ASP 100 მგ ტაბლეტები

აცეტილსალიცილის მჟავა

მედიკამენტის გამოყენებამდე ყურადღებით გაეცანით გამოყენების ინსტრუქციას, რადგან ის შეიცავს თქვენთვის მნიშვნელოვან ინფორმაციას .

- შეინახეთ გამოყენების ინსტრუქცია, შესაძლოა კიდევ დაგჭირდეთ მისი წაკითხვა შემდგომში.

- დამატებითი კითხვების შემთხვევაში მიმართეთ ექიმს ან ფარმაცევტს.

- ეს პრეპარატი დაგენიშნათ თქვენ ინდივიდუალურად. ნუ გადასცემთ მას მესამე პირს. პრეპარატმა შესაძლოა ზიანი მიაყენოს მათ იმისდამიუხედავათ თუ თქვენი სიმპტომები მსგავსია.

- თუ აღგენიშნათ რომელიმე გვერდითი მოვლენა, მიმართეთ ექიმს ან ფარმაცევტს. იმ გვერდითი მოვლენების ჩათვლით რომელიც არ არის მითითებული ამ გამოყენების ინსტრუქციაში. იხლიეთ პარაგრაფი 4.

რას შეიცავს წინამდებარე გამოყენების ინსტრუქცია:
1. რა არის ASP 100 და რისთვის გამოიყენება ის.
2. რას უნდა მიაქციოთ ყურადღება ASP 100-ის მიღებამდე.
3. როგორ გამოიყენება ASP 100
4. მოსალოდნელი გვერდითი მოვლენები
5. როგორ შევინახოთ ASP 100

6. შეფუთვის შემცველობა და სხვა ინფორმაცია.

1. რა არის ASP 100 და რისთვის გამოიყენება ის

ASP 100 არის სამკურნალო პროდუქტი წარმოდგენილი ტაბლეტების სახით, პერორალური გამოყენებისთვის, თითოეული შეიცავს 100 მგ აცეტილსალიცილის მჟავას (აქტიურ ნივთიერებას).

დაბალი დოზებით გამოყენებისას, ASP 100-ის აქტიური ნივთიერება აცეტილსალიცილის მჟავა, თრგუნავს თრომბოციტების აგრეგაციას. ამიტომ, ეს აგენტი გამოიყენება იმ სიტუაციებში, როდესაც საჭიროა თრომბოემბოლიური შემთხვევების პრევენცია.

ASP 100 ნაჩვენებია ისეთი მდგომარეობისას, როდესაც საჭიროა თრომბოციტების აგრეგაციის დათრგუნვა, კერძოდ:

- არასტაბილური სტენოკარდიის მქონე პაციენტებში მიოკარდიუმის მწვავე ინფარქტის პროფილაქტიკა;

- მიოკარდიუმის მწვავე ინფარქტი;

- მიოკარდიუმის განმეორებითი ინფარქტის პრევენცია;

-ტრანზიტორული იშემიური შეტევების (TIA) და თრომბოზული ცერებროვასკულური შემთხვევების (CVA) პირველადი ან მეორადი პრევენცია;

- თრომბოემბოლიის პრევენცია სისხლძარღვთა ქირურგიის ან სხვა ქირურგიული პროცედურების შემდეგ.

ასევე, იხილეთ : ASPIRIN CARDIO - ასპირინი კარდიო 0.1გ 28 ტაბლეტი

2. რას უნდა მიაქციოთ ყურადღება ASP 100-ის მიღებამდე

არ მიიღოთ ASP 100 შემდეგ შემთხვევებში:

- თუ ხართ ალერგიული (ჰიპერმგრძნობიარე) აქტიური ნივთიერების, სხვა სალიცილატების ან ამ პრეპარატის რომელიმე სხვა ინგრედიენტის მიმართ (რაც მითითებულია მე-6 პარაგრაფში). ალერგიული რეაქციები ამ მედიკამენტზე შეიძლება მოიცავდეს სახის, ტუჩების ან ყელის შეშუპებას (ყლაპვის ან სუნთქვის გაძნელება);

- თუ გაქვთ კუჭ-ნაწლავიდან სისხლდენის ან პერფორაციის ანამნეზი, რომელიც დაკავშირებულია არასტეროიდული ანთების საწინააღმდეგო საშუალებებით (NSAIDs) წინა მკურნალობასთან, რომლებიც გამოიყენება ტკივილისა და ანთების სამკურნალოდ;

