Nitronal - ნიტრონალი 200მგ/5მლ სუსპენზია 90მლ

საერთაშორისო არაპატენტირებული დასახელება: ნიფუროქსაზიდი.

ძირითადი ფიზიკურ-ქიმიური თვისებები:

სუსპენზია (200 მგ/5 მლ): ყვითელი ფერის ჰომოგენური სუსპენზია ბანანის არომატით.

შემადგენლობა:

სუსპენზიის 5 მლ შეიცავს: ნიფუროქსაზიდს 200 მგ;

დამხმარე ნივთიერებები: სორბიტოლი, გლიცეროლი, კარბომერი 940, პოლისორბატი 80, დინატრიუმის ედეტატი, ნატრიუმის ბენზოატი, ნატრიუმის ციტრატის დიჰიდრატი, ნატრიუმის სახარინი, ბანანის არომატიზატორი, გემოს შემნიღბველი არომატიზატორი, სიმეთიკონის ემულსია 30 %, გასუფთავებული წყალი.

გამოშვების ფორმა:

სუსპენზია 200 მგ/5 მლ, 90 მლ.

ფარმაკოლოგიური ჯგუფი:

სხვა ნაწლავური ანტიმიკრობული საშუალებები.

ფარმაკოლოგიური თვისებები:

ფარმაკოდინამიკა:

ნიფუროქსაზიდი წარმოადგენს ფართო სპექტრის ანტიმიკრობულ საშუალებას, 5-ნიტროფურანის წარმოებულს. პრეპარატი ბლოკავს დეჰიდროგენაზების აქტივობას, არღვევს უჯრედული სუნთქვის ციკლს, ცილების სინთეზს, ტრიკარბონის მჟავების ციკლს და რიგ სხვა ბიოქიმიურ პროცესებს პათოგენური ბაქტერიების უჯრედებში. შლის მიკრობული უჯრედის მემბრანას და აქვეითებს მიკროორგანიზმების მიერ ტოქსინების პროდუქციას.

აქტიურია გრამდადებითი ბაქტერიების მიმართ: Staphylococcus aureus, Streptococcus pyogenes, Clostridium perfringens და გრამუარყოფითი ბაქტერიების მიმართ: Escherihia coli, Salmonella spp., Shigella spp., Klebsiella spp., Enterobacter spp., Vibrio cholerae, Campylobacter jejuni, Edwarsiella, Citrobacter, Yersinia enterocolitica.

ნიფუროქსაზიდი არ მოქმედებს ნაწლავთა საპროფიტულ ფლორაზე და არ არღვევს ნორმალური ნაწლავური ფლორის წონასწორობას, არ იწვევს რეზისტენტული შტამების წარმოქმნას. მწვავე ბაქტერიული დიარეის დროს აღადგენს ნაწლავთა ეუბიოზს. ენტეროტროპული ვირუსებით ინფიცირების შემთხვევაში ხელს უშლის ბაქტერიული სუპერინფექციის განვითარებას.

ფარმაკოკინეტიკა:

პერორალური მიღების შემდეგ ნიფუროქსაზიდი პრაქტიკულად არ შეიწოვება კუჭ-ნაწლავის ტრაქტში და ავლენს თავის ანტიბაქტერიულ მოქმედებას მხოლოდ ნაწლავის სანათურში.

მეტაბოლიზდება ნაწლავებში, მიღებული დოზის 20%-ზე მეტი გამოიყოფა უცვლელი სახით. ნიფუროქსაზიდი და მისი მეტაბოლიტები სრულად გამოიყოფა განავალთან ერთად. ელიმინაციის სიჩქარე დამოკიდებულია როგორც პრეპარატის დოზაზე, ასევე ნაწლავური ტრაქტის მოტორიკაზე.

ჩვენება:

მწვავე ბაქტერიული დიარეის მკურნალობა.

მიღების წესი და დოზირება:

ნიტრონალი კაფსულები და სუსპენზია განკუთვნილია პერორალური მიღებისთვის.

სუსპენზია

მოზრდილები: 5 მლ (200 მგ) 4 ჯერ დღეში, ყოველ 6 საათში;

1-დან 6 თვემდე ასაკის ბავშვები: 2.5 მლ (100 მგ) 2-3 ჯერ დღეში, ყოველ 8-12 საათში;

6 თვიდან 3 წლამდე ასაკის ბავშვები: 2.5 მლ  (100 მგ) 3 ჯერ დღეში, ყოველ 8 საათში;

3-დან 6 წლამდე ასაკის ბავშვები: 5 მლ (200 მგ) 3 ჯერ დღეში, ყოველ 8 საათში;

6-დან 18 წლამდე ასაკის ბავშვები: 5 მლ (200 მგ) 3-4 ჯერ დღეში, ყოველ 6-8 საათში.

სუსპენზია არ გამოიყენება დღენაკლულ  ჩვილებში და 1 თვემდე ასაკის ახალშობილებში.

ყოველი გამოყენების წინ საჭიროა ფლაკონის შენჯღრევა ერთგვაროვანი სუსპენზიის მიღებამდე. დოზირებისთვის გამოიყენება საზომი ხუფი, რომელიც მოთავსებულია შეფუთვაში.

მკურნალობის კურსი არ უნდა აღემატებოდეს 7 დღეს. მკურნალობის გახანგრძლივების აუცილებლობის შემთხვევაში საჭიროა ექიმის კონსულტაცია.

გვერდითი მოვლენები:

ნიფუროქსაზიდი კარგად გადაიტანება. ძალიან იშვიათად შესაძლებელია ალერგიული რეაქციების გამოვლენა (გამონაყარი, ჭინჭრის ციება, ანგიონევროზული შეშუპება, ანაფილაქსიური შოკი).

