Losartan - ლოსარტანი ნორმონი 50მგ+12.5მგ 28 ტაბლეტი

რას წარმოადგენს ლოსარტანი/ჰიდროქლორთიაზიდი ნორმონი და მისი გამოყენება

ლოსარტანი/ჰიდროქლორთიაზიდი ნორმონი წარმოადგენს ანგიოტენზინ II რეცეპტორის ანტაგონისტის (ლოსარტანის) და დიურეტიკის (ჰიდროქლორთიაზიდის) კომბინაციას.

ლოსარტანი/ჰიდროქლორთიაზიდი ნორმონი გამოიყენება ესენციური ჰიპერტენზიის (მაღალი არტერიული წნევის) სამკურნალოდ.

რა უნდა იცოდეს პაციენტმა ლოსარტანი/ჰიდროქლორთიაზიდი ნორმონის მიღებამდე

დაუშვებელია ლოსარტანი/ჰიდროქლორთიაზიდი ნორმონის მიღება:

თუ პაციენტი ალერგიულია (ჰიპერმგრძნობიარეა) ლოსარტანის, ჰიდროქლორთიაზიდის ან მედიკამენტის შემადგნელობაში შემავალი სხვა რომელიმე ინგრედიენტის მიმართ;

თუ პაციენტი ალერგიულია (ჰიპერმგრძნობიარეა) სულფონამიდის წარმოებული ნივთიერებების (როგორიცაა სხვა თიაზიდები, ზოგიერთი ანტიბაქტერიული მედიკამენტი, მაგ.: კოტრიმოქსაზოლი; თუ პაციენტი არ არის დარწმუნებული, უნდა მიმართოს ექიმს);

თუ პაციენტი 3 თვეზე მეტი ხნის ფეხმძიმეა (უმჯობესია, არ მოხდეს ლოსარტანი/ჰიდროქლორთიაზიდი ნორმონის მიღება ფეხმძიმობის ადრეულ სტადიაზე, იხ. პარაგრაფი “ფეხმძიმობა”);

თუ პაციენტს აღენიშნება ღვიძლის ფუნქციის მძიმე დაზიანება;

თუ პაციენტს აღენიშნება თირკმლის ფუნქციის დაზიანება ან თუ თირკმელები არ გამოყოფენ შარდს;

თუ პაციენტს აღენიშნება სისხლში კალიუმის, ნატრიუმის დაბალი და კალციუმის მაღალი დონე, რომელიც არ კორექტირდება მკურნალობით;

თუ პაციენტს აღენიშნება პოდაგრა;

თუ პაციენტს აქვს დიაბეტი ან აღენიშნება თირკმლის ფუნქციის დაზიანება და მკურნალობდა სისხლის წნევის დამწევი მედიკამენტით, რომელიც შეიცავს ალისკირენს.

განსაკუთრებული სიფრთხილეა საჭირო ლოსარტანი/ჰიდროქლორთიაზიდი ნორმონის მიღებისას

პაციენტმა უნდა აცნობოს ექიმს ფეხმძიმობის (ან შესაძლო ფეხმძიმობის) შესახებ. ლოსარტანი/ჰიდროქლორთიაზიდი ნორმონი არ არის რეკომენდებული ფეხმძიმობის ადრეულ სტადიაზე და არ უნდა იქნას მიღებული 3 თვეზე მეტი ხნის ფეხმძიმობის შემთხვევაში, რადგან შეიძლება გამოიწვიოს ნაყოფის მძიმე დაზიანება (იხ. პარაგრაფი “ფეხმძიმობა”).

