Rigevidon - რიგევიდონი 0.03/0.15მგ 63 ტაბლეტი

რიგევიდონი® 

RIGEVIDON®

საერთაშორისო არადაპატენტებული დასახელება: (ეთინილესტრადიოლი/ლევონორგესტრელი(Ethinylestradiol/levonorgostrel)

სამკურნალო საშუალების გამოყენებამდე ყურადღებით წაიკითხოთ ეს ფურცელი-ჩანართი

·  შეინახეთ ფურცელი-ჩანართი. ის შეიძლება კიდევ დაგჭირდეთ.

·  დამატებითი კითხვების შემთხვევაში, მიმართეთ მკურნალ ექიმს ან აფთიაქის თანამშრომელს.

·  ეს სამკურნალო პრეპარატი დაგენიშნათ პირადად თქვენ. არ გადასცეთ ის სხვა ადამიანებს. მან შეიძლება მათ ზიანი მოუტანოს.  

· გვერდითი მოვლენების განვითარების შემთხვევაში აცნობეთ მათ შესახებ თქვენს ექიმს ან აფთიაქის თანამშრომელს. აღნიშნული რეკომენდაცია ვრცელდება ყველა შესაძლო გვერდით მოვლენაზე, იმ მოვლენების ჩათვლით, რომლებიც არ არის აღწერილი ამ ფურცელ-ჩანართის ნაწილში 4. 

ფურცელი-ჩანართის შინაარსი:

1.   რას წარმოადგენს პრეპარატი რიგევიდონის გარსით დაფარული ტაბლეტები (შემდგომში – პრეპარატი რიგევიდონი) და რა მიზნით გამოიყენება.  

2.   რისი ცოდნაა აუცილებელი, სანამ დაიწყებთ პრეპარატ რიგევიდონის მიღებას?

3.   პრეპარატ რიგევიდონის გამოყენება.

4.   შესაძლო გვერდითი რეაქციები.

5.   პრეპარატ რიგევიდონის შენახვის პირობები.

6.   შეფუთვა და დამატებითი ინფორმაცია. 

1. რას წარმოადგენს პრეპარატი რიგევიდონი და რა მიზნით გამოიყენება

პრეპარატი რიგევიდონი, მიეკუთვნება კომბინირებული პერორალური კონტრაცეპტული საშუალებების ჯგუფს (კოკ).

პრეპარატი რიგევიდონი შეიცავს ჰორმონების ორ ტიპს: ესტროგენს (ეთინილესტრადიოლი) და პროგესტერონს (ლევონორგესტრელი) მცირე დოზებით. 

ისინი ხელს უშლიან დაორსულებას სამი მექანიზმის ხარჯზე:

1. მის შემადგენლობაში შემავალი ჰორმონები თრგუნავენ საკვერცხეებიდან კვერცხუჯრედის ყოველთვიურ გამოსვლას (ოვულაციას).

2. მათი მოქმედება ასევე მდგომარეობს საშვილოსნოს ყელის შემავსებელი ლორწოს წებოვნების მომატებაში, რაც აძნელებს სპერმატოზოიდების შეღწევას საშვილოსნოს ღრუში და კვერცხუჯრედთან კონტაქტს. 

3. ამის გარდა იცვლება საშვილოსნოს ლორწოვანი გარსის სტრუქტურა და ფუნქცია, რაც ნაკლებშესაძლებელს ხდის განაყოფიერებული კვერცხუჯრედის მიმაგრებას საშვილოსნოს კედელზე. 

ზოგადი ინფორმაცია

სწორი გამოყენების შემთხვევაში კონტრაცეფციული ტაბლეტები წარმოადგენს კონტრაცეფციის შექცევად, ეფექტურ მეთოდს. მიუხედავად ამისა, ზოგიერთ შემთხვევებში ამ ტაბლეტების ეფექტურობა შეიძლება შემცირდეს, ან თქვენ მოგიწიოთ მათი მიღების შეწყვეტა (იხ. ქვემოთ). ასეთ შემთხვევებში აუცილებელია სქესობრივი კონტაქტისგან თავის შეკავება ან ეფექტური კონტრაცეფციის უზრუნველსაყოფად სქესობრივი აქტისას არაჰორმონული საშუალებების დამატებით გამოყენება (მაგ. პრეზერვატივები ან სპერმიციდები).

გახსოვდეთ, რომ კომბინირებული პერორალური კონტრაცეფციული საშუალებები (კოკ), ისეთი როგორიც პრეპარატი რიგევიდონის ტაბლეტები, თქვენ არ გიცავთ სქესობრივი გზით გადამდები დაავადებებისგან (როგორიც არის შიდსი). 

ამისთვის აუცილებელია პრეზერვატივის გამოყენება.

2. რისი ცოდნაა აუცილებელი, სანამ დაიწყებთ პრეპარატ რიგევიდონის ტაბლეტების მიღებას

არ გამოიყენოთ პრეპარატ რიგევიდონის ტაბლეტები, თუ

-     თქვენ გაქვთ (ან წარსულში გქონდათ) თრომბი ფეხების (ღრმა ვენების თრომბოზი), ფილტვების (ფილტვის არტერიის თრომბოემბოლია) ან სხვა ორგანოების სისხლძარღვებში;

-     თუ თქვენთვის ცნობილია ისეთი დაავადების არსებობის შესახებ, რომელსაც თან ახლავს თრომბის წარმოქმნის მომატება – მაგალითად, С პროტეინის დეფიციტი,   შ პროტეინის დეფიციტი, III ანტითრომბინის დეფიციტი, V ფაქტორის ლეიდენის მუტაცია ან ფოსფოლიპიდების მიმართ ანტისხეულების არსებობა;

-     თუ გადატანილი გაქვთ ინფარქტი ან ინსულტი;

-     თუ გაწუხებთ (ან ოდესმე გაწუხებდათ) სტენოკარდია (მდგომარეობა, რომელიც იწვევს ძლიერ ტკივილ გულმკერდში და შეიძლება იყო ინფარქტის პირველი ნიშნი) ან თუ გაქვთ თავის ტვინში სისხლის მიმოქცევის ტრანზიტორული დარღვევები (ტრანზიტორული იშემიური შეტევა); 

-     თუ გაქვთ (ან გქონდათ) ე.წ. "შაკიკი აურით";

-     თუ გაქვთ რომელიმე ჩამოთვლილი დაავადება, რამაც შეიძლება გაზარდოს არტერიული თრომბოზის რისკი: 

- მძიმე შაქრიანი დიაბეტი სისხლძარღვთა დაზიანებით;

- გულის სარქვლოვანი დაავადება;

- ძალიან მაღალი წნევა;

- სისხლში ლიპიდების ძალიან მაღალი დონე (ქოლესტერინი ან ტრიგლიცერიდები);

- თუ გაქვთ (ან გქონდათ) ან ეჭვი გაქვთ, რომ შესაძლოა გქონდეთ ძუძუს ან სასქესო ორგანოების კიბო;

- თუ გაქვთ (ან ადრე ჰქონდათ) პანკრეასის ანთება;

- თუ გაქვთ ან გქონდათ წარსულში ღვიძლის დაავადება და თქვენი ღვიძლის ფუნქცია ჯერ არ მოწესრიგებულა;

- თუ გაქვთ ან გქონდათ ღვიძლის სიმსივნე;

