის ფუნქციის ანალიზების ჩატარებას;

·       თუ პაციენტი მკურნალობდა ჭვავის რქის წარმოებულებით (გამოიყენება შაკიკის ტიპის თავის ტკივილის სამკურნალოდ), საჭიროა ექიმის ინფორმირება, რადგან თანმხლებმა მკურნალობამ აზითრომიცინით შეიძლება გამოიწვიოს გვერდითი რეაქცია, ე.წ. ერგოტიზმი;

·       მედიკამენტით მკურნალობის პერიოდში შესაძლებელია განვითარდეს სუპერინფექცია რეზისტენტული მიკროორგანიზმებით, მათ შორის სოკოთი. ამ შემთხვევაში საჭიროა ექიმთან კონსულტაცია;

·       აზითრომიცინი ნორმონით მკურნალობის დროს ან მის შემდეგ შეიძლება განვითარდეს ანტიბიოტიკებთან დაკავშირებული კოლიტის (ფაღარათის) სიმპტომები. ასეთ შემთხვევაში მკურნალობა უნდა შეწყდეს და ექიმი დანიშნავს სათანადო მკურნალობას;

·       თუ პაციენტს აღენიშნება თირკმლის სერიოზული დაზიანება, საჭიროა ექიმთან კონსულტაცია;

·       თუ პაციენტს აღენიშნება გულისცემის სიხშირის ცვლილება (არითმია) ან წინასწარგანმწყობი ფაქტორები (გულის გარკვეული დაავადებები, სისხლში ელექტროლიტების დონის ცვლილებები ან გარკვეული მედიკამენტებით თერაპია), საჭიროა ექიმთან კონსულტაცია, რადგან მედიკამენტმა შეიძლება გააუარესოს ეს ცვლილებები ან გახდეს მათი ტრიგერი.

თუ პაციენტს აღენიშნება მიასთენია ან კუნთების სისუსტე და დაღლილობა მკურნალობის პერიოდში, საჭიროა ექიმის ინფორმირება, რადგან აზითრომიცინი შეიძლება ამ დაავადების სიმპტომების განვითარების ტრიგერი გახდეს ან გამოიწვიოს მათი გაუარესება. 

ბავშვები და მოზარდები

ბავშვები და მოზარდები 45 კგ-ზე ნაკლები სხეულის წონით 

ტაბლეტები არ არის ნაჩვენები ამ ჯგუფის პაციენტებისათვის. გამოყენებულ უნდა იქნას აზითრომიცინის შემცველი პროდუქტების სხვა ფარმაცევტული ფორმები. დაუშვებელია მათი გამოყენება 6 თვემდე ასაკის ბავშვებში.

ბავშვები და მოზარდები 45 კგ-ზე მეტი სხეულის წონით 

ეს მედიკამენტი არ არის რეკომენდებული ბავშვებში, რომლებსაც არ შეუძლიათ მთლიანი ტაბლეტების გადაყლაპვა. გამოყენებულ უნდა იქნას აზითრომიცინის შემცველი პროდუქტების სხვა ფარმაცევტული ფორმები.

სხვა მედიკამენტები და აზითრომიცინი ნორმონი

მკურნალ ექიმს უნდა ეცნობოს, თუ პაციენტი იღებს, უახლოეს წარსულში იღებდა ან აპირებს, მიიღოს ნებისმიერი სხვა მედიკამენტი.