მნიშვნელოვანია, რომ ექიმს ეცნობოს ლოსარტანი/ჰიდროქლორთიაზიდი ნორმონით მკურნალობის დაწყებამდე:

თუ პაციენტს ანამნეზში აღენიშნება სახის, ტუჩების, ხორხის ან ენის შეშუპება;

თუ პაციენტი იღებს დიურეტიკებს (შარდმდენებს);

თუ პაციენტი იმყოფება მარილის შეზღუდული შემცველობის დიეტაზე;

თუ პაციენტს აღენიშნება ძლიერი ღებინება და/ან დიარეა;

თუ პაციენტს გულის უკმარისობა აქვს;

თუ პაციენტს აღენიშნება თირკმლის არტერიების შევიწროება (თირკმლის არტერიის სტენოზი) ან ერთი თირკმელი აქვს, ან უკანასკნელ პერიოდში ჩატარებული აქვს თირკმლის ტრანსპლანტაცია;

თუ პაციენტს აღენიშნება არტერიების შევიწროება (ათეროსკლეროზი), სტენოკარდია (ტკივილი მკერდის არეში გულის ფუნქციის დაქვეითების გამო);

თუ პაციენტს აღენიშნება “აორტის ან მიტრალური სარქვლის სტენოზი” (გულის სარქველების შევიწროება) ან “ჰიპერტროფული კარდიომიოპათია” (დაავადება, რომლის დროსაც ხდება გულის კუნთის გასქელება);

თუ პაციენტს დიაბეტი აქვს;

თუ პაციენტს აღენიშნება პოდაგრა;

თუ პაციენტს აქვს ან აღენიშნებოდა ალერგიული მდგომარეობები, ბრონქული ასთმა ან მდგომარეობა, რომელიც იწვევს სახსრების ტკივილს, გამონაყარს კანზე და ცხელებას (სისტემური წითელი მგლურა);

თუ პაციენტს აღენიშნება კალციუმის მაღალი ან კალიუმის დაქვეითებული დონე სისხლში ან იმყოფება კალიუმის დაბალი შემცველობის დიეტაზე;

თუ პაციენტი საჭიროებს საანესთეზიო საშუალებას (მათ შორის სტომატოლოგთან ვიზიტის დროს) ან ქირურგიული ოპერაციის წინ, ან ანალიზებს ფარისებრახლო ჯირკვლის ფუნქციის გამოსაკვლევად, უნდა აცნობოს მკურნალ ექიმს ან სამედიცინო პერსონალს, რომ იღებს კალიუმის ლოსარტანისა და ჰიდროქლორთიაზიდის ტაბლეტებს;

თუ პაციენტს აღენიშნება პირველადი ალდოსტერონიზმი (სინდრომი, რომელიც დაკავშირებულია თირკმელზედა ჯირკვლების პათოლოგიის გამო ჰორმონ ალდოსტერონის ჰიპერსეკრეციასთან);

თუ პაციენტს აღენიშნება მხედველობის დაქვეითება ან თვალის ტკივილი, რომელიც შეიძლება იყოს თვალის სისხლძარღვოვან გარსში სითხის აკუმულაციის (ქოროიდული ეფუზიის) ან თვალშიდა წნევის გაზრდის სიმპტომები და შეიძლება განვითარდეს ლოსარტანი/ჰიდროქლორთიაზიდის მიღებიდან საათების ან კვირების განმავლობაში. ამ მდგომარეობამ შეიძლება გამოიწვიოს მხედველობის მუდმივი დაკარგვა, თუ არ მოხდა შესაბამისი მკურნალობა. თუ პაციენტს ანამნეზში აღენიშნება ალერგია პენიცილინის ან სულფონამიდის მიმართ, შეიძლება იყოს ამ მდგომარეობის განვითარების გაზრდილი რისკის ქვეშ;

თუ პაციენტი მაღალი არტერიული წნევის (ჰიპერტენზიის) სამკურნალოდ იღებს შემდეგ მედიკამენტებს:

-   აგფ ინჰიბიტორებს (როგორიცაა ენალაპრილი, ლიზინოპრილი, რამიპრილი), განდაკუთრებით, თუ პაციენტს აღენიშნება დიაბეტით გამოწვეული თირკმელების დაზიანება;

-   ალისკირენს.

