Dutasterida Tamsulosina - დუტასტერიდ ტამსულოზინი 30 კაფსულა

დუტასტერიდი/ტამსულოზინი სტადაფარმა

0.5 მგ/0.4 მგ მყარი კაფსულები EFG

დუტასტერიდი/ტამსულოზინის ჰიდროქლორიდი

ყურადღებით წაიკითხეთ მთელი ანოტაცია, სანამ დაიწყებთ ამ პრეპარატის მიღებას, რადგან ის შეიცავს თქვენთვის მნიშვნელოვან ინფორმაციას.

- შეინახეთ ანოტაცია, რადგან შეიძლება დაგჭირდეთ მისი ხელახლა წაკითხვა.

- თუ გაქვთ რაიმე შეკითხვა, მიმართეთ თქვენს ექიმს ან ფარმაცევტს.

- ეს მედიკამენტი გამოწერილია მხოლოდ თქვენთვის და არ უნდა გადასცეთ ის სხვა ადამიანებს მაშინაც კი, თუ მათ იგივე სიმპტომები აქვთ, რაც თქვენ, რადგან ამან შეიძლება ზიანი მიაყენოს მათ.

- თუ გაქვთ რაიმე გვერდითი მოვლენა, მიმართეთ თქვენს ექიმს ან ფარმაცევტს, მათ შორის იმ გვერდითი მოვლენების ჩათვლით, რომლებიც არ არის ჩამოთვლილი წინამდებარე ანოტაციაში. იხილეთ ნაწილი 4.

ანოტაციის შინაარსი

1. რა არის დუტასტერიდი/ტამსულოზინი სტადაფარმა და რისთვის გამოიყენება.

2. რა უნდა იცოდეთ დუტასტერიდი/ტამსულოზინი სტადაფარმას მიღებამდე

3. როგორ მივიღოთ დუტასტერიდი/ტამსულოზინი სტადაფარმა

4. შესაძლო გვერდითი მოვლენები

5. დუტასტერიდი/ტამსულოზინი სტადაფარმას შენახვა

6. კონტეინერის შიგთავსი და დამატებითი ინფორმაცია

1. რა არის დუტასტერიდი/ტამსულოზინი სტადაფარმა და რისთვის გამოიყენება

დუტასტერიდი/ტამსულოზინი გამოიყენება მამაკაცებში გადიდებული პროსტატის სამკურნალოდ (კეთილთვისებიანი პროსტატის ჰიპერპლაზია) - ეს არის პროსტატის არასიმსივნური ზრდა, რაც გამოწვეულია ჰორმონის დიჰიდროტესტოსტერონის ჭარბი გამომუშავებით.

დუტასტერიდი/ტამსულოზინი სტადაფარმა არის ორი განსხვავებული მედიკამენტის კომბინაცია, სახელწოდებით დუტასტერიდი და ტამსულოზინი.

დუტასტერიდი მიეკუთვნება მედიკამენტების ჯგუფს, რომელსაც ეწოდება 5-ალფა რედუქტაზას ინჰიბიტორები, ხოლო ტამსულოზინი მიეკუთვნება მედიკამენტების ჯგუფს, რომელსაც ეწოდება ალფა-ბლოკატორები.

პროსტატის გადიდებამ შეიძლება გამოიწვიოს შარდვის პრობლემები, როგორიცაა შარდის გადინების გაძნელება და შარდვის საჭიროების გახშირება. მას ასევე შეუძლია გამოიწვიოს შარდის  უფრო მცირე და ნაკლებად ძლიერი ნაკადის წარმოქმნა. თუ არ განიხილება პროსტატის კეთილთვისებიანი ჰიპერპლაზია, არსებობს შარდის დინების სრული დაბლოკვის რისკი (შარდის მწვავე შეკავება). აღნიშნული მოითხოვს სასწრაფო სამედიცინო მკურნალობას. ზოგიერთ შემთხვევაში, შეიძლება საჭირო გახდეს ოპერაცია პროსტატის ზომის შესამცირებლად ან მის მოსაშორებლად.