- თუ გაწუხებთ პეპტიური წყლული/აქტიური სისხლდენა ან გაქვთ მორეციდივე პეპტიური წყლულის/სისხლდენის ისტორია (დადასტურებული წყლულის ან სისხლდენის ორი ან მეტი განსხვავებული შემთხვევა), ან თუ გაქვთ სისხლდენისაკენ მიდრეკილება (ჰემორაგიული დიათეზი);

- ორსულობის ბოლო ტრიმესტრში, 100 მგ/დღეზე მაღალი დოზებით;

- ინფექციების სამკურნალოდ 12 წლამდე ასაკის ბავშვებში და მოზარდებში, ცხელებით ან მის გარეშე, პოტენციურად მძიმე დაავადების (რეიეს სინდრომი) გამოწვევის რისკის გათვალისწინებით;

- 3 წლამდე ასაკის ბავშვებში ნებისმიერი მდგომარეობისას.

გაფრთხილება და სიფრთხილის ზომები

ASP 100-ის მიღებამდე გაესაუბრეთ თქვენს ექიმს ან ფარმაცევტს.

ექიმი, რომელმაც დაგინიშნათ ASP 100, უნდა იცნობდეს თქვენს კლინიკურ ისტორიას და თქვენს მიმდინარე მდგომარეობას.

ASP 100-ის გამოყენება ტკივილისა და ანთების სამკურნალოდ გამოყენებულ სხვა პრეპარატებთან (არასტეროიდული ანთების საწინააღმდეგო საშუალებები) ერთად, მათ შორის შერჩევითი ციკლოოქსიგენაზა-2 ინჰიბიტორებთან, თავიდან უნდა იქნას აცილებული.

კუჭ-ნაწლავიდან სისხლდენა, წყლული და პერფორაციები: კუჭ-ნაწლავის ტრაქტიდან სისხლდენის, წყლულების და პერფორაციების პოტენციურად ფატალური შემთხვევები დაფიქსირდა ყველა არასტეროიდული ანთების საწინააღმდეგო საშუალების გამოყენებისას, მკურნალობის რამდენიმე ეტაპზე, გამაფრთხილებელი სიმპტომებით ან მის გარეშე ან კუჭ-ნაწლავის ტრაქტის მძიმე მოვლენების წინა ისტორიით.

სისხლდენის, წყლულების ან პერფორაციების რისკი უფრო მაღალია უფრო დიდი დოზების გამოყენებისას პაციენტებში, რომლებსაც ანამნეზში ჰქონდათ პეპტიური წყლულები, განსაკუთრებით თუ დაკავშირებულია სისხლდენასთან ან პერფორაციასთან და ხანდაზმულ პაციენტებში.

თუ თქვენ გაქვთ აბდომინალური სიმპტომები, ან თუ აღმოაჩენთ სისხლს ღებინებისას ან განავალში, მიმართეთ ექიმს.

ამ პაციენტებში მკურნალობა უნდა დაიწყოს ყველაზე დაბალი ეფექტური დოზით. ამ პაციენტებში უნდა განიხილებოდეს დამცავი საშუალებების (მაგ., მიზოპროსტოლი ან პროტონული ტუმბოს ინჰიბიტორები) ერთდროული გამოყენება, ისევე როგორც იმ პაციენტებში, რომლებიც ერთდროულად მკურნალობენ სხვა მედიკამენტებით, რომლებიც ზრდის წყლულების ან სისხლდენის რისკს, მაგალითად კორტიკოსტეროიდები, ანტიკოაგულანტები (როგორიცაა ვარფარინი), სეროტონინის უკუმიტაცების შერჩევითი ინჰიბიტორები და ანტითრომბოციტების აგენტები.

ASP 100-ით მკურნალობა უნდა შეწყდეს კუჭ-ნაწლავის სისხლდენის ან წყლულის შემთხვევაში.

არასტეროიდული ანთების საწინააღმდეგო საშუალებები სიფრთხილით უნდა დაინიშნოს ნაწლავის ანთებითი დაავადების ანამნეზით პაციენტებში (წყლულოვანი კოლიტი, კრონის დაავადება), რადგან ეს მდგომარეობები შეიძლება გამწვავდეს.