განსაკუთრებით მნიშვნელოვანია, რომ მკურნალ ექიმს ან ფარმაცევტს ეცნობოს, თუ პაციენტი იღებს ქვემოთ ჩამოთვლილი მედიკამენტებიდან რომელიმეს:

·       ანტაციდები (მედიკამენტები, რომლებიც გამოიყენება საჭმლის მონელების პრობლემების სამკურნალოდ). რეკომენდებულია, რომ მედიკამენტები არ იქნას მიღებული ერთდროულად, დღის ერთსა და იმავე მონაკვეთში;

·       ერგოს წარმოებულები (როგორიცაა ერგოტამინი, გამოიყენება შაკიკის ტიპის თავის ტკივილის დროს), რადგან აზითრომიცინთან ერთდროულმა გამოყენებამ შეიძლება გამოიწვიოს ერგოტიზმი (პოტენციურად სერიოზული გვერდითი მოვლენა დაბუჟების ან ჩხვლეტის შეგრძნებით კიდურებში, კუნთების სპაზმები, თავის ტკივილი, კრუნჩხვები ან მუცლის ტკივილი ან მკერდის არეში ტკივილი);

·       დიგოქსინი (მედიკამენტი, რომელიც გამოიყენება არითმიების სამკურნალოდ), რადგან აზითრომიცინმა შეიძლება გაზარდოს სისხლში დიგოქსინის დონე. ამიტომ საჭიროა მისი დონის მონიტორინგი;

·       კოლხიცინი (გამოიყენება პოდაგრისა და მემკვიდრეობითი ხმელთაშუა ზღვისპირეთის ცხელების დროს);

·       ციკლოსპორინი (გამოიყენება ორგანოგადანერგილ პაციენტებში), რადგან აზითრომიცინმა შეიძლება გაზარდოს ციკლოსპორინის დონე სისხლში, ამიტომ საჭიროა მისი დონის მონიტორინგი; 

·       დიკუმარინის ანტიკოაგულანტები (მედიკამენტები, რომლებიც გამოიყენება სისხლის თრომბოზის პრევენციისათვის), რადგან აზითრომიცინმა შეიძლება გააძლიეროს ამ ანტიკოაგულანტების ეფექტი. ექიმმა უნდა მოახდინოს სისხლის შედედების მაჩვენებლების (პროთრომბინის დროის) მონიტორინგი;

·       ნელფინავირი, ზიდოვუდინი (ადამიანის იმუნოდეფიციტური ვირუსით გამოწვეული ინფექციების სამკურნალო მედიკამენტები), რადგან შეიძლება გაიზარდოს აზითრომიცინის დონე სისხლში;

·       ფლუკონაზოლი (გამოიყენება სოკოვანი ინფექციების სამკურნალოდ), რადგან შეიძლება გაიზარდოს აზითრომიცინის დონე სისხლში;

·       ტერფენადინი (გამოიყენება ალერგიების სამკურნალოდ), რადგან მათმა კომბინაციამ შეიძლება გამოიწვიოს გულის პრობლემები;

·       რიფაბუტინი (გამოიყენება ფილტვის ტუბერკულოზის და მიკობაქტერიით გამოწვეული არაპულმონარული ინფექციების სამკურნალოდ), რადგან შეიძლება გამოიწვიოს ლეიკოციტების რაოდენობის შემცირება. მედიკამენტები, რომელთა აქტიური ნივთიერებები ახანგრძლივებენ Qთ ინტერვალს, როგორიცაა IA კლასის (ქინიდინი და პროკაინამიდი) და III კლასის (დოფეტილიდი, ამიოდარონი და სოტალოლი) ანტიარითმიული პრეპარატები, ცისაპრიდი, ტერფენადინი, ანტიფსიქოზური მედიკამენტები (როგორიცაა პიმოზიდი), ანტიდეპრესანტები (როგორიცაა ციტალოპრამი) და ანტიინფექციური საშუალებები (ფტორქინოლონები, როგორიცაა: მოქსიფლოქსაცინი ან ლევოფლოქსაცინი ან ქლოროქვინი), რადგან შეიძლება გამოიწვიოს გულისცემის სიხშირის მძიმე ცვლილებები და მათ შორის, გულის გაჩერებაც.