- თუ გაქვთ დაუზუსტებელი ეტიოლოგიის სისხლდენა საშოდან;

- თუ ხართ ორსულად ან ძუძუთი კვებავთ; გაქვთ ეჭვი ორსულობაზე;

- პირველი მენსტრუაციის დაწყებამდე (მენარქე);

- პოსტმენოპაუზის პერიოდში;

- თუ გაქვთ გალაქტოზას აუტანლობა ლაქტოზას სრული დეფიციტი, გლუკოზა-გალაქტოზას მალაბსორბცია, ფრუქტოზის აუტანლობა, გლუკოზა-გალაქტოზას მალაბსორბციის სინდრომი, საქაროზას და იზომალტაზას დეფიციტი;

- თუ ალერგიული ხართ ლევონორგესტრელზე, ეთინილესტრადიოლზე ან ამ წამლის რომელიმე სხვა ინგრედიენტზე (ჩამოთვლილი მე-6 ნაწილში);

- თუ იღებთ ან აპირებთ კრაზანას (Hყპერიცუმ პერფორატუმ) მცენარეული სამკურნალო პრეპარატების მიღებას.

არ მიიღოთ რიგევიდონი, თუ გაქვთ ჩ ჰეპატიტი და იღებთ მედიკამენტებს, რომლებიც შეიცავს ომბიტასვირს / პარიტაპრევირს / რიტონავირს, დასაბუვირს, გლეკაპრევირს / პიბრენტასვირს და სოფოსბუვირს / ველპატასვირს / ვოქსილაპრევირს (იხილეთ ასევე ნაწილი "სხვა პრეპარატები და რიგევიდონი").

გაფრთხილებები და უსაფრთხოების ზომები

რიგევიდონის გამოყენებამდე გაესაუბრეთ თქვენს ექიმს ან ფარმაცევტს.

სანამ რიგევიდონის მიღებას დაიწყებთ, თქვენი ექიმი შეკრებს თქვენს სამედიცინო ანამნეზს და დაგისვამთ რამდენიმე შეკითხვას თქვენსა და თქვენი ოჯახის წევრების შესახებ. თქვენი ექიმი გაზომავს თქვენს წნევას და საჭიროების შემთხვევაში ჩაატარებს გამოკვლევას.

აცნობეთ თქვენს ექიმს, თუ რომელიმე ეს პირობა გეხებათ.

თუ ასეთი მდგომარეობა განვითარდება ან გაუარესდება რიგევიდონის მიღებისას, ასევე უნდა აცნობოთ ექიმს:

- თუ გაქვთ სისხლში ლიპიდების მაღალი დონე (ჰიპერტრიგლიცერიდემია) ან გაქვთ ამ მდგომარეობის ოჯახის ისტორია. ჰიპერტრიგლიცერიდემია დაკავშირებულია პანკრეატიტის (პანკრეასის ანთება) განვითარების გაზრდილ რისკთან;

- თუ ეწევით;

- თუ გაქვთ ჭარბი წონა;

- თუ გაქვთ მაღალი წნევა;

- თუ გაქვთ ტკივილი თავის ერთ მხარეს (ჰემიკრანია);

- თუ გაქვთ დიაბეტი;

- თუ გაქვთ კრონის დაავადება ან წყლულოვანი კოლიტი (ნაწლავის ქრონიკული ანთებითი დაავადება);

- თუ გაქვთ ოტოსკლეროზით გამოწვეული სმენის დაქვეითების მემკვიდრეობითი ფორმა;

- თუ გაქვთ დეპრესია ან განწყობის ცვალებადობა;

- თუ გაქვთ ცენტრალური ნერვული სისტემის დარღვევა, რომელიც იწვევს კრუნჩხვებს და გონების დაკარგვას (ეპილეფსია);

- თუ გაქვთ მოძრაობის დარღვევა, ე.წ. სიდენჰემის ქორეა (გამოიხატება კიდურების უეცარი კანკალით);

- თუ გაქვთ ღვიძლის ან ნაღვლის ბუშტის დაავადება (მაგ. კანის გაყვითლება, კენჭები ნაღვლის ბუშტში);

- თუ გაქვთ მემკვიდრეობითი დაავადება, რომელსაც ეწოდება პორფირია (სისხლის პიგმენტის (ჰემოგლობინის) მეტაბოლიზმის თანდაყოლილი დარღვევა);

- თუ გაქვთ ნამგლისებრუჯრედოვანი ანემია (მემკვიდრეობითი დაავადება, რომელიც იწვევს სისხლის წითელი უჯრედების ცვლილებას);

- თუ გაქვთ სისხლის დაავადება, რომლის დროსაც სისხლის შედედება (თრომბები) იწვევს თირკმლის უკმარისობას (ჰემოლიზური ურემიული სინდრომი);

- თუ გაქვთ სისტემური წითელი მგლურა (ატოიმუნური დაავადება კანის გამოვლინებით);

- თუ გაქვთ სისხლში პროლაქტინის მომატებული დონე;

- თუ გაწუხებთ მთელი სხეულის ქავილი, რომელიც დაკავშირებულია ნაღვლის მეტაბოლიზმის დარღვევასთან;

- თუ ორსულობის დროს გქონდათ ჰერპეს ვირუსით გამოწვეული კანის ინფექცია (ორსულობის დროს კანზე გამონაყარი);

- თუ გაქვთ ყავისფერი ლაქები სახესა და ტანზე (ქლოაზმა). ამ შემთხვევაში მოერიდეთ მზის პირდაპირი სხივების ან ულტრაიისფერი გამოსხივების ზემოქმედებას;

- თუ თქვენ გაქვთ ანგიონევროზული შეშუპების სიმპტომები, როგორიცაა სახის, ენის და/ან ყელის შეშუპება, ყლაპვის გაძნელება ან ჭინჭრის ციება, მათ შორის სუნთქვის გაძნელებასთან ერთად, დაუყოვნებლივ მიმართეთ ექიმს.

ეგზოგენურ ესტროგენებს შეუძლიათ მემკვიდრეობითი და შეძენილი ანგიონევროზის სიმპტომების პროვოცირება ან გამწვავება.

ზემოაღნიშნული პირობები შეიძლება გამწვავდეს კონტრაცეპტული პრეპარატების მიღებისას; ამიტომ მათი გამოყენება მოითხოვს რეგულარულ სამედიცინო გამოკვლევებს.

კომბინირებული პერორალური კონტრაცეპტივები (კოკ) და თრომბოზი 

ვენური თრომბოზი

ნებისმიერი კომბინირებული კონტრაცეპტივების გამოყენება, მათ შორის რიგევიდონის გამოყენება, ზრდის ქალებში ვენური თრომბოზის (სისხლძარღვებში თრომბის წარმოქმნა) განვითარების რისკს, იმ ქალებთან შედარებით, რომლებიც არ იღებენ ჩასახვის საწინააღმდეგო ტაბლეტებს.