ხანდაზმული პაციენტები: არასტეროიდული ანთების საწინააღმდეგო საშუალებების გვერდითი რეაქციები უფრო ხშირად აღინიშნებოდა ხანდაზმულ პაციენტებში, განსაკუთრებით კუჭ-ნაწლავის სისხლდენა და პერფორაციები, რომლებიც შეიძლება იყოს ფატალური.

ASP 100 უნდა დაინიშნოს სიფრთხილით და მხოლოდ იმ შემთხვევაში, თუ მოსალოდნელი სარგებელი აღემატება პოტენციურ რისკებს, შემდეგ სიტუაციებში:

- ორსულობის პირველი და მეორე ტრიმესტრი;

- ძუძუთი კვება;

- ალერგია სხვა არასტეროიდულ ანთების საწინააღმდეგო საშუალებებზე;

- თრომბოციტების აგრეგაციის სხვა ინჰიბიტორებთან და/ან ანტიკოაგულანტებთან ერთდროული მკურნალობა;

- გლუკოზა-6-ფოსფატდეჰიდროგენაზას დეფიციტი;

- ჰიპოპროთრომბინემიის ანამნეზი;

- K ვიტამინის დეფიციტი;

- ღვიძლის მძიმე დაავადება;

- ქრონიკული ალკოჰოლიზმი (3 ან მეტი ალკოჰოლური სასმელი დღეში), ვინაიდან ამ პაციენტებს აქვთ კუჭ-ნაწლავის ტრაქტის ზედა ნაწილიდან სისხლდენის რისკი;

- თირკმელების მძიმე დაავადება;

- კუჭ-ნაწლავის დაავადების ისტორია;

- უკონტროლო ჰიპერტენზია;

- პროლიფერაციული დიაბეტური რეტინოპათია;

- ბრონქული ასთმა, ფილტვების ქრონიკული ობსტრუქციული დაავადება, თივისმიერი ცხელება და ცხვირის პოლიპები;

- ხანგრძლივი პერიოდები კლინიკური მონიტორინგის გარეშე.

რეიეს სინდრომის შესაძლებლობის გათვალისწინებით, აცეტილსალიცილის მჟავა უნდა დაინიშნოს 12 წელზე უმცროსი ასაკის ბავშვებში მხოლოდ ექიმის პირდაპირ მითითებით.

სხვა პრეპარატები და ASP 100

აცნობეთ თქვენს ექიმს ან ფარმაცევტს, თუ იღებთ, ბოლო პერიოდში გაქვთ მიღებული ან შესაძლოა მიიღოთ სხვა მედიკამენტები.

მკურნალობის შედეგებზე შესაძლოა გავლენა იქონიოს, თუ აცეტილსალიცილის მჟავა მიიღება სხვა სამკურნალო საშუალებებთან ერთად, რომლებიც გამოიყენება შემდეგი მდგომარეობების სამკურნალოდ:

- სისხლის კოაგულაცია (მაგ. ვარფარინი);

- სეროტონინის უკუმიტაცების შერჩევითი ინჰიბიტორები: იზრდება კუჭ-ნაწლავის ტრაქტიდან სისხლდენის რისკი;

- ტკივილი და ანთება (მაგ., სტეროიდები ან ანთების საწინააღმდეგო საშუალებები);

- კორტიკოსტეროიდები და ალკოჰოლური სასმელები: ASP 100-თან ერთდროულმა გამოყენებამ შეიძლება გაზარდოს კუჭ-ნაწლავიდან სისხლდენის ან წყლულის რისკი;

- დიაბეტი (მაგ. სულფონილშარდოვანას წარმოებულები);

- პოდაგრა (მაგ., პრობენეციდი);

- კიბო ან რევმატოიდული ართრიტი (მაგ. მეტოტრექსატი);

- ორგანოს მიუღებლობა ტრანსპლანტაციის შემდეგ (ციკლოსპორინი, ტაკროლიმუსი);

- სულფონილშარდოვანა;

- ვალპროის მჟავა (გამოიყენება ეპილეფსიის სამკურნალოდ);

- ინსულინი;

- ფენიტოინი;

- ტრიიოდთირონინი;

- პლაზმაში დიგოქსინის კონცენტრაციის (გამოიყენება გულის უკმარისობის სამკურნალოდ), ბარბიტურატების და ლითიუმის (გამოიყენება ფსიქიატრიული დარღვევების სამკურნალოდ) მომატება;