თუ პაციენტს ანამნეზში აღენიშნება კანის კიბო ან კანის მოულოდნელი დაზიანება მკურნალობის დროს. ჰიდროქლორთიაზიდით მკურნალობამ, განსაკუთრებით ხანგრძლივად მაღალი დოზებით, შეიძლება გაზარდოს გარკვეული ტიპის კანისა და ტუჩის კიბოს (არამელანომური კანის კიბო) რისკი. ლოსარტანი/ჰიდროქლორთიაზიდით მკურნალობის დროს საჭიროა კანის დაცვა მზის გამოსხივებისა და ულტრაიისფერი სხივებისაგან.

მკურნალი ექიმი რეგულარულად შეამოწმებს თირკმელების ფუნქციას, არტერიულ წნევასა და სისხლში ელექტროლიტების (მაგ.: კლიუმის) დონეს. იხ. აგრეთვე ინფორმაცია პარაგრაფში “დაუშვებელია ლოსარტანი/ჰიდროქლორთიაზიდი ნორმონის მიღება”.

სხვა მედიკამენტები და ლოსარტანი/ჰიდროქლორთიაზიდი ნორმონი

მკურნალ ექიმს ან ფარმაცევტს უნდა ეცნობოს, თუ პაციენტი იღებს ან ახლო წარსულში იღებდა ნებისმიერ სხვა მედიკამენტს, ურეცეპტოდ გასაცემი მედიკამენტების ჩათვლით.

დიურეტიკი, როგორიცაა ჰიდროქლორთიაზიდი, რომელიც შედის ლოსარტანი/ჰიდროქლორთიაზიდი ნორმონის შემადგენლობაში, შეიძლება ურთიერთქმედებაში შევიდეს სხვა მედიკამენტებთან. ლითიუმის შემცველი პრეპარატები არ უნდა იქნას მიღებული ლოსარტანი/ჰიდროქლორთიაზიდი ნორმონთან ერთად ექიმის მეთვალყურეობის გარეშე. განსაკუთრებული სიფრთხილის ზომებია საჭირო (მაგ.: სისხლის ნალიზების ჩატარება), თუ პაციენტი იღებს კალიუმის დანამატებს, კალიუმის შემცველ მარილის შემცველელებს, კალიუმის დამზოგველ პრეპარატებს, დიურეტიკებს (შარდმდენებს), ზოგიერთ საფაღარათო საშუალებას, პოდაგრის სამკურნალო მედიკამენტებს, არითმიის ან დიაბეტის სამკურნალო საშუალებებს (შიგნით მისაღებ პრეპარტებს ან ინსულინს).

ასევე, მნიშვნელოვანია, რომ მკურნალ ექიმს ეცნობოს, თუ პაციენტი იღებს არტერიული წნევის დამწევ სხვა სამკურნალო საშუალებებს, სტეროიდებს, კიბოს საწინააღმდეგო საშუალებებს, ტკივილგამაყუჩებლებს, სოკოვანი ინფექციების საწინაღმდეგო ან ართრიტის სამკურნალო პრეპარატებს, ქოლექტერინის დონის დამწევ საშუალებებს, როგორიცაა: ქოლესტირამინი, კუნთების რელაქსანტებს, საძილე საშუალებებს, ოპიატურ ნარკოტიკებს, როგორიცაა მორფინი, “პრესორულ ამინებს”, როგორიცაა ადრენალინი ან ამავე ჯგუფის სხვა მედიკამენტები, (დიაბეტის სამკურნალო პერორალურ საშუალებებს ან ინსულინს).

მკურნალმა ექიმმა შეიძლება შეცვალოს მედიკამენტის დოზა და/ან მიიღოს სიფრთხილის სხვა ზომები:

თუ პაციენტი იღებს აგფ ინჰიბიტორებს ან ალისკირენს (იხ. ასევე, პარაგრაფები “დაუშვებელია ლოსარტანი/ჰიდროქლორთიაზიდი ნორმონის მიღება” და “გაფრთხილება და სიფრთხილის ზომები”).