არ აღინიშნა ურთიერთქმედება აზითრომიცინსა და ცეტირიზინს (გამოიყენება ალერგიული რეაქციის სამკურნალოდ); დიდანოზინს, ეფავირენცს, ინდინავირს (გამოიყენება აივ ინფექციის სამკურნალოდ); ატორვასტატინს (გამოიყენება მაღალი ქოლესტერინისა და გულის პრობლემების სამკურნალოდ); კარბამაზეპინს (გამოიყენება ეპილეფსიის სამკურნალოდ), ციმეტიდინს (გამოიყენება კუჭის მჟავიანობის მომატების დროს); მეთილპრედნიზოლონს (გამოიყენება იმუნური სისტემის დასათრგუნად); თეოფილინს (გამოიყენება სუნთქვის პრობლემების დროს); მიდაზოლამს, ტრიაზოლამს (იწვევს სედაციას); სილდენაფილს (გამოიყენება იმპოტენციის სამკურნალოდ) და ტრიმეტოპრიმს/სულფამეთოქსაზოლს (გამოიყენება ინფექციების დროს) შორის. 

აზითრომიცინი ნორმონის მიღება საკვებთან და სასმელთან ერთად

ტაბლეტების მიღება უნდა მოხდეს მთლიანად, წყალთან ერთად და შესაძლებელია როგორც საკვებთან ერთად, ისე მის გარეშე.

ფეხმძიმობა, ძუძუთი კვება და რეპროდუქციულ ფუნქციაზე გავლენა

ფეხმძიმობის ან ძუძუთი კვების დროს, შესაძლო ფეხმძიმობის ან ფეხმძიმობის დაგეგმვის შემთხვევაში საჭიროა მკურნალ ექიმთან ან ფარმაცევტთან კონსულტაცია ამ მედიკამენტით მკურნალობის დაწყებამდე. 

არ არის საკმარისი ინფორმაცია აზითრომიცინის უსაფრთხოების შესახებ ფეხმძიმობის დროს. ამიტომ, აზითრომიცინი არ უნდა იქნას გამოყენებული ფეხმძიმობის ან მისი დაგეგმვის დროს, გარდა იმ შემთხვევისა, თუ არ არის ექიმის მიერ დანიშნული.

აზითრომიცინი გამოიყოფა დედის რძეში. ძუძუთი კვებაზე მყოფ ბავშვზე პოტენციური გვერდითი მოვლენების გამო, აზითრომიცინი არ არის რეკომენდებული ძუძუთი კვების დროს; თუმცა, ძუძუთი კვება შეიძლება განახლდეს აზითრომიცინი ნორმონით მკურნალობის დამთავრებიდან ორი დღის შემდეგ.

ავტომობილისა და სხვა მექანიზმების მართვა

მედიკამენტს არ აქვს, ან უმნიშვნელო გავლენა აქვს ავტომობილისა და სხვა მექანიზმების მართვის უნარზე.

აზითრომიცინი ნორმონი შეიცავს ლაქტოზასა და ნატრიუმს

ეს მედიკამენტი შეიცავს ლაქტოზას. თუ პაციენტს აღენიშნება აუტანლობა რომელიმე შაქრის მიმართ, საჭიროა ექიმთან კონსულტაცია ამ მედიკამენტის მიღებამდე.

ეს მედიკამენტი შეიცავს 23 მგ-ზე (1 მმოლ-ზე) ნაკლებ ნატრიუმს ერთ აპკიანი გარსით დაფარულ ტაბლეტში, რაც ნიშნავს, რომ ის პრაქტიკულად “ნატრიუმისგან თავისუფალია”.

3.   აზითრომიცინი ნორმონის მიღების წესი

მედიკამენტის მიღება ყოველთვის უნდა მოხდეს ზუსტად ინსტრუქციის შესაბამისად ან ექიმის ან ფარმაცევტის დანიშნულების მიხედვით. თუ პაციენტი არ არის დარწმუნებული, საჭიროა მკურნალ ექიმთან ან ფარმაცევტთან კონსულტაცია.