ვენური თრომბოზის რისკი ქალებში, რომლებიც იღებენ კომბინირებული პერორალური კონტრაცეპტივები, იზრდება:

- ასაკთან ერთად;

- სხეულის ჭარბი მასით;

- თუ ახლო ნათესავს მცირე ასაკში ჰქონდა ფეხების, ფილტვების ან სხვა ორგანოების სისხლძარღვების თრომბოზის შემთხვევები;

- ქირურგიული ჩარევების (ოპერაციების), ხანგრძლივი იმობილიზაციის ან სერიოზული დაზიანებების დროს. მნიშვნელოვანია წინასწარ აცნობოთ ექიმს, რომ იღებთ რიგევიდონს, რადგან შეიძლება დაგჭირდეთ მკურნალობის შეწყვეტა. თქვენი ექიმი გეტყვით, როდის შეგიძლიათ ხელახლა დაიწყოთ რიგევიდონის მიღება. ეს ჩვეულებრივ ხდება მობილობის აღდგენიდან 2 კვირის შემდეგ;

- შესაძლოა ზედაპირული თრომბოფლებიტის (ვენების ანთება კანის ქვეშ მდებარე ვენებში სისხლის შედედების წარმოქმნის გამო) და ვარიკოზული ვენების დროს (ფეხებზე შესამჩნევი შეშუპებული და გაფართოებული ვენები).

არტერიული თრომბოზი 

კომბინირებული პერორალური კონტრაცეპტივების გამოყენება დაკავშირებულია არტერიული თრომბოზის (არტერიის ბლოკირების) გაზრდილ რისკთან, მაგალითად, გულის (გულის შეტევა) ან თავის ტვინის (ინსულტი) სისხლძარღვებში.

არტერიული თრომბოზის რისკი ქალებში, რომლებიც იღებენ კომბინირებული პერორალური კონტრაცეპტივებს, იზრდება:

- ასაკთან ერთად;

- თუ ხართ მწეველი. პრეპარატი რიგევიდონის გამოყენებისას მკაცრად რეკომენდებულია მოწევის შეწყვეტა, განსაკუთრებით თუ ხართ 35 წელზე უფროსი ასაკის;

- სისხლში ლიპიდების (ქოლესტერინი ან ტრიგლიცერიდები) გაზრდილი შემცველობით;

- სხეულის ჭარბი მასით;

- მაღალი წნევის დროს;

- შაკიკის დროს;

- გულის დაავადებების დროს (გულის სარქვლოვანი დაავადება, გულის რითმის დარღვევა);

- თუ რომელიმე ახლო ნათესავს ახალგაზრდა ასაკში ჰქონდა მიოკარდიუმის ინფარქტი ან ინსულტი.

ძალიან იშვიათად გულის სისხლძარღვებში შეიძლება წარმოიქმნას თრომბები,  მიოკარდიუმის ინფარქტის განვითარებით. ჯანმრთელ ახალგაზრდა ქალებში მიოკარდიუმის ინფარქტის რისკი უკიდურესად დაბალია.

შეწყვიტეთ პრეპარატ რიგევიდონის მიღება და სასწრაფოდ მიმართეთ ექიმს, თუ შენიშნავთ თრომბოზის შესაძლო ნიშნებს, როგორიცაა: 

- ძლიერი ტკივილი და/ან ერთი ფეხის შეშუპება;

- ძლიერი და უეცარი ტკივილი გულმკერდის არეში, მათ შორის მარცხენა მკლავში ირადიაციით;

- უეცარი ქოშინი;

- უეცარი ხველა აშკარა მიზეზის გარეშე;

- უჩვეულო, მძიმე, გახანგრძლივებული თავის ტკივილი ან შაკიკის გაუარესება;

- მხედველობის ნაწილობრივი ან სრული დაკარგვა ან მხედველობის გაორება;

- მეტყველების დარღვევა ან მეტყველების უნარის დაკარგვა;

- თავბრუსხვევა ან გონების დაკარგვა;

- სისუსტე, უჩვეულო შეგრძნებები ან სხეულის ნაწილის ძლიერი დაბუჟება;

- მოძრაობის დარღვევები;

- მწვავე ტკივილი მუცლის არეში.

კომბინირებული პერორალური კონტრაცეპტივები და ონკოლოგიური დაავადებები

ზოგიერთმა კვლევამ აჩვენა საშვილოსნოს ყელის კიბოს განვითარების გაზრდილი რისკი კონტრაცეპტივების ხანგრძლივი გამოყენებისას. გაურკვეველია არის თუ არა ეს გაზრდილი რისკი დაკავშირებული პრეპარატების მოხმარებასთან, რადგან ეს შეიძლება გამოწვეული იყოს სქესობრივი ქცევის თავისებურებებითა და სხვა ფაქტორებით.

ძუძუს კიბო ქალებში, რომლებიც იღებენ კონტრაცეპტივებს, დიაგნოზირებულია ოდნავ უფრო ხშირად, ვიდრე იმავე ასაკის ქალებში, რომლებიც არ იღებენ კონტრაცეპტივებს. გამოყენების შეწყვეტის შემდეგ, ძუძუს კიბოს გამოვლენის რისკი მცირდება და 10 წლის შემდეგ იგივე ხდება, რაც ქალებში, რომლებსაც არასოდეს მიუღიათ კონტრაცეპტივები. გაურკვეველია, ზრდის თუ არა კონტრაცეპტული პრეპარატები ძუძუს კიბოს განვითარების რისკს. ეს აიხსნება იმით, რომ ქალები, რომლებიც იღებენ კონტრაცეპტივებს, უფრო ხშირად ექვემდებარებიან გამოკვლევას, ამიტომ ძუძუს კიბო ადრეულ სტადიაზე ვლინდება.

ქალებს, რომლებიც იღებენ პერორალურ კონტრაცეპტივებს, დაუდგინდათ ღვიძლის ავთვისებიანი და კეთილთვისებიანი სიმსივნეები. ღვიძლის სიმსივნემ შეიძლება გამოიწვიოს სიცოცხლისათვის საშიში ინტრააბდომინალური სისხლდენის განვითარება. ამრიგად, თუ გრძნობთ ტკივილს მუცლის ზედა ნაწილში, რომელიც სწრაფად არ ქრება, მიმართეთ ექიმს.

ფსიქიკური აშლილობები

ზოგიერთმა ქალმა, რომლებიც ჰორმონალურ კონტრაცეპტივებს იღებს, მათ შორის რიგევიდონს, აღნიშნეს დეპრესია ან დეპრესიული განწყობა. დეპრესია შეიძლება იყოს მძიმე და ზოგჯერ შეიძლება გამოიწვიოს სუიციდალური აზრები. თუ თქვენ განიცდით განწყობის ცვლილებებს და დეპრესიის სიმპტომებს, რაც შეიძლება მალე უნდა მიმართოთ ექიმს დამატებითი სამედიცინო კონსულტაციისათვის.

რეგულარული სამედიცინო გამოკვლევები

თუ დაიწყებთ კონტრაცეპტივების მიღებას, თქვენი ექიმი ჩაატარებს რეგულარულ ყოველწლიურ სამედიცინო შემოწმებას, ხოლო თუ რაიმე პრობლემა შეგექმნათ, ნებისმიერ დროს შეგიძლიათ მიმართოთ ექიმს.

სხვა პრეპარატები და პრეპარატი რიგევიდონი

აცნობეთ თქვენს ექიმს ან ფარმაცევტს, თუ იღებთ, ახლახან იღებდით ან შეიძლება დაიწყოთ სხვა მედიკამენტების მიღება.