ასევე, საჭიროა ექიმის ინფორმირება, თუ ლოსარტანი/ჰიდროქლორთიაზიდი ნორმონით მკურნალობის დროს პაციენტი საჭიროებს იოდიზირებული საკონტრასტო საშუალებებით რადიოგრაფიულ კვლევას.

ლოსარტანი/ჰიდროქლორთიაზიდი ნორმონის მიღება საკვებთან და სასმელთან ერთად

არ არის რეკომენდებული ალკოჰოლის მიღება ამ მედიკამენტით თერაპიის განმავლობაში: ალკოჰოლმა და ლოსარტანი/ჰიდროქლორთიაზიდი ნორმონის ტაბლეტებმა შეიძლება გააძლიერონ ერთმანეთის ეფექტი.

დიეტური მარილის ჭარბი რაოდენობით მიღებამ შეიძლება ლოსარტანი/ჰიდროქლორთიაზიდი ნორმონის ტაბლეტების მოქმედების უკუეფექტი გამოიწვიოს.

ლოსარტანი/ჰიდროქლორთიაზიდი ნორმონის მიღება შესაძლებელია როგორც საკვებთან ერთად, ისე მის გარეშე.

ფეხმძიმობა და ძუძუთი კვება

ფეხმძიმობა

მკურნალ ექიმს უნდა ეცნობოს პაციენტის შესაძლო ფეხმძიმობის (ან ფეხმძიმობის დაგეგმვის) შესახებ. ფეხმძიმობის შემთხვევაში მკურნალი ექიმი შეწყვეტს ლოსარტანი/ჰიდროქლორთიაზიდი ნორმონით მკურნალობას და მის ნაცვლად დანიშნავს სხვა მედიკამენტს. ლოსარტანი/ჰიდროქლორთიაზიდი ნორმონი არ არის რეკომენდებული ფეხმძიმობის დროს და დაუშვებელია მისი მიღება 3 თვეზე მეტის ხნის ორსულობისას, რადგან მან შეიძლება გამოიწვიოს ნაყოფის მძიმე დაზიანება ფეხმძიმობის პირველი ტრიმესტრის შემდეგ გამოყენებისას.

ძუძუთი კვება

მკურნალ ექიმს უნდა ეცნობოს, თუ პაციენტი ძუძუთი კვებავს ბავშვს ან აპირებს მის ძუძუთი კვებას. ლოსარტანი/ჰიდროქლორთიაზიდი ნორმონი არ არის რეკომენდებული მეძუძური დედებისათვის და ამ შემთხვევაში ექიმი შეარჩევს სხვა პრეპარატით მკურნალობას.

ნებისმიერი მედიკამენტის მიღებამდე საჭიროა ექიმთან ან ფარმაცევტთან კონსულტაცია.

ბავშვებსა და მოზარდებში გამოყენება

არ არსებობს მონაცემები ლოსარტანი/ჰიდროქლორთიაზიდის გამოყენების შესახებ ბავშვებში, ამიტომ ლოსარტანი/ჰიდროქლორთიაზიდი ნორმონი არ არის რეკომენდებული ბავშვებისათვის.

ხანდაზმულ პაციენტებში გამოყენება

ლოსარტანი/ჰიდროქლორთიაზიდი ნორმონი თანაბრად მოქმედებს და თანაბრად გადაიტანება როგორც ხანდაზმულ, ისე ახალგაზრდა პაციენტებში. ამიტომ ხანდაზმული პაციენტები საჭიროებენ მედიკამენტის იმავე დოზას, რასაც ახალგარდა პაციენტები.