მკურნალი ექიმი განსაზღვრავს პაციენტისათვის ყველაზე შესაფერის დოზასა და მკურნალობის ხანგრძლივობას, მდგომარეობისა და მკურნალობის მიმართ პასუხის მიხედვით. ზოგადად, რეკომენდებული დოზა და მიღების სიხშირე შემდეგია:

მოზრდილები (ხანდაზმული პაციენტების ჩათვლით) და ბავშვები 45 კგ-ზე მეტი სხეულის წონით 

ჩვეულებრივი დოზაა 1,500 მგ 3 ან 5 დღის განმავლობაში, შემდეგი სახით:

·       თუ მიიღება 3 დღის განმავლობაში, 500 მგ დღეში;

·       თუ მიიღება 5 დღის განმავლობაში, 500 მგ პირველ დღეს და 250 მგ მე-2 დღიდან მე-5 დღის ჩათვლით.

ხანდაზმულ პაციენტებში ინიშნება იგივე დოზა, რაც მოზრდილებში. თუმცა, თუ პაციენტს აღენიშნება გულისცემის სიხშირის ცვლილებები, საჭიროა მისი ყურადღებითი მონიტორინგი.

ურეთრის (შარდსადენის) და საშვილოსნოს ყელის (ცერვიციტი) ინფექცია:

ჩვეულებრივი დოზაა 1,000 მგ ერთჯერადი დოზის სახით, მხოლოდ ერთი დღე. 

თუ ინფექცია გამოწვეულია N. გონორრჰოეაე-თი, ექიმი დანიშნავს იმავე დოზას სხვა ანტიბიოტიკთან (ცეფტრიაქსონი (250 მგ)) კომბინაციაში).

რბილი შანკრი:

ჩვეულენრივი დოზაა 1,000 მგ ერთჯერადი დოზის სახით, მხოლოდ ერთი დღის განმავლობაში.

სინუსიტი:

მკურნალობა ნაჩვენებია მოზრდილებსა და 16 წლის ასაკის ზემოთ მოზარდებში.

ბავშვებსა და მოზარდებში გამოყენება

ტაბლეტები არ არის ნაჩვენები ბავშვებისა და მოზარდებისათვის 45 კგ-ზე ნაკლები სხეულის წონით. გამოყენებულ უნდა იქნას აზითრომიცინის შემცველი პროდუქტების სხვა ფარმაცევტული ფორმები (როგორიცაა სუსპენზიები).

ღვიძლის დაზიანების მქონე პაციენტებში გამოყენება

მკურნალ ექიმს უნდა ეცნობოს, თუ პაციენტს აღენიშნება ღვიძლის მძიმე პრობლემები, რადგან შეიძლება საჭირო გახდეს სტანდარტული დოზის კორექცია.

თირკმლის უკმარისობის მქონე პაციენტებში გამოყენება

მკურნალ ექიმს უნდა ეცნობოს, თუ პაციენტს აღენიშნება თირკმლის მძიმე პრობლემები, რადგან შეიძლება საჭირო გახდეს სტანდარტული დოზის კორექცია.

მიღების მეთოდი

განკუთვნილია შიგნით მისაღებად.

მედიკამენტი ინიშნება ერთხელ დღეში, ერთჯერადი დოზის სახით. ტაბლეტები უნდა გადაიყლაპოს მთლიანად, წყალთან ერთად და შესაძლებელია მათი მიღება როგორც ჭამის დროს, ისე კვებისგან დამოუკიდებლად.

გამყოფი ხაზი გამოყენებულ უნდა იქნა ტაბლეტის გასატეხად, როცა მისი გადაყლაპვა გაძნელებულია.

აზითრომიცინი ნორმონის დოზის გადაჭარბებისას

დოზის გადაჭარბებისას შეიძლება აღინიშნოს სმენის შექცევადი დაკარგვა, ძლიერი გულისრევა, ღებინება და ფაღარათი. 

ინფორმაცია სამედიცინო პერსონალისათვის

დოზის გადაჭარბების შემთხვევაში ნაჩვენებია გააქტივებული ნახშირის დანიშვნა, ზოგადი სიმპტომური მკურნალობა და სასიცოცხლო ფუნქციების მხარდაჭერა.