იმ შემთხვევაში, თუ გამოვლინდა ისეთი გვერდითი მოვლენა, რომელიც არ არის აღნიშნული გამოყენების ინსტრუქციაში, პაციენტმა უნდა მიმართოს მკურნალ ექიმს.

უკუჩვენება:

- მომატებული მგრძნობელობა ნიფუროქსაზიდის, ნიტროფურანის წარმოებულების და/ან პრეპარატის სხვა რომელიმე კომპონენტის მიმართ.

- ნიტრონალი სუსპენზია შეიცავს სორბიტოლს და საქაროზას და უკუნაჩვენებია ისეთი იშვიათი მემკვიდრეობითი დაავადების დროს, როგორიცაა ფრუქტოზას აუტანლობა, გლუკოზა-გალაქტოზას აბსორბციის დარღვევა ან საქარაზა-იზომალტაზას უკმარისობა.

ურთიერთქმედება სამკურნალო საშუალებებთან და სხვა სახის ურთიერთქმედება:

არ არის რეკომენდებული ერთდროული გამოყენება ისეთ პრეპარატებთან, რომლებიც თრგუნავს ცენტრალური ნერვული სისტემის ფუნქციას ან იწვევს დისულფირამის მსგავსი რეაქციების განვითარებას.

ჭარბი დოზირება:

არ არსებობს მონაცემები ნიფუროქსაზიდის დოზის გადაჭარბების შესახებ. ტარდება სიმპტომური მკუნალობა.

ორსულობა და ლაქტაცია:

არ არსებობს კლინიკური მონაცემები შესაძლო ტერატოგენულ ან ემბრიოტოქსიკურ ეფექტებთან დაკავშირებით ნიფუროქსაზიდის მიღების დროს ორსულობის პერიოდში. თუმცა, სიფრთხილის მიზნით, ორსულობის დროს პრეპარატის მიღება არ არის რეკომენდებული.

ძუძუთი კვების დროს ნიფუროქსაზიდის გამოყენება დასაშვებია მხოლოდ ხანმოკლე კურსით, ექიმის მეთვალყურეობის ქვეშ.

განსაკუთრებული მითითებები:

ნიფუროქსაზიდი სიფრთხილით გამოიყენება ღვიძლის დაავადებების, ალკოჰოლიზმის, ქალა-ტვინის ტრავმის, თავის ტვინის დაავადებების, ლაქტაციის დროს, ასევე ბავშვთა ასაკში. 3 წლამდე ასაკის ბავშვებში მკურნალობა უნდა ტარდებოდეს ექიმის მეთვალყურეობის ქვეშ.

დიარეის მკურნალობისას საჭიროა სათანადო რეჰიდრატაციული თერაპიის (პერორალური ან ინტრავენური) ჩატარება, პაციენტის ასაკის, მდგომარეობის სიმძიმის და დიარეის ინტენსივობის გათვალისწინებით. რეკომენდებულია ასევე შესაბამისი დიეტის დაცვა.

ბაქტერიული დიარეის დროს სისტემური დაზიანების ნიშნების გამოვლენის შემთხვევაში (ზოგადი მდგომარეობის გაუარესება, სხეულის ტემპერატურის მატება, ინტოქსიკაციის ან ინფექციის სიმპტომების განვითარება) აუცილეველია ექიმის კონსულტაცია სისტემური მოქმედების ანტიბაქტერიული პრეპარატების დანიშვნის საჭიროების თაობაზე.

თუ მკურნალობის დაწყებიდან 3 დღის განმავლობაში პაციენტის მდგომარეობა არ გაუმჯობესდა, საჭიროა ექიმის კონსულტაცია.

ჰიპერმგრძნობელობის სიმპტომების განვითარების შემთხვევაში (ქოშინი, გამონაყარი, ქავილი) პრეპარატის მიღება უნდა შეწყდეს.

ნიფუროქსაზიდით მკურნალობისას უკუნაჩვენებია ალკოჰოლური სასმელების მოხმარება, რადგან შესაძლოა დისულფირამის მსგავსი რეაქციების განვითარება.

ნიტრონალი შეიცავს 1 მმოლ-ზე ნაკლებ (23 მგ) ნატრიუმის რაოდენობას ყოველ კაფსულაში და სუსპენზიის ყოველ 5 მლ-ში და შეიძლება ჩაითვალოს „ნატრიუმისგან თავისუფალ“ მედიკამენტად.

პრეპარატის ზემოქმედება ავტოტრანსპორტისა და მექანიზმების მართვის უნარზე: პრეპარატის მიღება არ ახდენს გავლენას სატრანსპორტო საშუალებებისა და სხვა მექანიზმების მართვის უნარზე.

შეფუთვა:

90 მლ სუსპენზია ნარინჯისფერ მინის ფლაკონში საზომი ხუფით, თითო ფლაკონი მუყაოს კოლოფში.

შენახვის პირობები:

ინახება არა უმეტეს 25°C ტემპერატურაზე ორიგინალურ შეფუთვაში ბავშვებისთვის მიუწვდომელ ადგილას. ფლაკონის გახსნის შემდეგ სუსპენზია ვარგისია გამოყენებისთვის 6 თვის განმავლობაში.

ვიზუალური დათვალიერების შედეგად აღმოჩენილი რაიმე სახის დეფექტის შემთხვევაში პრეპარატის მიღება დაუშვებელია.

ვარგისობის ვადა:

3 წელი.

შეფუთვაზე აღნიშნული ვადის გასვლის შემდეგ პრეპარატის გამოყენება დაუშვებელია.

აფთიაქიდან გაცემის პირობა:

ფარმაცევტული პროდუქტის ჯგუფი III, გაიცემა რეცეპტის გარეშე.

მწარმოებელი:

შპს “ავერსი-რაციონალი” (საქართველო).