დუტასტერიდი განაპირობებს დიჰიდროტესტოსტერონის წარმოქმნის შემცირებას, რაც ხელს უწყობს პროსტატის ზომის შემცირებას და სიმპტომების შემსუბუქებას. ეს შეამცირებს შარდის მწვავე შეკავების რისკს და ოპერაციის საჭიროებას. ტამსულოზინი მოქმედებს პროსტატის კუნთების მოდუნების გზით, აადვილებს შარდვას და სწრაფად აუმჯობესებს სიმპტომებს.

2. რა უნდა იცოდეთ დუტასტერიდი/ტამსულოზინი სტადაფარმას მიღებამდე

არ მიიღოთ დუტასტერიდი/ტამსულოზინი სტადაფარმა

- თუ ხართ ქალი  (რადგან ეს მედიკამენტი განკუთვნილია მხოლოდ მამაკაცებისთვის).

- თუ ხართ 18 წლამდე ასაკის ბავშვი ან მოზარდი.

-თუ ხართ ალერგიული  დუტასტერიდის, 5-ალფა რედუქტაზას ფერმენტის სხვა ინჰიბიტორების, ტამსულოზინის, სოიოს, არაქისის ან ამ მედიკამენტის შემადგენელი  რომელიმე სხვა კომპონენტის მიმართ (ჩამოთვლილი მე-6 ნაწილში).

- თუ გაქვთ დაბალი არტერიული წნევა, რაც იწვევს თავბრუსხვევას, გაბრუებას ან სისუსტეს (ორთოსტატული ჰიპოტენზია).

- თუ გაწუხებთ ღვიძლის მძიმე დაავადება.

  თუ ფიქრობთ, რომ რომელიმე ზემოთ ჩამოთვლილი თქვენ გეხებათ, არ მიიღოთ  მედიკამენტი, სანამ არ განიხილავთ ამ საკითხს ექიმთან ერთად.

გაფრთხილებები და სიფრთხილის ზომები

დუტასტერიდი/ტამსულოზინი სტადაფარმას მიღებამდე გაიარეთ კონსულტაცია ექიმთან:

- ზოგიერთ კლინიკურ კვლევაში, უფრო მეტ პაციენტს, რომლებიც იღებდნენ დუტასტერიდს და სხვა წამალს, როგორიცაა ალფა-ბლოკატორი, კერძოდ, ტამსულოზინი, განუვითარდა გულის უკმარისობა იმ პაციენტებთან შედარებით, რომლებიც იღებდნენ მარტო დუტასტერიდს ან ალფა-ბლოკატორს. გულის უკმარისობა ნიშნავს, რომ თქვენი გული არ ტუმბავს სისხლს ისე, როგორც საჭიროა.

- დარწმუნდით, რომ ექიმმა იცის, გაქვთ თუ არა ღვიძლის პრობლემები. თუ გაქვთ რაიმე დაავადება, რომელიც აზიანებს ღვიძლს, შეიძლება დაგჭირდეთ დამატებითი გამოკვლევები დუტასტერიდით/ტამსულოზინით მკურნალობის დროს.

- დარწმუნდით, რომ ექიმმა იცის, გაქვთ თუ არა თირკმელების სერიოზული პრობლემები.

- კატარაქტის ოპერაცია (გაუმჭვირვალე ლინზა). თუ თქვენ აპირებთ კატარაქტის ოპერაციის გაკეთებას, ექიმმა შეიძლება მოგთხოვოთ დუტასტერიდის/ტამსულოზინის მიღების შეწყვეტა ოპერაციამდე გარკვეული ხნით ადრე. ოპერაციის დაწყებამდე აცნობეთ თქვენს ოფთალმოლოგს, რომ იღებთ (ან ადრე მიიღეთ) დუტასტერიდი/ტამსულოზინი ან ტამსულოზინი. თქვენმა ექიმმა უნდა მიიღოს შესაბამისი ზომები ოპერაციის დროს გართულებების თავიდან ასაცილებლად.

- ქალებმა, ბავშვებმა და მოზარდებმა თავი უნდა აარიდონ გატეხილ დუტასტერიდის/ტამსულოზინის კაფსულებთან კონტაქტს, რადგან აქტიური ნივთიერება შეიძლება შეიწოვოს კანში. კანთან კონტაქტის შემთხვევაში, დაზიანებული ადგილი დაუყოვნებლივ უნდა დაიბანოთ საპნით და წყლით.