დოზის გადაჭარბებისას ან შემთხვევით გადაყლაპვისას საჭიროა დაუყოვნებლივ ექიმთან ან ფარმაცევტთან, ან უახლოეს საავადმყოფოში მიმართვა, მედიკამენტის სახელწოდებისა და მიღებული რაოდენობის მითითებით. სასურველია, ჰოსპიტალში ან ექიმთან მიმართვისას პაციენტმა თან იქონიოს გამოყენების ინსტრუქცია, დარჩენილი ტაბლეტები და შეფუთვა, რათა ექიმმა იცოდეს, რომელი ტაბლეტებია მიღებული.

აზითრომიცინი ნორმონის დოზის გამოტოვებისას

გამოტოვებული დოზის მიღება უნდა მოხდეს გახსენებისთანავე და შემდეგ მკურნალობა გაგრძელდეს დანიშნულების მიხედვით. თუ მოახლოებულია შემდეგი დოზის მიღების დრო, გამოტოვებულ უნდა იქნას დავიწყებული დოზა და უნდა მოხდეს შემდეგ დოზამდე მოცდა. დაუშვებელია დოზის გაორმაგება გამოტოვებულის სანაცვლოდ. აზითრომიცინი ნორმონის მიღება უნდა გაგრძელდეს ზუსტად ექიმის დანიშნულების მიხედვით.

აზითრომიცინი ნორმონით მკურნალობის შეწყვეტა

ექიმის მიერ რეკომენდებულზე ნაადრევად აზითრომიცინი ნორმონით მკურნალობის შეწყვეტამ შეიძლება გამოიწვიოს სიმპტომების გაუარესება ან მათი ხელახალი განვითარება.

მედიკამენტის შესახებ დამატებითი კითხვების არსებობისას საჭიროა ექიმთან ან ფარმაცევტთან მიმართვა.

4.   შესაძლო გვერდითი მოვლენები

ყველა სხვა მედიკამენტის მსგავსად, ამ მედიკამენტმაც შეიძლება გამოიწვიოს გვერდითი მოვლენები, თუმცა არა ყველა პაციენტში.

კლინიკური კვლევებისა და პოსტმარკეტინგულ პერიოდში აღწერილი გვერდითი მოვლენები კლასიფიცირებულია შემდეგი სახით:

ძალიან ხშირი გვერდითი მოვლენები (აღინიშნება 10-დან არაუმცირეს 1 პაციენტში):

·       ფაღარათი

ხშირი გვერდითი მოვლენები (აღინიშნება 100-დან არაუმცირეს 1 პაციენტში):

·       გარკვეული ტიპის ლეიკოციტების (ლიმფოციტები, ეოზინოფილები, ბაზოფილები, მონოციტები და ნეიტროფილები) რაოდენობის ცვლილებები, ბიკარბონატების დონის დაქვეითება;

·       თავის ტკვივილი;

·       ღებინება, მუცლის ტკივილი, გულისრევა.

არახშირი გვერდითი მოვლენები (აღინიშნება 1000-დან არაუმცირეს 1 პაციენტში):

·       კანდიდა სოკოთი გამოწვეული გენერალიზებული ან პირის ღრუს ინფექცია, ვაგინალური ინფექცია, პნევმონია, სოკოვანი ან ბაქტერიული ინფექცია, ფარინგიტი, გასტროენტერიტი, სუნთქვის ცვლილება, რინიტი;

·       ზოგიერთი ტიპის ლეიკოციტების რაოდენობის დაქვეითება (ლეიკოციტების, ნეიტროფილებისა და ეოზინოფილების);

·       ალერგიული რეაქცია კანქვეშა ღრმა ქსოვილების ანთებითი პროცესების ჩათვლით (ანგიონევროზული შეშუპება);

·       მადის ცვლილება (ანორექსია);

·       ნევროზულობა, უძილობა;