მანქანისა და სხვა მექანიზმების მართვა

მედიკამენტით მკურნალობის დაწყებისას არ არის რეკომენდებული ისეთი მოქმედებების შესრულება, რომლებიც საჭიროებენ განსაკუთრებულ ყურადღებას (როგორიცაა მაგ.: მანქანის ან სხვა სახიფათო მექანიზმების მართვა), სანამ პაციენტს არ ეცოდინება, როგორ მოქმედებს მასზე მედიკამენტი. 

მნიშვნელოვანი ინფორმაცია ლოსარტანი/ჰიდროქლორთიაზიდი ნორმონის ზოგიერთი ინგრედიენტის შესახებ

ეს მედიკამენტი შეიცავს ლაქტოზას. პრეპარატის მიღებამდე საჭიროა მკურნალ ექიმთან კონსულტაცია, თუ პაციენტს აღენიშნება აუტანლობა ზოგიერთი შაქრის მიმართ.

სპორტსმენებში გამოყენება:

ეს მედიკამენტი შეიცავს ჰიდროქლორთიაზიდს, რომელმაც შეიძლება გამოიწვიოს დოპინგ ტესტის დადებითი შედეგი.

ლოსარტანი/ჰიდროქლორთიაზიდი ნორმონის მიღების წესი

ლოსარტანი/ჰიდროქლორთიაზიდი ნორმონის მიღება ყოველთვის უნდა მოხდეს ზუსტად ექიმის დანიშნულების მიხედვით.

მკურნალი ექიმი განსაზღვრავს ლოსარტანი/ჰიდროქლორთიაზიდი ნორმონის საჭირო დოზას პაციენტის მდგომარეობისა და სხვა პრეპარატების მიღების მიხედვით. მნიშვნელოვანია, რომ ლოსარტანი/ჰიდროქლორთიაზიდი ნორმონის მიღება გაგრძელდეს ექიმის დანიშნულების მიხედვით, რათა შენარჩუნდეს კონტროლი არტერიულ წნევაზე.

მაღალი არტერიული წნევა

ჩვეულებრივ, მაღალი არტერიული წნევის სამკურნალოდ, უმეტესობა პაციენტებში, მედიკამენტის დოზა შეადგენს ლოსარტანი/ჰიდროქლორთიაზიდი ნორმონის 100 მგ/25 მგ 1 ტაბლეტს ერთხლ დღეში, 24 საათის განმავლობაში.

დოზა შეიძლება გაიზარდოს ლოსარტანი/ჰიდროქლორთიაზიდი 50 მგ/12.5 მგ 2 აპკიანი გარსით დაფარულ ტაბლეტამდე ერთხელ დღეში ან შეიცვალოს ლოსარტანი/ჰიდროქლორთიაზიდის 100 მგ/25 მგ აპკიანი გარსით დაფარულ 1 ტაბლეტამდე დღეში (უფრო მაღალი დოზა). მაქსიმალური დღიური დოზაა ლოსარტანი/ჰიდროქლორთიაზიდი 50 მგ/12.5 მგ 2 ტაბლეტი ან ლოსარტანი/ჰიდროქლორთიაზიდი 100 მგ/25 მგ 1 ტაბლეტი დღეში.

ლოსარტანი/ჰიდროქლორთიაზიდი ნორმონის დოზის გადაჭარბებისას

დოზის გადაჭარბებისას საჭიროა დაუყოვნებლივ ექიმთან მიმართვა, რადგან პაციენტი შეიძლება საჭიროებდეს გადაუდებელ დახმარებას.

დოზის გადაჭარბებისას ან შემთხვევით მიღებისას საჭიროა დაუყოვნებლივ მიმართვა ექიმთან ან ფარმაცევტთან, ან ტოქსიკოლოგიის საინფორმაციო სამსახურში დარეკვა, ტელ.: +34 91 562 04 20, მიღებული მედიკამენტისა და რაოდენობის მითითებით.

დოზის გადაჭარბებამ შეიძლება გამოიწვიოს არტერიული წნევის მკვეთრი ვარდნა, გულის თრთოლვა, პულსის შენელება, სისხლის შემადგენლობის ცვლილება და დეჰიდრატაცია.