- დიურეტიკები, როგორიცაა ალდოსტერონის ანტაგონისტები ან მარყუჟოვანი დიურეტიკები, ანგიოტენზინ-გარდამქმნელი ფერმენტის ინჰიბიტორები (აგფ ინჰიბიტორები) და ანგიოტენზინ II რეცეპტორების ბლოკატორები (ARBs): აცეტილსალიცილის მჟავას მიღებამ (> 3 გ/დღეში) შეიძლება შეამციროს დირეზული საშუალებების, ისევე როგორც სხვა ანტიჰიპერტენზიული საშუალებების ეფექტურობა და შეიძლება გავლენა იქონიოს თირკმელების მუშაობაზე. ამიტომ, ეს კომბინაცია სიფრთხილით უნდა იქნას მიღებული, განსაკუთრებით ხანდაზმულ პაციენტებში. პაციენტებმა უნდა შეინარჩუნონ კარგი ჰიდრატაცია და თირკმლის ფუნქციის მონიტორინგის აუცილებლობა უნდა შეფასდეს კომბინირებული თერაპიის დაწყებიდან და რეგულარულად დაწყების შემდეგ;

- ASP 100-ის ერთდროული მიღება ამცირებს ურიკოზურული აგენტების (წამლები, რომლებიც ზრდის შარდმჟავას ექსკრეციას) და ალფა-ინტერფერონის ეფექტს;

- ალუმინის, ფოსფორის ან მაგნიუმის შემცველი მედიკამენტების ერთდროულმა გამოყენებამ, როგორიცაა ზოგიერთი ანტაციდი, შეიძლება შეამციროს ASP 100-ის ეფექტი.

მეტამიზოლმა (ტკივილისა და სიცხის დამწევი ნივთიერება) შეიძლება შეამციროს აცეტილსალიცილის მჟავას მოქმედება თრომბოციტების აგრეგაციაზე (სისხლის უჯრედების ერთმანეთთან შეწებება და თრომბის წარმოქმნა) ერთდროულად მიღებისას. ამიტომ, ეს კომბინაცია სიფრთხილით უნდა იქნას გამოყენებული პაციენტებში, რომლებიც იღებენ ასპირინს დაბალი დოზით, კარდიოპროტექციის მიზნით.

არ შეიძლება აცეტილსალიცილის მჟავას გამოყენება გრიპის ცოცხალი ვირუსის ვაქცინასთან ერთად.

პაციენტებს, რომლებსაც გაკეთებული აქვთ ჩუტყვავილას ვირუსის (ჩუტყვავილას) ვაქცინა, ურჩევენ არ მიიღონ აცეტილსალიცილის მჟავა ვაქცინაციიდან 6 კვირის განმავლობაში, რადგან ჩუტყვავილას ვირუსით ინფექციის შემდეგ დაფიქსირდა პოტენციურად მძიმე დაავადების შემთხვევები (რეიეს სინდრომი).

გთხოვთ, აცეტილსალიცილის მჟავას მიღებამდე აცნობეთ ექიმს, თუ იღებთ სხვა პრეპარატებს. თუ რეგულარულად იღებთ აცეტილსალიცილის მჟავას, გთხოვთ, მიმართოთ ექიმს სხვა მედიკამენტების მიღებამდე (მათ შორის, მედიკამენტები, რომლებიც არ ექვემდებარება რეცეპტით გაცემას).

ორსულობა და ძუძუთი კვება

თუ ხართ ორსულად ან ლაქტაციის პერიოდში, ფიქრობთ რომ შეიძლება იყოთ ორსულად ან გეგმავთ ბავშვის გაჩენას, რჩევისთვის მიმართეთ ექიმს ან ფარმაცევტს ამ პრეპარატის მიღებამდე.

ASP 100-ის აქტიური ნივთიერება აცეტილსალიცილის მჟავა აღწევს პლაცენტაში. კლინიკური კვლევების მონაცემებით, 100 მგ-მდე დღიური დოზების მიღება გარკვეულ სამეანო ჩვენებაში, რომელიც საჭიროებს სპეციალიზებულ სამედიცინო დახმარებას, აშკარად უსაფრთხოა.