არ მიიღოთ რიგევიდონი, თუ გაქვთ ც ჰეპატიტი და იღებთ ომბიტასვირის / პარიტაპრევირის / რიტონავირის, დასაბუვირის, გლეკაპრევირის / პიბრენტასვირის და სოფოსბუვირის / ველპატასვირის / ვოქსილაპრევირის შემცველ მედიკამენტებს, რადგან ამან შეიძლება გაზარდოს ღვიძლის ფუნქციის სინჯების სისხლის ანალიზების დროს (ღვიძლის ფერმენტის აქტივობის მომატება ალანინ ამინოტრანსფერაზა (ALT)).

ამ მედიკამენტებით მკურნალობის დაწყებამდე თქვენი ექიმი დაგინიშნავთ სხვა კონტრაცეპტივს.

რიგევიდონის მიღება შეიძლება განახლდეს ზემოაღნიშნული მკურნალობის დასრულებიდან დაახლოებით 2 კვირის შემდეგ. იხილეთ ნაწილი "არ მიიღოთ რიგევიდონი".

ზოგიერთმა პრეპარატმა შეიძლება გავლენა მოახდინოს პრეპარატის რიგევიდონის კონცენტრაციაზე სისხლში და შეამციროს მისი კონტრაცეპტული ეფექტურობა ან გამოიწვიოს მოულოდნელი სისხლდენის განვითარება. ეს შეიძლება იყოს ისეთი სამკურნალო საშუალებები, როგორიცაა:

- ეპილეფსიის სამკურნალო მედიკამენტები (მაგ. პრიმიდონი, ფენიტოინი, ბარბიტურატები, კარბამაზეპინი, ოქსკარბაზეპინი, ტოპირამატი, ჰიდანტოინები, ფელბამატი, რუფინამიდი);

- ტუბერკულოზის სამკურნალო მედიკამენტები (მაგალითად, რიფამპიცინი);

- მედიკამენტები აივ და ვირუსული ც ჰეპატიტის (ე.წ. პროტეაზას ინჰიბიტორები და არანუკლეოზიდური საპირისპირო ტრანსკრიპტაზას ინჰიბიტორები, როგორიცაა რიტონავირი, ნევირაპინი, ეფავირენცი, ნელფინავირი) ან სხვა ინფექციების (გრიზეოფულვინი) სამკურნალოდ;

- წამლები ძილიანობის შეტევების, ჭარბი ძილიანობის, დღის ჭარბი ძილიანობის სამკურნალოდ (მოდაფინილი);

- მედიკამენტები კანის გარკვეული ტიპის კიბოს სამკურნალოდ (ვემურაფენიბი);

- მედიკამენტები ართროზის სიმპტომური მკურნალობისთვის (ეტორიკოქსიბი);

- Hყპერიცუმ პერფორატუმ-ზე დამზადებული მცენარეული მედიკამენტები. თუ იღებთ ან აპირებთ Hყპერიცუმ პერფორატუმ შემცველ მედიკამენტებს, მიმართეთ ექიმს, რადგან რიგევიდონი შეიძლება არ იყოს თქვენთვის შესაფერისი.

რიგევიდონმა შეიძლება გავლენა მოახდინოს სხვა მედიკამენტების მოქმედებაზე, მაგალითად:

- ციკლოსპორინის შემცველი პრეპარატები;

- ანტიკონვულსანტი ლამოტრიგინი (ამან შეიძლება გამოიწვიოს კრუნჩხვების ზრდა).

თუ რიგევიდონთან ერთად იღებთ სხვა პრეპარატებს, აუცილებლად აცნობეთ ექიმს, სტომატოლოგს ან ფარმაცევტს.

თქვენი ექიმი ან სტომატოლოგი გეტყვით, გჭირდებათ თუ არა კონტრაცეფციის დამატებითი მეთოდების გამოყენება (როგორიცაა პრეზერვატივი ან სხვა ბარიერული მეთოდი) სხვა წამლის მიღებისას და მისი მიღების შეწყვეტიდან 7 დღის განმავლობაში (ან მეტი ხნის განმავლობაში).

რიგევიდონის მიღება საკვებთან და სასმელთან ერთად

საჭიროების შემთხვევაში გადაყლაპეთ ტაბლეტები მთლიანად წყლის მიყოლებით.

გავლენა ლაბორატორიულ ტესტებზე

თუ დაგინიშნეს სისხლის ანალიზი, აცნობეთ ექიმს ან ლაბორატორიას, რომ იღებთ ჩასახვის საწინააღმდეგო ტაბლეტებს, რადგან ამან შეიძლება გავლენა მოახდინოს ზოგიერთი ანალიზის შედეგებზე.

ორსულობა და ძუძუთი კვება

თუ ხართ ორსულად ან ძუძუთი კვებავთ, ფიქრობთ, რომ შეიძლება იყოთ ორსულად ან გეგმავთ ორსულებას, ამ პრეპარატის გამოყენებამდე გაესაუბრეთ თქვენს ექიმს ან ფარმაცევტს.

ორსულობა

თუ ორსულად ხართ ან ფიქრობთ, რომ ორსულად ხართ, შეწყვიტეთ რიგევიდონის მიღება და დაუყოვნებლივ აცნობეთ ექიმს.

ლაქტაცია

რიგევიდონი არ უნდა იქნას მიღებული ძუძუთი კვების დროს. თუ ძუძუთი კვებავთ და გსურთ კონტრაცეპტივების მიღება, ეს უნდა განიხილოთ თქვენს მკურნალ ექიმთან. 

გავლენა სატრანსპორტო საშუალებების მართვის ან მექანიზმებთან მუშაობის უნარზე

არ არსებობს მონაცემები იმის შესახებ, რომ პრეპარატი რიგევიდონი გავლენას ახდენს მანქანების მართვის ან მექანიზმებთან მუშაობის უნარზე.

მნიშვნელოვანი ინფორმაცია რიგევიდონის დამხმარე ნივთიერებების შესახებ

რიგევიდონი შეიცავს 33 მგ ლაქტოზას მონოჰიდრატს (რძის შაქარი) და 22,459 მგ საქაროზას თითოეულ გარსით დაფარულ ტაბლეტში. თუ ექიმმა ადრე შენიშნა, რომ გაქვთ ზოგიერთი შაქრის აუტანლობის სიმპტომები, პრეპარატის მიღებამდე გაიარეთ კონსულტაცია მასთან.

ეს პრეპარატი შეიცავს ნატრიუმის კარმელოზას.

ეს პრეპარატი შეიცავს მნიშვნელოვნად <1 მმოლ (23 მგ) ნატრიუმს თითოეულ გარსით დაფარულ ტაბლეტში, რაც ნიშნავს, რომ ის არსებითად არ შეიცავს ნატრიუმს.

3. პრეპარატ რიგევიდონის გამოყენება

ყოველთვის მიიღეთ პრეპარატი თქვენი ექიმის რეკომენდაციების სრული დაცვით. თუ ეჭვი გეპარებათ, რჩევისთვის მიმართეთ თქვენს ექიმს ან ფარმაცევტს.

რიგევიდონის ყოველი შეფუთვაში არის 1 ან 3 ბლისტერი, რომელიც შეიცავს 21 გარსით დაფარულ ტაბლეტს და გამოყენების ინსტრუქციას. ბლისტერი შექმნილია ისე, რომ არ გამოტოვოთ ის დღეები, როდესაც უნდა მიიღოთ ტაბლეტები.