გამოიყენეთ პრეზერვატივი სექსუალური ურთიერთობების დროს. დუტასტერიდი აღმოჩენილია მამაკაცების სპერმაში, რომლებიც იღებენ დუტასტერიდს/ტამსულოსინს. თუ თქვენი პარტნიორი ორსულადაა ან ფიქრობს, რომ შეიძლება ორსულად იყოს, თავიდან უნდა აიცილოს სპერმის ზემოქმედება, რადგან დუტასტერიდმა შეიძლება გავლენა მოახდინოს მამრობითი სქესის ბავშვის ნორმალურ განვითარებაზე. დუტასტერიდი იწვევს სპერმის რაოდენობის, სპერმის მოძრაობისა და სპერმის მოცულობის შემცირებას, რამაც შეიძლება შეამციროს თქვენი ნაყოფიერება.

- დუტასტერიდი/ტამსულოზინი მოქმედებს შრატის PSA (პროსტატის სპეციფიკური ანტიგენი) ტესტზე, რომელიც ზოგჯერ გამოიყენება პროსტატის კიბოს სკრინინგისთვის. თქვენს ექიმს მაინც შეუძლია გამოიყენოს ეს ტესტი პროსტატის კიბოს სკრინინგისთვის, თუმცა, თქვენ უნდა იცოდეთ ეს ეფექტი. თუ თქვენ იკეთებთ სისხლის ანალიზს PSA-ს დასადგენად, აცნობეთ ექიმს, რომ იღებთ დუტასტერიდს/ტამსულოზინს. მამაკაცებში, რომლებიც იღებენ დუტასტერიდს/ტამსულოზინს, რეგულარულად უნდა შემოწმდეს PSA.

- პროსტატის კიბოს გაზრდილი რისკის მქონე მამაკაცებში ჩატარებულ კლინიკურ კვლევაში, მამაკაცებს, რომლებიც იღებდნენ დუტასტერიდს, უფრო ხშირად უვითარდებოდათ პროსტატის კიბოს სერიოზული ტიპი, ვიდრე მამაკაცებს, რომლებიც არ იღებდნენ დუტასტერიდს. დუტასტერიდის ეფექტი პროსტატის კიბოს ამ მწვავე ტიპზე დადგენილი არ არის.

- დუტასტერიდმა/ტამსულოზინმა შეიძლება გამოიწვიოს მკერდის გადიდება და ტკივილი პალპაციისას. თუ ეს იწვევს დისკომფორტს, ან თუ შეამჩნევთ მკერდის სიმსივნეებს ან ძუძუდან გამონადენს, მიმართეთ ექიმს, რადგან ეს ცვლილებები შეიძლება იყოს ისეთი სერიოზული დაავადების ნიშანი, როგორიცაა ძუძუს კიბო.

მიმართეთ თქვენს ექიმს ან ფარმაცევტს, თუ გაქვთ რაიმე შეკითხვა დუტასტერიდის/ტამსულოზინის მიღებასთან დაკავშირებით.

სხვა მედიკამენტები და დუტასტერიდი/ტამსულოზინი სტადაფარმა

აცნობეთ თქვენს ექიმს ან ფარმაცევტს, თუ იღებთ, ცოტა ხნის წინ მიიღეთ ან შესაძლოა მიიღოთ სხვა მედიკამენტები.

არ მიიღოთ დუტასტერიდი/ტამსულოზინი ამ მედიკამენტებთან ერთად:

- სხვა ალფა ბლოკატორები (გადიდებული პროსტატის ან მაღალი წნევის დროს)

არ არის რეკომენდებული დუტასტერიდის/ტამსულოზინის მიღება ამ მედიკამენტებთან ერთად:

- კეტოკონაზოლი (გამოიყენება სოკოვანი ინფექციების სამკურნალოდ)

გარკვეული მედიკამენტები, რომლებსაც შეუძლიათ ურთიერთქმედება დუტასტერიდთან/ტამსულოზინთან, ან რამაც შეიძლება გამოიწვიოს გვერდითი მოვლენები. ამ მედიკამენტებიდან ზოგიერთია:

- PDE5 ფერმენტის ინჰიბიტორები (გამოიყენება ერექციის მისაღწევად ან შესანარჩუნებლად), როგორიცაა ვარდენაფილი, სილდენაფილის ციტრატი და ტადალაფილი

- ვერაპამილი ან დილთიაზემი (მაღალი წნევის დროს)

- რიტონავირი ან ინდინავირი (შიდსისთვის)

- იტრაკონაზოლი ან კეტოკონაზოლი (სოკოვანი ინფექციების დროს)

- ნეფაზოდონი (ანტიდეპრესანტი)

- ციმეტიდინი (კუჭის წყლულის დროს)

- ვარფარინი (სისხლის შედედების მიზნით)

- ერითრომიცინი (ანტიბიოტიკი, რომელიც გამოიყენება ინფექციების სამკურნალოდ)

- პაროქსეტინი (ანტიდეპრესანტი)

- ტერბინაფინი (გამოიყენება სოკოვანი ინფექციების სამკურნალოდ)

 - დიკლოფენაკი (გამოიყენება ტკივილის გასაყუჩებლად ან ანთების დროს)

 აცნობეთ თქვენს ექიმს, თუ იღებთ რომელიმე ამ მედიკამენტს.

სხვა მედიკამენტები და დუტასტერიდი/ტამსულოზინი სტადაფარმა 

თქვენ უნდა მიიღოთ დუტასტერიდი/ტამსულოზინი 30 წუთის შემდეგ ერთი და იგივე  ჭამიდან ყოველდღე.

ორსულობა, ლაქტაცია და ნაყოფიერება

ქალებმა არ უნდა მიიღონ დუტასტერიდი/ტამსულოზინი.

ქალები, რომლებიც არიან (ან შეიძლება გახდნენ) ორსულად, უნდა მოერიდონ კონტაქტს გატეხილ კაფსულებთან. დუტასტერიდი შეიწოვება კანში და ამან შეიძლება გავლენა იქონიოს მამრობითი სქესის ბავშვის ნორმალურ განვითარებაზე. აღნიშნული რისკი განსაკუთრებით მნიშვნელოვანია ორსულობის პირველ 16 კვირაში.

გაიარეთ კონსულტაცია ექიმთან, თუ ორსულ ქალს ჰქონდა კონტაქტი დუტასტერიდთან/ტამსულოზინთან.

გამოიყენეთ პრეზერვატივი სექსუალური ურთიერთობების დროს. დუტასტერიდი აღმოჩენილია მამაკაცების სპერმაში, რომლებიც იღებენ დუტასტერიდს/ტამსულოზინს. თუ თქვენი პარტნიორი ორსულად არის ან ფიქრობს, რომ შეიძლება იყოს,  თავიდან უნდა აიცილოს  თქვენი სპერმის ზემოქმედება.

დადგენილია, რომ დუტასტერიდი/ტამსულოზინი ამცირებს სპერმის რაოდენობას, სპერმის მოძრაობას და სპერმის მოცულობას. ამან შეიძლება შეამციროს თქვენი ნაყოფიერება.

ავტომობილის  მართვა და მექანიზმების გამოყენება

ზოგიერთ ადამიანს შეიძლება განუვითარდეს თავბრუსხვევა დუტასტერიდით/ტამსულოზინით მკურნალობის დროს, რამაც შეიძლება გავლენა მოახდინოს ავტომობილის მართვის ან მექანიზმების უსაფრთხოდ გამოყენების უნარზე.

ნუ მართავთ მანქანას და არ გამოიყენოთ მექანიზმები, თუ თქვენ გაქვთ ასეთი ზემოქმედება.

დუტასტერიდი/ტამსულოზინი სტადაფარმა შეიცავს ნარინჯისფერ ყვითელ S-ს (E110) და სოიოს ლეციტინს

მედიკამენტმა შეიძლება გამოიწვიოს ალერგიული რეაქციები, რადგან ის შეიცავს ნარინჯისფერ ყვითელ S-ს. შეუძლია გამოიწვიოს ასთმა, განსაკუთრებით ასპირინის მიმართ ალერგიული პაციენტებში.