როგორც პროსტაგლანდინების სინთეზის ინჰიბიტორი, აცეტილსალიცილის მჟავამ შეიძლება უარყოფითად იმოქმედოს ორსულობაზე და/ან ემბრიონის/ნაყოფის განვითარებაზე. ეპიდემიოლოგიური კვლევის მონაცემები მიუთითებს სპონტანური აბორტისა და გულ-სისხლძარღვთა მალფორმაციების გაზრდილ რისკზე, როდესაც პროსტაგლანდინების ინჰიბიტორები ინიშნება ორსულობის ადრეულ ეტაპებზე. ორსულობის მე-3 ტრიმესტრში ამ ნივთიერებების მიღებამ შესაძლოა ნაყოფში გამოავლინოს კარდიოპულმონური ტოქსიკურობისა და თირკმლის დისფუნქცია. ორსულობის ბოლო სტადიაზე დედასაც და ნაყოფსაც შეიძლება აღენიშნოს სისხლდენის დროის გახანგრძლივება, ანტითრომბოციტების ეფექტები და საშვილოსნოს შეკუმშვის დათრგუნვა, რამაც შეიძლება გამოიწვიოს მშობიარობის დაგვიანება ან გახანგრძლივება.

ამიტომ ASP 100-ის გამოყენება 100 მგ/დღეზე მაღალი დოზებით უკუნაჩვენებია ორსულობის მესამე ტრიმესტრში.

ASP 100 არ უნდა დაინიშნოს ორსულობის 1 და 2 ტრიმესტრში, თუ მოსალოდნელი სარგებელი არ აღემატება პოტენციურ რისკებს.

არ უნდა მიიღოთ ASP 100 ძუძუთი კვების დროს, თუ მოსალოდნელი სარგებელი არ აღემატება პოტენციურ რისკებს. თუმცა, ძუძუთი კვების შეწყვეტა არ არის საჭირო ერთჯერადი დოზის შემდეგ. რეგულარული გამოყენებისას ან მაღალი დოზების მიღების შემთხვევაში ძუძუთი კვება უნდა შეწყდეს.

ავტომობილის მართვა და მექანიზმების გამოყენება

აცეტილსალიცილის მჟავით მკურნალობის დროს სატრანსპორტო საშუალებების მართვის ან მექანიზმებთან მუშაობის უნარზე ზემოქმედება არ არის აღწერილი.

3. ASP 100-ის მიღების წესი

ყოველთვის მიიღეთ ეს პრეპარატი ზუსტად თქვენი ექიმის ან ფარმაცევტის დანიშნულებით. თუ არ ხართ დარწმუნებული, მიმართეთ თქვენს ექიმს ან ფარმაცევტს.

ASP 100 ტაბლეტი უნდა დაინიშნოს პერორალურად. ტაბლეტები უნდა იქნას მიღებული წყალთან ერთად.

რეკომენდებული დოზაა 1-დან 3-მდე ASP 100 ტაბლეტი დღეში (100-დან 300 მგ აცეტილსალიცილის მჟავა), კლინიკური მდგომარეობის მიხედვით.

გამოყენება ხანდაზმულ პაციენტებში:

ხანდაზმულ პაციენტებში დოზის კორექცია საჭირო არ არის.

გამოყენება ბავშვებში:

აცეტილსალიცილის მჟავა არ უნდა დაინიშნოს 3 წელზე უმცროსი ასაკის ბავშვებში ან ციებ-ცხელებით დაავადებულ ბავშვებსა და 12 წლამდე მოზარდებში, რეიეს სინდრომის შესაძლო განვითარების გამო.

გამოყენება თირკმლის უკმარისობის მქონე პაციენტებში

აცეტილსალიცილის მჟავას გამოყენება თავიდან უნდა იქნას აცილებული თირკმლის მძიმე უკმარისობის მქონე პაციენტებში (კრეატინინის კლირენსი < 10 მლ/წთ). ჰემოდიალიზზე მყოფ პაციენტებში აცეტილსალიცილის მჟავა უნდა დაინიშნოს ჰემოდიალიზის შემდეგ.

გამოყენება ღვიძლის ფუნქციის დარღვევის მქონე პაციენტებში

აცეტილსალიცილის მჟავას გამოყენება თავიდან უნდა იქნას აცილებული ღვიძლის მძიმე უკმარისობის მქონე პაციენტებში.

არასასურველი ეფექტების მინიმუმამდე შემცირება შესაძლებელია სიმპტომების კონტროლისთვის საჭირო უმოკლეს დროში ყველაზე დაბალი ეფექტური დოზის გამოყენებით.