·       ძილიანობა, თავბრუსხვევა, გემოს ცვლილებები, შეხების შეგრძნების დაკარგვა;

·       მხედვველობის ცვლილება;

·       სმენის პრობლემები, ვერტიგო;

·       გულის ფრიალი;

·       ალები;

·       ქოშინი, ცხვირიდან სისხლდენა;

·       ყაბზობა, მეტეორიზმი, დისპეფსია, გასტრიტი, ყლაპვის გაძნელება, მუცლის დაჭიმულობა, პირის სიმშრალე, ბოყინი, პირის წყლულები, გაზრდილი ნერწყვდენა;

·       გამონაყარი, ქავილი, კვანძოვანი წითელი გამონაყარი, დერმატიტი, კანის სიმშრალე, ძლიერი ოფლიანობა, სიწითლე;

·       სახსრების ანთება, კუნთების ტკივილი, წელის ტკივილი, კისრის ტკივილი;

·       შარდვის გამოყოფის დარღვევები, თირკმლის ტკივილი;

·       საშოდან სისხლდენა, სათესლე ჯირკვლების პათოლოგიები;

·       ზოგადი შეშუპება, სისუსტე, უღონობა, დაღლილობა, სახის შეშუპება, მკერდის არეში ტკივილი, ცხელება, კიდურების ტკივილი და შეშუპება;

·       ღვიძლის ფუნქციის მაჩვენებლების ცვლილება (ღვიძლის ფერმენტების დონის მომატება, ასტ, გპტ და ტუტე ფოსფატაზა) და ბილირუბინის, შარდოვანას, კრეატინინის, ქლორიდების, გლუკოზის, ბიკარბონატების, და თრომბიციტების მომატება სისხლში, ნატრიუმისა და კალიუმის დონის ცვლილება, ჰემატოკრიტის დაქვეითება;

·       ქირურგიული ჩარევის შემდგომი გართულებები.

იშვიათი გვერდითი მოვლენები (აღინიშნება 10,000-დან არაუმცირეს 1 პაციენტში):

·       აგზნება;

·       ღვიძლის ფუნქციის ცვლილება, კანის სიყვითლე; 

·       მგრძნობელობა მზის სხივებზე (ფოტომგრძნობელობა), წამლისმიერი რეაქცია სისხლის გარკვეული ტიპის უჯრედების დონის მომატებით (ეოზინოფილიით) და ზოგადი სიმპტომებით (მულტიორგანული მოცვა) (DღEშშ სინდრომი);

·       კანზე გამონაყარი, რომელიც ხასიათდება კანზე წითელი ლაქების სწრაფი განვითარებით ცენტრში წვრილი პუსტულებით (წყლით ან ყვითელი სითხით სავსე ბუშტუკებით).

სიხშირე უცნობია (სიხშირის შეფასება ვერ ხერხდება არსებული მონაცემების საფუძველზე) 

·       ჩლოსტრიდიუმ დიფფიცილე-თი გამოწვეული კოლიტი;

·       თრომბოციტების რაოდენობის შემცირება სისხლში, ანემია, მძიმე ალერგიული რეაქცია;

·       აგრესიული რეაქციები, შფოთვა, დელირიუმი, ჰალუცინაციები;

·       ცნობიერების დაკარგვა, გულყრები, მგრძნობელობის დაქვეითება, ჰიპერაქტიულობა, ყნოსვის ცვლილება და/ან დაკარგვა, გემოს ცვლილება, კუნთების სისუსტე (მიასთენია);

·       სმენის დაზიანება, მათ შორის სიყრუე და/ან ყურებში ხმაური;

·       ტორსადეს დე პოინტეს, გულის რითმის დარღვევები, გახანგრძლივებული Qთ ინტერვალი ელექტროკარდიოგრამაზე;

·       დაბალი არტერიული წნევა;

·       პანკრეასის ანთება, ენის ფერის ცვლილება;