მედიკამენტი შეიცავს სოიოს ლეციტინს. არ გამოიყენოთ იგი, თუ ალერგიული ხართ არაქისის ან სოიოს მიმართ.

მედიკამენტი შეიცავს 1 მმოლ-ზე ნაკლებ ნატრიუმს (23 მგ) თითო კაფსულაში; ანუ, არსებითად იგი არის „ნატრიუმისგან თავისუფალი“.

3. როგორ მივიღოთ დუტასტერიდი/ტამსულოზინი სტადაფარმა

ზუსტად დაიცავით თქვენი ექიმის ან ფარმაცევტის მიერ მოცემული მედიკამენტის მიღების ინსტრუქცია. თუ რეგულარულად არ იღებთ დუტასტერიდს/ტამსულოზინს, ამან შეიძლება გავლენა მოქხდინოს თქვენი PSA დონის კონტროლზე. თუ ეჭვი გეპარებათ, კვლავ მიმართეთ თქვენს ექიმს ან ფარმაცევტს.

რა დოზა უნდა მიიღოთ

რეკომენდებული დოზაა ერთი კაფსულა დღეში ერთხელ, ჭამიდან 30 წუთის შემდეგ ყოველდღე.

როგორ მივიღოთ

კაფსულები უნდა გადაიყლაპოს მთლიანად, წყლის მიყოლებით. არ დაღეჭოთ და არ გახსნათ კაფსულები. კაფსულების შიგთავსთან კონტაქტმა შეიძლება გაგიღიზიანოთ პირი ან ყელი.

თუ იღებთ იმაზე მეტ დუტასტერიდ/ტამსულოზინ სტადაფარმას, ვიდრე საჭიროა, დოზის გადაჭარბების ან შემთხვევითი მიღების შემთხვევაში, დაუყოვნებლივ მიმართეთ ექიმს ან ფარმაცევტს 

თუ დაგავიწყდათ დუტასტერიდი/ტამსულოზინი სტადაფარმას მიღება

არ მიიღოთ ორმაგი დოზა გამოტოვებული დოზის ასანაზღაურებლად.

მიიღეთ შემდეგი დოზა ჩვეულებრივ დროს.

არ შეწყვიტოთ დუტასტერიდი/ტამსულოზინი სტადაფარმათი მკურნალობა რჩევის გარეშე

არ შეწყვიტოთ დუტასტერიდი/ტამსულოზინის მიღება ექიმთან წინასწარი კონსულტაციის გარეშე.

თუ  გაქვთ დამატებითი შეკითხვები ამ მედიკამენტის გამოყენებასთან დაკავშირებით, მიმართეთ თქვენს ექიმს ან ფარმაცევტს.

4. შესაძლო გვერდითი მოვლენები

ყველა მედიკამენტის მსგავსად, ამ მედიკამენტსაც შეუძლია გამოიწვიოს გვერდითი მოვლენები, თუმცა, ისინი ყველას არ უვითარდება.

ალერგიული რეაქცია

ალერგიული რეაქციის სიმპტომები შეიძლება შეიცავდეს:

- კანის გამონაყარს (შეიძლება იყოს ქავილი)

- ჭინჭრის ციებას (ურტიკარია)

- ქუთუთოების, სახის, ტუჩების, ხელების ან ფეხების შეშუპებას

დაუყონებლივ მიმართეთ ექიმს, თუ აღმოგაჩნდათ რომელიმე ზემოთ ჩამოთვლილი სიმპტომი და შეწყვიტეთ დუტასტერიდის/ტამსულოზინის მიღება.

თავბრუსხვევა, გაბრუება და სისუსტე

დუტასტერიდმა/ტამსულოზინმა შეიძლება გამოიწვიოს თავბრუსხვევა, გაბრუება და იშვიათად, სისუსტე. ფრთხილად უნდა იყოთ მჯდომიარე ან მწოლიარე პოზიციიდან სწრაფად ადგომისას, განსაკუთრებით თუ ღამით ადგომა გიწევთ, სანამ არ გაიგებთ, როგორ მოქმედებს ეს მედიკამენტი თქვენზე. თუ მკურნალობის დროს იგრძნობთ თავბრუსხვევას ან გაბრუებას, დაჯექით ან დაწექით, სანამ ეს სიმპტომები არ გაქრება.