ლოსარტანი/ჰიდროქლორთიაზიდი ნორმონის დოზის გამოტოვებისას

ლოსარტანი/ჰიდროქლორთიაზიდი ნორმონის მიღება უნდა მოხდეს ყოველდღე დანიშნულების მიხედვით. დოზის გამოტოვებისას, არ შეიძლება ჭარბი დოზის მიღება. მკურნალობა უნდა გაგრძელდეს ექიმის დანიშნულების მიხედვით.

დამატებითი კითხვების არსებობისას ამ მედიკამენტის გამოყენებასთან დაკავშირებით, საჭიროა ექიმთან ან ფარმაცევტთან მიმართვა.

შესაძლო გვერდითი მოვლენები

სხვა მედიკამენტების მსგავსად, ლოსარტანი/ჰიდროქლორთიაზიდი ნორმონმაც შესაძლებელია გამოიწვიოს გვერდითი ეფექტები, თუმცა ისინი ყველას არ უვითარდება.

ქვემოთ ჩამოთვლილი სიმპტომების განვითარებისას უნდა შეწყდეს ლოსარტანი/ჰიდროქლორთიაზიდი ნორმონის მიღება და საჭიროა მკურნალ ექიმთან ან უახლოესი საავადმყოფოს ემერჯენსის განყოფილებაში მიმართვა:

მძიმე ალერგიული რეაქციები (გამონაყარი, ქავილი, სახის, ტუჩების, პირის ან ხორხის შეშუპება, რომელმაც შეიძლება გამოიწვიოს სუნთქვის ან ყლაპვის გაძნელება). ეს არის მძიმე, მაგრამ იშვიათი სიმპტომები და აღინიშნება 10.000-დან 1-ზე მეტ, მაგრამ 1.000-დან 1-ზე ნაკლებ პაციენტში. ეს სიმპტომები მოითხოვს გადაუდებელ სამედიცინო დახმარებას ან ჰოსპიტალიზაციას.

აღინიშნა შემდეგი გვერდითი მოვლენები:

ხშირი (შეიძლება განვითარდეს 10-დან 1-ზე ნაკლებ, მაგრამ 100-დან 1-ზე მეტ პაციენტში):

ხველა, ზედა რესპირატორული გზების ინფექციები, ცხვირის გაჭედვა, სინუსიტი, სინუსის წიაღის დაავადებები;

დიარეა, მუცლის ტკივილი, გულისრევა, დისპეფსია;

კუნთების ტკივილი ან სპაზმები, ფეხის ტკივილი, წელის ტკივილი;

უძილობა, თავის ტკივილი, თავბრუსხვევა;

სისუსტე, დაღლილობა, მკერდის არეში ტკივილი;

კალიუმის დონის მომატება (რომელმაც შეიძლება გამოიწვიოს გულის რიტმის დარღვევა), ჰემოგლობინის დონის დაქვეითება.

არახშირი (შეიძლება განვითარდეს 100-დან 1-ზე ნაკლებ, მაგრამ 1.000-დან 1-ზე მეტ პაციენტში):

ანემია, წითელი ან მოყავისფრო ლაქები კანზე (განსაკუთრებით, ტერფებზე, ფეხებზე, მკლავებზე და დუნდულებზე სახსრების ტკივილით, ხელებისა და ტერფების შეშუპება და მუცლის ტკივილი), სისხლჩაქცევები, ლეიკოციტების რაოდენობის დაქვეითება, სისხლის შედედების პრობლემები, თრომბოციტების რაოდენობის დაქვეითება და სისხლჩაქცევები;

მადის დაკარგვა, შარდმჟავის დონის მომატება ან პოდაგრის გამწვავება, სისხლში შაქრის დონის მომატება, სისხლში ელექტროლიტების დონის ცვლილება;