ბლისტერზე აღნიშნულია კვირის დღეები, რომლებშიც უნდა იქნას მიღებული თითოეული ტაბლეტი. ბლისტერზე დაბეჭდილი ისრის მიმართულების მიხედვით, თქვენ უნდა მიიღოთ თითო ტაბლეტი ყოველდღე 21 დღის განმავლობაში, სანამ ის არ დაცარიელდება.

ამის შემდეგ, 7 დღის განმავლობაში, არ უნდა მიიღოთ ტაბლეტები. პრეპარატის მიღებიდან თავისუფალი 7 დღის ინტერვალში დგება მენსტრუაცია, რომელიც დაიწყება მე-2 ან მე-3 დღეს მენსტრუაციის მსგავსი „მოხსნის“ სისხლდენის ტიპით, რომელიც მენსტრუალურ სისხლდენას შეესაბამება.

დაიწყეთ შემდეგი შეფუთვა მე-8 დღეს (წამლის გარეშე 7 დღის შემდეგ), მაშინაც კი, თუ სისხლდენა ჯერ არ შეწყვეტილა. თუ თქვენ იღებთ რიგევიდონს სწორად, თქვენ ყოველთვის იწყებთ ყოველ ახალ შეფუთვას კვირის ერთსა და იმავე დღეს და თქვენი მენსტრუალური სისხლდენა ყოველთვის დაიწყება ყოველთვიურად კვირის ერთსა და იმავე დღეს.

თქვენ უნდა შეეცადოთ მიიღოთ თქვენი ტაბლეტები ყოველდღე დაახლოებით ერთსა და იმავე დროს. შეიძლება გაგიადვილდეთ ამის გაკეთება დილით ან ღამით ძილის წინ.

ტაბლეტები გადაყლაპეთ მთლიანად, საჭიროების შემთხვევაში წყლის მიყოლებით.

როგორ დავიწყოთ რიგევიდონის პირველი შეფუთვის მიღება

თუ წინა მენსტრუალური ციკლის დროს არ იქნა გამოყენებული პერორალური კონტრაცეპტივები

მიიღეთ პირველი ტაბლეტი მენსტრუაციის პირველ დღეს. ეს არის თქვენი ციკლის პირველი დღე - დღე, როდესაც იწყება სისხლდენა. მიიღეთ ტაბლეტი, რომელიც მითითებულია კვირის იმ დღეს (მაგალითად, თუ თქვენი პერიოდი დაიწყო სამშაბათს, მიიღეთ ტაბლეტი შეფუთვაზე წარწერით "სამშაბათი"). მიჰყევით ისრის მიმართულებას და განაგრძეთ თითო ტაბლეტის მიღება ყოველდღე ბლისტერის დაცლამდე.

თქვენ არ გჭირდებათ კონტრაცეფციის სხვა მეთოდის გამოყენება პრეპარატის მიღების შვიდდღიანი შესვენების დროს, იმ პირობით, რომ ტაბლეტები სწორად მიიღეთ წინა 21 დღის განმავლობაში და დაიწყეთ შემდეგი შეფუთვა სწორ დღეს.

რიგევიდონზე გადასვლა სხვა კომბინირებული ჰორმონალური კონტრაცეპტივისგან

დაიწყეთ რიგევიდონის მიღება წინა პრეპარატის შეფუთვიდან ბოლო ტაბლეტის მიღებიდან მეორე დღეს. არ შეისვენოთ ორი წამლის მიღებას შორის. თუ წინა პრეპარატის შეფუთვაში ასევე შედიოდა პლაცებო ტაბლეტები (ჰორმონების გარეშე), რიგევიდონის მიღება უნდა დაიწყოთ აქტიური ნივთიერების შემცველი ბოლო ტაბლეტის მიღებიდან მეორე დღეს, მაგრამ არა უგვიანეს მეორე დღისა წინა მიღების ჩვეულებრივი შესვენებიდან. Kკოკ (ან წინა პრეპარატის შეფუთვიდან ბოლო პლაცებო ტაბლეტის მიღების შემდეგ). ვაგინალური რგოლიდან ან პლასტირიდან გადასვლისას მიჰყევით ექიმის მითითებებს.

თუ არ ხართ დარწმუნებული რა უნდა გააკეთოთ ან გაქვთ დამატებითი შეკითხვები, მიმართეთ თქვენს ექიმს ან ფარმაცევტს.

რიგევიდონზე გადასვლა მხოლოდ პროგესტაგენური კონტრაცეპტივიდან (“მინი-პილი”, ინექციები, იმპლანტები ან საშვილოსნოსშიდა სისტემა)

შეგიძლიათ ნებისმიერ დროს შეწყვიტოთ მხოლოდ პროგესტოგენის შემცველი პრეპარატის („მინი-პილი“) მიღება და დაიწყოთ რიგევიდონის მიღება მეორე დღეს ჩვეულ დროს. თუმცა, თქვენ უნდა გამოიყენოთ დამატებითი კონტრაცეფცია (როგორიცაა კონდომი ან სხვა ბარიერული მეთოდი) ახალი პრეპარატის მიღებიდან პირველი 7 დღის განმავლობაში.

თუ თქვენ გქონდათ ინექციები, იმპლანტი (კანქვეშ მოთავსებული კონტრაცეპტივი) ან პროგესტოგენური საშვილოსნოსშიდა სისტემა, შეგიძლიათ დაიწყოთ რიგევიდონის მიღება თქვენი შემდეგი ინექციის დაგეგმვის დღიდან ან იმპლანტის ან საშვილოსნოსშიდა სისტემის ამოღების დღიდან. თუმცა, თქვენ უნდა გამოიყენოთ დამატებითი კონტრაცეფცია (როგორიცაა პრეზერვატივი ან სხვა ბარიერული მეთოდი) ახალი პრეპარატის მიღებიდან პირველი 7 დღის განმავლობაში.

როგორ დავიწყოთ რიგევიდონის მიღება მშობიარობის, სპონტანური აბორტის ან აბორტის შემდეგ

მშობიარობის, სპონტანური აბორტის ან აბორტის შემდეგ ექიმმა უნდა მოგცეთ რჩევა პრეპარატის მიღების შესახებ.

თქვენ შეგიძლიათ დაიწყოთ რიგევიდონის მიღება დაუყოვნებლივ ორსულობის პირველი სამი თვის განმავლობაში მომხდარი სპონტანური აბორტის ან აბორტის შემდეგ. ამ შემთხვევაში, თქვენ არ გჭირდებათ დამატებითი კონტრაცეპტივების გამოყენება.

თუ ორსულობის მეორე ტრიმესტრში გქონდათ ნაადრევი მშობიარობა ან აბორტი და თუ არ ხართ მეძუძური, შეგიძლიათ დაიწყოთ რიგევიდონის მიღება დაბადებიდან, სპონტანური აბორტიდან ან აბორტიდან  21-28 დღის შემდეგ. თუმცა, პრეპარატის მიღებიდან პირველი 7 დღის განმავლობაში, სქესობრივი აქტის დროს უნდა იქნას გამოყენებული დამატებითი კონტრაცეპტივები (როგორიცაა პრეზერვატივი ან სხვა ბარიერული მეთოდი). 