კანის მწვავე რეაქციები

კანის მწვავე რეაქციების ნიშნები შეიძლება შეიცავდეს:

- ფართოდ გავრცელებულ გამონაყარს ბუშტუკებით და კანის აქერცვლას, განსაკუთრებით პირის ღრუს, ცხვირის, თვალების და სასქესო ორგანოების ირგვლივ (სტივენს-ჯონსონის სინდრომი).

დაუყოვნებლივ მიმართეთ ექიმს, თუ გაქვთ ეს სიმპტომები და შეწყვიტეთ დუტასტერიდის/ტამსულოზინის გამოყენება.

ხშირი გვერდითი მოვლენები (შეიძლება განვითარდეს 10-დან 1 ადამიანში)

- იმპოტენცია (ერექციის მიღწევის ან შენარჩუნების უუნარობა)*

- დაქვეითებული სექსუალური ლტოლვა (ლიბიდო)*

- ეაკულაციის გაძნელება, როგორიცაა სქესობრივი აქტის დროს გამოყოფილი სპერმის რაოდენობის შემცირება*

- მკერდის გადიდება და ტკივილი პალპაციით

- თავბრუსხვევა

* ადამიანთა მცირე რაოდენობაში, ზოგიერთი გვერდითი მოვლენა შეიძლება გაგრძელდეს დუტასტერიდის/ტამსულოზინის მიღების შეწყვეტის შემდეგ.

იშვიათი გვერდითი მოვლენები (შეიძლება განვითარდეს 100-დან 1-მდე ადამიანში)

- გულის უკმარისობა (გული ხდება ნაკლებად ეფექტური სხეულში სისხლის გადატუმბვის თალსაზრისით. ამან შეიძლება გამოიწვიოს ისეთი სიმპტომები, როგორიცაა ქოშინი, ზედმეტი დაღლილობა და შეშუპება ტერფებსა და ფეხებში)

- არტერიული წნევის დაქვეითება ადგომისას

- ნორმალურზე სწრაფი გულისცემა (პალპიტაცია)

- ყაბზობა, დიარეა, ღებინება, ავადმყოფობის შეგრძნება (გულისრევა)

- სისუსტე ან ძალის დაკარგვა

- თავის ტკივილი

- ცხვირის ქავილი, გაჭედვა ან სურდო (რინიტი)

- გამონაყარი კანზე, ჭინჭრის ციება, ქავილი

- თმის ცვენა (ძირითადად, სხეულიდან) ან თმის ზრდა.

იშვიათი გვერდითი მოვლენები (შეიძლება განვითარდეს 1000-დან 1-მდე ადამიანში)

- ქუთუთოების, სახის, ტუჩების, ხელების ან ფეხების შეშუპება (ანგიოედემა)

- გონების დაკარგვა.

ძალიან იშვიათი გვერდითი მოვლენები (შეიძლება განვითარდეს 10000-დან 1-მდე ადამიანში)

- პენისის გახანგრძლივებული და მტკივნეული ერექცია (პრიაპიზმი)

- კანის მძიმე რეაქციები (სტივენს-ჯონსონის სინდრომი)

სხვა გვერდითი მოვლენები

სხვა გვერდითი მოვლენები აღინიშნებოდა მცირე რაოდენობით პაციენტებში, მაგრამ მათი ზუსტი სიხშირე უცნობია (სიხშირე არ შეიძლება შეფასდეს არსებული მონაცემებით):

- არანორმალური ან სწრაფი გულისცემა (არითმია ან ტაქიკარდია ან წინაგულების ფიბრილაცია)

- ქოშინი (დისპნოე)

- დეპრესია

- ტკივილი და შეშუპება სათესლე ჯირკვლებში

- ცხვირიდან სისხლდენა

- ძლიერი გამონაყარი კანზე

- მხედველობის ცვლილებები (მხედველობის დაბინდვა ან მხედველობის პრობლემები)

-    პირის სიმშრალე

არასასურველი ეფექტების შეტყობინება

თუ თქვენ გაქვთ რაიმე გვერდითი მოვლენა, მიმართეთ თქვენს ექიმს ან ფარმაცევტს, მათ შორის შესაძლო გვერდითი მოვლენების ჩათვლით, რომლებიც არ არის ჩამოთვლილი ამ ინსტრუქციაში. 