შფოთვა, ნევროზულობა, პანიკური დარღვევები (პანიკური რეციდიული შეტევები), ცნობიერების დაბინდვა, დეპრესია, უჩვეულო სიზმრები, ძილის დარღვევები, ძილიანობა, მეხსირების პრობლემები;

ჩხვლეტის ან წვის მსგავსი ტიპის შეგრძნება, კიდურების ტკივილი, ტრემორი, შაკიკი, სინკოპე;

მხედველობის დაბინდვა, თვალებში წვა ან ჩხვლეტის შეგრძნება, კონიუქტივიტი, მხედველობის დაქვეითება, მხედველობა ყვითელ ფერებში;

რეკვის, სტვენის, ხმაურის ან ტკაცუნის შეგრძნება ყურებში;

არტერიული წნევის დაქვეითება, რომელიც შეიძლება დაკავშირებული იყოს პოზიციის შეცვლასთან (ადგომისას თავბრუსხვევა ან სისუსტე), სტენოკარდია (ტკივილის მკერდის არეში), არითმია, ცერებროვასკულარული დარღვევები (გარდამავალი იშემიური ინსულტი, „მინი-ინსულტი“), მიოკარდიუმის ინფარქტი, გულის თრთოლვა;

სისხლძარღვების ანთება, რომელიც დაკავშირებულია კანზე გამონაყართან ან სისხლჩაქცევებთან;

ყელის ტკივილი, ქოშინი, ბრონქიტი, პნევმონია, სითხე ფილტვებში (იწვევს სუნთქვის გაძნელებას), სისხლდენა ცხვირიდან, გამონადენი ცხვირიდან, ცხვირის გაჭედვა;

ყაბზობა, მეტეორიზმი, დიარეა, მუცლის სპაზმები, ღებინება, პირის სიმშრალე, სანერწყვე ჯირკვლების ანთება, კბილების ტკივილი;

სიყვითლე (კანისა და სკლერების გაყვითლება), პანკრეასის ანთება;

ჭინჭრის ციება, ქავილი, კანის ანთება, გამონაყარი, კანის გაწითლება, სინათლეზე მგრძნობელობა, კანის სიმშრალე, წამოწითლება, ოფლიანობა, თმის ცვენა;

მკლავების, მხრების, ბარძაყების, მუხლების ან სხვა სახსრების ტკივილი, სახსრების შეშუპება, მოძრაობის გაძნელება, კუნთების სისუსტე;

ხშირი შარდვა ღამით, თირკმლის ფუნქციის დარღვევა, მათ შორის თირკმელების ანთება, საშარდე გზების ინფექცია, შარდში შაქრის არსებობა;

ლიბიდოს დაქვეითება, იმპოტენცია;

სახის შეშუპება, ცხელება.

იშვიათი (შეიძლება განვითარდეს 10.000-დან 1-ზე მეტ, მაგრამ 1.000-დან 1-ზე ნაკლებ პაციენტში):

ჰეპატიტი (ღვიძლის ანთება), ღვიძლის ფუნქციის ანალიზების ცვლილებები.

სიხშირე უცნობია:

კანისა და ტუჩის კიბო (არამელანომური კანის კიბო)

მხედველობის დაქვეითება ან ტკივილი თვალებში მაღალი წნევის გამო [თვალის სისხლძარღვოვან გარსში სითხის დაგროვების (ქოროიდული ეფუზიის) ან მწვავე დახურულკუთხოვანი გლაუკომის შესაძლო ნიშნები].

თუ რომელიმე გვერდითი ეფექტი მიიღებს მძიმე ხასიათს, ან განვითარდება ისეთი მოვლენები, რომლებიც არ არის ჩამოთვლილი ინსტრუქციაში, საჭიროა ექიმთან ან ფარმაცევტთან მიმართვა.