·       ღვიძლის მძიმე დაზიანება და ღვიძლის უკმარისობა, იშვიათად ფატალური, ღვიძლის ქსოვილის ნეკროზი, ფულმინანტური ჰეპატიტი;

·       კანზე წითელი კვანძოვანი გამონაყარი, გენერალიზებული გამონაყარი ბუშტუკებითა და კანის აქერცვლით, რომელიც განსაკუთრებით ვითარდება პირის, ცხვირის, თვალების ირგვლივ და სასქესო ორგანოებზე (სტივენს-ჯონსონის სინდრომი), კანის მძიმე რეაქციები, როგორიცაა მულტიფორმული ერითემა, ტოქსიკური ეპიდერმული ნეკროლიზი;

·       სახსრების ტკივილი;

·       თირკმლის მწვავე უკმარისობა და თირკმლის მილაკებს შორის ქსოვილის ანთება (ინტერსტიციალური ნეფრიტი).

გვერდითი მოვლენების შესახებ შეტყობინება

ნებისმიერი გვერდითი მოვლენის განვითარებისას საჭიროა მკურნალ ექიმთან ან ფარმაცევტთან მიმართვა. ეს მოიცავს ისეთ შესაძლო გვერდით მოვლენებს, რომლებიც არ არის ჩამოთვლილი ინსტრუქციაში. გვერდითი მოვლენების შესახებ შეტყობინება ხელს უწყობს წამლის უსაფრთხოების შესახებ მეტი ინფორმაციის შეგროვებას.

5.   აზითრომიცინი ნორმონის შენახვის წესი

ინახება ბავშვებისთვის მიუწვდომელ ადგილას. 

არ საჭიროებს შენახვის სპეციალურ პირობებს. ინახება ორიგინალური შეფუთვით.

დაუშვებელია პრეპარატის მიღება კონტეინერზე მითითებული შენახვის ვადის გასვლის შემდეგ, შენახვის ვადა გულისხმობს მითითებული თვის ბოლო დღეს.

დაუშვებელია პრეპარატის გადაგდება საკანალიზაციო წყალში ან საყოფაცხოვრებო ნაგავში. ნებისმიერი გამოუყენებელი პრეპარატის განადგურების შესახებ ინფორმაციის მისაღებად საჭიროა ფარმაცევტთან მიმართვა. აღნიშნული ღონისძიებები ემსახურება გარემოს დაცვას.

6.   შეფუთვის შემცველობა და სხვა ინფორმაცია

რას შეიცავს აზითრომიცინი ნორმონი

-    აქტიური ნივთიერებაა აზითრომიცინი (დიჰიდრატის სახით). თითოეული ტაბლეტი შეიცავს 500 მგ აზითრომიცინს.

-    სხვა დამხმარე ნივთიერებებია: ტაბლეტის შიგთავსი: პრეჟელატინიზირებული სიმინდის სახამებელი, კროსპოვიდონი, კალციუმის ჰიდროფოსფატი, ნატრიუმის ლაურილსულფატი, მაგნიუმის სტეარატი. 

გარსი: ჰიდროქსიპროპილ მეთილცელულოზა (ჰიპრომელოზა), ტიტანიუმის დიოქსიდი (E171), ლაქტოზის მონოჰიდრატი, ტრიაცეტინი (E1518).

აზითრომიცინი ნორმონის ფორმა და შეფუთვის შემცველობა

თეთრი, მოგრძო, ორმხრივ ამობურცული, ცალ მხარეს გამყოფი ხაზით, გარსით დაფარული ტაბლეტები.

ტაბლეტები მოთავსებულია პვქ-ალუმინის ბლისტერებზე. შეფუთვა ხელმისაწვდომია 3 და 150 აპკიანი გარსით დაფარული ტაბლეტით. ყველა სახის შეფუთვა შეიძლება არ იყოს წარმოდგენილი ყველა ქვეყნის ბაზარზე.

გაცემის წესი:

ფარმაცევტული პროდუქტის ჯგუფი - II , გაიცემა ფორმა №3 რეცეპტით