თუ მიიღეთ საჭიროზე მეტი რიგევიდონი

თუ თქვენ მიიღებთ საჭიროზე მეტ რიგევიდონს, ნაკლებად სავარაუდოა, რომ ზიანი მიაყენოთ საკუთარ თავს, მაგრამ შეიძლება გამოვლინდეს გულისრევა, ღებინება, მუცლის ტკივილი, სარძევე ჯირკვლებიდ შეშუპება, დაბუჟება, ძილიანობა/სისუსტე. გოგონებს შეიძლება დაეწყოთ სისხლდენა საშოდან. თუ თქვენ გაქვთ ეს სიმპტომები, უნდა მიმართოთ ექიმს, რომელიც გეტყვით რა უნდა გააკეთოთ (საჭიროების შემთხვევაში).

თუ დაგავიწყდათ რიგევიდონის მიღება

თუ ერთი ტაბლეტი უნდა მიგეღოთ 12 ან ნაკლების საათის წინ

თქვენ კვლავ დაცული ხართ ორსულობისგან, თუ მიიღებთ ტაბლეტს, რომელიც უნდა მიგეღოთ, როგორც კი გაგახსნედებათ, მომდევნო ტაბლეტი მიიღეთ ჩვეულებრივ დროს. შეიძლება ერთ დღეში მიიღოთ ორი ტაბლეტი.

თუ ტაბლეტი უნდა მიგეღოთ 12 საათზე მეტი ხნის წინ

თუ ტაბლეტი უნდა მიღებულიყო 12 საათზე მეტი ხნის წინ, ორსულობისგან დაცვა შეიძლება შემცირდეს. ამიტომ აუცილებელია დამატებითი კონტრაცეპტივების გამოყენება. რაც უფრო მეტი ტაბლეტი გამოტოვებთ, მით უფრო მაღალია რისკი იმისა, რომ თქვენ არ ხართ დაცული ორსულობისგან.

თუ გამოტოვებთ ერთზე მეტ ტაბლეტს, მიმართეთ ექიმს.

რა უნდა გააკეთოთ, თუ პრეპარატის გამოყენების პირველ კვირას გამოტოვებთ ტაბლეტს

თქვენ უნდა მიიღოთ ბოლო გამოტოვებული ტაბლეტი, როგორც კი გაგახსენდებათ, მაშინაც კი, თუ აღმოჩნდება, რომ თქვენ უნდა მიიღოთ წამლის 2 ტაბლეტი ერთდროულად. ამის შემდეგ თქვენ უნდა გააგრძელოთ რიგევიდონის მიღება დღის ჩვეულ დროს. თქვენ ასევე უნდა გამოიყენოთ კონტრაცეფციის ბარიერული მეთოდი, როგორიცაა პრეზერვატივი, მომდევნო 7 დღის განმავლობაში. თუ სქესობრივი კავშირი მოხდა წინა 7 დღის განმავლობაში, აუცილებელია ვივარაუდოთ ორსულობის ალბათობა. რაც უფრო მეტი ტაბლეტი იყო გამოტოვებული და რაც უფრო ახლოს იყო ეს წამლის მიღების შეწყვეტასთან, მით უფრო მაღალია ორსულობის რისკი.

რა უნდა გააკეთოთ, თუ პრეპარატის გამოყენების მეორე კვირას გამოტოვებთ ტაბლეტს

თქვენ უნდა მიიღოთ ბოლო გამოტოვებული ტაბლეტი, როგორც კი გაგახსენდებათ, მაშინაც კი, თუ აღმოჩნდება, რომ თქვენ უნდა მიიღოთ წამლის 2 ტაბლეტი ერთდროულად. ამის შემდეგ, თქვენ უნდა გააგრძელოთ რიგევიდონის მიღება დღის ჩვეულ დროს. იმ პირობით, რომ რიგევიდონი სწორად იქნა მიღებული წინა 7 დღის განმავლობაში, არ არის საჭირო დამატებითი კონტრაცეპტივების გამოყენება. თუმცა, თუ 1 ტაბლეტზე მეტი გამოტოვებულია, დამატებითი კონტრაცეფცია უნდა იქნას გამოყენებული მომდევნო 7 დღის განმავლობაში.

რა უნდა გააკეთოთ, თუ პრეპარატის გამოყენების მესამე კვირას გამოტოვებთ ტაბლეტს

კონტრაცეპტული ეფექტის კრიტიკული შემცირების რისკი გარდაუვალია პრეპარატის მიღების შემდგომი შეწყვეტის გამო. თუმცა, კონტრაცეპტული ეფექტის დაქვეითება შეიძლება თავიდან აიცილოთ ტაბლეტების რეჟიმის შეცვლით. ამასთან დაკავშირებით, პრეპარატის მიღების ორი შემოთავაზებული რეჟიმიდან ერთ-ერთის დაცვით, არ არის საჭირო კონტრაცეფციის დამატებითი მეთოდების გამოყენება, იმ პირობით, რომ რიგევიდონის ყველა ტაბლეტი სწორად იქნა მიღებული პირველი გამოტოვებული ტაბლეტის წინ 7 დღის განმავლობაში. თუ თქვენ იღებდით რიგევიდონს არასწორად პირველი გამოტოვებული ტაბლეტის მიღებამდე 7 დღით ადრე, უნდა დაიცვათ პრეპარატის მიღების ორი შემოთავაზებული რეჟიმიდან პირველი. გარდა ამისა, კონტრაცეფციის ბარიერული მეთოდი (მაგალითად, პრეზერვატივი) უნდა იქნას გამოყენებული ერთდროულად მომდევნო 7 დღის განმავლობაში.

1. თქვენ უნდა მიიღოთ ბოლო გამოტოვებული ტაბლეტი, როგორც კი გაგახსენდებათ, მაშინაც კი, თუ აღმოჩნდება, რომ თქვენ უნდა მიიღოთ წამლის 2 ტაბლეტი ერთდროულად. ამის შემდეგ თქვენ უნდა გააგრძელოთ რიგევიდონის მიღება დღის ჩვეულ დროს. შემდეგ ტაბლეტების მიღება უნდა დაიწყოთ შემდეგი შეფუთვიდან, მიმდინარე შეფუთვაში ბოლო ტაბლეტის მიღებიდან მეორე დღეს, ე.ი. პრეპარატის მიღების შეფერხების გარეშე. მეორე შეფუთვის დასრულებამდე სისხლდენის "მოხსნის" ალბათობა მცირეა, მაგრამ ტაბლეტების მიღებისას შეიძლება განვითარდეს "ლაქოვანი" სისხლიანი გამონადენი ან "ჭარბი" სისხლდენა.

2. ასევე შეგიძლიათ შეწყვიტოთ ტაბლეტების მიღება მიმდინარე შეფუთვაში. ამ შემთხვევაში თქვენ უნდა გამოტოვოთ პრეპარატის მიღება 7 დღემდე, იმ დღეების ჩათვლით, როდესაც დაგავიწყდათ ტაბლეტების მიღება და შემდეგ გადახვიდეთ წამლის შემდეგ შეფუთვაზე.

თუ თქვენ გამოტოვეთ ტაბლეტი და ამის შემდეგ არ იყო "მოხსნის" სისხლდენა პრეპარატის მიღების პირველი შესვენების დროს, აუცილებელია ვივარაუდოთ ორსულობის შესაძლებლობა.