5. დუტასტერიდი/ტამსულოზინი სტადაფარმას შენახვა

მედიკამენტი შეინახეთ  ბავშვებისთვის მიუწვდომელ ადგილას.

არ გამოიყენოთ ეს წამალი ვარგისიანობის ვადის გასვლის შემდეგ, რომელიც მითითებულია კონტეინერზე, ბოთლზე ან ბლისტერზე. ვარგისიანობის ვადა არის მითითებული თვის ბოლო დღე.

მაღალი სიმკვრივის პოლიეთილენის (HDPE) ბოთლებისთვის, პირველი გახსნის შემდეგ, არ გამოიყენოთ 30 კაფსულიანი ბოთლები 6 კვირაზე მეტი ხნის განმავლობაში და 90 კაფსულიანი ბოთლები 18 კვირაზე მეტი ხნის განმავლობაში.

არ შეინახოთ იგი 30 C°-ზე მაღალ ტემპერატურაზე.

მედიკამენტები არ უნდა გადააგდოთ კანალიზაციაში ან ნაგავში. შეიტანეთ კონტეინერები და მედიკამენტები, რომლებიც არ გჭირდებათ აფთიაქის სპეციალურ კუთხეში, Point SIGRE-ში. თუ ეჭვი გეპარებათ, ჰკითხეთ თქვენს ფარმაცევტს, როგორ გადააგდოთ კონტეინერები და მედიკამენტები, რომლებიც არ გჭირდებათ. ამ გზით თქვენ დაეხმარებით გარემოს დაცვას.

6. შეფუთვის შემადგენლობა და სხვა ინფორმაცია

დუტასტერიდი/ტამსულოზინი სტადაფარმას შემადგენლობა

- აქტიური ნივთიერებებია დუტასტერიდი და ტამსულოზინის ჰიდროქლორიდი. თითოეული კაფსულა შეიცავს 0,5 მგ დუტასტერიდს და 0,4 მგ ტამსულოზინის ჰიდროქლორიდს.

- სხვა კომპონენტებია (დამხმარე ნივთიერებები):

- მყარი კაფსულის გარსი: ჰიპრომელოზა, კარაგენანი (E407), კალიუმის ქლორიდი, ტიტანის დიოქსიდი (E171), რკინის ოქსიდი წითელი (E172), ნარინჯისფერი ყვითელი S (E110).

- მყარი კაფსულის შიგნით: გლიცერილის მონოკაპრილოკაპრატი და ბუტილჰიდროქსიტოლუენი (E321), ჟელატინი, გლიცეროლი, ტიტანის დიოქსიდი (E171), რკინის ყვითელი ოქსიდი (E172), ტრიგლიცერიდები (საშუალო ჯაჭვი), ლეციტინი ლეციტინი (შეიძლება შეიცავდეს სოიოს ზეთს) (E322), მიკროკრისტალური ცელულოზა, მეთილაკრილის მჟავისა და ეთილის აკრილატის კოპოლიმერი (1:1) დისპერსია 30%, მეთილაკრილის მჟავა და ეთილის აკრილატის კოპოლიმერი (1:1), მაგნიუმის სტეარატი, ნატრიუმის ჰიდროქსიდი, ტრიაცეტინი, ტალკი, ტიტანის დიოქსიდი (E171).

პროდუქტის გარეგნობა და კონტეინერის შიგთავსი

მედიკამენტი გამოდის მყარი, წაგრძელებული კაფსულების სახით, დაახლოებით 24 მმ სიგრძით, ყავისფერი სხეულით და ნარინჯისფერი თავსახურით. 

ისინი ხელმისაწვდომია 7, 30 და 90 კაფსულის შეფუთვაში მაღალი სიმკვრივის პოლიეთილენის (HDPE) ბოთლებში ან ალუმინის/ალუმინის ბლისტერებში.

შეიძლება ყველა ზომის შეფუთვა არ იყოს გაყიდვაში.

გაცემის წესი:

ფარმაცევტული პროდუქტის ჯგუფი -  II , გაიცემა ფორმა №3 რეცეპტით