თუ მიიღეთ საჭიროზე მეტი ASP 100.

ASP 100-ის გადაჭარბებული მიღების შემთხვევაში შეიძლება აღგენიშნოთ ღრმა და/ან სწრაფი სუნთქვა, გულისრევა, ღებინება, თავბრუსხვევა, ყურებში ხმაური, აჩქარებული გულისცემა, სიწითლე, ძილიანობა და წყურვილი. დოზის გადაჭარბებამ შეიძლება გამოიწვიოს ცხელება, აგზნება, დეზორიენტაცია, კრუნჩხვები, კომა, სუნთქვის მწვავე უკმარისობა, ჰიპოგლიკემია და სისხლდენა. ქრონიკული ჭარბი დოზირება (სალიცილიზმი) არსებითად ვლინდება ნერვული სისტემის დარღვევებით, რაც უპირატესად მოქმედებს ცენტრალურ ნერვულ სისტემაზე.

ASP 100-ის დოზის გადაჭარბების შემთხვევაში დაუყოვნებლივ მიმართეთ ექიმს.

თუ დაგავიწყდათASP 100-ის მიღება

განაახლეთ მკურნალობა ჩვეულებისამებრ, მიიღეთ შემდეგი ტაბლეტი ჩვეულ დროს.

არ მიიღოთ ორმაგი დოზა გამოტოვებული დოზის კომპენსირების მიზნით. თუმცა, გახსოვდეთ, რომ თქვენი მედიკამენტების რეგულარული მიღება წარმატებული მკურნალობის აუცილებელი ფაქტორია.

თუ თქვენ გაქვთ დამატებითი შეკითხვები ამ მედიკამენტის გამოყენებასთან დაკავშირებით, მიმართეთ თქვენს ექიმს ან ფარმაცევტს.

4. მოსალოდნელი გვერდითი მოვლენები

ყველა მედიკამენტის მსგავსად, ამ პრეპარატმაც შესაძლოა გამოიწვიოს გვერდითი მოვლენები, თუმცა ისინი ყველას არ უვითარდება.

ყველაზე ხშირად გამოვლენილი გვერდითი მოვლენები არის კუჭ-ნაწლავის მხრივი მოვლენები. შესაძლოა ადგილი ჰქონდეს პეპტიური წყლულის, კუჭ-ნაწლავის ტრაქტიდან სისხლდენის ან პერფორაციის პოტენციურად ფატალური შემთხვევებს, განსაკუთრებით ხანდაზმულ პაციენტებში. ამ მედიკამენტების მიღების შემდეგ დაფიქსირდა გულისრევის, დისპეფსიის, ღებინების, ჰემატემეზის, მეტეორიზმის, მუცლის ტკივილის, დიარეის, ყაბზობის, მელენას, აფთოზური სტომატიტის, კოლიტის გამწვავების და კრონის დაავადების შემთხვევები. გასტრიტის შემთხვევები დაფიქსირდა ნაკლებად ხშირად.

არასასურველი ეფექტები სიხშირის თითოეული კლასისთვის ჩამოთვლილია ქვემოთ, სიმძიმის შემცირების თანმიმდევრობით.

სისხლისა და ლიმფური სისტემის მხრივი დარღვევები:

იშვიათი (> 1/10,000-დან < 1/1,000-მდე): რკინა დეფიციტური ანემია (განსაკუთრებით ხანდაზმულ პაციენტებში), სისხლდენის დროის გაზრდა. ძალიან იშვიათი (< 1/10,000): ჰემოლიზური ანემია, რომელიც დაკავშირებულია გლუკოზა-6-ფოსფატდეჰიდროგენაზას დეფიციტთან, პორფირია.

მეტაბოლიზმის და კვებითი დარღვევები:

ძალიან იშვიათი (< 1/10,000): ჰიპოგლიკემია.

ნერვული სისტემის მხრივი დარღვევები:

იშვიათი (> 1/10,000-დან < 1/1,000-მდე): თავბრუსხვევა, ყურებში ხმაური და სმენის დაკარგვა, ასოცირებულია დოზის გადაჭარბებასთან, განსაკუთრებით ხანდაზმულ პაციენტებში და ბავშვებში.

სისხლძარღვთა სისტემის მხრივი დარღვევები:

ძალიან იშვიათად (< 1/10,000): ინტრაცერებრული სისხლჩაქცევა და თვალშიდა სისხლჩაქცევა.