გვერდითი მოვლენების შესახებ შეტყობინება

ნებისმიერი გვერდითი მოვლენის განვითარებისას, მათ შორის, რომელიც არ არის ჩამოთვლილი ინსტრუქციაში, საჭიროა მკურნალ ექიმთან ან  ფარმაცევტთან მიმართვა. გვერდითი მოვლენების შესახებ შეტყობინება შესაძლებელია ესპანეთის ადამიანისათვის განკუთვნილი სამკურნალო საშუალებების ფარმაკოზედამხედევლობის სისტემის საშუალებით: ჰტტპს://წწწ.ნოიფიცარამ.ეს გვერდითი მოვლენების შესახებ შეტყობინება ხელს უწყობს წამლის უსაფრთხოების შესახებ მეტი ინფორმაციის შეგროვებას.

ლოსარტანი/ჰიდროქლორთიაზიდი ნორმონის შენახვის წესი

ინახება ბავშვებისათვის მიუწვდომელ ადგილას.

დაუშვებელია ლოსარტანი/ჰიდროქლორთიაზიდი ნორმონის გამოყენება კონტეინერზე მითითებული შენახვის ვადის გასვლის შემდეგ, შენახვის ვადა გულისხმობს მითითებული თვის ბოლო დღეს.

ინახება 30°c-ზე დაბალ ტემპერატურაზე.

ლოსარტანი/ჰიდროქლორთიაზიდი ნორმონი ინახება ორიგინალური შეფუთვით.

ბლისტერი ინახება გარეთა შეფუთვით. დაუშვებელია ბლისტერული შეფუთვის გახსნა მედიკამენტის მიღების დაწყებამდე. დაუშვებელია პრეპარატის გადაგდება საკანალიზაციო წყალში ან სახლის ნაგავში. ნებისმიერი გამოუყენებელი პრეპარატის განადგურების შესახებ ინფორმაციის მიღება შესაძლებელია ფარმაცევტთან. აღნიშნული ზომების გატარება ემსახურება გარემოს დაცვას.

შეფუთვა და დამატებითი ინფორმაცია

ლოსარტანი/ჰიდროქლორთიაზიდი ნორმონის შემადგენლობა

აქტიური ნივთიერებებია კალიუმის ლოსარტანი და ჰიდროქლორთიაზიდი.

ლოსარტანი/ჰიდროქლორთიაზიდი ნორმონის თითოეული ტაბლეტი შეიცავს 50 მგ კალიუმის ლოსარტანს და 12.5 მგ ჰიდროქლორთიაზიდს, აქტიური ნივთიერებების სახით.

ლოსარტანი/ჰიდროქლორთიაზიდი ნორმონი შეიცავს შემდეგ დამხმარე ნივთიერებებს:

მიკროკრისტალური ცელულოზა, პრეჟელატინიზებული სიმინდის სახამებელი, ლაქტოზის მონოჰიდრატი და მაგნიუმის სტეარატი.

მედიკამენტი შეიცავს 9.28 მგ (0.24 მმოლ) კალიუმს ერთ დოზაში.

ლოსარტანი/ჰიდროქლორთიაზიდი ნორმონი ასევე შეიცავს ჰიდროქსიპროპილცელულოზას, ჰიპრომელოზას, ტიტანიუმის დიოქსიდს (E-171) და რკინის ყვითელ ოქსიდს (E-172).

ლოსარტანი/ჰიდროქლორთიაზიდი ნორმონის ფორმა შეფუთვა

ლოსარტანი/ჰიდროქლორთიაზიდი ნორმონი არის ყვითელი, მრგვალი, აპკიანი გარსით დაფარული ტაბლეტები.

ლოსარტანი/ჰიდროქლორთიაზიდი ნორმონი წარმოდგენილია შემდეგი შეფუთვით:

ალუმინის/პვქ/პე/პვდქ  ბლისტერებზე 28 ტაბლეტით.

გაცემის წესი:

ფარმაცევტული პროდუქტის ჯგუფი -  II ჯგუფი, გაიცემა ფორმა №3 რეცეპტით.