რა უნდა გააკეთოთ, თუ გაქვთ ღებინება/ფაღარათი

ღებინების ან ფაღარათის შემთხვევაში მიღებიდან 3-4 საათის შემდეგ, არსებობს შესაძლებლობა, რომ აქტიურ ნივთიერებებმა ვერ მოასწრეს შეწოვა. ამ შემთხვევაში აუცილებელია ზემოთ აღწერილი ტაბლეტების გამოტოვებასთან დაკავშირებული რეკომენდაციების დაცვა. ღებინების ან ფაღარათი შემთხვევაში, დამატებითი კონტრაცეპტივები, როგორიცაა პრეზერვატივი ან სხვა ბარიერული მეთოდები უნდა იქნას გამოყენებული საჭმლის მონელების ხანგრძლივობისა და მომდევნო 7 დღის განმავლობაში.

რა უნდა გააკეთოთ, თუ გსურთ მენსტრუაციის გადადება 

თუ გსურთ მენსტრუაციის დაწყების გადადება, უნდა მიმართოთ ექიმს.

თუ გსურთ მენსტრუაციის დაწყების გადადება, უნდა დაიწყოთ ტაბლეტების მიღება ახალი შეფუთვიდან მიმდინარე შეფუთვის (ბლისტერის) დასრულებიდან მეორე დღეს, მიღებისას შესვენების გარეშე. მენსტრუაციის შეფერხება შეიძლება გაგრძელდეს მანამ, სანამ დაგჭირდებათ ტაბლეტების დასრულებამდე მეორე შეფუთვიდან. პრეპარატის მეორე შეფუთვის გამოყენების პერიოდში შეიძლება განვითარდეს "ჭარბი" სისხლდენა ან "ლაქოვანი” სისხლიანი გამონადენი. ჩვეულებრივი 7-დღიანი შესვენების შემდეგ, თქვენ კვლავ უნდა დაიწყოთ რიგევიდონის რეგულარულად მიღება.

თუ გსურთ შეცვალოთ თქვენი მენსტრუაციის დაწყების თარიღი

თუ რიგევიდონს სწორად იღებთ, თქვენი მენსტრუაცია ყოველთვის დადგება ყოველთვიურად კვირის ერთსა და იმავე დღეს. თუ გსურთ მენსტრუაციის დაწყების დრო სხვა დღეზე გადაიტანოთ იმ დღესთან შედარებით, როდესაც ის ადრე მოხდა ტაბლეტების მიღებისას, შეგიძლიათ შეამციროთ (მაგრამ არავითარ შემთხვევაში გააგრძელოთ) წამლის მიღების შემდეგი შესვენება იმდენი დღით. როგორც გინდა. მაგალითად, თუ თქვენი მენსტრუაცია ჩვეულებრივ პარასკევს იწყება და გსურთ, რომ ის დადგეს სამშაბათს (ანუ სამი დღით ადრე), უნდა დაიწყოთ ტაბლეტების მიღება რიგევიდონის შემდეგი შეფუთვიდან სამი დღით ადრე. რაც უფრო ხანმოკლეა წამლის მიღების შესვენება, მით უფრო დიდია ალბათობა იმისა, რომ არ იქნება „მოხსნის“ სისხლდენა, მაგრამ შეიძლება იყოს “ლაქიანი” სისხლიანი გამონადენი ან „ჭარბი“ სისხლდენა პრეპარატის მეორე პაკეტიდან ტაბლეტების მიღებისას.

თუ თქვენ გაქვთ სისხლდენა პერიოდებს შორის

პრეპარატის რიგევიდონის მიღებისას ქალების მცირე რაოდენობას შეიძლება განუვითარდეს უმნიშვნელო „ჭარბი“ სისხლდენა ან „ლაქების“ სისხლიანი გამონადენი, განსაკუთრებით მისი გამოყენების პირველი რამდენიმე თვის განმავლობაში. როგორც წესი, ასეთი სისხლდენა არანაირ საფრთხეს არ წარმოადგენს, ერთი-ორი დღის შემდეგ ჩერდება. განაგრძეთ ტაბლეტების მიღება ჩვეულებრივად. ეს სიმპტომები უნდა გაქრეს პრეპარატის პირველი რამდენიმე პაკეტის მიღების შემდეგ (ჩვეულებრივ, სამი პაკეტი).

თუ სისხლდენა განმეორდება, იწვევს დისკომფორტს ან გახანგრძლივდება, უნდა მიმართოთ თქვენს მკურნალ ექიმს.

თუ შემდეგი მენსტრუაცია არ დადგა

თუ ყველა ტაბლეტი სწორად მიიღეთ, არ იყო საჭმლის მონელების დარღვევა და არ იყენებდით სხვა პრეპარატებს, მაშინ ორსულობის ალბათობა მცირეა. გააგრძელეთ რიგევიდონის მიღება ჩვეულებრივად.

თუ ზედიზედ ორი მენსტრუაცია არ განვითარდა

თუ თქვენ არ გქონიათ ზედიზედ ორი მენსტრუაცია, არსებობს შესაძლებლობა, რომ ორსულად იყოთ და დაუყოვნებლივ უნდა მიმართოთ ექიმს. თქვენ შეძლებთ გააგრძელოთ კონტრაცეპტივების მიღება მხოლოდ მას შემდეგ, რაც გაიკეთებს ორსულობის ტესტებს და მიიღებთ რჩევას თქვენი ექიმისგან.

თუ გსურთ შეწყვიტოთ რიგევიდონის მიღება

თქვენ შეგიძლიათ შეწყვიტოთ რიგევიდონის მიღება ნებისმიერ დროს. თუ თქვენ შეწყვეტთ პრეპარატის მიღებას ბავშვის გაჩენის მიზნით, გამოიყენეთ კონტრაცეფციის სხვა მეთოდი, სანამ თქვენი ბუნებრივი მენსტრუაცია არ დადგება. ეს გაუადვილებს თქვენს ექიმს თქვენი ბავშვის სავარაუდო დაბადების თარიღის დადგენას.

თუ თქვენ გაქვთ რაიმე შეკითხვა პრეპარატის გამოყენებასთან დაკავშირებით, მიმართეთ თქვენს ექიმს ან ფარმაცევტს.

4. შესაძლო გვერდითი რეაქციები

როგორც ყველა მედიკამენტმა, რიგევიდონმაც შეიძლება გამოიწვიოს გვერდითი მოვლენები, თუმცა ისინი ყველას არ უვითარდება.

მძიმე გვერდითი მოვლენები

ანგიონევროზული შეშუპების სიმპტომები, როგორიცაა სახის, ენის და/ან ყელის შეშუპება, ყლაპვის გაძნელება ან ჭინჭრის ციება, მათ შორის სუნთქვის გაძნელებასთან ერთად, დაუყოვნებლივ უნდა მიმართოთ ექიმს (იხ. ნაწილი „განსაკუთრებული მითითებანი და სიფრთხილის ზომები“).

შემდეგი სერიოზული გვერდითი მოვლენები დაფიქსირდა ქალებში, რომლებიც ღებულობდნენ კოკ კონტრაცეპტივებს (იხილეთ ნაწილი 2, ქვეპუნქტები "კომბინირებული პერორალური კონტრაცეპტივები და თრომბოზი" და " კომბინირებული პერორალური კონტრაცეპტივები და ონკოლოგიური დაავადებები"):

- ვენური თრომბოემბოლია (სისხლძარღვებში თრომბის წარმოქმნა);

- არტერიული თრომბოემბოლია (არტერიის ბლოკირება);

- საშვილოსნოს ყელის კიბო.