კუჭ-ნაწლავის სისტემის მხრივი დარღვევები:

ხშირი (> 1/100-დან < 1/10-მდე): გულისრევა, გულძმარვა, აბდომინალური დისტრესი, დიარეა, ღებინება და კუჭ-ნაწლავის ტრაქტიდან მსუბუქი სისხლდენა, რაც მხოლოდ გამონაკლის შემთხვევაში იწვევს ანემიას. იშვიათი (> 1/10,000-დან < 1/1,000-მდე): კუჭ-ნაწლავის წყლული, ზოგჯერ დაკავშირებული სისხლდენასთან (ჰემატემეზი და/ან მელენა) და/ან პერფორაციასთან. ძალიან იშვიათი (< 1/10,000): ღვიძლის ფერმენტების დონის ცვლილებები.

ჰეპატობილიარული დარღვევები:

ძალიან იშვიათი (< 1/10,000): ჰეპატიტი.

კანისა და კანქვეშა ქსოვილის დარღვევები:

იშვიათი (> 1/10,000-დან < 1/1,000): ალერგიული დერმატიტი.

თირკმელების და შარდის სისტემის დარღვევები:

ძალიან იშვიათი (< 1/10,000): თირკმლის ფუნქციის ცვლილებები.

ზოგადი დარღვევები და მდგომარეობები გამოყენების ადგილას:

იშვიათი (> 1/10,000-დან <1/1,000-მდე): ქოშინის შეტევები, ბრონქოსპაზმი, ვაზომოტორული რინიტი, ჭინჭრის ციება და ანგიონევროზული შეშუპება. ძალიან იშვიათი (< 1/10,000): ერითემა, გამონაყარი და პუსტულოზური გამონაყარი.

ანგარიში გვერდითი ეფექტების შესახებ

თუ აღგენიშნათ რომელიმე გვერდითი მოვლენა მიმართეთ ექიმს ან ფარმაცევტს. ეს მოიცავს ნებისმიერ შესაძლო გვერდით ეფექტებს, რაც არ არის მითითებული ამ გამოყენების ინსტრუქციაში. ასევე შეგიძლიათ გვერდიითი ეფექტების შესახებ განაცხადოთ პირდაპირ ეროვნული საანგარიში სისტემის მეშვეობით INFARMED I.P.-ში ქვემოთ მითითებული საკონტაქტო ინფორმაციის გამოყენებით. გვერდითი ეფექტების შესახებ განაცხადით თქვენ შეგიძლიათ ამ პრეპარატის უსაფრთხოების შესახებ მეტი ინფორმაციის მოწოდებაში დახმარება.

5. ASP 100-ის შენახვის პირობები

ინახება არაუმეტეს 25⁰C-ზე.

პრეპარატი შეინახეთ ბავშვებისათვის მიუწვდომელ ადგილას.

არ გამოიყენოთ პრეპარატი კოლოფზე მითითებული მოქმედების ვადის გასვლის შემდეგ „EXP“-ის შემდეგ. მოქმედების ვადა ეხება მითითებული თვის ბოლო დღეს.

არ გადააგდოთ პრეპარატები გამდინარე წყალში ან საყოფაცხოვრებო ნარჩენებში. ჰკითხეთ ფარმაცევტს როგორ გაანადგუროთ პრეპარატები რომელსაც აღარ იყენებთ. ეს ღონისძიებები დაგეხმარებათ გარემოს დაცვაში.

6. შეფუთვის შემცველობა და სხვა ინფორმაცია

რას შეიცავსASP 100

- აქტიური ნივთიერება არის აცეტილსალიცილის მჟავა.

- სხვა ინგრედიენტებს წარმოადგენს: მიკროკრისტალური ცელულოზა 112 და მანიტოლი.

გაცემის რეჟიმი:

ფარმაცევტული პროდუქტის ჯგუფი:III ჯგუფი, გაიცემა რეცეპტის გარეშე.

ASP 100-ისგარეგნული სახე და შეფუთვის შემცველობა.

ტაბლეტები არის თეთრი და მრგვალი.

ASP 100 ხელმისაწვდომია 10, 20, 30 და 60 ტაბლეტიან შეფუთვაში რომელიც მოთავსებულია ბლისტერებში.

შესაძლოა ყველა ზომის შეფუთვა არ იყოს გაყიდვაში.