ქვემოთ მოცემულია გვერდითი მოვლნების ჩამონათვალი, რომლებიც დაკავშირებულია რიგევიდონის მიღებასთან.

ხშირი (შეიძლება განვითარდეს 10-დან 1 ქალში): საშოს ანთება, ვაგინალური კანდიდოზის ჩათვლით; განწყობის ცვლილებები, მათ შორის დეპრესია; სექსუალური ლტოლვის დარღვევა, თავის ტკივილი, ნერვიულობა, თავბრუსხვევა, გულისრევა, ღებინება, მუცლის ტკივილი, აკნე; ტკივილი, შეშუპება და გამონადენი სარძევე ჯირკვლებიდან; მტკივნეული მენსტრუაცია, არარეგულარული მენსტრუალური სისხლდენა, სისხლდენის გარეშე ან მსუბუქი მენსტრუალური სისხლდენა; საშვილოსნოს ყელის პათოლოგია (საშვილოსნოს ყელის ლორწოვანი გარსის ცვლილებები) და ვაგინალური გამონადენი; სითხის შეკავება/შეშუპება, სხეულის წონის ცვლილებები.

არახშირი (შეიძლება აღენიშნებოდეს 100-დან 1 ქალს): მადის ცვლილებები, შაკიკი, მაღალი წნევა, ფაღარათი, მუცლის სპაზმები, შებერილობა, გამონაყარი, ჭინჭრის ციება; ქლოაზმა (კანზე მოყვითალო-ყავისფერი ლაქები), რომელიც შეიძლება დიდხანს გაგრძელდეს; თმის გადაჭარბებული ზრდა, თმის ცვენა; სისხლის ლიპიდების ცვლილებები, მათ შორის ტრიგლიცერიდების მატება.

იშვიათი (შეიძლება დაემართოს 1000-დან 1 ქალს): ჰიპერმგრძნობელობის რეაქციები, მძიმე ალერგიული რეაქციები (ანაფილაქსიური რეაქციები ჭინჭრის ციების ძალიან იშვიათი შემთხვევებით, სახის, ენის, სისხლის მიმოქცევის და სუნთქვის მძიმე დარღვევები), გლუკოზის ტოლერანტობის დაქვეითება, თვალის გაღიზიანება კონტაქტური ლინზების ტარებისას, კანის გაყვითლება (სიყვითლე), ერითემა კვანძოვანი (კანის დაავადება, რომელიც ხასიათდება მტკივნეული მოწითალო კვანძებით).

ძალიან იშვიათი (შეიძლება გამოვლინდეს 10000-დან 1 ქალში):

ღვიძლის კეთილთვისებიანი ან ავთვისებიანი სიმსივნეები, აუტოიმუნური დაავადებების პროგრესირება (მგლურა), პორფირიის პროგრესირება, ქორეას გამწვავება (დაავადება, რომელსაც ახასიათებს უნებლიე მოძრაობები), მხედველობის ნერვის ანთება, თვალის სისხლძარღვებში სისხლის შედედება, ვარიკოზული ვენების გაუარესება. მსხვილი ნაწლავის ანთება (იშემიური კოლიტი), პანკრეასის ანთება, ნაღვლის ბუშტის დაავადება (ქვების წარმოქმნის ჩათვლით), მრავალფორმუ ერითემა (ახასიათებს გამონაყარი სამიზნის მსგავსი სიწითლით ან წყლულებით); სისხლის დაავადება, რომელსაც ეწოდება ჰემოლიზური ურემიული სინდრომი (ჰუს-დარღვევა, რომლის დროსაც თრომბი იწვევს თირკმლის უკმარისობას); სისხლის შრატში ფოლიუმის მჟავას მარილების შემცველობის შემცირება.

უცნობია (სიხშირე არ შეიძლება შეფასდეს არსებული მონაცემებით):

ნაწლავის ანთებითი დაავადება (კრონის დაავადება, წყლულოვანი კოლიტი), ღვიძლის უჯრედების დაზიანება (მაგ. ჰეპატიტი, ღვიძლის ფუნქციის დარღვევა).

არასასურველი რეაქციების შესახებ შეტყობინება

თუ თქვენ გაქვთ რაიმე გვერდითი რეაქცია, გთხოვთ მიმართოთ თქვენს ექიმს. ეს რეკომენდაცია ვრცელდება ნებისმიერ შესაძლო არასასურველ რეაქციაზე, მათ შორის იმათზე, რომლებიც არ არის ჩამოთვლილი აღნიშნულ ინსტრუქციაში. თქვენ ასევე შეგიძლიათ შეატყობინება არასასურველი რეაქციების შესახებ გააკეთოთ პირდაპირ ეროვნული რეპორტინგის სისტემის საშუალებით. არასასურველი რეაქციების შეტყობინებით, თქვენ პრეპარატის უსაფრთხოების შესახებ მეტი ინფორმაციის მიღებაში ეხმარებით.

5. რიგევიდონის შენახვის პირობები

ინახება არაუმეტეს 25°Cტემპერატურაზე.

შეინახეთ პრეპარატი ბავშვებისთვის მიუწვდომელ ადგილას.

არ გამოიყენოთ რიგევიდონის გარსით დაფარული ტაბლეტები შეფუთვაზე მითითებული ვარგისიანობის ვადის გასვლის შემდეგ.

6. აფთიაქიდან გაცემის პირობები

ფარმაცევტული პროდუქტის ჯგუფი II, გაიცემა ფორმა №3 რეცეპტით. 

7. დამატებითი ინფორმაცია

რიგევიდონის გარსით დაფარული ტაბლეტების შემადგენლობა

აქტიური ინგრედიენტები: 

ლევონორგესტრელი 0,15 მგ და ეთინილესტრადიოლი 0,03 მგ თითოეულ გარსით დაფარულ ტაბლეტში.

დამხმარე ნივთიერებები:

ტაბლეტის ბირთვი: უწყლო კოლოიდური სილიციუმის დიოქსიდი, მაგნიუმის სტეარატი, ტალკი, სიმინდის სახამებელი, ლაქტოზას მონოჰიდრატი.

გარსი: ნატრიუმის კარმელოზა, პოვიდონი K-30, უწყლო კოლოიდური სილიციუმის დიოქსიდი, მაკროგოლი 6000, კოპოვიდონი, ტიტანის დიოქსიდი (E171), კალციუმის კარბონატი, ტალკი, საქაროზა.

პრეპარატ რიგევიდონ გარსით დაფარული ტაბლეტების აღწერა

თეთრი მრგვალი ორმხრივამოზნექილი გარსით დაფარული ტაბლეტები.

შეფუთვის შიგთავსი

21 გარსით დაფარული ტაბლეტი პვქ/პვდქ ბლისტერში და ალუმინის ფოლგაში.

1 ან 3 ბლისტერი მუყაოს კოლოფში გამოყენების ინსტრუქციასთან ერთად. მუყაოს ყუთი შეიცავს მუყაოს ბრტყელ ფუტლიარს ბლისტერის შესანახად.